Ka Epine Palua La Ihnimi Akötresie

1-2. Nemene la itre jol ka traqa kowe la itre xaa keresiano?

PANE mekune jë la ketre he nyipine la hnagejë, nge kola hnahna catre la eny. Ase jë hi kapa draiën hnei gejë, me tro fë pi ipië. Tha ka co kö la aqane jume ej. Maine tha hna kuiëne ju la iuhni, tro lai a thenge la he hnei gejë. Iuhni hmekuje hi la ka troa cilaxome la he, matre tha tro kö a hule menune ej.

² Ame la kola jumijumi eö hnei itre jol, ke kösë ceitu eö hi memine lai he. Hetre ijine loi, nge hetre ijine ngazo. Ame enehila, eö a mejiune kowe la ihnim me ixatua i Iehova, ngo ame elany, eö pena a luelu. Kösë tha öhne kö Nyidrë la jol ka traqa koi eö. (Sal. 10:1; 13:1) Maine jë, kola akeukawanyi eö hnene la ketre sinee, nge lolo hmaca eö. (It. Ed. 17:17; 25:11) Ngo ame e thupen, eö hmaca a luelu. Ma eö jë a mekun ka hape, tha hnimi eö kö hnei Iehova. Nemene la ka troa “cilaxomi” eö ngöne la itre ijine cili? Nemene la ka troa xatua eö, matre tro pala hi a xecie e kuhu hni eö laka, ce Iehova me eö, nge Nyidrëti a hnimi eö?

3. Nemene la aliene la “ihnimi nyipici” ka mama ngöne Salamo 31:7 me 136:​1, nge pine nemene matre Iehova la tulu göi aqane troa ihnimi nyipici? (Wange ju fe la foto.)

³ Tro eö a cile catr ngöne la itre jol, e tro eö a lapa mekun la ihnimi nyipici i Iehova. (E jë la Salamo 31:7; 136:1.) Ame la “ihnimi nyipici” ke, kola qaja la ihnim ka ej thene la lue atr. Ame la ihnim cili ke, ka jui me ka cilehut. Iehova la tulu göi troa amamane la ihnimi nyipici. Öni Tusi Hmitrötr, “ka tru trenge ihnimi nyipici” Iehova. (Eso. 34:​6, 7) Ketre, ej a hape: “Tru la ihnimi nyipici i nyipë kowe la itre ka hë nyipë.” (Sal. 86:5) Kola hapeue lai? Tha tro kö Iehova a nuetrij la itre hlue i Nyidrë. Maine tro eö a lapa mekun laka, ka nyipici Iehova, tha tro kö a jumijumi eö hnene la itre itupath.—Sal. 23:4.

KETRE INI KA TRU LAI

4. Nemene la itre xaa ini ka tru qa hnine la Tusi Hmitrötr, nge pine nemene matre easa mejiun koi itre ej?

⁴ Ketre, tha tro kö a jumijumi së hnei itre jol, e tro sa lapa atre ka hape, ame la ihnimi Iehova koi së, ke ketre ini ka tru ngöne la hmi së. Nemene la “itre ini ka tru” koi eö? Ma eö jë a mekun la itre ini ka hnyipixe hnei eö hna kapa la eö a inine la Tusi Hmitrötr. Nemene ini? Iehova la ëje i Akötresie, Iesu la nekö hnimina i Nyidrë, pëhë hna atre hnene la itre ka mec, nge tro la itre atr a mele palua ngöne la ihnadro hna aparadraison. (Sal. 83:18; A. Cai. 9:5; Ioa. 3:​16; Hna Am. 21:​3, 4) Qane lo eö a atre la itre ini cili, pëkö ka atreine fej itre ej qa kuhu hni eö. Pine nemen? Ke öhne hi eö laka, ka nyipici itre ej. Maine xecie koi eö laka, ame la ihnimi Iehova koi së, ke ketre ini ka tru, tha tro kö eö a mekun ka hape, tha öhne kö Iehova la itre jol ka traqa koi eö, maine tha nyipiewekë eö kö hnei Nyidrë. Nemene la ka troa xatua eö?

