Hnei Eö Kö Hna “Inine” Troa Melën La Hna Hetreny?

1. Kola hapeu la troa melën la hna hetreny?

KA MADRINE kö eö kowe la hnei eö hna hetreny? Tru la madrin, me tingetinge ne la atr ka melëne la hnei angeic hna hetreny, ke angeic a goeëne catrëne la itre manathith hnei angeic hna kapa. Tha angeic kö a wesitr, ke hetre ka pë thei angeic. Ame la atr ka melën la hnei angeic hna hetreny, ke tha kolo kö lai a hape, tha angeic kö a hane hnehengazo. Tune la ketre trejin ka thele troa catre huliwa koi Iehova. (Roma 12:1; 1 Tim. 3:1) Ame la trejin ka melën la hnei angeic hna hetreny, ke tro angeic lai a madrin, ngacama tha canga kapa kö angeic la itre hnëqa hna pi xom.

2. Pine nemen matre ka ngazo catr la troa tha melën la hna hetreny?

² Ka ngazo catr, e thatreine kö së melën la hna hetreny. E cili, tro së lai a huliwa mec, matre itöne la itre ewekë ka tha nyipiewekë kö. Ngazo pe, hnene la itre xaa keresiano hna atrekënö mani maine itre ewekë hnei angatr hna ajan. Maine jë hnei angatre hna qaja ka hape, ‘Ke ewekëng kö la,’ ‘Ijine hi tro hna xom,’ maine ‘Tro pë hë ni a të e thupen.’ Ngo tha madrine kö Iehova, nge kola thaipië Nyidrë la easa atrekënö. (It. Ed. 30:9) Ame la itre xan, hnei angatr hna trotriji Iehova, ke pë pala kö hnëqa i angatr ngöne la ekalesia. (Gal. 6:9) Pine nemen matre traqa jë lai kowe la ketre hlue i Iehova? Pine laka, tha hnei angeic kö hna melën la hnei angeic hna hetreny.

3. Nemene la trenge nyipici hna qaja ngöne Filipi 4:​11, 12?

³ Ijiji easë asë hi troa melëne la hna hetreny. Öni Paulo aposetolo: “Ngöne la nöjei götran asë, hnenge hna inine troa melëne la hna hetreny.” (E jë la Filipi 4:​11, 12.) Paulo a cinyianyine la itre trengewekë celë qa ngöne la kalabus. Ngo ka madrine pala hi angeic. Hnei angeic hna “inine la hna atre hnene la ala xalaith” ene la troa melën la hna hetreny. Maine jole koi së troa melëne la hna hetreny, tro la hna qaja me hna melën hnei Paulo a akeukawanyi së ka hape, ijiji së fe troa hane melën la hna hetreny. Ngo hetre nyine tro sa kuca. Tro sa inin troa melën la hne së hna hetreny. Troa tune kaa?

TROA HETRE HNI NE OLE

4. Tro la hni ne ole a xatua së tune kaa troa melën la hne së hna hetreny? (1 Thesalonika 5:​18)

⁴ Ame la hni ne ole, ke kola akökötrene la aja troa melën la hna hetreny. (E jë la 1 Thesalonika 5:​18.) Maine tro sa hetre hni ne ole kowe la hne së hna hetreny, tha tro kö së lai a mekune lapan la ka pë the së. Nge maine tro sa kapa hnyawan la itre hnëqa së enehila, ke tro së lai a isine troa eatren itre ej, hune la troa thele troa hetre xaa hnëqa. Matre tha sesëkötre kö së la Tusi Hmitrötr a ithuecatr koi së, troa amamane la hni ne ole së koi Iehova ngöne la thith. E ka tru la hni ne ole së, ke “tro ha thupëne la itre hni me mekuna i [easë] hnene la tingetinge qaathei Akötresie.”​—Fil. 4:​6, 7.

