Metrötrëne Ju La Itre Xan

1. Pine nemene matre aja ne la itre atr troa metrötrë angatr? (Itre Edromë 22:1)

TUNE kaa eö la itre xan a metrötrë eö? Tro eö lai a madrin. Eje hi, easë asë a madrin la kola metrötrë së, ke aqane xupi së lai hnei Akötresie. Celë hi matre, öni Tusi Hmitrötr, “Ka loi ju kö la troa metrötrë së hune la troa hetre sileva me gool”!​—E jë la Itre Edromë 22:1.

2-3. Pine nemene matre jole koi së troa metrötrë itre xan, nge nemene la hne së hna troa ce wang ngöne la tane mekune celë?

² Ame itre xaa ijin, jole koi së troa metrötrë itre xan. Pine nemen? Ke canga mama hi koi së la itre tria i angatr. Ketre, ame la itre atr enehila, ke itre ka pë metrötr. Ngo nyipiewekë tro së, itre keresiano a hetre metrötr, ke aja i Iehova tro sa nyipine me metrötrëne “la nöjei atr asë.”​—1 Pet. 2:​17.

³ Ame ngöne la tane mekune celë, tro sa ce wang la aliene la troa metrötr, memine la aqane tro sa metrötrën (1) la fami së, (2) la itre trejin ne la ekalesia, me (3) itre atr asë. Ketre, tro sa ce wang la aqane tro sa hetre metrötr, ngacama jole koi së.

KOLA HAPEU LA TROA HETRE METRÖTR?

4. Kola hapeu la troa metrötrë itre xan?

⁴ Kola hapeu koi eö la troa hetre metrötr? Ame ngöne la itre xaa qene hlapa, ka ce tro la hnëewekë “metrötr” me “nyipin.” Ame la hnëewekë “metrötr” ke, kola qaja la aqane goeëne së la ketre atr. Ame la easa metrötrëne la itre atr, easa wangatrunyi angatr pine la itre thiina i angatr ka lolo, maine itre hnei angatr hna kuca, maine itre hnëqa i angatr. Ngo ame la hnëewekë “nyipin,” ke kola qaja la aqane ujë së koi angatr. Ame la easa nyipine la itre atr, ke göne matre tro angatr a dreng laka, easa wangatrunyi angatr, me hnim me metrötrë angatr. Ngo tro lai a hetre thangan e tro sa kuca qa kuhu hni.​—Mat. 15:8.

5. Nemene la ka uku së troa metrötrë itre xan?

⁵ Aja i Iehova tro sa metrötrë itre xan, tune “la itre mus.” (Roma 13:​1, 7) Ngo öni itre xan, “Tro ni a metrötrë eö, e tro eö a pane metrötrë ni.” Tune kaa fe së itre hlue i Iehova? Tha easë kö a metrötrëne la itre atr, ke ka lolo la aqane ujë i angatr koi së. Waea! Easë pe a metrötrë itre atr ke, easa hnimi Iehova, nge aja së troa amadrinë Nyidrë.​—Ios. 4:​14; 1 Pet. 3:​15.

6. Ijije kö tro sa metrötrëne la ketre atr ka pë metrötr koi së? Qejepengöne jë. (Wange ju fe la .)

⁶ Ma itre xan a hnying ka hape, ‘Ijije kö tro sa metrötrëne la ketre atr ka pë metrötr koi së?’ Öö, ijije hi. Tro sa ce wang la itre xaa tulu ne la Tusi Hmitrötr. Hnei Saulo joxu hna thaipië Ionathana qëmekei nöjei atr. (1 Sam. 20:​30-​34) Ngo hnei Ionathana pala hi hna metrötrë nyidrë, me sine la trongene isi nyidrë utihë la mec. (Eso. 20:12; 2 Sam. 1:​23) Hnei Eli, Atre Huuj Ka Sisitria, hna jelë Hana ka hape, ka hnaitö. (1 Sam. 1:​12-​14) Atre asë hi la angetre Isaraela laka, tha hnei Eli kö hna kuca la hnëqa i nyidrë ne kem me atre huuj, ke ka ngazo la thiina ne la lue nekö i nyidrë trahmany. Ngacama atre fe hi Hana, ngo hnei eahlo hna sa amenyiken me metrötrë nyidrë. (1 Sam. 1:​15-​18; 2:​22-​24) Ketre, hnene la itre trahmanyi ne Athenai hna jelë Paulo aposetolo ka hape, “ka ithanata lapa.” (It. Hu. 17:18) Ngo hnei Paulo pala hi hna metrötrë angatr. (It. Hu. 17:22) Nemene la ini hne së hna xom qa ngöne la itre tulu celë? Ngacama jol, ngo ijije hi tro sa metrötrë itre xan e ka tru la ihnimi së koi Iehova, me xoue Nyidrë. Drei la nyine tro sa metrötrën, nge pine nemen? Tro sa ce wang.

