Aqane Troa Ujë La Kola Qanangazo Së

1-2. Nemene la hna kuca hnene la itre atr la angatr a öhne la itre ewekë ka tha meköti kö, nge nemene la hne së hna isa hnyingën?

TRU catr la itre ewekë ka tha meköti kö ka traqa ngöne la fen. Alanyim la itre atr hna xele ma wang ke, itre ka pë ewekë, maine hnene la hane ngönetrei angatr, maine qëmekei angatr, me itre xaa kepine ju kö. Nge nyimutre la itre atr ka akötr pine la aqane axecië mekun hnene la itre he ne ka tru, me itre ka kuci politik ka aja mani. Easë asë a akötr pine la itre huliwa cili ka tha meköti kö.

² Alanyim la itre atr ka elëhni la angatr a öhne la itre ewekë ka tha meköti kö ngöne la fen. Aja i easë asë troa mel ngöne la fen ka tingeting me meköt. Matre itre atr a thele jëne troa nyinyine la itre jol. Angatre a trofë petisio, maine marche e kuhu gojeny, maine vootëne la itre he ne politik ka mekun troa apatrene la itre huliwa ka tha meköti kö. Ngo ame easë itre keresiano, “tha itre atre ne fene kö” së, matre easa treqene tro la Baselaia i Akötresie a apatrene la itre huliwa ka tha meköti kö. (Ioa. 17:16) Ngo easa akötr maine elëhni la easa öhne la kola qanangazone la ketre atr. Maine jë, easë a isa hnying ka hape: ‘Nemene la nyine tro ni a kuca? Hetre nyine tro kö ni a kuca la kola traqa la itre ewekë cili?’ Qëmekene troa sa la lue hnyinge celë, tro sa ce wang la mekuna i Iehova me Iesu la nyidro a öhne la itre ewekë ka tha meköti kö.

XELE IEHOVA ME IESU MA WANG LA THIINA KA THA MEKÖTI KÖ

3. Hnauëne laka, tha loi kö së la easa öhne la itre ewekë ka tha meköti kö? (Isaia 5:7)

³ Tusi Hmitrötr a amamane la kepine matre tha loi kö së la easa öhne la itre ewekë ka tha meköti kö. Eje hi, hnei Iehova hna xupi së hnaiji Nyidrë, nge Nyidrëti a “hnime la meköt memine la thiina ka meköt.” (Sal. 33:5; Gen. 1:​26) Ka meköti pala hi la aqane ujë i Nyidrë, matre tha aja i Nyidrëti kö tro sa kuca la itre huliwa ka tha meköti kö! (Dreut. 32:​3, 4; Mika 6:8; Zaka. 7:9) Ame ngöne la hneijine Isaia, hnei Iehova hna dreng la angetre Isaraela a “suene la ewekë ka tha meköti kö” ke, kola qanangazo angatr hnene la itre trejin me angatr. (E jë la Isaia 5:7.) Hnei Nyidrë hna amekötine la itre ka lapa ena la wathebo me ngazo thiina koi itre xan.​—Isa. 5:​5, 13.

4. Tune kaa Iesu la kola qanangazone la ketre atr? (Wange ju fe la foto.)

⁴ Ceitu Iesu hi me Iehova, nyidrëti a hnim la meköt, me xele ma wang la itre huliwa ka tha meköti kö. Ame lo ketre drai, nyidrëti a cainöje trootro, nge öhne jë hi nyidrë la ketre trahmanyi ka genyi im. Nemene la hnei Iesu hna kuca? Hnei nyidrë hna utipi angeic, me aloine la ime i angeic. Ngo ame pena la itre he ne hmi, itre ka pë utipin, matre tha nyipiewekë angeice kö hnei angatr. Ka tru kö koi angatr la wathebo göi Sabath, hune la troa xatuane la atr ka adikape. Tune kaa Iesu la nyidrëti a öhne la aqane ujë i angatr? “Hace ju hi la hni i nyidrë pine laka, ka xeti la itre hni i angatr.”​—Mar. 3:​1-6.

