Catre Jë Xomi Ini Qa Ngöne La Itre Ini Ka Tru Ne La Tusi Hmitrötr!

1. Nemene la thangane la itre ini hnei eö hna kapa lo eö a xötrei ini Tusi Hmitrötr?

HNA saze la mele së hnene la itre ini hne së hna kapa lo easa xötrei ini Tusi Hmitrötr. Ame la easa atre la ëje i Iehova Akötresie, ke hna aeasenyi së koi Nyidrë. Nge itre sinee i Nyidrëti hë së enehila. (Isa. 42:8) Ame la easa atre la nyipici göne la itre ka mec, ke xecie hë koi së ka hape, ame la itre sinee së ka mec, ke tha angatr kö a akötr. (A. Cai. 9:​10) Nge ame la easa atre la itre hna thingehnaean hnei Akötresie göne la ihnadro, ke tha hnehengazo hë së göne la itre drai elany. Xecie hë koi së laka, tha tro hmaca kö sa mel koi 70 maine 80 lao macatre, ngo utihë epine palua.​—Sal. 37:29; 90:10.

2. Nemene la ka amaman ngöne 2 Peteru 1:​12, 13 ka hape, loi e tro la itre keresiano ka macaj a xomi ini qa ngöne la itre ini ka tru?

² Tha tro pi kö sa wangacone la enyipiewekëne la itre ini ka tru. Hnei Peteru aposetolo hna cinyianyine la hnaaluene tusi angeic kowe la itre keresiano ka ‘catre hnyawa ha ngöne la nyipici.’ (E jë la 2 Peteru 1:​12, 13.) Ngo ame ngöne la ijine cili, hetrenyi la itre ka iamenumenu me itre atr ka pë metrötr koi Akötresie hnine la ekalesia. (2 Pet. 2:​1-3) Hnei Peteru hna amexeje kowe la itre trejin cili la itre ini hnei angatr hna atre hë, matre troa xatua angatr troa cile catr qëmekene la itre jol. Itre ini lai ka troa xatua angatr troa mele nyipici uti hë la pun.

3. Pine nemene matre loi e tro pala hi la itre keresiano a lapa mekun la itre ini ka tru? Qaja jë la ketre ceitun.

³ Atreine hi la itre keresiano ka macaj xom la itre ini ka hnyipixe qa ngöne la itre ini ka tru. Tro sa xome la ketre ceitun: Pane mekune jë laka, ketre thin me nekö i eahlo jajiny a isa hnëkë suup. Ngo tro kö a hnyapa catr la suup i thin, ke majemine hë eahlo kuci suup. Ketre tun, maine ekö hë së nyihlue i Iehova, öhne hi së la itre xaa ini qa ngöne la itre ini ka tru. Tha ceitune kö memine la itre ka xötrei ini Tusi Hmitrötr. Maine jë, qaane lo easa xomi bapataiso, saze hë la mele së, nge hetre itre xaa hnëqa së ngöne la organizasio i Iehova. Ame la easa lapa mekun la itre ini hne së hna kapa ekö, atreine hi së waiewekën la aqane tro sa trongën itre ej ngöne la mele së enehila, me xom la itre xaa ini ka hnyipixe. Tro sa ce wang la itre xaa ini nyine tro la itre keresiano ka macaj a kapa, qa ngöne la köni ini ka tru.

IEHOVA LA ATRE XUP

4. Tune kaa së la easa atre ka hape, Iehova la Atre Xupi së?

⁴ Atre hi së laka, hna xup la ihnadro me itre ka mel asë hnene la Atre Xup ka inamacan me ka trene men. Öni Tusi Hmitrötr, “Akötresie la atre xupe la nöjei ewekë asë.” (Heb. 3:4) Ngo hetre itre xaa ini kö nyine tro sa xom qa ngöne la nyipici cili. Pine laka, Nyidrëti la Atre Xupi së, atrepengö së hnyawa hi hnei Nyidrë. Ketre, Nyidrëti a hnehengazo së, nge atre kö Nyidrë la ka loi koi së. Qaane lo easa atre laka, Iehova la Atre Xupi së, ke saze hë la mele së, nge hetre aliene hë.