5. Qejepengöne jë la aqane nuetrij la ketre atr la itre ini ka thoi.

⁵ Ame la eö a nyiqane ini Tus, nemene la ka xatua eö troa nuetrij la itre ini ka thoi? Maine jë, hnei eö hna goeëne la hna qaja hnei Tusi Hmitrötr göne la itre ini cili. Pane mekune jë laka, eö ekö a mekun ka hape, Iesu la Akötresie Ka Tru Trenge Men. Ame la eö a ini Tusi Hmitrötr, hnei eö hna hnying ka hape, ‘Ka nyipici kö la ini celë?’ Nge hnei eö hna öhne laka, tha celë kö la hna qaja hnei Tusi Hmitrötr. Matre hnei eö hna nuetrij la ini ka thoi, me kapa la hna qaja hnei Tusi Hmitrötr laka, Iesu la “haetra ne la itre hna xup asë,” “Nekö hnimina i Akötresie.” (Kol. 1:​15; Ioa. 3:​18) Eje hi, ceitune hi la itre ini ka thoi memine “la itre itra etë atraqatr,” ka jol troa akein. (2 Kor. 10:​4, 5) Ngo e kei hë, tha eö hmaca kö a bëeke koi itre ej.​—Fil. 3:​13.

6. Pine nemene matre xecie koi eö laka, “ka epine palua la ihnimi nyipici i [Iehova]”?

⁶ Maine easa luelue laka, Iehova a hnimi së, loi e tro sa xötrethenge lo hne së hna kuca, lo easa xötrei ini Tus. Isa hnyinge jë ka hape, ‘Ka loi kö la aqane waiewekëng?’ Wange ju la hna qaja hnei Tusi Hmitrötr ngöne Salamo 136:​1, lo xötr ka nyitane la tane mekune celë. Hnauëne la Iehova a qaja ka hape, ka “nyipici” la ihnimi Nyidrë? Pine nemene matre a 26 lao qaja ngöne la Salamo ka hape, “ka epine palua la ihnimi nyipici i nyidrë”? Tune la hne së hna ce wang, ame la ihnimi nyipici Iehova kowe la itre hlue i Nyidrë, ke ketre ini ka tru. Ceitune hi memine la itre xaa ini hnei eö hna kapa qa hnine la Tusi Hmitrötr. Ka tria catr la mekun hna hape, tha nyipiewekë eö kö hnei Iehova, nge tha ijije kö tro Nyidrëti a hnimi eö. Lepetrije pi la mekune cili tune la itre xaa ini ka thoi!

7. Qaja jë la itre xötr ka amamane la ihnimi Iehova koi së.

⁷ Itre xaa xötre ne la Tusi Hmitrötr a amamane la ihnimi Iehova koi së. Öni Iesu kowe la itretre dreng: “Nyipiewekë catre kö nyipunie hune la itre sisi ka nyimutre.” (Mat. 10:31) Nge öni Iehova kowe la nöje i Nyidrë: “Tro ni a aegöcatrenyi ö. Eje hi, tro ni a xatua eö, eje hi, tro ni a sajuë eö hnene la ime macang ka meköt.” (Isa. 41:10) Ka lualai hnyawa la hna qaja e celë. Tha hnei Iesu kö hna qaja ka hape, ‘Ma ka nyipiewekë jë epun.’ Nge tha hnei Iehova kö hna qaja ka hape, ‘Ma tro jë ni a xatua eö.’ Öni nyidroti pe: “Nyipiewekë catre kö nyipunie” me “tro ni a xatua eö.” Maine eö a cile kowe la ketre itupath, nge eö a luelu laka, Iehova a hnimi eö, tro la itre xötre celë a akeukawanyi eö. Tro fe itre ej a anyipicine koi eö laka, Iehova a hnimi eö. Ame la itre hna qaja ngöne la itre xötr ke, ka nyipici. Maine tro eö a lapa mekune itre ej, me catre thith, ke tro hë eö a jelenyipicine la hna qaja ngöne 1 Ioane 4:​16, hna hape: “Ame hne së hna atre, me mejiune laka, Akötresieti a hnimi së.”a