5. Nemene la nyine tro sa mekune hnyawan e easa elëhni pine la ketre ewekë ka tha meköti kö?

⁵ Iehova me Iesu a elëhni la nyidro a öhne la itre atr hna qanangazon. Matre tro fe së lai a elëhni la kola qanangazo së maine itre xan. (Efe. 4:​26) The thëthëhmine kö laka, ngacama hetre nyipi kepin matre easa elëhni, ngo tha tro kö lai a nyinyine la jol. Ketre, maine tro sa lapa fë trengehni, tro lai a angazone la ngönetrei së, me ajolëne la mekuna së. (Sal. 37:​1, 8; Iako. 1:20) Haawe, nemene la nyine tro sa kuca e tha ka meköti kö la hna kuca koi së? Tro sa ce wang la tulu i Iesu.

AQANE UJË IESU QËMEKENE LA ITRE EWEKË KA THA MEKÖTI KÖ

6. Nemene la itre ewekë ka tha meköti kö hnei Iesu hna öhn e celë fen? (Wange ju fe la foto.)

⁶ Hnei Iesu hna öhne la itre ewekë ka tha meköti kö lo nyidrëti e celë fen. Hnei nyidrë hna öhne la itre he ne hmi a qanangazone la itre atr. (Mat. 23:​2-4) Nge musi Roma a wajahuj la nöj Iudra. Matre alanyim la angetre Iudra ka xele ma lapa fene la musi Roma. Ame la itre xan e angatr, tune la itre Zélotes ke, tha cile kö angatr troa isi memine la mus. Ngo tha ase kö Iesu nyixölene la itre ka pi saze mus. Ame lo itre atr a thel troa acili nyidrë troa joxu, ke hnei nyidrë hna kötre angatr.​—Ioa. 6:​15.

7-8. Pine nemene matre tha ase kö Iesu thel troa apatrene la itre ewekë ka tha meköti kö? (Ioane 18:36)

⁷ Tha ase kö Iesu lö hnine la politik, matre apatrene la itre ewekë ka tha meköti kö. Pine nemen? Ke atre hi nyidrë laka, tha ijije kö, nge thatreine kö la itre atr troa sipu mus. (Sal. 146:3; Iere. 10:23) Ketre, thatreine kö angatr apatrene la qane la itre jol. Eje hi, hna musinëne la fen hnei Satana Diabolo. Atre ihumuth angeic, nge angeic la ka ukune la itre angela me itre atr troa kuca la itre ewekë ka tha meköti kö. (Ioa. 8:​44; Efe. 2:2) Nge, itre atr ka tha pexeje kö së, matre kuca ju hë së la hne së hna atrein, ngo tha ijiji së kö tro pala hi a kuca la meköt.​—A. Cai. 7:​20.

⁸ Atre hi Iesu laka, tro hmekuje hi la Baselaia i Akötresie a apatrene la qane la itre jol. Celë hi matre, hnei nyidrëti hna nue la traem me trengecatre i nyidrë troa “cainöjëne la maca ka loi ne la Baselaia i Akötresie.” (Luka 8:1) Öni nyidrë kowe la “itre ka ajane catrëne la thiina ka meköt” ka hape, tro kö a apatrene elanyi la itre akötr, me itre ewekë ka tha meköti kö. (Mat. 5:6; Luka 18:​7, 8) Tha musi atre kö la ka troa apatrene la itre ewekë cili, ngo Baselaia i Akötresie. Nge ame la Baselaia cili, ke “tha ka qaa kö celë fen.”​—E jë Ioane 18:36.

NYITIPU IESU JË LA KOLA QANANGAZO SË

9. Pine nemene matre xecie koi eö laka, tro kö la Baselaia i Akötresie a apatrene la itre ewekë ka tha meköti kö?

⁹ Pine laka, easa melëne “itre drai ne la pun,” matre tru catre kö la itre ewekë ka tha meköti kö hne së hna öhn enehila hu Iesu ekö. Ngo casi pala hi la qaane la itre jol, ene Satana me itre atr hna ajojezine hnei angeic. (2 Tim. 3:​1-5, 13; Hna Am. 12:12) Tui Iesu, xecie koi së laka, Baselaia i Akötresie hmekuje hi la ka troa apatrene la qaane la itre jol. Pine laka, easa nyixölene la Baselaia, matre tha easë kö a sine la itre manifestasio, me itre marche göi troa nyinyine la itre jol. Tro sa ce wang la hna melën hnei Stacy.a Qëmekene troa atre la nyipici, hnei Stacy hna majemine ut e kuhu gojenyi matre kuci manifestasio. Ngo angeic a luelu göne la itre thangane la itre huliwa i angeic. Öni angeic: “Ame lo eni a manifestasio, ke eni pala hi a mekun ka hape, ma tha eje kö lai nyin la jol. Ngo ame enehila, eni a nyixölene la Baselaia i Akötresie matre xecie koi ni laka, eje hi la nyin. Atre hi ni laka, ka lolo kö la aqane tro Iehova a isigöline la itre atr ka akötr hung.”​—Sal. 72:​1, 4.

