Loi e Xecie Koi Eö Laka Iehova a Hnimi Eö

1. Pine nemene matre eö a nue la mele i eö koi Iehova (Wange ju fe la foto.)

MEKUNE hi eö lo ijin ea axeciëne e kuhi hni eö troa nue la mele i eö koi Iehova? Ame la ea xome la mekune cili, ke hnei eö hna pane inine troa atre Nyidrë me hnimi Nyidrë. Hnei eö hna sisiny koi Nyidrë troa amë panën la aja i Nyidrë ngöne la mele i eö me catre hnimi Nyidrë, hnene la hni eö ka pexej, me mekuna i eö ka pexej, me trengecatre i eö ka pexej. (Mar. 12:30) Qane ju hi lai, kolo pala hi a kökötr la ihnimi eö koi Nyidrë. Tro eö a sa tune kaa, e kola hnyinge koi eö ka hape, “Eö kö a hnimi Iehova?” Canga tro hi eö a sa ka hape, “Pëkö ketre atr hnenge hna hnim hui Nyidrë!”

2-3. Nemene la hnei Iehova hna ajane troa xecie e kuhu hni së, nge nemene la hne së hna troa ce wang ngöne la tane mekun celë? (Ieremia 31:3)

² Ngo tro eö a sa tune kaa, e kola hnyinge koi eö ka hape, “Xecie kö koi eö ka hape, Iehova a hnimi eö?” Hapeu, eö kö a luelu troa sa la hnyinge cili, ke eö a mekune ka hape, tha ijiji Nyidrëti kö troa hnimi eö? Önine la ketre trejin föe, hna tha hnime kö lo angeic a nekönatr, ka hape: “Xecie hi koi ni laka, eni a hnimi Iehova ngo ame e xaa ijin, eni a hnyinge ka hape, Iehova kö a hnimi ni?” Nemene la ka troa xatua eö troa atre la aliene hni Iehova?

³ Aja i Iehova troa xecie koi eö laka, Nyidrëti a hnimi eö. (E jë la Ieremia 31:3.) Pane mekune jë la: Hnei Nyidrëti hna huli eö koi Nyidrë. Nge ame hë la eö a nue mele koi Nyidrë me xomi bapataiso, ke Nyidrëti hi lai a hamë eö la ketre ahnana ka sisitria, ene la ihnimi nyipici Nyidrë. Kolo lai a hape, tru la ihnimi Nyidrëti koi së nge tha tro jë kö Nyidrëti a nuetriji së. Tru catr la ihnimi Iehova kowe la itre hlue i Nyidrë. Itre “ka tru alameken” angatr koi Nyidrë, ketre tui eö fe. (Mal. 3:​17, ith.) Aja i Iehova tro eö a tui Paulo. Xecie hnyawa hi koi angeic ka hape, Iehova a hnimi angeic matre öni angeic: “Ka xecie hnyawa koi ni ka hape, thatreine kö la mec, me mel, me angela, me mus, me itre ewekë enehila, me itre ewekë elany, me men, me edraiën, me ejuin, me nöjei ewekë hna xup, troa thepe së qa ngöne la ihnimi Akötresie.” (Roma 8:​38, 39) Ame ngöne la tane mekune celë, tro sa ce wang la kepine matre nyipiewekë tro sa acatren la mekune ka hape, Iehova a hnimi së memine la nyine troa kuca göne lai .