5. Nemene la nyipici ka xatua së troa ipië? (Isaia 45:​9-​12)

⁵ Ame la easa atre ka hape, Iehova la Atre Xup, ke kola xatua së troa ipië. Tro sa ce wang la hna melën hnei Iobu. Angeice hi a meku angeic, me wangatrune la hna qaja hnei itre atr. Ngo hnei Iehova hna amekunë angeic laka, Nyidrëti la Atre Xup ka tru trenge men. (Iobu 38:​1-4) Jëne lai, Nyidrëti a xatua angeic troa trotrohnine laka, ka draië catre kö la aqane ujë i Nyidrë hune la itre atr. Kola anyipicine lai hnei Isaia perofeta ka hape: “Hapeu, tro kö la dro ka fedr a qaja kowe la Atre Xupi Inege ka hape: ‘Nyipëti a kuci nemen?’ ”​—E jë la Isaia 45:​9-​12.

6. Eu la tro sa lapa mekune la inamacane me edraië i Iehova? (Wange ju fe la itre foto.)

⁶ Pine laka, ekö hë së nyihlue i Iehova, matre ame itre xaa ijin, tro sa mejiune kowe la aqane waiewekë së hune la itre eamo i Iehova ka mama ngöne la Tusi Hmitrötr. (Iobu 37:​23, 24) Ngo nemene la thangan e tro sa lapa mekune la inamacane me edraië i Iehova? (Isa. 40:22; 55:​8, 9) Tro së lai a ipië me trotrohnine laka, ka nyipiewekë catre kö la itre mekuna i Iehova.

7. Nemene la hna kuca hnei Rahela matre kapa hnyawa la ketre hna amekötin ka hnyipixe?

⁷ Hnei Rahela, ka mel e Slovénie, hna kapa hnyawa la ketre hna amekötin ka hnyipixe, la angeic a mekun hmaca ka hape, Iehova la Atre Xup. Öni angeic: “Ame itre xaa ijin, jole koi ni troa kapa la itre mekun hna xom hnene la itre trejin ka iuji së. Ame la eni a goeëne lo video 2023 Maca Ka Hnyipixe Qaathene La Lapa Ne Xomi Meköt 8, jole pi kö ni la eni a öhne la ketre trejin trahmany ka hna ienaj, a cile fë cainöj. Matre hnenge hna sipo Iehova troa xatua ni.” Hnei Rahela hna trotrohnin e thupen ka hape, atre kö Iehova la aqane troa iujine la organizasio, ke Nyidrë la Atre Xup la hnengödrai me ihnadro. Maine jole koi eö troa kapa la ketre ini maine hna amekötin ka hnyipixe, lapa mekune jë la edraiëne la inamacan me mene i Iehova.​—Roma 11:​33-​36.

HNAUËNE LA AKÖTRESIE A NUE LA ITRE AKÖTR

8. Nemene la thangan, la easa trotrohnine la kepin matre Akötresie a nue la itre atr troa akötr?

⁸ Hnauëne la Akötresie a nue la itre atr troa akötr? Thatre kö la itre xan, matre angatr a elëhni koi Akötresie, maine mekun pena ka hape, pëkö Akötresie! (It. Ed. 19:3) Ngo ame së, atre hi së ka hape, hnene la ngazo matre kola akötr la itre atr, ngo tha zö i Iehova kö. Hne së fe hna inin laka, hnene la xomihni i Iehova hna aijijëne la itre milio lao atr troa atrepengöi Nyidrë, me trotrohnine laka, tro kö Nyidrëti a apatrene palua la itre akötr elany. (2 Pet. 3:​9, 15) Hna akeukawane la hni së hnene la itre nyipici cili me aeasenyi së koi Nyidrë.

9. Eu la tro sa mekun la itre kepin matre Iehova a nue la itre atr a akötr?

⁹ Easa trotrohnine laka, nyipiewekë tro sa treqene la ijine tro Iehova a apatrene la itre akötr. Ngo ame la kola mec la ketre sinee së, maine kola traqa la itre jol koi së maine kowe la fami së, maine kola qanangazo së pena, tro së lai a mekun ka hape, hmiitr pala ha Iehova. (Habak. 1:​2, 3) Ame e cili, loi e tro sa lapa mekun la itre kepin matre Iehova a nue la itre ka meköt kowe la itupath.a (Sal. 34:19) Loi e tro fe sa mekun laka, aja i Iehova troa apatrene palua la akötr, me lapa mekun la hnei Nyidrëti hna troa kuca elany.

