Troa Xome La Ita Ne Thup Celë e 13 Diseba Me Wiike Cili

Nyima 122 Me 104

Epuni Kö a Amamai Tulu Göi Troa Atrune La Itre Trejin?

“Ihnimikeuneju tune la aqane ihnimi tejin ; pi pa troa atrune la kete.”—ROM. 12:10.

1, 2. (a) Nemene la ihaji hna hamëne hnei Paulo ngöne la tusi nyidrëti koi angetre Roma? (b) Nemene la itre hnyinge hne së hna troa ce wang?

Ame ngöne la tusi Paulo koi angetre Roma, nyidrëti a amamane hnyawa la enyipiewekëne koi së itre keresiano troa ihnim e hnine la ekalesia. Nyidrëti a amekunë së laka loi e ka “pë thoi ngön” la ihnimi së. Nyidrëti mina fe a qaja, ka hape, loi e tro sa “ihnimikeun,” me amamane lai hnene la hna “ihnimi tejin.”—Rom. 12:9, 10a.

² Eje hi laka, ame la troa ihnimikeun, tre, thaa ene kö la tro hi a hni ka menyik kowe la itre xan, ngo loi e tro mina fe a amamane hnei huliwa. Nga troa atre tune kaa laka ka ihnimi së e thaa hne së kö hna amaman? Celë hi kepine lai matre Paulo a haji angatre fe me hape: “Pi pa troa atrune la kete.” (Rom. 12:10b) Kola hapeue la troa atrune la ketre? Pine nemene matre nyipi ewekë tro sa amamai tulu ngöne la aqane tro sa atrune la itre sine hmi së? Tro sa kuca tune kaa lai?

Metrötre Me Iatrun

3. Nemene la aliene la hnëewekë hna hape “atrun”?

³ Ame la sipu aliene la hnaewekë “atrun” qene Heberu, tre, kola hape “ehacen.” Ame la atr hna atrun, tre, hna goeën ceitu me ketre atr ka tru nge ka trene hnëqa. Ame pala hi lai hnëewekë qene Heberu, tre, hna ujëne fe e hnine la Itre Hna Cinyihan, ka hape, “lolo” kolo lai a amamane la aqane wanga atrune lai atr hne së hna atrun. (Gen. 45:13) Ame la hnëewekë qene Heleni ka ujëne la hna hape “atrun” ngöne la Tusi Hmitrötr, tre, kola qaja la inyipi, me enyipiewekën, me ka tru alameken. (Heb. 2 :9) Eje hi, ame la itre atr hne së hna atrun, tre, kolo itre atr ka hlemu loi nge ka sisitria koi së.

4, 5. Nemene la ka iothekeune la lue hnaewekë celë ene la iatrunyi me metrötr? Hamëne jë la ketre ceitun.

⁴ Nemene la aliene la hna hape, troa atrune la itre trejin? Loi e troa pane hetrenyi la metrötr. Eje hi laka, hna majemine ce xome la lue hnëewekë celë “atrun” me “metrötr,” ke, ka ce tro hnyawa hi lue ej. Ame la easa atrune la ketre atr, ke, celë hi aqane ujë lai maine ketre hatrene pena ka amamane la hni ne metrötre së. Matre kösë ame la metrötr, tre, kola pane qaja la aqane goeëne së la itre trejine me easë, nge ame la easa atrunyi angatr, ke, kola qaja la aqane tro sa ujë koi angatr.

⁵ Tro la ketre keresiano a atrune tune kaa la itre sine hmi angeic, e pëkö hni ne metrötre i angeic koi angatr? (3 Ioane 9, 10) Tune la ketre feja a cia hlöeë, me cile hut e catrecatre la itre iwaane ej ngöne la ihnadro gaa hmelek, tro fe ha nyipici me cile hut la kola atrune la ketre, e hna nyitrepene lai hnene la hni ne metrötr. E paatre kö la hni ne metrötr, tre, thatreine kö troa cile huti la iatruny. Qa ngöne lai, thaa sesëkötre kö së laka qëmekene troa ithuecatre kowe la itre trejine troa iatruny, hnei nyidrëti hna pane qaja hnyawa la hnëewekë celë: “Loi la ihnimi ka pë thoi ngön.”—E jë 1 Peteru 1:22.

