1925​—100 Hë Lao Macatre

THA EATRE JU KÖ LA MEKUNA I ANGATR

Kola mekune hnene la Itretre Ini Tus ka hape, troa aparadraisone la ihnadro lo 1925. Pine nemen? Öni trejin Albert Schroeder, ka troa sine la Lapa Ne Xomi Meköt e thupen ka hape: “Eahun a mekun ekö laka, tro la itre hna iën a elë e hnengödrai matre sine la Baselaia. Nge tro fe a amelene la itre hlue i Iehova, tui Aberahama, me Dravita me itre xan e celë fen, matre troa joxu fene la musi ne la Baselaia ne hnengödrai.” Kola tro la itre treu, nge itre xan a öhne laka, tha eatre ju kö la mekuna i angatr, matre angatr a dekurag.​—It. Ed. 13:12.

Ngacama angatr a dekurag, ngo alanyimu la Itretre Ini Tus ka catre cainöj. Angatr a trotrohnine laka, ame la ka nyipiewekë catr, ke ene la troa cainöjëne la ëje i Iehova. Tro sa ce wang la hnei angatr hna kuca, matre troa haöth la fen hnene la nyipici.

ITRE STASIO RADIO KA HNYIPIXE

Hetre thangane catr lo radio WBBR lo macatre hnapan, matre hnene la Itretre Ini Tus hna xup la ketre stasio ne radio ezine Chicago (Illinois). Ijije hi tro fe a hane dreng hnene la itre ka lapa gaa nany. Hna hëne la stasio cili ka hape, WORD. Öni Ralph Leffler, ketre ingénieur ka hane xupe la stasio cili ka hape, “Ame ngöne lo itre ijine hnötr, göi drenge fe hnene la itre ka lapa gaa nany lai radio WORD.” Hnene la ketre fami ka lapa e Pilot Station (Alaska,) hna hane dreng la radio lo kola xötrei mama. Thupene lai, hnei angatr hna cinyany kowe la itre ka huliwa ngöne stasio, matre olen kowe la porogaram ka ithuecatr.

Kola qejepengöne la radio cili ngöne la Ita Ne thup qene Papale ne 1 Diseba 1925. Ej a hape: “Ame la émetteur i WORD, ke traqa koi 5 000 watts, matre celë hi ketre radio ka tru e Etazini. Easë ju hë e Alaska maine Cuba, ngo drenge hi easë. Jëne la stasio cili, alanyimu la itre atr ka drenge la nyipici, nge ka ajane troa atre la itre xaa ithuemacany.”

Ame ngöne la ijine cili, hnene la Itretre Ini Tus hna catre cainöjëne la maca ka loi e Canada jëne radio. Ame lo 1924, hnei angatr hna xup lo stasio ne radio CHUC e Saskatoon (Saskatchewan). Kolo hi lo ketre pane radio ka qeje hmi e Canada. Ame lo 1925, hnei angatr hna xome la stasio qa cili me amë ngöne lo batima Regent. Ketre uma ne cinéma ekö hna itön me nyinyawan göne lai.

Jëne la stasio cili, alanyimu la itre atr ka lapa ngöne la itre götrane gaa nany ne Saskatchewan, ka hane dreng la maca ka loi. Thupene la hna dreng la radio, hnene la ketre föe, Mme Graham, ka lapa ngöne la ketre götran gaa nany hna cinyany matre sipone la itre itusi së. Öni trejin George Naish ka hape, “Kösë eahlo a sipo ielen ka hape, ‘Ini huni jë!’ Öhne hi eahun laka, tru la aja i eahlo, matre hnei eahun hna iupi fë la itus Études des Écritures.” Tha hmitre ju kö, nge Mme Graham a cainöjën la maca ne la Baselaia ngöne la itre götran gaa nany hmaca kö.

ITRE INI KA HNYIPIXE

Ame ngöne la Ita Ne Thup ne 1 Maac 1925, hna mama la ketre tane mekun ka nyipiewekë, hna hape “Nöj Ka Hnyipixe.” Pine nemen matre ka nyipiewekë la tane mekune cili? Ame ekö, atre hë la Itretre Ini Tus laka, hetre organizasio i Satana hna nyiatren hnene la itre u ka ngazo e hnengödrai, me itre hmi, me itre ka salem me itre politik e celë fen. Ngo jëne la tane mekune cili, hnene la “hlue ka nyipici me ka inamacan” hna xatuane la itre trejin troa trotrohnine laka, hetre organizasio i Iehova fe, ka isapengöne kö memine la organizasio i Satana, nge ka icilekeu me ej. (Mat. 24:45) Ketre, hnene la hlu hna qaja ka hape, ase hë acile la Baselaia i Akötresie lo 1914. Nge ame ngöne la macatre cili, “hna isi e hnengödrai,” matre hna helë Satana me itre dremoni a tro e celë fen.​—Hna Am. 12:​7-9.

Tha kapa kö itre xan la ini ka hnyipixe. Matre hna qaja ngöne la Ita Ne Thup cili ka hape: “E tha kapa kö epun la hna qaja e celë, ke kola sipo epun troa itreqe me catre mejiune koi Iehova.”

