Kola Sa Hnei Tusi Hmitrötr

Nemene la pengö i Akötresie?

Tha öhnyi Akötresieti kö së, ke ua Nyidrë. Nyidrëti la ka xup la hnengödrai me fene hnengödrai, memine la nöjei ewekë ka mel asë. Pëkö atre xupi Akötresie, ke pëkö qaane i Nyidrë. (Salamo 90:2) Aja i Akötresie tro la itre atr a thele troa atre la nyipi pengö i Nyidrë.—E jë la Ite Huliwa 17:24-27.

Hetre ëje i Akötresie. Nge tro sa atrehmekune la itre thiina i Nyidrë, e tro sa goeëne la itre ewekë hnei Nyidrëti hna xup. (Roma 1:20) Ngo maine easa ajane troa atrepengöi Akötresieti hnyawa, nyipi ewekë tro sa inine la Wesi Ula i Nyidrë, ene la Tusi Hmitrötr. Eje hi lai ka aijijë së troa epe catre koi Akötresie.—E jë la Salamo 103:7-10.

Nemene la mekuna i Akötresie göne la thiina ka tha meköti kö?

Methi Iehova Atre Xupi së, la thiina ka tha meköti kö. Nge hnei Nyidrëti hna xupi së hnaiji Nyidrë. (Deuteronomi 25:16) Celë hi kepine matre, methi së fe la thiina ka tha meköti kö. Ngo tha zö i Akötresieti kö la nöjei pengöne thiina ka tha meköti kö. Hnei Akötresieti hna xupe la atr cememine la atreine troa axecië mekun. Ngo ngazo la aqane huliwane hnei itre atr la emeköti angatr. Nge celë hi lai ka ahacene la hni Iehova.—E jë la Genese 6:5, 6; Deuteronomi 32:4, 5.

Aja i Iehova la meköt, nge tha tro kö Nyidrë a nue palua la thiina ka tha meköti kö. (Salamo 37:28, 29) Hna thingehnaeane hnene la Tusi Hmitrötr ka hape, easenyi hë tro Akötresieti a apatrene la nöjei pengöne thiina ka tha meköti kö.—E jë la 2 Peteru 3:7-9, 13.