10. Nemene la ka aupunyi Anne thupene la kola mec hnene la thine i angeic?

¹⁰ Ame la easa atre la kepin matre Akötresie a nue la akötr, ke kola xatua së troa xomihni. Öni Anne, ka mel e Mayotte, ketre hnapet ngöne la océan Indien ka hape: “Hleuhleu catre ni qaane lo kola mec hnei nenë, a ije macatre hë la. Ngo hnenge pala hi hna mekun laka, tha zöi Iehova kö la itre akötre së. Tru la aja i Nyidrë troa apatrene la itre akötr, me amelene hmaca la itre sinee së. Ame la eni a lapa mekun la itre ini cili, kola tingeting la hning. Thatreine kö ni mekun la emingömingöne la tingeting cili!”

11. Pine nemene matre kola uku së troa cainöj, la easa atre la itre kepin matre Iehova a nue la itre akötr?

¹¹ Ame la easa atre la itre kepin matre Iehova a nue la itre akötr, ke kola uku së troa catre cainöj. Hnei Peteru hna qaja ka hape, jëne la xomihni i Iehova, ijije hi tro la itre ka ietra a mel. E thupen, öni angeic: “Isa waipengö i nyipunieti jë, wange ju ka hape, nyipunieti kö la itre atre ka melëne la thiina ka meköt, nge ka kuca la itre huliwa ka nyipici koi Akötresie.” (2 Pet. 3:​11) Ame la ketre “huliwa ka nyipici koi Akötresie,” ke ene la huliwa ne cainöj. Tui Iehova, easa hnim la itre atr, nge aja së tro angatr a hane mel ngöne la fene ka hnyipixe hna haöth hnene la meköt. Pane mekune jë: Hnene la xomihni Iehova hna aijijëne la itre atr ne la teritoare së troa nyihlue i Nyidrë. Nge manathithi lai koi së troa ce huliwa me Nyidrë, me xatuane la itre atr troa atre Nyidrë qëmekene troa nyipune la fen!​—1 Kor. 3:9.

EASA MELËN “LA ITRE DRAI NE LA PUN”

12. Nemene la ka xecie koi së qaane lo easa atre la hna qaja hnei Tusi Hmitrötr göne “la itre drai ne la pun”?

¹² Hnei Tusi Hmitrötr hna qejepengöne hnyawane la aqane ujë ne la itre atr “ngöne la itre drai ne la pun.” (2 Tim. 3:​1-5) Tro hi sa goeën xötreithi së matre öhne laka, eje hnyawa hi la hna qaja hnei Tusi Hmitrötr. Tha fene ngazo kö la aqane ujë ne la itre atr. Kolo hi lai a amamane koi së ka hape, ka nyipici pala hi la Trengewekë i Akötresie.​—2 Tim. 3:​13-​15.

13. Thenge la ceitune i Iesu ngöne Luka 12:​15-​21, nemene la nyine tro sa isa hnyingën?

¹³ Ame la easa atre ka hape, easa melëne la itre drai ne la pun, ke kola upi së troa amë panëne la ka nyipiewekë. Tro sa xomi ini qa ngöne la ceitune i Iesu ngöne Luka 12:​15-​21. (E jë) göne la enyipiewekëne tro pala hi a catre cainöj. Hnauëne la kola jele ‘hmone’ lai atre trenamo? Tha hnene kö laka, ka trene mani angeic, ngo hnene laka, tha hnei angeice kö hna amë panëne la ka nyipiewekë. Hnei angeic hna “thele ewekë koi angeice kö, ngo ka pë ewekë koi Akötresie.” Pine nemene matre nyipiewekë tro angeic a canga saze? Öni Akötresie: “Kola sipone la mele i eö ngöne la jidri celë.” Easenyi catre hë la pune la fene celë, matre loi e tro sa isa hnying ka hape: ‘Kolo kö a mama ngöne la itre objectifeng laka, eni a amë panëne la ka nyipiewekë? Nge eni kö a ukune la haaneköng kowe la itre objectif ka loi? Eni kö a nue la trengecatreng, me traemeng, me itre mong matre tro ni a trenamo, maine troa hetre mo e hnengödrai?’