METRÖTRËNE JU LA FAMI EÖ

7. Pine nemene matre ka jole troa metrötrëne la fami së?

⁷ Pine nemene matre ka jol? Ce easë pala hi memine la fami së, matre canga öhne hi së la itre thiina ka loi me ka ngazo i angatr. Maine jë, easa thupëne la ketre sinee së ka wezipo, maine ka sine wezipo, matre ame itre xaa ijin, tro angeic a qaja la itre trengewekë ka akötr. Nge ame itre xan, angatr a mel ngöne la ketre fami ka pë metrötr, ke angatr a isa qaja me kuca la itre ewekë ka iakötrë. Matre tha tingetinge kö la fami angatr, ngo kolo pe a iwesitrë lapa. Ame la thangane lai, ke tha casi kö la fami. Tro sa xom la ketre ceitun: Ame la kola tith la ketre atr hnei sine mec, kola kucakuca la ngönetrei, nge thatreine kö troa ce huliwa la itre hnep. Ketre tun, ame la kola pë metrötr ngöne la fami, thatreine kö la itre atren ce huliwa, me cas. Eloine pe, ijije hi tro la itre atrene la fami a inin troa imetrötrekeu.

8. Pine nemene matre loi e tro sa metrötrëne la fami së? (1 Timoteo 5:​4, 8)

⁸ Pine nemene matre loi e tro sa hetre metrötr? (E jë la 1 Timoteo 5:​4, 8.) Ame ngöne la tusi 1 Timoteo, Paulo a qaja laka, nyipiewekë tro sa thupëne me hamëne la ka nyipiewekë kowe la itre atrene la fami së. Tha easë kö a kuca lai ke, hnëqa së, ngo hnene “la aqane nyipici [së] koi Akötresie.” Kolo hi lai a hape, easë kuca ke, easa hnimi Iehova, nge aja së troa atrunyi Nyidrë. Nge Iehova la ka acil la itre fami. (Efe. 3:​14, 15) Matre ame la easa nyipine la itre atrene la fami së, easë hi lai a atrunyi Iehova, la Atre Acil la fami. Celë hi kepine ka sisitria matre loi e tro sa metrötrëne la fami së!

9. Tune kaa la aqane tro la lue trefën a imetrötrë? (Goeëne ju fe la itre foto.)

⁹ Tune kaa la aqane tro sa imetrötrë? Loi e tro la trahmanyi a amamane laka, ka tru la föi nyidrë, la nyidroti cas me qëmekei itre xan. (It. Ed. 31:28; 1 Pet. 3:7) Tha tro kö nyidrëti a ilep maine thaipië angeic, maine jele genyi angeic. Öni Ariel,a ketre trejin trahmanyi ka mel e Argentine ka hape: “Pine laka, ka hetre mecine la föeng, matre ame itre xaa ijin, eahlo a hna koi ni la itre trenge ka akötr. Ngo atre hi ni ka hape, ka wezipo eahlo. Eni hmaca a mekune la tusi 1 Korinito 13:​5, kola xatua ni troa ithanata amenyiken, nge tha tro kö a thaipië eahlo ngöne la itre ijine cili.” (It. Ed. 19:11) Tune kaa pena kowe la itre föe? Loi e tro angeic a qaja aloine la föi angeic koi itre xan. (Efe. 5:​33) Tha angeice kö a ithanata qehnamo, me ihnyimasai, maine qaqa nyidrë pena. Atre hi angeic laka, aqane ujë lai ka troa thë la faipoipo i nyidro. (It. Ed. 14:1) Ka hnehengazo lapa la föene la ketre trejin föe qa Italie. Öni eahlo: “Ame itre xaa ijin, kola hnehengazo menu la föeng. Ame ekö, canga mama hi ngöne la lue mekeng, me aqane ithanatang ka hape, hmanono hë ni koi nyidrë. Ngo eni a öhne laka, ame la eni a ce tro lapa memine la itre atr ka metrötrë itre xan, ke kola xatua ni troa metrötrëne la föeng.”