Atrune Jë La Itre “Hna Xupe Hnaiji Akötesie”

6, 7. Pine nemene matre nyipi ewekë tro sa metrötrëne la itre atr?

⁶ Pine laka nyipi ewekë la hni ne metrötr ngöne la easa thele troa atrune la itre atr, haawe, thaa tro pi kö sa thëthëhmine la itre kepine matre loi e tro sa metrötrëne la nöjei trejine me easë. Tro hi sa ce wange la lue kepin.

⁷ Ame la itre atr “hna xup[i angatr] hnaiji Akötesie,” thaa tune kö lo itre öni. (Iako. 3:9) Qa ngöne lai, hetrenyi thei së la itre thiina i Akötresie, tune la ihnim me inamacan, me thiina ka meköt. Hanawange la itre xaa hne së hna kapa qaathene la Atre Xupi së. Önine la atre cinyihane la salamo ka hape: “Iehova Joxu huni fe, . . . ! hnei cilieti hna amë la lolo i cilieti e koho hune la hnengödrai . . . Ke hnei cilieti hna [celohmëne la atr] eashenyi fe ite angela, nge hnei cilieti hna petë angeice hnene la lolo me atrun.” (Salamo 8:1, 4, 5; 104:1)a Kola mama laka hnei Akötresieti hna atrune la itre atr, ngöne la aqane thaipi angatr hnei Nyidrë, me amingömingöi angatr. Haawe, ame hi la easa atrune la ketre atr, easë hi lai a atrehmekune la Qaane la iatruny, ene Iehova. Haawe, maine nyipici laka hetrenyi së la itre sipu kepine matre easa metrötrëne la itre atr, ngo sisitria pala kö e tro sa metrötrëne la itre trejine me easë!—Ioane 3:16; Gal. 6:10.

Easë La Itre Atrene La Ketre Hnepe Lapa

8, 9. Nemene la kepine hna qaja hnei Paulo ka upi së troa metrötrëne la itre sine hmi së?

⁸ Hnei Paulo hna qaja la ketre kepine matre easa metrötrëne la ketre atr. Qëmekene tro angeic a ithuecatre troa atrune la itre xan, öni angeic, ka hape: “Ihnimikeuneju tune la aqane ihnimi tejin.” Ame la qene Heleni ne la hnëewekë celë “ihnimi tejin” tre, kola qaja la otrene ka catr, ka iothekeune la itre atrene la ketre hnepe lapa ka ihnim, me ka itö ixatua. Haawe, ame la Paulo a xome la hnëewekë celë, tre, nyidrëti a amamane hnyawa laka, loi e tro la aqane imelekeu ne la itre atrene la ekalesia, a tune la aqane imelekeu ne la ketre hnepe lapa ka caas, ene la troa catre me keukawa. (Rom. 12:5) Ketre, the thëthëmine kö së laka hnei Paulo hna qaja la trenge ewekë celë kowe la itre Keresiano hna iën, ene lo itre atr hnei Iehova hna kapa matre troa itre nekö i Nyidrë. Haawe, kösë ketre hnepe lapa ka caasi hë angatr. Celë hi matre, ame lo itre Keresiano hna iën ngöne lo hneijine i Paulo, tre, hetrenyi fe angatre la ketre kepine ka tru ka upi angatr troa imetrötrë. Nge eje mina fe la aqane ujë cili thene la itre keresiano hna iën ne la hnedrai së enehila.

⁹ Nge tune kaa fe la itre “xa mamoe”? (Ioane 10:16) Ngacama thaa hna kepe angatre kö ceitu me itre nekö i Akötresie, ngo ijije troa hë ketre hnei ketre, ka hape trejin, ke, angatre la itre atrene la lapa ka cahae ne Keresiano e cailo fen. (1 Pet. 2:17; 5:9) Haawe, maine trotrohnine hnyawa hi hnene la itre xaa mamoe la aliene la hnei angatre hna qaja, jëne la hnaewekë “trejin,” haawe, ketre kepine lai ka tru ka upi angatre troa hetre hni ne metrötre kowe la itre sine hmi angatr.”—E jë la 1 Peteru 3:8.