8. Nemene la nyine tro sa kuca e easa luelu laka, Iehova a hnimi së?

⁸ Nemene la nyine tro eö a kuca, e eö pala hi a luelu laka, Iehova a hnimi eö? Wange ju la hnei eö hna mekun memine la hnei eö hna atre. Eje hi, ka lapa saze la itre mekuna së. Ngo ame la ihnimi Iehova, ke ketre nyipici hna qaja hnei Tusi Hmitrötr. Maine easa mekun ka hape, tha hnimi easë kö hnei Iehova, easë hi lai a thëthëhmine laka, ihnim la thiina ka sisitria i Nyidrë.​—1 Ioa. 4:8.

LAPA MEKUNE JË LA IHNIMI IEHOVA KOI EÖ

9-10. Nemene lo hnei Iesu hna ithanatane lo nyidrëti a hape, “Kakati fe a hane hnimi nyipunie” ngöne Ioane 16:​26, 27? (Wange ju fe la foto.)

⁹ Loi e tro fe sa ce wang lo hnei Iesu hna qaja kowe la itretre dreng: “Kakati fe a hane hnimi nyipunie.” (E jë la Ioane 16:​26, 27.) Tha Iesu kö a thel troa akeukawanyi angatr. Kola amamane ngöne la itre xötr laka, Iesu a ithanatane la thith.

¹⁰ Iesu a qaja koi angatr laka, loi e tro angatr a thith ngöne la ëje i nyidrë, ngo tha tro kö a thithi koi nyidrë. (Ioa. 16:​23, 24) Nyipiewekë tro angatr a trotrohnine hnyawa lai. Pine nemen? Ke thupene la kola amele nyidrëti hmaca, ma tro jë angatre lai a thithi koi nyidrë. Eje hi, itre tremesineene hë angatr me Iesu. Matre tro angatr a mekun ka hape, tro nyidrë a dreng la itre thithi angatr, me xëwesai angatr koi Iehova. Ngo, hnei Iesu hna hmekë angatr ka hape, tha tro kö a mekun tune lai. Pine nemen? Öni nyidrë: “Kakati fe a hane hnimi nyipunie.” Tru catr la ihnimi Iehova koi së, nge aja i Nyidrë troa dreng la itre thithi së. Celë hi ketre ini ka tru ne la Tusi Hmitrötr. Kola hapeue lai koi eö? Nyipici laka, ame la eö a ini Tusi Hmitrötr, hnei eö hna atrepengöi Iesu hnyawa, me hnimi nyidrë. (Ioa. 14:21) Ngo loi e tro eö a thithi koi Akötresie, tune la itretre dreng, ke Nyidrëti a “hane hnimi” eö. Ame la eö a thithi koi Iehova, eö hi lai a amamane la mejiune i eö kowe lo hna qaja hnei Iesu.​—1 Ioa. 5:​14.

QANE LA LUELU

11. Pine nemene matre ka madrine Satana la easa mekun ka hape, tha hnimi easë kö hnei Iehova?

¹¹ Drei la ka aciane the së la luelu? Ma easa canga meku Satana, nge nyipici hi lai. Madri catre Satana lo “ka thele tha,” tro sa mekun ka hape, tha Iehova kö a hnimi easë. (1 Pet. 5:8) Ihnimi Iehova la ka uku Nyidrë troa hamëne la thupene mel, ngo aja i Satana tro sa mekun ka hape, tha ijiji easë kö troa kapa. (Heb. 2:9) Drei la ka madrin la easa luelu? Satana. Nge drei la ka madrin la easa dekurag me nuetriji Iehova? Satana pala hi lai. Angeic a ajan tro sa mekun ka hape, tha hnimi easë kö hnei Iehova. Ngo ka tria la mekune cili. Angeice pe la hnei Iehova hna xele ma wang. Eje hi, ketre “nyinyithiina” i angeice lai tro sa mekun ka hape, xele kö Iehova ma wai së. (Efe. 6:​11) Maine atre hë së la itre nyinyithiina i angeic, tro së lai a catre “icilekeu” me angeic.​—Iako. 4:7.