10. Tune kaa la aqane tro la itre jeune a metrötrëne la keme me thine i angatr?

¹⁰ Maine ka jeune eö, drengethenge ju la itre hna amekötin hnei keme me thine i eö. (Efe. 6:​1-3) Ithanata jë koi nyidro cememine la metrötr. (Eso. 21:17) Ame la nyidro a utipië trootro, ke tro nyidroti lai a aja ixatua. Matre isine jë troa thupë nyidro hnyawa. Tro sa ce wang la hna melën hnei María. Tha ka hmi kö la keme i angeic, ngo ame la nyidrëti a wezipo, hnei María hna nyiqane thupë nyidrë. Ngo tha ka loi kö la thiina i nyidrë koi angeic. Öni angeic: “Hnenge hna thithi koi Iehova troa xatua ni troa metrötrëne la kemeng. Xecie koi ni laka, tro kö Iehova a xatua ni, ke aja i Nyidrë tro ni a metrötrëne la kemeng. Eni a trotrohnin e thupen laka, tha tro kö ni a treqene tro nyidrë a loi thiina matre nyiqane metrötrë nyidrë.” Ame la easa metrötrën la itre sinee së, ngacama ka ngazo la thiina i angatr, easë hi lai a metrötrë Iehova, Atre acile la fami.

METRÖTRËNE JU LA ITRE TREJIN

11. Pine nemene matre ka jole troa metrötrëne la itre trejin ne la ekalesia?

¹¹ Pine nemene matre ka jol? Itre trejin ne la ekalesia a mele thenge la itre trepene meköti Iehova. Ngo ame itre xaa ijin, tro angatr a ngazo thiina koi së, maine wang angazo së, maine aelëhni së pena. Maine tro ketre a “ngazo koi [së],” ke tro ha jole koi së troa metrötrë angeic. (Kol. 3:​13) Ngo nemene la ka troa xatua së?

12. Pine nemene matre loi e tro sa metrötrëne la itre trejin? (2 Peteru 2:​9-​12)

¹² Pine nemene matre loi e tro sa hetre metrötr? (E jë la 2 Peteru 2:​9-​12.) Ame ngöne la tusi 2 Peteru, Peteru a qaja ka hape, itre atrene la ekalesia a qaja angazone la “itre hna atrun hnei Akötresie,” ene la itre qatre thup. Tune kaa la aqane ujë ne la itre angela la angatr a öhne lai? Pine laka, “nyudreni a metrötrë Iehova,” tha hnei nyudren kö hna qaja angazone la itre atre cili. Öhne hi eö lai! Ngacama ka pexeje la itre angela, ngo tha hnei nyudreni kö hna xöjetrij la itre atre cili ka pi tru. Hnei nyudreni pe hna nue Iehova troa amekötin me haji angatr. (Roma 14:​10-​12; wange ju fe la Iudra 9.) Hetre ini nyine tro sa xom qaathene la itre angela. Maine tha itre angela kö a pë metrötr kowe la itre ithupëjia, haawe, tha tro kö sa pë metrötr kowe la itre trejin ka hnimi Iehova. Ngo tro pe së a “pa troa metrötrë ketre.” (Roma 12:10) Easa amamane e cili ka hape, easa metrötrë Iehova.

13-14. Tune kaa la aqane tro sa metrötrëne la itre trejin ne la ekalesia? Qaja jë la ketre hna melën. (Goeëne ju fe la itre foto.)

¹³ Tune kaa la aqane tro sa imetrötrë? Itre qatre thup fe, ame la epuni a hamë ini koi itre xan, hamëne jë cememine la ihnim. (File. 8, 9) Nge ame la epuni a eamo ketre, tha tro kö a kuca ngöne la elëhni, ngo loi pe troa menyik. Itre trejin föe, the qaja angazone kö la itre xan maine ixöjetrij, matre tro pala hi la ekalesia a imetrötrekeu. (Tito 2:​3-5) Easë a metrötrëne la itre qatre thup la easa ce huliwa me angatr, me olene la itre huliwa i angatr kowe la ekalesia. Eje hi, angatr a elemekene la itre icasikeu memine la huliwa ne cainöj, me xatuane la itre ka “nyiqaane kei.”​—Gal. 6:1; 1 Tim. 5:​17.