Pine Nemene Matre Nyipi Ewekë Catre Troa Atrune La Itre Xan?

10, 11. Pine nemene matre nyipi ewekë tro sa metrötrëne me atrune la itre trejine me easë?

¹⁰ Pine nemene matre nyipi ewekë catre tro sa metrötrëne me atrune la itre trejine me easë? Hanawange la kepin: Maine tro sa atrune la itre trejine me easë, trahmanyi me föe, tro hë sa sajuëne hnyawa la elolone me caasi ne la ekalesia.

¹¹ Nyipici, atrehmekune hi së laka ame la qaane la trenge catre së, easë itre nyipi keresiano, tre, ene la aqane imelekeu së me Iehova memine la ixatua hne së hna kapa qaathene la ua i Nyidrë. (Sal. 36:7; Ioane 14:26) Ketre, kola akeukawane la hni së hnene la aqane nyipi së hnene la itre sine hmi së. (Ite edomë 25:11) Nge kola hamë trenge catre së hnene la aqane qaja aloinyi së me metrötrë së hnei ketre. Kolo lai a acatrenyi së matre tro pala hi sa catre trongëne la gojenyi ne mele cememine la madrin. Eje hi laka itre ewekë lai hnei epuni hna melëne hë.

12. Tro sa sajuëne tune kaa la ihnim me hni ka keukawa e hnine la ekalesia?

¹² Atre hnyawa hi Iehova laka, aja së troa metrötrë së hnene la itre xan, celë hi matre, jëne la Wesi Ula, Nyidrëti a ithuecatre koi së troa “pi pa troa atrune la kete.” (Rom. 12:10; e jë la Mataio 7:12.) Ame la kola wanga atrune la eamo celë hnene la itre Keresiano asë, tre, angatre hi lai a sajuëne la ihnim memine la hni ka keukawa e hnine la lapa ne la itre trejine Keresiano. Qa ngöne lai, loi e tro sa pane isa thele ka hape, ‘Eue lo eni a metrötrëne la ketre trejine me eni e hnine la ekalesia, hnene la aqane ewekëng me aqane ujënge pena?’—Rom. 13:8.

Hnëqa Së Asë Hi La Troa Iatruny

13. (a) Drei la ka troa amamai tulu göi troa atrune la ketre?(b) Nemene la hna amamane hnene la trenge ewekë i Paulo ngöne Roma 1:7?

¹³ Drei la ka troa amamai tulu göi troa atrune la ketre atr? Ame ngöne la tusi nyidrë koi angetre Heberu, Paulo a qaja la itre qatre thup Keresiano, ka hape, angatr la itre “meken”. (Heb. 13:17) Nyipici, angatre hi la ka elemekene la itre huliwa ka nyimutre. Ngo pine laka itretre thupë mamoe angatr, haawe, nyipi ewekë tro angatr a amamai tulu göi troa atrune la itre trejin, tune mina fe lo itre xaa qatre thup. Drei la ketre ceitun, ame la kola icasikeu hnene la itre qatre thupe göi troa ce wange la itre aja ne la ekalesia, angatr a atrune la ketre hnene la hna drenge la itre mekune hna qaja hnene itre xaa qatre thup. Nge angatre fe a atrune la ketre, hnene la hna wanga atrune la aqane waiewekë me itre mekune ne la itre qatre thup asë ngöne la kola axecië mekun. (Ite hu. 15:6-15) Ngo loi e tro sa mekune hnyawa laka, ame la tusi Paulo koi angetre Roma, tre, thaa thatraqai itre qatre thupe hmekuje kö, ngo thatraqane fe la ekalesia asë. (Rom. 1:7) Haawe, thatraqa së asë hi enehila la ithuecatr, ene la troa amamai tulu göi troa atrune la ketre.

14. (a) Hamëne jë la ketre ceitun matre troa amamane la eisapengönene la troa atrune la ketre memine la troa amamai tulu göi troa atrune la ketre. (b) Nemene la hnyinge nyine tro sa isa xom?