12-13. Hnauëne la easa qaja ka hape, easa luelu ke, itre atr ka ngazo së?

¹² Ame la ketre kepin matre easa luelu, ke itre atr ka tha pexeje kö së. (Sal. 51:5; Roma 5:​12) Hnene la ngazo hna ananyine la itre atr me Akötresie. Ketre, hna angazone la mekun, me hni, me ngönetrei angatr.

¹³ Hna angazone fe la aliene hni ne la atr. Celë hi matre, ame la easa kei kowe la ngazo, kola huliwa la mekuthetheu së, nge easë fe a seseu, me xou me hmahma. Ngo ame itre xaa ijin, hna traqa xan la itre mekune cili, ke öhne hi së la pengö së ka ngazo, nge tha celë kö aqane xupi së ekö. (Roma 8:​20, 21) Ceitu së memine la ketre loto laka, tha ka nyiape catre kö ke, ka uqa la wiil. Pine laka, itre atr ka tha pexeje kö së, matre tha easë kö a huliwan asë la atreine së, lo hnei Iehova hna amë the së ekö. Celë hi matre, ame itre xaa ijin, easa luelu. Ame ngöne la itre ijine cili, mekune hnyawa ju së laka, Iehova la “Akötresie ka draië nge nyine xouen . . . ka amamane la ihnimi nyipici nyidrë kowe la itre ka hnimi nyidrë, nge ka trongëne la itre wathebo i nyidrë.”​—Neh. 1:5.

14. Pine nemene matre ame la easa lapa mekun la thupene mel, kola xatua së troa lepetrij la luelu? (Roma 5:8) (Wange ju la hna eköhagen “Mekune Kö Laka Hetre Emenene La Ngazo.”)

¹⁴ Hna hane traqa fe koi së troa mekun ka hape, tha ijiji së kö troa kapa la ihnimi Iehova. Nge ka nyipici hi lai, ke pëkö hne së hna kuca matre tro Nyidrëti a hnimi së. Celë hi matre, ka ketrepengöne kö la ihnim cili. Hnene la ihnimi Iehova koi së, matre hnei Nyidrëti hna hamëne la thupene mel nyine he la itre ngazo së. (1 Ioa. 4:​10) Ketre, hnei Iesu hna uti kowe la fen troa amelene la itre atr ka ngazo, ngo tha itre atr ka pexeje kö. (E jë la Roma 5:8.) Atre hnyawa hi Iehova laka, pëkö ala cas thei easë ka pexej, me ka kuca pala hi la meköt. Maine trotrohnine hë së laka, ngazo la ka aciane the së la luelu, tha tro kö sa nue ej troa musinëne la itre mekuna së.​—Roma 7:​24, 25.

IËNE JË TROA MELE NYIPICI

15-16. Nemene la thangane e tro sa mele nyipici koi Iehova? Nge pine nemen matre loi e xecie koi së laka, Iehova a hnimi së? (2 Samuela 22:26)

¹⁵ Aja i Iehova tro sa iëne la mel, me “fedre koi nyidrë.” (Dreut. 30:​19, 20) E tro sa fedre koi Nyidrë, tro kö Nyidrëti a nyipici koi së. (E jë la 2 Samuela 22:26.) Nge e tro sa mele nyipici koi Nyidrë, tro kö Nyidrëti a xatua së ngöne la nöjei jol hne së hna cile kow.

¹⁶ Tune la hne së hna ce wang, loi e xecie koi së laka, Iehova a hnimi së, nge celë hi ka troa “cilaxomi” së ngöne la itre itupath. Atre hi së jëne la Tusi Hmitrötr laka, Iehova a hnimi së me xatua së. Maine easa luelu, lapa mekune jë la itre hne së hna atre, ngo the mejiune kö kowe la itre mekuna së. Loi e xecie koi së la hna qaja hnei Tusi Hmitrötr laka, ka epine palua la ihnimi nyipici Iehova.