5. Maine ju, nemene la itre kepin ka troa ukune la angetre Isaraela troa hetre hni ne ole? (Wange ju fe la foto.)

⁵ Pane mekune jë la ka traqa kowe la angetre Isaraela. Anyimua eetr angatr koi Iehova, pine la itre xen ka hetrenyi ekö e Aigupito. (Num. 11:​4-6) Nyipici laka, ka jole catr la mel ngöne la hnapapa. Ngo nemene la ka troa xatua angatr troa melën la hna hetreny? Troa lapa mekun me amamane la hni ne ole i angatr kowe la hnei Iehova hna kuca koi angatr. Ame lo kola thaluë angatr e Aigupito, hnei Iehova hna lep la nöj hnene la 10 lao akötr. Thupene la hna nue angatr qa Aigupito, hnei angatr hna “eöth asë la itre mo i angetre Aigupito” ene la itre ewekë sileva me gool, me itre iheetr. (Eso. 12:​35, 36) Ame la angatr a traqa qëmeken la Hnagejë Ka Palulu, hnei Iehova hna thawaluën ej. Nge ame ngöne la hnapapa, hnei Iehova hna thua i angatr mana e nöjei drai. Nga hnauëne kö la angatr a eetr? Tha hnei hna pë xeni kö, ngo pëkö ca hnine ole i angatr kowe la itre hnei Iehova hna hamën koi angatr.

6. Nemene la ka troa xatua së troa hetre hni ne ole?

⁶ Nemene la ka troa xatua eö troa hetre hni ne ole? Hnapan, xomi ijine jë troa lapa mekun e nöj drai la itre ewekë ka amadrinë eö ngöne la mele i eö. Makëne jë la luetre maine köni ewekë ka uku eö troa hetre hni ne ole. (It. t. Iere. 3:​22, 23) Hnaaluen, amamane jë la hni ne ole i eö. Olene jë koi itre xan la hnei angatr hna kuca koi eö. Ngo the thëthëhmine pi kö troa olene lapan koi Iehova. (Sal. 75:1) Hnaakönin, iëne jë la itre sinee ka hetre hni ne ole. Ka ixötrekeu la troa hetre hni ne ole, me pë hni ne ole. (Dreut. 1:​26-​28; 2 Tim. 3:​1, 2, 5) Maine tro pala hi sa thele ijine troa amamane la hni ne ole së, ke tha tro kö a löthi së hnene la pë hni ne ole.

7. Nemene la ka xatua Aci troa melën la hna hetreny?

⁷ Tro sa ce wange la ka traqa koi Aci, ketre trejin föe ka mele e Indonésie. Öni angeic: “Ame lo ijine COVID-19, hnenge hna lapa goeëne la aqane mel ne la itre trejin. Ame la pun, tha madrine hë ni.” (Gal. 6:4) Nemene la ka xatua Aci troa saze la aqane waiewekë i angeic? Öni Aci: “Hnenge hna nyiqane lapa mekun la itre manathith hnenge hna kapa e nöjei drai, me itre ewekë ka lolo hnenge hna kapa qane lo eni sine la organizasio i Iehova. Nge hnenge pala hi hna amamane la hni ne oleng koi Iehova. Ame la thangane lai, ke atreine hë ni melën la hna hetreny.” E traqa ju la itre mekun ka ngazo koi eö, hane jë tui Aci matre troa hetre hni ne ole.

TROA AMË PANËN LA KA NYIPIEWEKË ME IPIË

8. Nemene la ka traqa koi Baruka?

⁸ Hnei Baruka, sekreter i perofeta Ieremia hna nyiqane eetr göne la aqane mele i angeic. Hnëqa i Ieremia troa tro fë la ketre maca ka catr, kowe la nöj ka pë hni ne ole. Hnëqa i Baruka troa xatua Ieremia, nge tha ka hmaloi kö. Ngazo pe, tha hnei Baruka kö hna amë panëne la hnëqa i angeic. Tha hnei angeic kö hna mekun la hnëqa hnei Iehova hna athip koi angeic, hnei angeic pe hna nyiqane meku angeic hi me aja i angeic. Jëne Ieremia, öni Iehova koi angeic: “Eö a thele thatraqai ö la itre ewekë ka tru. Loi ju hë hna thele la itre ewekë cili.” (Iere. 45:​3-5) Kösë kola hape: “Melëne ju hi la hnei eö hna hetreny.” Hnei Baruka hna kapa la eamo i Iehova, me catre nyisinee i Nyidrë.

9. Thenge la 1 Korinito 4:​6, 7, troa xatua së tune kaa hnene la ipië? (Wange ju fe la foto.)

⁹ Canga tro hi a mekun hnene la ketre trejin ka hape, meköt tro angeic a kapa la ketre hnëqa. Maine jë ka inamacane angeic, ka catre huliwa, maine ka hekö hë angeic ngöne la nyipici. Ngazo pe, hna hamëne koi ketre la hnëqa hnei angeic hna ajan. Nemene la nyine tro angeic a mekun e cili? Loi e tro angeic a lapa mekun la hna qaja hnei Paulo ngöne 1 Korinito 4:​6, 7. (E jë.) Ame asë hi la itre hnëqa së me talan së, ke qaathei Iehova. Itre hatren ne la ihnimi gufa i Iehova lai koi së. Tha hnene kö laka, hetre hne së hna kuca matre hetrenyi jë së la itre ewekë cili.​—Roma 12:​3, 6; Efe. 2:​8, 9.