LOI E TROA XECIE KOI EÖ LAKA IEHOVA A HNIMI EÖ

4. Tune kaa la aqane tro sa trian la ketre nyinyithiina i Satana?

⁴ E xecie koi së ka hape, Iehova a hnimi së, ke tro lai a trianyi së qa ngöne la ketre “nyinyithiina” i Satana. (Efe. 6:​11) Satana a kuca asë la hnei angeic hna atrein, matre tha tro hmaca kö së a nyihlue i Iehova. Ame la ketre nyinyithiina i angeic, ke ene la troa qaja la trengathoi laka, tha Iehova kö a hnimi së. The thëthëhmine kö laka, ka iaö lae Satana. Angeic a thele troa akeinyi së la easa kucakuca, tune la easa akötre pine la itre ewekë ka traqa koi së ekö, maine itre jol hne së hna cile kow enehila, me hnehengazone la drai elany. (It. Ed. 24:10) Hna aceitunë Satana me ketre liona ka thele tha thene la ketre öni ka kucakuca. Angeic a thele troa akeinyi së la easa kucakuca. Ngo maine tro sa isine troa acatrene la mekun ka hape, Iehova a hnimi së, ke tro hë së lai a atreine “icilekeu” me angeic me trian la itre nyinyithiina i angeic.​—1 Pet. 5:​8, 9; Iako. 4:7.

5. Pine nemene matre aja së tro Iehova a hnimi së?

⁵ E xecie koi së ka hape, Iehova a hnimi së, ke tro së lai a easeny koi Nyidrë. Hnauëne la easa qaja lai? Hnei Iehova hna xupi së memine la aja troa hnime la itre xan, nge tro fe a hnimi së. Ame la ketre atr a hnimi së, ke kola uku së troa hane hnimi angeic. Matre ame la easa drenge la ihnimi Iehova, ke kola uku së troa hnimi Nyidrë. (1 Ioa. 4:19) Nge ame la kola kökötre la ihnimi së koi Nyidrë, ke kolo fe a kökötr la ihnimi Nyidrëti koi së. Celë hi ka mama ngöne la xötre celë: “Easenyi Akötresieti jë, nge tro nyidrëti a easenyi koi nyipunie.” (Iako. 4:8) Ngo tro sa acatrene tune kaa la mekune ka hape, Iehova a hnimi së?

TROA XECIE TUNE KAA KOI EÖ LAKA IEHOVA A HNIMI EÖ?

6. Maine easa luelu ka hape, Iehova a hnimi së, nemene la nyine tro sa sipone koi Nyidrë?

⁶ Catre jë thith koi Iehova, nge qaja hnyawane jë la hnei eö hna ajan. (Luka 18:1; Roma 12:12) Sipo Iehova jë matre tro eö a atreine goeëne la pengöi eö tui Nyidrë. Nge the cile kö troa anyimua sipone ngöne la drai. Eje hi, ame la kola nyi zö së hnene la hni së, ke jole troa kapa ka hape, Iehova a hnimi së. Ngo the thëthëhmine kö laka, ka draië kö Iehova hune la hni së. (1 Ioa. 3:​19, 20) Atre kö Nyidrë la pengöi eö hui eö kö, nge öhne kö Nyidrë la itre thiina i eö ka lolo ka tha mama kö. (1 Sam. 16:7; 2 Aq. Jo. 6:​30) Celë hi matre the xou kö troa ‘nenge la hni’ eö koi Nyidrë me sipo Nyidrë troa kapa la ihnimi Nyidrë. (Sal. 62:8) Nge thupene la eö a thith, nyipiewekë troa trongëne la itre mekun e cahu.

7-8. Kola akeukawanyi së tune kaa hnene la itre Salamo ka hape, Iehova a hnimi së?