14. Tui Miki, hnauëne laka, nyipiewekë tro sa lapa mekun la itre hatrene laka, easa melëne la itre drai ne la pun?

¹⁴ Ame la easa lapa mekun la itre hatrene laka, easa melëne la itre drai ne la pun, ke kola saze la aqane waiewekë së. Celë hi la ka traqa koi Miki, ketre trejin föe. Öni angeic: “Ame la eni a ase ini ngöne lycée, hnenge hna mekun troa xom la ketre huliwa ka waipengöne la itre öni. Ngo aja i eni fe troa xom la huliwa ne pionie, me cainöj ngöne la itre götrane ka aja ixatua. Hnene la itre trejin ka macaj, hna ithuecatre koi ni troa mekune hnyawane la hnenge hna troa kuca, me hnying ka hape, ka inamacane kö troa ce xome la ini aqeanyi me thele troa pionie. Hnei angatr hna amexej koi ni laka, easenyi hë la pun la fene celë, nge ame ngöne la fene ka hnyipixe, pëhë ka troa sewe ni troa waipengön la nöjei öni hnenge hna ajan. Matre hnenge hna iëne la ketre ini ka aijijë ni troa canga hetre huliwa. E thupen, hnenge hë hna öhne la ketre huliwa ka aijijë ni troa pionie lapa, me fek a tro Équateur, ketre götran ka aja ixatua.” Ame enehila, Miki me föi angeic a huliwa ngöne la sirkoskripsio e Équateur.

15. Hapeu, ijije kö tro la itre atr a saze me kapa la maca ka loi? Qaja jë la ketre ceitun. (Wange ju fe la itre foto.)

¹⁵ Tha tro pi kö sa kucakuca e xele kö la itre atr ma drei së. Ijije hi tro angatr a saze. Pane mekune jë la tulu i Iakobo, lo trejin me Iesu. Hnei angeic hna öhne la mama i angeic e tru utihë la nyidrëti a Mesia. Goi öhne fe angeic la aqane hamë ini i nyidrë. Ngo tha hnei angeice kö hna xötrethenge nyidrë. Kolo hi lo thupene melehmaca i Iesu, la Iakobo a nyiqane xötrethenge nyidrë. Iakobo la ketre atre dreng ka catre cainöj!b (Ioa. 7:5; Gal. 2:9) Haawe, catre jë kö cainöj kowe la itre sinee i eö me itre atr ka tha kapa pala kö la maca. The thëthëhmine kö laka, easë hë la ngöne la itre drai ne la pun, matre huliwa ka sisitria la huliwa ne cainöj. Ame la hnei eö hna qaja enehila koi angatr, ke maine jë, tro lai a ketri angatr e thupen, maine amele angatre pena la kola nyiqane la akötr atraqatr.c

OLENE JË KOI IEHOVA LA ITRE INI I NYIDRË

16. Nemene la itre thangane hnei eö hna kapa qa ngöne la itre ini i Iehova? (Wange ju la hna eköhagen “Huliwane Jë Itre Ej Matre Xatua Itre Xan.”)

¹⁶ Ame la itre xaa itusi së, ke thatraqane la itre atre ne fen, itre ka thatre la itre ini qa hnine la Tusi Hmitrötr. Ka tune la cainöj hna cile fë ngöne la icasikeu ne pune wiik, me itre tane mekun me video ka mama ngöne jw.org, memine la itre zonal hne së hna tro fë. Ngo thatraqai easë mina fe lai. Ame la itre ini cili hna hamën, ke kola akökötrene la ihnimi së koi Iehova, me acatrene la lapaune së kowe la Tusi Hmitrötr. Kolo fe a xatua së troa maca ngöne la easa hamëne la itre ini ne la Tusi Hmitrötr.​—Sal. 19:7.

17. Eu la tro sa lapa mekun la itre ini ka tru qa hnine la Tusi Hmitrötr?

¹⁷ Ame easë itre hlue i Iehova, easa madrin la kola mama la ketre ini ka hnyipixe. Ngo easë pala hi a olene koi Iehova la itre ini ka tru ne la Tusi Hmitrötr ka ee së koi Nyidrë. Maine easa catrefë mekun me xele ma kapa la ketre hna amekötin hnei organizasio, the thëthëhmine kö laka, ame la ka iujine la organizasio, ke Iehova lo Atre Xup ka inamacan me ka trene men. Ame la easë maine ketre sinee së a cile kowe la itre jol, loi e tro sa atreine itreqe me lapa mekun la itre kepin, matre Iehova a nue la itre akötr. Nge qëmekene troa xomi mekun göne la aqane tro sa huliwane la traeme së me itre hne së hna hetreny, mekune ju laka, easë hë ngöne la itre drai ne la pun, nge enehila hi la tro sa catre cainöj. Epi tro la itre ini i Iehova a ainamacanë së, me ithuecatre koi së, me uku së troa catre huliwa.