Hna Amele Së Tune Kaa Hnene La Meci Iesu?

Pine la hna tha idrei hnene la lue pane atr, traqa ha koi së, la ngazo, me akötr, me mec.a Ngo tha luzi kö la atr. Ke hnei Iehova hna aijijëne la Nekö i Nyidrë Iesu, troa mec thatraqai së, matre thepe së qa ngöne la ngazo me mec. Tusi Hmitrötr a qaja ka hape, hnene la meci Iesu hna aijijëne la thupene mel. Ame la thupene mel, ke ketre mani matre troa nue la hna akalabusin. Ame hi lai thupene hnei Iesu hna hamën, ke ene la mele i nyidrë ka pexej. (E jë la Mataio 20:28.) Maine ju ke, ijiji Iesu hi troa mel epine palua e celë fen, ngo hnei nyidrë hna hamëne la mele i nyidrë matre tro hmaca së a kapa lo mel hnei Adramu me Eva hna aluzin. Kola amamane la etrune la ihnimi Iehova me Iesu koi së. Tro la mekene celë a akökötrene la hni ne ole së kowe la hnei Iesu hna kuca koi së.

1. Matre nemene la thangane la meci Iesu koi së qane enehila?

Pine laka itre atr ka ngazo së, tro palahi së lai a kuca la itre ewekë ka tha amadrinë Iehova. Ngo ijije hi tro sa imelekeu me Akötresie, e tro sa ietrane la itre ngazo së, me sipo Nyidrë troa nue la itre ngazo së jëne Iesu Keriso, me kuca asë la hne së hna atreine matre tha tro hmaca kö së a tria. (1 Ioane 2:1) Öni Tusi Hmitrötr ka hape: “Ke aca meci hi Keriso thatraqane la nöjei ngazo asë, hna meci hnene la ca atre ka meköt thatraqane la nöjei ka tha meköti kö, matre xometrongë nyipunie koi Akötresie.”—1 Peteru 3:18.

2. Nemene la thangane la meci Iesu koi së kowe la itre drai ka troa traqa?

Hnei Iehova hna upe la nekö i Nyidrë Iesu a tro e celë fen matre troa hamëne la mele i nyidrë ka pexej “matre tha tro kö a meci la atre amamane la lapaune i angeic [koi Iesu], ngo tro pe a hetrenyi la mele ka pë pun.” (Ioane 3:16) Nge jëne la hnei Iesu hna hamëne la mele i nyidrë, tro hë Iehova a apatrene la ngazo qa ngöne la tha idrei i Adramu. Matre, maine tro sa lapaune kowe la thupene mel, ijije hmaca ha tro sa mel e celë fen ngöne la paradraiso utihë epine palua!—Isaia 65:21-23.

TROA CE ITHANATAN

3. Meci Iesu a thepe së qa ngöne la ngazo me mec

VIDEO: Hnauëne La Iesu a Mec?—Götrane 1 (2:01)

• Nemene la hnei Adramu hna aluzin pine la tha idrei angeic?

E jë la Roma 5:12, nge ce ithanatane jë cahu hnying:

• Nemene hë la thangane la ngazo i Adramu koi së?

E jë la Ioane 3:16, nge ce ithanatane jë cahu hnying:

• Pine nemene matre hnei Iehova hna upe la Nekö i Nyidrë kowe la fen?

1. Ka pexeje Adramu ekö, ngo ame la kola traqa la ngazo me meci koi së, ke hnene la tha idrei angeic

2. Ame Iesu atr ka pexej. Jëne la idrengethenge i nyidrë easa mejiun ka hape, tro ha thepe së qa ngöne la ngazo, nge tro sa hetrenyi la mele ka pë pun

4. Hnei Iesu hna mec thatraqane la nöjei atr asë

VIDEO: Hnauëne La Iesu a Mec?—Götrane 2 (2:00)

• Troa amelene tune kaa la nöjei atr asë hnene la mec ne la ala cas?

E jë la 1 Timoteo 2:5, 6, nge ce ithanatane jë cahu hnying:

• Ka pexeje Adramu ekö, ngo pine la ngazo i angeic, ngazo me mec la pune kowe la atr. Pine nemene matre qaja jë së ka hape, “ka ihmeku” la thupene mel memine la mel hnei Iesu hna huujën, nge nemene la hna troa aijijëne hnene lai?

5. Ame la thupene mel ke, ahnahna i Iehova fe koi epun

Ame la easa trotrohnine ka hape, ame la thupene mel ke ahnahna i Iehova koi së, ke celë hi ka easenyi së catre koi Nyidrë. E jë la Galatia 2:20, nge ce ithanatane jë cahu hnying:

• Nemene la ka amamane ka hape, ame koi Paulo ketre ahnahna koi nyidrë la thupene mel?

Thupene la hnei Adramu hna ngazo, traqa ha koi angeice me itre matra i angeic la mec. Ngo hnei Iehova hna hamëne la mele ne la Nekö i Nyidrë matre aijijë së troa mel epine palua.

Ame la epuni a e la itre xötr, mekune ju la aqane akötre Iehova la Nyidrëti a goeëne la Nekö i Nyidrë e akötr. E jë la Ioane 19:1-7, 16-18, nge ce ithanatane jë cahu hnying:

• Ame la epuni a mekun la hnei Iehova me Iesu hna kuca koi epun, nemene la ka ketri epun?

HANE HI LA HNE SË HNA CE WANG

Jëne la meci Iesu ijije hë tro Iehova a nue la itre ngazo së, nge hetrenyi hë së la mejiune kowe la mel ka pë pun.

Nyine Amekunën

• Hnauëne la Iesu a mec?

• Pine nemene matre Tusi Hmitrötr a qaja ka hape, ame la mele i Iesu ke, ka ihmeku hi memine la thupene mel?

• Nemene la thangane koi epun la meci Iesu?

ITRE XAA NYINE WANG

Pine nemene matre qaja jë së ka hape, ame la mele i Iesu ka pexej ke, thupene mel?

“En quel sens le sacrifice de Jésus est-il ‘une rançon pour beaucoup’ ?” (Itus jw.org)

Tro hi sa lapaune koi Iesu, nge mele hë së?

“Jésus sauve : comment ?” (Itus jw.org)

Iehova kö a nue la itre ngazo ka tru?

“Kola Sa Hnei Tusi Hmitrötr” (Ita Ne Thup 1 Julai 2013)

Hnene la meci Iesu hna xatuane la ketre trahmanyi troa saze la pengöi angeic

“Je ne suis plus esclave de la violence” (Itus jw.org)