10. Thenge la Mataio 5:​43-​48, hnauëne laka, tha tro kö së a sine la itre gurup ka pi saze mus? (Wange ju fe la foto.)

¹⁰ Ame la itre atr ka sine la itre gurup ka pi saze mus, ke itre ka wathöthöl me ka pi mus. Itre thiina lai ka isazikeu memine la itre thiina i Iesu, me itre ini qaathei nyidrë. (Efe. 4:​31) Öni Jeffrey, ketre trejin trahmany: “Ame la itre manifestasio, ke ka lolo hi lo qaan, ngo tha hlë ju kö së la kola nyiqane isi me atrekënö.” Ngo Iesu pe a upi së troa hnim la nöjei atr, memine fe lo itre ka tha kapa kö la hmi së, me itre ka axösisi së. (E jë la Mataio 5:​43-​48.) Ame easë itre keresiano, easa isine troa xötrethenge la itre thupaca i Iesu.

11. Eu la kola jol koi së troa nyitipu Iesu?

¹¹ Atre hi së laka, tro la Baselaia i Akötresie a apatrene paluane la itre ewekë ka tha meköti kö. Ngo ame la kola akötrë së, jole koi së troa nyitipu Iesu. Hane hi la hna melëne hnei Janiya, ketre trejin me easë. Hna akötrë angeic pine la hane ngönetrei angeic. Öni angeic: “Elëhni catre ni. Eni fe a akötr, nge ajang troa amekötin la itre atre cili. Matre hnenge hna lö hnine la ketre gurup ka isi memine la ixele ma iwai pi hane ngönetrei. Ame koi ni, pëkö engazon, nge tro lai a hetre thangan.” Ngo öhne hi Janiya laka, loi e tro angeic a saze la aqane waiewekë i angeic. Öni angeic, “Hnenge hna nue angatr troa ajojezi ni. Eni ha mejiune kowe la atr, ngo tha koi Iehova kö. Matre hnenge hna trotrij la gurup cili.” Wange pala kö! Ngacama hetre nyipi kepin matre easa wesitr, ngo tha tro kö sa lö hnine la kuci politik, me itre jol ka traqa ngöne la nöj.​—Ioa. 15:19.

12. Pine nemene matre nyipiewekë tro sa thupëne la hne së hna e, me dreng, me goeën?

¹² Tune kaa la aqane tro sa xomihni la kola ngazo thiina koi së? Ame la itre xan, angatr a thupëne la hnei angatr hna e, me dreng, me goeën. Pine nemen? Ame la itre hna qaja ngöne Ëternet, ke kola jele la trengehni ne la itre atr, me uku angatr troa cil kowe la mus. Ketre, ame lo itre ka hamë nuvel, ke angatr a qaja la sipu mekuna i angatr, ngo tha eje kö la ka traqa. Ame itre xaa ijin, ka nyipici la itre ithuemacanyi cili. Ngo hapeu, e tro eö a mekun lapan itre ej, tro kö lai a xatua eö? Waea! Maine tro pala hi sa nyialiene la he së hnene la itre ewekë cili, ke tro së lai a dekurag me elëhni menu. (It. Ed. 24:10) Nge ame la ka ngazo catr, ke tro ha hajihaj koi së la Baselaia i Akötresie, kolo hi lo nyin la itre jol ne la fen.

13. Nemene la thangane la troa e lapan me lapa mekun la Tusi Hmitrötr?

¹³ Maine tro pala hi sa e me lapa mekun la Tusi Hmitrötr, tro së lai a atre la nyine troa kuca la kola qanangazo së, maine qanangazo itre xan. Tha madrine kö Alia, ketre trejin föe, la angeic a öhne la aqane qanangazone la itre atrene la nöje i angeic. Nge ame koi angeic, pëkö hna kuca hnei mus. Öni angeic: “Hnenge hna pane cil me hnying ka hape, ‘Xecie kö koi ni laka, tro Iehova a nyinyine la itre jole celë?’ Nge ame ngöne la ijine cili, hnenge hna e la tusi Iobu 34:​22-​29. Pëkö ewekë hna juetrën koi Iehova. Nyidrëti hmekuje hi la ka atreine amekötin la itre atr, nge tro kö Nyidrëti a apatrene paluane la itre ewekë ka tha meköti kö.” Ngo nemene la nyine tro sa kuca, treqene tro la Baselaia i Akötresie a apatrene la itre ewekë ka tha meköti kö?