¹⁴ Hanawange la ketre mekune ka eje ngöne la eamo i Paulo. Thaa nyidrëti hmekuje kö a upe la itre trejine ne Roma troa atrune la ketre atr, ngo tro fe a amamai tulu ngöne la götrane cili. Nemene la eisapengönene lai? Hanawange la ketre ceitun. Hapeu, tro kö la atre hamë ini a upe la itre ka ini nge ka inamacan, troa inine e tus? Ohea. Itre ka e tusi hë angatre lai. Ngo angeice pe a xatuane la itre ka ini troa e hnyawa. Ketre tune mina, ame la troa ihnimikeu, tre, celë hi la ka upi së troa atrune la ketre, nge celë hi hatrene la itre nyipi keresiano lai. Ngo tune la itre ka ini laka, angatr a thele troa maca troa e tusi hnyawa, haawe, ketre tu së mina fe, easa thele tro sa amamai tulu hnyawa göï troa atrune la ketre atr. (1 Thes. 4:9, 10) Ame la hnëqa cili, tre, hna hamëne koi së isa ala cas. Hapeu, epuni kö a xome la itre ijine ka ijij troa atrune la itre xaa atrene la ekalesia i epun?

Atrune Jë “La [Itretre] Ipië”

15, 16. (a) Ame la easa thele troa atrune la itre trejin, drei la itre hne së hna troa hane wangatrun, nge pine nemen? (b) Nemene la ka troa amamane koi së laka, easa nyipi metrötrëne la nöjei trejine me easë?

¹⁵ Ame la easa thele troa atrune la itre atrene la ekalesia, tre, thaa tro pi kö sa thëthëhmi drei? Wesi Ula i Akötresie a qaja, ka hape: “Ame la ate hnime la ate pë ewekë, te, kola pane hamëne koi Iehova ; nge tro anganyidëti a të la huliwa i angeic.” (Ite edomë 19:17) Kola ketri së tune kaa hnene la trepene meköti celë ngöne la easa catre amamai tulu troa hane atrune la itre xan?

¹⁶ Nyipici laka canga nyimenyime hi la atr troa atrune la itre xan ka cilëne la itre götrane qa ka tru, tune la itre maseta, ngo ame pë hë lo itre hne së hna mekune, ka hape ka co, easë pë hë a wanga aconyi angatr, nge thaa hane kö së metrötrëangatr. Thaa ka ujë tune kö Iehova lai. Öni Nyidrëti ka hape: “Tro ni a atrunyi angat’ anget’ atrunyi ni.” (1 Sam. 2:30; Sal. 113:5-7) Iehova a atrune la nöjei atr ka nyihlue i Nyidrë me ka atrunyi Nyidrë. Thaa sihngödri kö koi Nyidrë “la [itretre] ipië.” (E jë la Isaia 57:15; 2 A. l. ite jo. 16:9) Nyipici laka easa ajane troa nyitipu Iehova. Haawe, maine easa ajane troa atre la pengö së, laka, ka nyipici kö la aqane atrune së la itre trejin, loi e tro sa isa thele ka hape, ‘Nemene la aqane ujëng kowe la itre ka pë hnëqan, maine pena kowe lo itre trejin ka thaa mama kö e hnine la ekalesia?’ (Ioane 13:14, 15) Troa amamane hnene la aqane sa së la hnyinge celë, la etrune la metrötre së kowe la itre xaa trejin.—E jë la Filipi 2:3, 4.

Easa Atrune La Ketre Atr Hnene La Hna Nue La Traeme Së

17. Nemene la sipu aqane tro sa amamai tulu göi troa atrune la ketre, nge pine nemene lai?

¹⁷ Nemene la sipu aqane tro sa amamai tulu göi troa atrune la itre trejin asë e hnine la ekalesia? Loi e tro sa nue la traeme së matre tro sa hane xatua angatr. Pine nemene lai? Hnene laka itre Keresiano së, ene pe nyimutre la itre jole së, nge nyimu hawa hne së fe hna nue thatraqane la itre huliwa ka sisitria ne la ekalesia. Haawe, easa goeëne la traeme ceitu me ketre ewekë ka sisitria. Qa ngöne lai, atrehmekune hi së laka thaa tro kö sa xom atrune pala ha la traeme ne la itre trejine me easë. Ketre tune mina fe, easa madrine ngöne la kola trotrohnine hnene la itre trejin, laka thaa tro kö angatr a xome menune pala ha la traeme së.

