KA QA NGÖNE ICETRÖN | ISI KA SAZE LA FEN

Zö i Drei La Isi Me Akötr?

Ame lo drai 11 Nofeba macatre 1918, kolo hi lai a umuthe lo Pane Isi Ka Tru. Hna thinge la itre setroa, nge kola uti la iatr troa fia ngöne la itre gojeny. Ngo tha tro kö a cile huti la madrine i angatr, pine laka, cahmijë hë la ketre ewekë ka iaxoueny thupene lo pane isi ka tru.

Ame lo treu Juun 1918, ala nyimu hë la itre sooc hna nyiqaane lep hnene lo meci hna hape, grippe espagnole. Canga mama pi hi ka hape, hna mecine lai mec cili. Itre treu petre hi, nge kolo ha öhne laka, tru kö hnei sooc qa Amerika hna lepe e Faras hnene lai mec, hune la itre hna lep hnene la ithupëjia ngöne la isi. Nge ame hë la kola tro hnene la itre sooc kowe la isa nöje i angatr, tre angatr fe hi lai a bëeke fë lai mec, ene pe canga ixötrekeu jë hi.

Thupene ju hi lo isi ka tru, kolo fe ha jiin me pë mani. Ala nyimu la itre atr ne Erop ka mecijine ngöne lo macatre 1918. Nge ame hë lo 1923, tre pë hnyawa ha ca enyipiewekëne la mani ne Alema. Thupene la sikisi lao macatre, ala nyimu hë la itre nöje e cailo fen ka pë mani. Ame hë lo macatre 1939, tha mano pala kö la iatr qaane lo pane isi ka tru, nge kolo pena ha nyiqaane lo hnaaluene isi ka tru. Ngo hnauëne jë la kola traqa itrai la itre hulö cili?

HATRENE LA ITRE DRAI HNAPIN

Kola aijijë së hnene la itre hna perofetane hnene la Tusi Hmitrötr, troa atre la qaane la itre hulö ka lepe ekö la itre atr, hmekune lo Pane Isi Ka Tru. Hnei Iesu Keriso lo hna thingehnaeane ka hape, “tro ha cile la kete nöje kowe la kete nöj,” nge troa lepe la fene hnengödrai hnene la jiinë xen, me itre mec. (Mataio 24:3, 7; Luka 21:10, 11) Öni nyidrëti kowe la itretre drei nyidrë ka hape, itre hulö lai ka nyihatrene la itre drai hnapin. Hetre itre xa ithuemacanyi kö hna hamëne hnene la tusi Hna Amaman, nge ka amamane ka hape, itre hulö lai a qajaqaja lo isi ka traqa e koho hnengödrai.—Wange ju la itre mekune hna eköhagen “Isi e Celë Fen, Nge Isi Fe e Hnengödrai.”

Ame pala hi e cili hnine lai tusi Hna Amaman, tre kola qeje pengöne la foa lao ka ti hos, lo hna hëne qene Wiwi ka hape, Les quatre cavaliers de l’Apocalypse. Ame lai köni xan, tre angatre hi a nyihatrene lo köni hulö hna perofetane hnei Iesu; ene la isi, me jiin, me mec. (Wange ju la itre mekune hna eköhagen, “Hapeu, Ka Nyenyape Pala Kö Lo Foa Lao Ka Ti Hos?”) Celë hi ewekë lai ka anyipicine laka, qaane ju hi lo pane isi ka tru, kola xejë la ketre hneijine akötr, nge eje hë lai. Nge kolo fe a qaja hnene la Tusi Hmitrötr ka hape, Satana hi la qaane la nöjei akötre cili. (1 Ioane 5:19) Ngo hapeu, hetre ka atreine kö troa cile koi angeic?