10. Tune kaa la aqane tro sa huliwane la ipië?

¹⁰ Ijije hi tro sa ipië, e tro sa mekun la tulu i Iesu. Hnei nyidrëti hna wasine la waca ne la itre aposetolo, lo jidr qëmeken tro nyidrëti a mec. Öni Ioane aposetolo: “Atre hi Iesu ka hape, [1] hnei Keme i nyidrë hna amë la nöjei ewekë ngöne la lue ihnatrapaime i nyidrë, nge [2] hna upi nyidrë hnei Akötresie, [3] matre nyidrëti a bëeke hmaca koi Akötresie . . . me wasine la lue waca ne la itretre dreng.” (Ioa. 13:​3-5) Maine ju, tro hi Iesu a musinë angatr troa wasine la lue ca i nyidrë. Ngo tha ase pi kö nyidrëti mekune ka hape, pine laka, Nekö i Akötresieti nyidrë, tro nyidrëti a hetre hnalapa ka lolo, me trenamo, me hetre mel ka loi. (Luka 9:​58) Ka ipië nyidrë, nge nyidrëti hi a melën la hna hetreny. Ketre tulu lai ka lolo koi së.​—Ioa. 13:15.

11. Hna xatua Dennis tune kaa hnene la ipië matre melën la hna hetreny?

¹¹ Dennis, ketre trejin qa Pays-Bas a thele troa xötrethenge la tulu ne ipië i Iesu, ngacama tha ka hmaloi kö. Öni angeic: “Ame itre xaa ijin, eni a dreng la itine pi tru me piin thei eni, la kola hamë hnëqa kowe la ketre trejin. E cili, eni a canga inine hmaca la aqane troa ipië. Ame ngöne JW Library^®, hnenge hna xawan la itre xötr ka qeje ipië, matre tro hi ni a canga öhne me e. Hnenge fe hna téléchargé ngöne telefon la itre cainöj ka qeje ipiëa me drenge lapan. Eni a trotrohnine e cili ka hape, ame la itre hne së hna kuca koi Iehova, ke nyine atrunyi Nyidrë, ngo tha easë kö. Iehova a isa hamë hnëqa së, ngo Nyidrëti kö la ka eatrëne la aja i Nyidrë.” Ame la eö a nyiqane hleuhleu, ke tha hnei eö kö hna kapa la ketre hnëqa, thele jë troa huliwane la ipië. Aqane tro hi eö lai a acatrene la imelekeu i eö me Iehova, me melën la hna hetreny.​—Iako. 4:​6, 8.

TROA LAPA MEKUNE LA MEJIUNE SË

12. Tro la mejiune së a xatua së tune kaa troa melën la hna hetreny? (Isaia 65:​21-​25)

¹² Tro sa atreine melën la hna hetreny, e tro sa lapa mekune la mele së elany. Atre hnyawa hi Iehova laka, tru la itre ejolene la mele së enehila, nge Nyidrëti a thingehnaean troa apatren asë itre ej. Celë hi ka mama ngöne la hna qaja hnei Isaia perofeta. (E jë la Isaia 65:​21-​25.) Tro sa mele tingeting ngöne la itre hnalapa ka lolo. Nge tro sa madrin ngöne la itre huliwa së, me mej hnene la xen ka lolo. Ketre, tha tro hmaca kö sa seseu koi së me itre nekö së. (Isa. 32:​17, 18; Ezek. 34:25) Eje hi, mingöming me lolo la mele së elany.