⁷ Mejiune ju kowe la hnei Iehova hna qaja. Ijije hi tro sa mejiune kowe la Tusi Hmitrötr, ke hnei Iehova hna hamëne la uati hmitrötre kowe la itre ka cinyanyin. Goeëne la hna qaja hnei Dravita göne la aqane hnimi së hnei Iehova. Öni angeic: “Tha nanyi kö Iehova qaathene la itre hni ka akötr; nyidrëti a amelene la itre ka kucakuca.” (Sal. 34:18) Ame la eö a hleuhleu, ke kösë pëkö ka atreine trotrohni eö, me xatua eö. Ngo Iehova a qaja koi eö ka hape, ame ngöne la itre ijine cili, ce Nyidrëti me eö, ke itre ijine lai eö a aja ixatua. Öni Dravita ngöne la ketre Salamo ka hape: “Thiane pi la itre trenge timidrang ngöne la trengene tim i nyipë.” (Sal. 56:8) Ame la eö a akötr, ke öhne hi Iehova. Ka tru eö koi Nyidrë. Kösë Nyidrëti hi lai a thiane la itre trenge timidrai eö me wangatrune itre ej. Tune la enyipiewekëne la tim e hnine la trengene tim kowe la atre ka trongë ihnadro, ka nyipiewekë catre koi Iehova la itre trenge timidrai eö. Easë fe a e ngöne Salamo 139:3 ka hape: “Atre hnyawa hi nyipëti la itre jëng.” Öhne asë hi Iehova la nöjei huliwa i eö, ngo Nyidrëti a wangatrune la itre huliwa i eö ka lolo. (Heb. 6:​10) Pine nemen? Pine laka, ka tru koi Nyidrë la itre trengecatre hnei eö hna nue matre amadrinë Nyidrë.a

⁸ Jëne la itre xötre celë ka iakeukawany me itre xane ju kö, kösë Iehova a qaja koi eö ka hape: “Eni a ajane tro eö a atre la etrune la ihniming koi eö, memine la aqane meku eö hneng.” Ngo tune lo hne së hna qaja, Satana a ajan tro eö a mekune ka hape, tha Iehova kö a hnimi eö. Maine eö a nyiqane luelu, hnyinge jë ka hape: ‘Drei la hnenge hna troa mejiune kow? “Keme ne la thoi” maine “Akötresie ka nyipici”?’​—Ioa. 8:​44; Sal. 31:5.

9. Nemene la hnei Iehova hna qaja kowe la itre ka hnimi Nyidrë? (Esodro 20:​5, 6)

⁹ Mekune ju la aqane hnimi eö hnei Iehova. Pane mekune jë la hnei Nyidrëti hna qaja koi Mose me kowe la angetre Isaraela. (E jë la Esodro 20:​5, 6.) Hnei Nyidrëti lo hna qaja koi Mose ka hape, tro pala hi Nyidrëti a amamane la ihnimi nyipici Nyidrë kowe la itre ka hnimi Nyidrë. Matre xecie koi së laka, ka nyipici Nyidrë, nge tro kö Nyidrëti a hnim la itre ka hnimi Nyidrë. (Neh. 1:5) Maine eö a luelu, hnyinge jë ka hape, ‘Eni kö a hnimi Iehova?’ Nge the thëthëhmine kö laka, maine eö a hnimi Nyidrë me isine troa amadrinë Nyidrë, ke tro kö Nyidrëti lai a hnimi eö. (Dan. 9:4; 1 Kor. 8:3) Maine ka xecie koi eö laka, eö a hnimi Iehova, nga hnauëne la eö a mekun ka hape, tha hnimi eö kö hnei Nyidrë? Eje hi, tro pala hi Iehova lai a hnimi eö, nge tha tro jë kö Nyidrëti lai a nuetriji eö.

10-11. Nemene la aja i Iehova göne la aqane tro eö a goeëne la thupene mel? (Galatia 2:​20)

¹⁰ Lapa mekune jë la thupene mel. Ame la mel hna huujëne hnei Iesu, ke celë hi ahnahna ka sisitria hnei Iehova hna hamëne kowe la itre atr. (Ioa. 3:​16) Ngo hapeu, thatraqai eö fe la ahnahna cili? Öö eje hi! Tro sa ce wang la pengöi Paulo. Qëmekene tro angeic a keresiano, hnei angeic hna kuca la itre ngazo ka tru. Nge e thupen, angeic pala hi a isi memine la pengöi angeic ka ngazo. (Roma 7:​24, 25; 1 Tim. 1:​12-​14) Ngo hnei angeice pala hi hna goeëne la thupene mel, kösë ahnahna hnei Iehova hna hamë angeic. (E jë la Galatia 2:​20.) The thëthëmine kö, hnei Paulo hna cinyanyine la itre trengewekë celë jëne la uati hmitrötre i Iehova. Nge ame asë hi la itre hna qaja e hnine la Tusi Hmitrötr, ke nyine ini së. (Roma 15:4) Itre trengewekë i Paulo a amamane laka, aja i Iehova tro eö a goeëne la thupene mel, kösë ketre ahnahna hnei Nyidrëti hna hamëne koi eö. Maine celë hi hnei eö hna kuca, tro eö lai a acatrene la mejiune i eö laka, Iehova a hnimi eö.