Kola qaja koi së hnene la tusi Hna Amaman, ka hape “xoxopate pe hi la ijine” i Satana. (Hna Amamane 12:12) Celë hi kepine matre tru la trenge elëhni Satana, ene pe angeic a axulune la nöjei akötr e celë fene hnengödrai. Ngo ame pe, itre akötre lai ka anyipicine koi së ka hape, tha qea pe kö la ijine i angeic.

TRO HA PATR LA ITRE HULIWA I DIABOLO

Pane Isi Ka Tru hi la ka nyiqaane la ketre hneijin. Qaane ju hi lai, isi asë hë la fen, nge tha mano kö la itre atr icilekeu, nge tha mejiune hë la itre atr kowe la itre ka musi hui angatr. Nge Pane Isi Ka Tru fe la sipu hatrene laka, hna helëne triji Satana qa hnengödrai. (Hna Amamane 12:9) Angeice la tane la fene celë, nge angeic a ujë tune la ketre joxu ka akötrëne la itre jini hmunë, ke atre hi angeice lak tha qea pe kö la ijine i angeic. Ngo elanyi e patre hë angeic, ketre tro fe a patr lai hneijine akötr, lo hna afetrane hnene lo Pane Isi Ka Tru.

Itre hna perofetane hnei Tusi Hmitrötre la ka amamane koi së la itre kepine matre ijije tro sa mejiune laka tro Iesu Keriso, Joxu së e hnengödrai, “a apatene la ite huliwa i diabolo.” (1 Ioane 3:8) Itre milio enehila lao atr ka thithi göi troa sipone matre traqa pi la Baselaia i Akötresie. Nyipunieti fe kö a hane thithi fë la ewekë cili? Tro la Baselaia cili a aijijëne la itre atr ka loi thiina troa öhne la kola eatr la aja i Akötresie kowe la fene hnengödrai, ngo tha aja i Satana hmaca kö. (Mataio 6:9, 10) Ame hë la kola musi hnene la Baselaia i Akötresie, pë hmaca kö troa hane isi ngöne la fene hnengödrai asë! (Salamo 46:9) Epi tro fe nyipunie a hane thele troa atrepengöne la Baselaia cili, matre tro fe nyipunie elany a hane melëne la ijine tro ha tingeting asë la fene hnengödrai!—Isaia 9:6, 7.

Isi e Celë Fen, Nge Isi Fe e Hnengödrai

Ame ekö catr, ma traqa koi 1900 lao macatre qëmekene troa traqa la Pane Isi Ka Tru, hnei Satana hna qaja koi Iesu, ka hape tro angeic a hamë nyidrëti “la nöjei baselaia asë e celë fen.” (Mataio 4:8, 9) Ngo tha kei kö Iesu kowe la itupathi cili, nge öni nyidrëti e thupen, ka hape, Diabolo hi “la tane celë fene hnengödrai.” (Ioane 14:30) Ame pena aposetolo Ioane, tre öni nyidrë ngöne la tusi nyidrë ka hape, “fene hnengödrai asëjëihë a meköle thene la ate ka ngazo.”—1 Ioane 5:19.

Nge pine laka, Satana Diabolo hi la tane la fene hnengödrai asë, haawe meköti troa qaja ka hape, angeice la atrekë zöne lo pane isi ka tru, memine la itre ethanyine ej. Ketre, kola anyipicine hnyawa hnene la tus i Hna Amamane ka hape, Satana hi la atrekë zöne la itre hulö ka lepe la fene hnengödrai qaane lo macatre 1914. Hane hi la itre xa ewekë hna qaja ngöne la tus i Hna Amamane mekene 12:

Xötre 7 Kola isi e hnengödrai hnei Mikaela (Iesu Keriso) memine la drakona (Satana).
Xötre 9 Hna ukapiëne triji Diabolo kowe la fene hnengödrai, lo “ate amenune la fene hnengödrai asëjëihë.”
Xötre 12 “Ekölö hi ni la hnadro me hnagejë ! qa ngöne la hna utipi koi nyipunie la diabolo ka tru tenge elëhni, ke trotrohninë hë nyëne laka xoxopate pe hi la ijine i nyën.”