18. Tune la hna amamane ngöne la iatr ne la götrane 18, tune kaa la aqane tro sa amamane la aja së troa nue la traeme së kowe la itre trejine me easë?

¹⁸ Ngo atrehmekune hnyawa hi së (easë itretre thup e hnine la ekalesia), laka ame la easa pane canga amë la itre huliwa së matre troa nue la traeme së kowe la itre trejine me easë, tre, kolo hi lai a amamane laka easa metrötrë angatr. Tune kaa lai? Ame la easa pane amë la itre huliwa së matre troa nue la traeme së kowe la itre trejine me easë, tre, kösë easë hi lai a qaja koi angatr, ka hape, ‘Pine laka ka sisitria nyipunieti koi ni, ene pe nyipi ewekë tro ni a pane nue la traemeng thatraqai nyipunie hune la tro ni a sisedrëne la itre sipu joleng.’ (Mar. 6:30-34) Ketre, maine tro pena sa cile hnö, nge thaa pane amë kö la itre huliwa së matre troa nue la traeme së kowe la trejine me easë, maine jë tro angeic a mekune, ka hape, thaa ka nyipi ewekë kö angeic koi së. Nyipici laka, ame itre xaa ijin, thatreine kö së troa nue la itre jole së, ke, nyipi ewekë pala ha itre ej. Tro ha mama jëne la hni ne ajane së maine aqane cile hnö së troa nue la traeme së koi itre xan, laka, atraqatre la metrötre së kowe la itre trejine me easë.—1 Kor. 10:24.

Loi e Xecie e Kuhu Hni Së Troa Amamai Tulu

19. Nemene la ketre aqane tro sa hane atrune la itre trejine me easë?

¹⁹ Hetrenyi la itre xaa aqane tro sa atrune la itre trejine me easë. Drei la ketre ceitun, ame ngöne la easa nue la traeme së koi angatr, tre, loi e tro mina fe sa wanga atrunyi angatr. Iehova hmaca kö a amamai tulu ngöne la götrane cili. Öni Davita, ka hape: “Eje la lue xajawa i Iehova hui ange ka meköt, nge ame la lue hnashama i nyidë, te, kola shamatine la nine hë i angat.” (Sal. 34:15) Easa catre nyitipu Iehova hnene la hna wanga atrune la itre trejine me easë ka sipo ixatua koi së, me hane wai pengöi angatr me drei angatr. Maine tro sa ujë tune lai, haawe, easë hi lai a hane atrunyi angatr.

20. Nemene la itre ewekë nyine tro sa hnehen matre troa xatua së troa hane atrune fe la itre xan?

²⁰ Tune la hne së hna ce wange hë, easa ajane troa lapa mekune la kepine matre tro sa nyipi metrötrën la itre trejine me easë. Ketre, easa thele ijine troa pane canga atrune la itre trejine asë, tune mina fe lo itretre ipië. Maine tro sa trongëne la itre eamo celë, tro hë sa acatrene la otrene ihnimi ka iothekeu së itre trejin, memine la caas ka eje e hnine la ekalesia. Qa ngöne lai, catre jë së troa atrune la itre atr, nge sisitria catre kö e troa amamai tulu göi troa atrunyi angatr. Hapeu, xecie kö e kuhu hni së laka, tro sa ujë tune lai?

[Ithueamacany]

Mekune Pala Kö Nyipunie?

• Nemene la ka iothekeune la lue hnëewekë celë, ene la atrune me metrötr?

• Nemene la itre kepine ka upi së troa atrune la itre trejine me easë?

• Pine nemene matre nyipi ewekë tro sa atrune la itre xaa atr?

• Nemene la itre aqane tro sa atrune la itre trejine me easë?