¹¹ Easë a olene koi Iehova la hna upi Iesu kowe la fen matre nue la mele i nyidrëti koi së. Ngo ame la ketre kepin matre traqa pi nyidrëti e celë fen, ke göne troa amamane la nyipi pengöi Iehova. (Ioa. 18:37) Ketre, hnei Iesu hna qejepengöne la aqane hnime Iehova la itre nekö i Nyidrë.

AQANE AMAMANE IESU LAKA IEHOVA A HNIMI EÖ

12. Pine nemene matre easa mejiune kowe la hnei Iesu hna qaja göi Iehova?

¹² Ame lo Iesu e celë fen, madrine catre nyidrë troa amamane la nyipi pengöi Iehova. (Luka 10:22) Ijije hi tro sa mejiune kowe la hnei Iesu hna qaja göne la Keme i nyidrë. Pine nemen? Pine laka, qea catr la ijine ne ce mele nyidro e hnengödrai qëmeken tro nyidrëti a traqa e celë fen. (Kol. 1:​15) Öhne hi Iesu la aqane hnimi Iehova la itre nekö i Nyidrë ka mele nyipici. Iesu a xatua së tune kaa troa trotrohnin laka, Iehova a hnimi së?

13. Ame koi Iesu, tune kaa la aqane tro sa goeë Iehova?

¹³ Iesu a ajane tro sa goeë Iehova tui nyidrë. Ame ngöne la itre Evangelia, hna sasaith la 160 lao mama la hnëewekë “Kem,” la Iesu a ithanata koi Iehova. Nge ame la nyidrëti a qeje Iehova kowe la itretre drei nyidrë, öni nyidrë, “Keme i nyipunie” maine “Keme i nyipunie e koho hnengödrai.” (Mat. 5:​16; 6:​26) Qëmekene tro Iesu a traqa e celë fen, itre hlue i Iehova a hë Nyidrë ka hape, ‘Ka Tru Trenge Men,’ ‘Ka Draië Catr,’ me ‘Atre Xup Ka Sisitria,’ me itre xaa aqane hëne ju kö. Ngo hnei Iesu pala hi hna hë Iehova ka hape, ‘Keme së.’ Kolo hi lai a amamane ka hape, aja i Iehova tro la itre hlue i Nyidrë a epe koi Nyidrë, tune la aqane epe la nekönatr kowe la kem. Tro sa ce wang la lue ijin, Iesu a huliwane la hnëewekë “Kem,” me xomi ini qa ngön.

14. Tune kaa la aqane amamane Iesu ka hape, ka sisitria catre së isa ala cas kowe la Keme i nyidrë? (Mataio 10:​29-​31) (Wange ju fe la foto.)

¹⁴ Tro sa pane ce wang la hna qaja hnei Iesu ngöne Mataio 10:​29-​31. (E jë.) Ame la itre neköi sisi, ke itre neköi waco, tha ka nyihlue i Iehova kö me hnimi Nyidrë, ngo Nyidrëti a wangatrunyi nyudren. Matre ame la kola kei hnei ala cas, ke öhne hi Nyidrë. Maine Iehova a wangatrune la ketre neköi waco, hapeu, tha ka sisitria catre kö la itre hlue i Nyidrë ka hnimi Nyidrë? Öni Iesu fe, Iehova a ‘e la itre pene he i nyipunie.’ Maine atre hi Iehova la itre ewekë ka co the së, nga loi e xecie koi së laka, tro kö Nyidrëti a thupë së hnyawa. Eje hi, aja i Iesu tro së isa ala cas a trotrohnine laka, ka sisitria catre së kowe la Keme i nyidrë .