13. Eu la itre ijin tro sa goeëne catrëne la mejiune së?

¹³ Enehila hi la ijine tro sa goeëne catrëne la mejiune së. Pine nemen? Pine laka, easa melën “la itre drai ne la pun” nge easë asë hi hnine la itre jol “hna thatreine xomihnin.” (2 Tim. 3:1) Iehova a xatua së e nöjei drai troa cile catr, jëne la itre eamo, me trengecatre i Nyidrë. (Sal. 145:14) Ketre ame ngöne la itre ijine jol, tro la mejiune së a akeukawanyi së. Maine jë jole koi eö troa thupëne la fami eö. Kolo kö lai a hape, tro pala pëhë eö lai a pë ewekë? Waea! Ase hë Iehova qaja ka hape, tro kö Nyidrëti a hamë eö la ka ijij, nge tru catre hmaca kö elany ngöne la paradraiso. (Sal. 9:​18; 72:​12-​14) Maine jë hetre sine meci eö, maine depresio, maine mec ka pë nyine pena. Hapeu, ka pë hnyawa ha nyine lai? Waea. Tro ha apatrene la itre sine mec, me mec ngöne la fen ka hnyipixe. (Hna. Am. 21:​3, 4) Tro la mejiune së a xatua së troa melën la hne së hna hetreny enehila, nge tha tro kö sa elëhni me hleuhleu. Ijije hi tro sa madrine me tingeting, ngacama hna ngazo koi së, maine hna mecitriji së maine itre xaa jole pena. Pine nemen? Pine laka, atre hi së ka hape, ame la itre jole së ke “ka canga patre hi” nge easenyi catre hë la mele ka loi ngöne la fen ka hnyipixe.​—2 Kor. 4:​17, 18.

14. Tune kaa la aqane tro sa acatrene la mejiune së?

¹⁴ Pine laka, mejiune së a xatua së troa melën la hna hetreny, nyipiewekë tro sa acatren ej. Troa tune kaa? Tune la ketre atr ka ati thulu matre öhne e gaa nany, loi e tro sa kuca la itre ewekë ka troa acatrene la mejiune së, me mama hnyawa koi së la paradraiso. Maine easa xou, ke thatreine kö së afenesine la treu, lapa mekune jë së la mele së elany, laka, pëhë mani, pëhë gufa, me itre ewekë ka tha meköti kö. Maine easa kucakuca, ke tha kapa pala kö së la itre xaa hnëqa, loi e tro sa mekun ka hape, tha ka nyipiewekë kö la itre ewekë cili hune la mele së elany, e pexeje hë së. (1 Tim. 6:​19) Maine jë jole koi së lo xötrei troa mekune la mele së elany hune la mele së enehila. Ngo e thupen, tro hë lai a maca koi së troa goeëne la itre hnei Iehova hna thingehnaean koi elany.

15. Nemene la ini hne së hna xom qa ngöne la hna melën hnei Christa?

¹⁵ Tro sa ce wang la ka traqa koi Christa, föi Dennis lo hna qaja e caha. Hna xatua angeic hnene la mejiune i angeic. Öni angeic: “Hna tithi ni hnene la ketre mec ka agenyine la ngönetreing, matre ame enehila eni pala hi a lapa ikatr me meköle ili. Eni a akötr e nöjei drai. Hnene la droketre hna qaja ka hape, tha tro kö a tro loi la mecing. Ngo canga öninge jë hi, ‘tha ceitune kö la aqane goeëne së me nyidrë, la mele elany.’ Eni a lapa mekun la mejiuneng, nge celë hi ka hamë tingeting koi ni. Ame enehila, tru la akötreng, ngo easenyi hë tro eni a melëne la nyipi mel!”

“AME LA ITRE KA XOUE NYIDRË, THA TRO KÖ ANGATR A PË EWEKË”

16. Hnauëne la Dravita joxu a qaja ka hape, ame la itre ka xoue Iehova, ke “tha tro kö angatr a pë ewekë”?

¹⁶ Ngacama easa melën la hna hetreny, ngo tro pala hi së lai a cile kowe la itre jol. Hna mec la köni nekö i Dravita joxu. Hna upe zö nyidrë me iaö nyidrë, nge hna wejehuzu nyidrë ngöne itre macatre. Ngacama tru la itre jol ka traqa koi Dravita, öni nyidrë: “Ame la itre ka xoue [Iehova], tha tro kö angatr a pë ewekë.” (Sal. 34:​9, 10) Kola hapeue lai? Xecie kowe la itre hlue i Iehova laka, tha tro kö angatr a hane pë ewekë. (Sal. 145:16) Eje hi, tro pala hi sa cile kowe la itre jol, ngo xecie koi së laka, tro kö Iehova a xatua së troa xomihnin itre ej. Tro hë së lai a tingeting me madrin troa melën la hne së hna hetreny.

17. Pine nemen matre xecie koi eö, troa inin troa melën la hna hetreny?

¹⁷ Aja Iehova tro sa mele madrin. (Sal. 131:​1, 2) Haawe, catre jë së inine troa melën la hne së hna hetreny. Isine jë së tro pala hi a hetre hni ne ole, me amë panëne la ka nyipiewekë, me ipië me lapa mekun la mejiune së. Haawe, tro hë së lai a hape : “Madrine catre ni.”​—Sal. 16:​5, 6.