Loi e Tro Sa Atrunyi Iehova Memine La Hupuna i Nyidrë
Tune Kaa La Aqane Troa Kepe Thangane Hnyawa La Drai Ne Amekunën e Drai 8 Eipereme Hnene La Nöjei Atr Ka Troa Sine Ej
1 Drei la itre atr hna atrune me haine enehila? Kolo itre ka kuca la itre ewekë ka draië kö hune la nöjei ewekë hna majemine kuca hnei atr. Ngo ame pe, ke, canga thëthëhmine hi së la itre ewekë cili. Ngo hapeue la itre ewekë hna kuca, nge hna troa kepe thangane hnene la nöjei atr asë? Ngöne la itre ewekë cili, hetrenyi la itre ka sisitria nyine tro së a wangatrune hnyawa ngöne la easë a troa atrune la Pui Ne Xeni Ne La Joxu, ngöne jidri ne drai 8 Eiperem 2001.
2 Drei la nyine tro sa atrune catrën? Tusi Hmitrötre a sa ka hape: “Ijiji enëtilai [Iehova] . . . troa kapa la nyine atrun, me nyine adraiën, me men; ke hnei enëtilai hna xupe la nöjei ewekë asëjëihë.” (Hna ama. 4:11) Iehova hi la Atre Ixup, matre Nyidrëti hi la musi ka draië ekoho hnengödrai me e celë fen. Loi e troa atrunyi Nyidrëti epine palua!—1 Tim. 1:17.
3 Hnene la itre ewekë ka tru hna kuca hnei Iesu Keriso, Hupuna i Akötresie, hna aijijëne la nöjei atr troa kapa elanyi la itre manathithi ka pë pun. Ka pexeje hnyawa la aqane xome nyidrë la tulu ne la Tretretro i nyidrë. (Ioane 5:19) Hna aijijë nyidrë jëne la aqane drengethenge nyidrë ka pë ethan, me aqane huliwa nyipici nyidrë “troa kapa la men, me tenga mo, me inamacan, me cat, me atrun, me lolo, me ole.” (Hna ama. 5:12) Haawe, hnei Tretretro i nyidrë hna acili nyidrë troa Joxu, matre nyine adraië nyidrë. (Sal. 2:6-8) Ketre ijiji së fe tro sa atrunyi Tretretroti memine la Hupuna, ngöne la easë a hane sine la Pui Ne Xeni Ne La Joxu e jidri ne 8 Eiperem 2001.
4 Jole pi hë koi së troa wange laka, tha ala nyimu kö ngöne la mele ne la atr la itre ka atrunyi Iehova me Hupuna i Nyidrë. Ame mina fe la nöje i Akötresie ekö, ene la angetre Isaraela, ke, hna traqa fe la itre ijine hnei angatre hna nyihlue Iehova, ngo thaa qa kö kuhu hni angatr. Ketre aqane ujë lai ka ngazo, nge ka pëkö caa metrötre ngön. (Mal. 1:6) Kola thele thene la atr ka metrötr, la nyipi drengethenge, nge hna nyitrepene hnene la ihnim, me hnene la ole kowe la nöjei ewekë hna kuca hnei Iehova me Hupuna i Nyidrë koi së. Ame la iatrunyi cili me metrötr, ke, kolo lai a hape, tro sa xoue Akötresie, me metrötr, nge easë fe a amamane laka, Iehova me Iesu a ce me easë ngöne la nöjei jë së. Haawe, kola catre hnene la ekalesia i Keresiano, troa inine me xatuane la itre xaa atr troa xome la aqane ujë celë.
5 Ketre Ijine Ka Ketre Pengöne Kö Troa Iatruny: Ketre icasikeu ka tru hune la nöjei icasikeu, la troa sine la Drai Ne Amekunën hnene la nöje i Iehova e nöjei macatre. Loi e tro la nöjei ka hetre ajane troa nyihluei Iehova me atrunyi Nyidrëti, a hane sine ej. (Luka 22:19) Easë a mekune laka, troa elë la etrune la itre ka troa sine la icasikeu cili, a kola troa e la 14 milio lao atr, thaa hnene hmekuje kö la 6 milio lao Temoë, ngo memine fe la itre atr ka hni ne ajane kowe la nyipici. Drei la ketre ijine ka lolo, troa atrune la Tretretro së e koho hnengödrai! Haawe, pine laka kola qaja atrunyi Iesu ngöne la ijine cili, tro la aqane metrötre së me ole së kowe la hna kuca hnei Iesu, a atrune la Tretretro, ka upi nyidrë.—Ioane 5:23.