15. Nemene la ini hnei eö hna xome qa ngöne Ioane 6:​44 göi Iehova?

¹⁵ Tro sa ce wang la hnaaluene xötr, lo Iesu a huliwane la hnëewekë “Kaka.” (E jë la Ioane 6:​44.) Hnene la Keme i eö e koho hnengödrai hna ee eö kowe la nyipici. Hnauëne la kola ee eö hnei Nyidrë? Ke hnei Nyidrë hna öhne thei eö la itre thiina ka lolo . (It. Hu. 13:48) Ame la Iesu a qaja la itre trengewekë ngöne Ioane 6:​44, ke ma nyidrëti jë a mekun la hnei Iehova hna qaja ngöne Ieremia 31:3. Iehova a qaja e cili kowe la nöje i Nyidrë ka hape: “Hnenge hna huli ö koi ni hnene la ihnimi nyipicing [maine, hnenge pala hi hna amamai ö la ihnimi nyipicing].” (Iere. 31:3; ith.; wange ju fe la Hosea 11:4.) Nemene la aliene lai? Öhne pala hi Iehova la ka loi thei eö, ngacama tha öhne kö eö.

16. (a) Nemene la hnei Iesu hna qaja, nge hnauëne la tro sa mejiune koi nyidrë? (b) Nemene la ka troa xatua eö troa trotrohnine laka, Iehova la Kem ka lolo koi eö? (Wange ju la hna eköhagen “Ketre Kem Ka Lolo Koi Së.”)

¹⁶ Ame la Iesu a qeje Iehova ka hape, Keme së, kösë nyidrëti a hape: “Ame Iehova ke tha Kemeng casi kö, ngo Keme i eö fe. Nge eni a qaja koi eö ka hape, Nyidrëti a hnimi eö me hnehengazo eö.” E traqa ju eö luelue ka hape, Iehova a hnimi eö, hnyinge jë ka hape: “Hnauëne laka, tha mejiune kö ni kowe la hnei Iesu hna qaja, nge nyidrëti pe la ka atre Iehova hnyawa, nge ka thatreine thoi?”​—1 Pet. 2:​22.

ACATRENE JË LA MEJIUNE I EÖ LAKA IEHOVA A HNIMI EÖ

17. Hnauëne la tro pala hi sa acatrene la mejiune së laka, Iehova a hnimi së?

¹⁷ Nyipiewekë tro pala hi së a acatrene la mejiune së laka, Iehova a hnimi së. Tune lo hne së hna qaja, tro Satana a kuca asë la hnei angeic hna atreine matre sewe së troa nyihlue i Iehova. Tro angeic lai a thele jëne troa akucakucanyi së, me thë la mejiune së laka, Iehova a hnimi së. The nue angeic pi kö troa hun!​—Iobu 27:5.

18. Tune kaa la aqane tro eö a acatrene la mejiune i eö ka hape, Iehova a hnimi eö?

¹⁸ Maine aja i eö troa acatrene la mejiune i eö laka, Iehova a hnimi eö, catre jë sipo Nyidrë troa xatua eö troa goeë eö tui Nyidrë. Lapa mekune jë la hna qaja hnei Tusi Hmitrötr göne la ihnim ka tru i Iehova. The thëthëhmine kö laka, tro pala hi Iehova a hnime la atr ka hnimi Nyidrë. Mekune kö la itre kepin, matre eö a goeëne la thupene mel tune la ketre ahnahna hnei Iehova hna hamë eö. Nge mejiune ju koi Iesu la nyidrë a hape, Iehova la Keme i eö e koho hnengödrai. Haawe, maine tro ketre a hnyinge koi eö ka hape: “Xecie kö koi eö laka, Iehova a hnimi eö?” Canga tro hi eö a sa ka hape: “Öö eje hi! Nge e nöjei drai, eni a kuca asë la hnenge hna atreine matre amamane la ihniming koi Nyidrë.”