¹⁴ Jole koi Rocío, ketre trejin föe troa metrötrëne la ketre qatre thup, ke hnei nyidrë hna eamo angeic. Öni angeic, “Ame koi ni, catre pala ha la aqane ithanata i nyidrë. Nge ame koilo hnalapa, eni a xöjetriji nyidrë. Tha eni kö a amaman, ngo kösë ame koi ni, tha nyidrëti kö pi wai ni. Matre xele ni ma dreng la eamo i nyidrë.” Nemene la ka xatua Rocío? Öni angeic: “Ame la eni a e Tusi Hmitrötr, hnenge hna e la tusi 1 Thesalonika 5:​12, 13. Hnenge hna öhne laka, pëkö metrötreng kowe la trejin cili, matre hna nyiqane huliwa la mekuthetheung. Hnenge hna thithi koi Iehova me ithel ngöne la itre itusi së, matre troa amekötin la aqane waiewekëng. Eni a öhn e cili laka, tha zöi nyidrëti kö, ngo eni la ka pi tru. Trotrohnine hë ni enehila laka, ame la atr ka ipië, ke ka metrötrë itre xan. Hetre xaa thiina nyine tro pala kö ni a huliwan, ngo drenge hi ni laka, Iehova a madrin la eni a isine troa metrötrë itre xan.”

METRÖTRËNE JU LA ITRE XAA ATR

15. Pine nemene matre ka jol troa metrötrëne la itre xaa atr?

¹⁵ Pine nemene matre ka jol? Ame ngöne la hna cainöje trootro, easa ixelë memine la itre atr ka xele ma dreng la itre ini qa hnine la Tusi Hmitrötr. (Efe. 4:​18) Ame la itre xan, tha kapa kö la maca pine la aqane hetru angatr. Maine jë, ame easë, jole troa amadrinëne la maseta maine porofesör. Maine pena, ka ngazo thiina la itre sine huliwa së, maine sine ini. Matre nemene la ewekë ka troa traqa? Tro hë së lai a nyiqane pë metrötr koi angatr, me xele ma wai angatr.

16. Pine nemene matre nyipiewekë tro sa metrötrëne la itre atr ka tha nyihlue i Iehova pala kö? (1 Peteru 2:​12; 3:​15)

¹⁶ Pine nemene matre loi e tro sa hetre metrötr? The thëthëhmine kö laka, Iehova a goeëne la aqane ujë së kowe la itre atr ka tha hmi kö. Peteru aposetolo a amekunë së laka, maine tro sa loi thiina koi itre xan, ke ijije hi tro angatr a “atrunyi Akötresie.” Celë hi matre, hnei Peteru hna ithuecatre koi së troa qaja la lapaune së “cememine la menyike me metrötr atraqatr.” (E jë la 1 Peteru 2:​12; 3:​15.) Easë ju hë a isigöline la lapaune së ngöne la hnakootr, maine qëmekene la ketre atr, ngo loi e tro sa ithanata kösë easë qëmekene la therone i Akötresie. Eje hi, Iehova a goeë së, me drenge la hne së hna qaja, me aqane ithanata së. Hapeu, tha kolo kö lai a uku së troa metrötrëne la itre atr ka tha nyihlue i Nyidrëti pala kö?

17. Tune kaa la aqane tro sa metrötrëne la itre xan?

¹⁷ Tune kaa la aqane tro sa imetrötrë? Ame la easa cainöj, tha tro kö sa nyi ka atre qëmekene la itre atr ka thatre hnyawa kö la Tusi Hmitrötr. Loi e tro pe sa mekun laka, ka sisitria kö angatr hu së. The thëthëhmine kö laka, ka tru angatr koi Iehova. (Haga. 2:7; Fil. 2:3) Maine tro ketre a qaqa së pine la lapaune së, ke the sa angazone kö, maine qenexetihe angeic. (1 Pet. 2:​23) Maine hnei eö hna ithanata menu, ke canga qeje menu jë. Nge tune kaa la aqane tro eö a hetre metrötr ngöne la hna huliwa? Loi e tro eö a catre huliwa, me loi thiina kowe la maseta me kowe la itre sine huliwa i eö. (Tito 2:​9, 10) Maine tro eö a nyipici me huliwa catr, tro kö Iehova a madrin, ngacama tha madrine kö itre xan.​—Kol. 3:​22, 23.

18. Pine nemene matre loi e tro sa metrötrë itre xan?

¹⁸ Nyimutre catr la itre kepin matre loi e tro sa metrötrë itre xan! Hne së hna ce wang laka, ame la easa metrötrën la fami së, easë hi lai a atrunyi Iehova, Atre Acil la fami. Ceitune hi lai memine la easa metrötrëne la itre trejin ne la ekalesia. Nge ame la easa metrötrëne la itre atr ka tha nyihlue i Iehova pala kö, ke easë hi lai a aijijë angatr troa atrunyi Iehova Akötresi së. Ngacama tha metrötrë së kö hnei itre xan, ngo loi e tro pala hi sa metrötrë angatr. Pine nemen? Ke tro kö Iehova a amanathithi së. Öni Nyidrëti lo: “Ame la atre atrunyi ni, tro fe ni a atrun.”​—1 Sam. 2:​30.