Kola ce anyipicine hnene la Tusi Hmitrötr memine la itre ewekë ka traqa e cailo fen laka, kola isi e koho hnengödrai thupene la kola cile la Baselaia i Akötresie, ngöne lo macatre 1914.a Kolo lai a qaja ka hape, hna ce traqa ngöne la macatre ka cas la isi e koho hnengödrai, memine la isi e celë fen.

a Wange ju fe la mekene 8 ne lo itus Nemene La Nyipi Ini Hna Hamën Hnei Tusi Hmitrötr?, hna kuca hnene la Itretre Anyipici Iehova.

Hapeu, Ka Nyenyape Pala Kö Lo Foa Lao Ka Ti Hos?

Ihos ka wië hna tithe hnene la joxu ne hnengödrai. Iesu Keriso hi lai Joxu, nge nyidrëti a tro pi ngöne la meköt. (Salamo 45:4) Ame la pane hnëqa i nyidrë, tre ene la troa ukapiëne triji Satana memine la itre dremoni angeic qa hnengödrai.—Hna Amamane 6:2; 12:9.

Ihos ka palulu hna tithe hnene la atre “xome la tingetinge qa la fen.” (Hna Amamane 6:4) Qaane lo macatre 1914, tha mano kö la itre atr hnene la itre isi. Ase hë lo Pane Isi Ka Tru; ngo thupene la 21 lao macatre, kolo pena ha fetra lo hnaaluene isi ka tru a lep hmaca la itre atr ka ala nyim. Hna e la 60 milio la etrune la itre ka mec. Qaane lo macatre 1945, kola isi hnene la itre atr ngöne la ca götran, ngo ame pe, ke casi pala hi la aqane catrehnine la isi. Kola mekune hnene la itre xa ka inamacan, ka hape, hna sasaithe la 100 milio lao atr ka meci hnene la itre isi ngöne lo itre macatre 1900.

Ihos ka wetrewetr hna tithe hnene la atre xome trongë itulu; kolo hi lo jiin. (Hna Amamane 6:5, 6) Ame ngöne lo ijine pane isi ka tru, hnene lo köni nöje ka tru ka ce xöl (Faras, me Agele, me Russie) hna thingijëne kowe la xen troa traqa e Alema, ene pe meci ju hi la ala 750 000 la angetre Alema, hnei jiin. Hna e fe la 2 milio nge hetre munën lao angetre Russie ka meci hnei mecijine ngöne lo macatre 1921, nge hna hane traqa fe kowe la itre xa nöje la ewekë cili. Maine troa e asë la itre atr ka mec hnei mecijine ngöne lo itre macatre 1900, tre traqa koi 70 milio la etrun. Ame ngöne la nöjei macatre, kola meci hnei mecijine la itre nekönatr, ene lo itre medreng uti hë lo itre ka faifi lao macatre, a traqa koi theri milio nge hetre munën la etrun.

Ihos ka xuhao, hna tithe hnene la atre hamë mec hna mecin. (Hna Amamane 6:8) Ame la pane meci ka tru hna mecin ngöne lo itre macatre 1900, tre kolo hna hape, grippe espagnole qene Wiwi. Ala nyimu la itre ka thele troa atre la etrune la itre atr ka mec hnene la giripe cili, ngo kola mekune ka hape, ma traqa koi 50 milio lao ka mec. Kola qaja hnene la ketre itus qene papale (Man and Microbes) ka hape, pë pala kö meci ka ngazo ka tune lai hna hane atre ngöne la mele ne la atr. Nyimenyime ju kö la aqane lepe la itre atr hnene la meci cili, hune lo ketre mec, hna hape, la peste bubonique. Hetrenyi fe la itre xa meci ka fetra ngöne lo itre macatre 1900, ka tune lo variole, me paludisme, me tuberculose me itre xane ju kö, ka humuth la itre hadredr milio lao atr.