6 Nemene la nyine tro sa kuca matre troa sajuëne la ijine cili ka ketre pengön? Ijije tro sa xatuane la itre ka xötrei atre la nyipici, matre troa kepe thangane hnyawa. Loi e tro sa xatua angatre troa hane sine la ijine cili, nge maine ijije ke, qaja hnyawane jë koi angatre ka hape, tro sa itrothei maine wai loto i angatre pena. Loi e tro sa qejepengöne la aliene la cainöje hna troa hamën. Tro fe sa tro sai angatre koi itre xaa trejine me easë, matre troa hane atre angatr. Jëne la hnei angatre hna goeëne me dreng, haawe kola upi angatre troa thel, matre caasi me easë troa ce atrunyi Iehova.
7 Thaa tro kö sa wangacone la thangane ka loi, hna troa kapa qa ngöne la porogaram. Hanawange la mekune ne la ketre atr ka ini ngöne université kola hape: “Anyimua sine ni la itre ijine Communion ngöne la uma ne hmi eni, ngo ka ketre pengöne kö la ijine celë. Eni a öhne laka, eje hnyawa hi lo hna qaja hnei Tusi Hmitrötr, nge eni a mekune laka, thei nyipunie la nyipici.” Qa ngöne lai, thaa paatre kö angeice ngöne la nöjei icasikeu, nge thaa qea ju kö, nge kola bapataiso angeic.
8 Loi e Tro Sa Xatuane La Itre Ka Xötrei Atre La Nyipici Troa Kökötre Ngöne La Ua: Loi e tro sa thele troa atre hnyawa la itre ka xötrei sine la Drai Ne Amekunën, me canga wai angatre hmaca thupen, matre ce goeëne hmaca me angatre la itre ewekë ka ithuecatre hne së hna inin, me trongën. Loi e tro fe sa xatua angatre troa wangatrune la itre xaa icasikeu, ke, jëne tro fe angatre lai a akökötrene la atrehmekune i angatre qa hnine la Tusi Hmitrötr. Maine tro sa ce wange me angatre la mekene 17 ne la itus Atrehmekune, hna hape “Thele Jë La Lapa Xetietë Thene La Nöje i Akötresie,” ke, tro lai a amamai angatre la emanane la xeni ne ua hna hamëne jëne la ekalesia, nge thaa jole kö koi angatre troa kapa itre ej. Tro fe sa ce wange la ijine matre troa goeëne la video hna hape, Les Témoins de Jéhovah : un nom, une organisation matre atreine tro angatre a ketre sipu öhne la caas, me madrin, me aqane catre hnene la nöje i Iehova!
9 Nyipi ewekë catre troa atre hnene la itre atr ka hetre hni ne ajan, la aqane tro angatre a ketre sipu amamane la aqane tro angatre a metrötrë Iehova me atrunyi Nyidrë. Tro fe sa qeje pengöne hnyawa laka, kola amadrinë Iehova la thithi hne së hna qaja qa kuhu hni së, nge ketre qeqe ne ithuecatre pala hi ngöne la ua. (1 Ioane 5:14) Loi e tro sa xome la ini 8 uti hë la ini 12 ngöne la boroshüre Thele, me qejepengöne koi angatre la thiina ka loi, nge ka atrunyi Iehova. Maine tro sa ithahnatane la itre mekune hna cinyihane e hnine la boroshüre Les Témoins de Jéhovah, götrane 30-1, ke, loi e tro sa xatuane la itre ka xötrei atre la nyipici, matre tro angatre a isa mekune la aqane tro angatre a atrunyi Iehova, ene la troa xome la huliwa ne cainöj.
10 Tro la aqane kapa madrine së la huje i Iesu, memine la hnëqa ka eje the së itretre drei nyidrë, troa nyihluene me atrune la Tretretro, me hamëne la itre manathithi kowe la itre xaa atr. Hnei Iesu hna thingehnaeane ka hape: “Maine kete ate a nyi hlueng, tro ha atrunyi angeice hnei Tetetro.”—Ioane 12:26.