Ngo hnei Tom Eyre ketre pionie qa Grande-Bretagne, hna qaja la aqane kapa la Itretre Ini Tus Hmitrötr la ini ka hnyipixe. Öni nyidrë: “Tru la madrine la itre trejin la angatr a drenge la aqane qejepengöne la tusi Hna Amaman 12. Pine laka, trotrohnine hë eahun laka, ase hë acile la Baselaia e hnengödrai, tru la aja hun troa thawa me itre xan la maca ka loi cili. Celë hi ka uku eahun troa catre cainöj me öhne la aqane eatrongëne Iehova la nöje i Nyidrë.”

NYIPIEWEKË TROA ANYIPICI IEHOVA

Ame enehila, atre catr la itre Temoë Iehova la hna qaja ngöne Isaia 43:10 ka hape: “ ‘Epuni la itre temoëng,’ öni Iehova, ‘Eje hi, lo hlueng hnenge hna iën.’ ” Qëmekene la macatre 1925, tha nyipi mama kö la aliene la xötre celë. Ngo ame hë lo 1925, hnene la Ita Ne Thup hna qejepengöne la tusi Isaia 43:10 me 12 ngöne la 11 lao tane mekun!

Ame lo Ogas 1925, hnene la Itretre Ini Tus hna sine la ketre asabele e Indianapolis (Indiana). Hna cinyanyine ngöne la porogaram la itre hna qaja hnei Joseph Rutherford hna hape: “Eahuni a sine la asabele celë matre kapa . . .  la trengecatr qaathene la Joxu, ka troa xatua së troa catre cainöj, me anyipici Nyidrë.” Ame ngöne la 8 lao drai ne asabele, hna ithuecatr kowe la itre ka dreng troa catr qeje Iehova ngöne la nöjei götrane hnei angatr hna tro kow.

Ame lo Mecixen 29 Ogas, hnei Trejin Rutherford hna cile fë la cainöj hna hape, “Cile Jë.” Hnei nyidrë hna amamane la enyipiewekën troa cainöjëne la ëje i Iehova. Öni nyidrë: “Öni Iehova kowe la nöje i Nyidrë . . . : ‘Epuni la itre temoëng. . . nge eni la Akötresi epun.’ Thupene lai, hna mexem la ketre hna amekötin ka hape: ‘Acile jë la ketre hatren thatraqane la itre nöj.’ Pëkö ketre atr e celë fen ka acile la ketre hatren thatraqane la itre nöj, ngo itre [hlue i Nyidrë] hmekuj, itre ka kapa la ua i Joxu, nge ka anyipici Nyidrë.”​—Isa. 43:12; 62:10.

Thupene la cainöje i Trejin Rutherford, hnei nyidrë hna e la ketre tus hna hape, “Maca Ne Mejiun.” Ej a qaja ka hape, Baselaia i Akötresie hmekuje hi la jëne troa kapa “la itre manathith qaathei Joxu, me tingeting, me lolo, me mel, me inuegufan, me madrin ka epine palua.” E thupen, hna ujën la tarak cili ngöne la nyimu qene hlapa, me fejan. Traqa koi 40 milio lao tarak hna hamën koi itre atr.

Ngo hnene la Itretre Ini Tus hna xom la ëj Temoë Iehova itre macatre thupen. Ame pe, trotrohnine hë angatr la hnëqa i angatr, ene la troa anyipici Iehova.

EAHUNI A IWAI HMACA

Pine laka, kola elë la etrune la itre ka cainöj ngöne la fen, matre hna ithuecatr koi angatr troa wange hmaca la itre atr hna ketr hnene la maca ka loi. Thupene la hna trofë lo tarak Maca Ne Mejiun, hnene la zonal Bulletina hna qaja ka hape: “Tro hmaca jë a wang la itre atr ka kapa lo tarak Maca Ne Mejiun.”

Hane hi la hna qaja hnene la ketre trejin qa Plano (Texas) ngöne la zonal Bulletin ne Januare 1925: “Eahuni a haine ke, nyimutre la itre atr ka kapa la maca ka loi ngöne la itre teritoar hna trongën lapan, hune la itre teritoar ka hnyipixe. Ame la ketre traon ke, a faif jë kö lao kuca eahun ngöne la 10 lao macatre. . . . Eue hi lo, hnei Trejin Hendrix me nenë hna kuca hmaca la traone cili, nge nyimutre catr la itre itus hnei nyidro hna hamën.”

Hane hi la hna qaja hnene la ketre pionie e Panama: “Alanyim la itre atr ka helë ni ekö, ngo saze hë la eni a alu maine akönia wai angatr. Ame la huliwang la macatre ce, ke troa wang hmaca la itre atr hnenge hna porotrik memin. Nge tha fene lolo kö la porotrike hun.”

KOLA GOEËN LA ITRE DRAI KA CALEMI

Ame ngöne la tusi Trejin Rutherford koi itre pionie, hnei nyidrë hna qaja la huliwa hna eatrëne lo macatre ka ase hë, me itre nyine tro pala kö a eatrën. Öni nyidrë: “Ame ngöne la macatre ka ase hë, hnei epun hna akeukawan la itre atr ka hleuhleu. Tru la madrine i epun ngöne la huliwa cili . . . Ame ngöne la macatre ka troa xulu, thele jë la itre aqane troa qeje Akötresie me Baselaia, me acili hatren thatraqane la itre nöj. . . . Catre jë së atrune la Akötresi së me Joxu së.”

Ame ngöne la pune la macatre 1925, itre trejin a hnëkë troa atrune la itre batima e Brooklyn. Ame ngöne la macatre 1926, troa nyiqane la ketre projet ka tru ngöne la organizasio i Iehova.