NYINE TRO SA KUCA LA KOLA QANANGAZO SË

14. Nemene la nyine tro sa kuca matre tha tro kö a nyixane la itre jole ne la fen? (Kolose 3:​10, 11)

¹⁴ Thatreine kö së troa sawa la itre atr troa ngazo thiina, ngo ame pe, ijiji easë hi troa saze la aqane ujë së. Tune lo hne së hë hna wang, ame la easa hnim la itre xan, ke easë hi lai a nyitipu Iesu. Nge tro la ihnimi a uku së troa metrötrë itre xan, memine fe lo itre ka qanangazo së. (Mat. 7:​12; Roma 12:17) Iehova a madrin la easa hnim me thiina ka meköt koi itre xan.​—E jë la Kolose 3:​10, 11.

15. Nemene la thangane e tro sa qeje Tusi Hmitrötr koi itre xan?

¹⁵ Ame la ewekë ka sisitria nyine tro sa kuca matre xatuane la itre atr, ke ene la troa qeje Tusi Hmitrötr koi angatr. Hnauëne la easa qaja lai? Ke “atrehmekune i Iehova” la ka atreine saze la atr ka isi, koi atr ka menyik me tingeting. (Isa. 11:​6, 7, 9) Qëmekene troa atre Iehova, Jemal a sine la ketre gurup ka pi saze mus, ke ame koi angeic, tha ka meköti kö la aqane mus. Öni angeic: “Thatreine kö së saze la atr. Ngo e tro angatr a inine la itre nyipici qa hnine la Tusi Hmitrötr, ke tro angatre lai a saze. Nge celë hi ka traqa koi ni.” Hnene la itre ini hnei Jemal hna kapa, matre tha isi hë angeic. Haawe, e tro la itre atr a ini Tusi Hmitrötr, ke tha tro hë angatre lai a akötrë itre xan.

16. Pine nemene matre hetre aja i eö troa ce thawa me itre xan la mejiune kowe la Baselaia?

¹⁶ Baselaia i Akötresie la nyin la nöjei jole ne la fen. Matre tui Iesu, tru la aja i easë troa qaja la Baselaia cili koi itre xan. Eje hi, tro la mejiun kowe la Baselaia a xatuane la itre atr hna qanangazon. (Iere. 29:11) Öni Stacy, lo hne së hna qaja ha e kula ka hape: “Atre hi ni laka, tro Akötresie a apatrene la itre akötr. Matre ame la kola qanangazo ni maine itre xan, ke tha wesitre kö ni. Jëne la Tusi Hmitrötr, Iehova a akeukawanyi së.” Loi e tro sa hnëkë hnyawa matre atreine së qaja koi itre xan la aqane tro Akötresie a apatrene la itre ewekë ka tha meköti kö. Maine ka xecie koi eö laka, ka nyipici la itre ini ka mama ngöne la tane mekune celë, ke tro hë eö lai a atreine ithanatane ngöne la hna inib maine ngöne la hna huliwa.c

17. Iehova a xatua së tune kaa troa xomihnine la itre ewekë ka tha meköti kö?

¹⁷ Atre hi së laka, tro pala hi a hetre ewekë ka tha meköti kö ke, Satana “la atre musinëne la fen.” Ngo easa lapa treqene la itre drai ka lolo, ke ase hë Iehova qaja ka hape, tro Nyidrëti a xatua së enehila, me “helëne trij” Satana elany. (Ioa. 12:31) Ame ngöne la Tusi Hmitrötr, Iehova a qaja koi së la kepin me aliene hni Nyidrë, la easa akötr. (Sal. 34:​17-​19) Jëne la tulu i Iesu, Iehova a ini së la aqane tro sa ujë la kola qanangazo së, memine la aqane tro la Baselaia a apatrene paluane la itre ewekë ka tha meköti kö. (2 Pet. 3:​13) Matre catre jë së cainöjëne la Baselaia, me lapa treqene la ijine tro la “nyipici me meköt” a haöthe la fen.​—Isa. 9:7.