Catre Jë Thithi Sai Itre Xan

1. Nemene la ka amamane ka hape, ka tru koi Iehova la itre thith?

KETRE ahnahna ka tru la thith. Hnei Iehova hna hamëne la itre xaa hnëqa kowe la itre angela. (Sal. 91:11) Hnei Nyidrëti fe hna hamëne la itre hnëqa ka tru koi Iesu. (Mat. 28:18) Ngo ame kö la thith, ke Nyidrëti kö la ka dreng. Öni Tusi Hmitrötr, Nyidrëti la ‘Atre drenge la itre thith.’​—Sal. 65:2.

2. Nemene la ka amaman ka hape, Paulo a thithi sai itre xan, nge nemen la tulu koi së?

² Ijije hi tro sa qaja asë koi Iehova la itre jole së. Ngo nyipiewekë tro fe sa thithi sai itre xan. Eje hi lai hnei Paulo hna lapa kuca. Öni angeic kowe la ekalesia ne Efeso: “Eni pala hi a thithi sai nyipunie.” (Efe. 1:​16) Angeice fe a thithi fë la itre trejin hnei angeic hna atre. Öni angeic koi Timoteo: “Eni a olene koi Akötresie, . . . eni pala hi a meku eö ngöne la itre thithing e lai me jidr.” (2 Tim. 1:3) Hetre itre jole hnei Paulo hna melën, nge aja i angeic troa qaja koi Iehova. (2 Kor. 11:23; 12:​7, 8) Ngo, angeic pala hi a xomi ijine troa thithi sai itre xan.

3. Hnauëne laka, tha thithi sai itre xan kö së?

³ Ngo ame itre xaa ijin, thëthëhmine hë së troa thithi sai itre xan. Pine nemen? Hane hi la ketre kepin hna qaja hnei Sabrinaa ketre trejin me easë. Öni angeic: “Easa melëne la hnedrai ka ngazo. Nge tru pala ha la itre jol, matre pëkö hne së hna mano. Hnene lai, matre tha meku itre xan hë së.” Hapeu, eje fe hi lai ka traqa koi eö? Maine eje hi, tro la tane mekune celë a xatua eö. Tro ej a qaja (1) la kepin, matre loi e tro sa thithi sai itre xan memine (2) la itre mekun ka troa xatua së troa meku itre xan, la easa thith.

KEPIN MATRE TRO SA THITHI SAI ITRE XAN

4-5. Hnauëne la easa qaja ka hape, “ka hetre thangane catre” la thith? (Iakobo 5:​16)

⁴ “Ka hetre thangane catre” la troa thithi sai itre xan. (E jë la Iakobo 5:​16.) Hapeu, ka hetre thangane kö la troa thithi sai itre xan? Eje hi. Atre hi Iesu laka, tro Peteru a xele nyidrë qëmekei itre xan, öni nyidrë: “Hnenge hna xëwe sai eö, matre tha tro kö a patre la lapaune i eö.” (Luka 22:32) Atre fe hi Paulo laka, ka hetre thangane la thith. Ame lo kola akalabusi angeic e Roma, öni angeic koi Filemona: “Eni a mejiune laka, jëne la itre thith i nyipunie, tro ha nuamacanyi ni me aijijë ni troa wai nyipunie.” (File. 22) Eje hi lai ka traqa koi Paulo. Hna nue angeic qa kalabus, matre hnei angeic hna xejë hmaca la huliwa ne cainöj.

⁵ Tha kolo kö lai a qaja ka hape, ijiji hi tro sa musinë Iehova jëne la itre thithi së. Ngo ame pe, Nyidrëti a kapa la itre hne së hna sipon la Nyidrëti a öhne ka hape, ka nyipiewekë koi së. Haawe, catre jë qaja koi Nyidrë la itre sipo i epun, nge nue pi koi Nyidrë, ke atre kö Nyidrë la nyine troa kuca.​—Sal. 37:5; wange ju fe la 2 Korinito 1:​11.

6. Ame la easa thith thatraqai itre xan, nemene la thangane koi së? (1 Peteru 3:8)

⁶ Ame la easa thithi sai itre xan, ke kola uku së troa ‘utipi’ angatr. (E jë la 1 Peteru 3:8.) Ame la easa utipi ketre, ke easa drenge la hace ka eje thei angeic, nge aja i easë troa xatua angeic. (Mar. 1:​40, 41) Öni Michael ketre qatre thup: “Ame la eni a thithi sai itre xan, eni a trotrohnine la itre jole ka eje thei angatr, nge kola acatrene la ihniming koi angatr.” Richard ketre qatre thup a qaja la ketre thangane la troa thithi sai itre xan. Öni nyidrë: “Ame la easa thith thatraqai ketre, ke kola thue aja i easë troa xatua angeic. Nge ame la easa xatuane la atr hne së hna thithi kow, ke easë hi lai a thele jëne troa sa la thithi së.”

7. Hnauëne laka, ame la easa thithi sai itre xan, ke kola xatua së troa cile kowe la itre jol? (Filipi 2:​3, 4) (Goeëne ju fe la itre foto.)

⁷ Ame la easa thithi sai itre xan, ke tha easë kö a wangatrune pala ha la itre jole së. (E jë la Filipi 2:​3, 4.) Pë ju pë hë hna tha ketr hnene la itre jole ne la fen celë hna musinën hnei Satana. (1 Ioa. 5:​19; Hna Am. 12:12) Ame la easa thithi sai itre xan, ke easa öhne laka, kola “traqa fe la itre akötre cili kowe la lapa ne la itre trejin me [easë] e cailo fen.” (1 Pet. 5:9) Öni Katherine ketre pionie: “Ame la eni a thithi sai itre xan, ke eni a öhne laka, tha eni casi kö la ka cile kowe la itre jol. Celë hi ka xatua ni matre, tha tro kö ni a wangatrune pala ha la itre jol ka traqa koi ni.”

LA EASA THITH THATRAQANE LA ITRE TREJIN ASË

8. Tro sa thithi sai drei?

⁸ Tro sa thithi sai drei? Ijije hi tro sa thithi fë la itre ka wezipo, me itre ka utipië trootro. Ketre, loi e tro sa mekune la itre jeune ka ini, kola hnyimasai angatr me tupathi angatr hnene la itre ewekë ka ngazo. Nge alanyimu la itre trejin laka, kola icilekeu hnei fami maine mus ngöne la nöje i angatr. (Mat. 10:​18, 36; It. Hu. 12:5) Ame itre xan, hnei angatr hna trotrij la hnalapa i angatr, ke kola isi ngöne la götrane i angatr. Nge ame la itre xan, ke hna lep hnei hulö. Maine jë, thatre kö së la itre trejine cili. Ngo ame la easa thithi sai angatr, ke easë hi lai a trongëne la hna qaja hnei Iesu, ene la troa “hnimi ketre me ketre.”​—Ioa. 13:34.

9. Hnauëne laka, tro sa thithi fë la itre trejin ka elemeken me itre föi angatr?

⁹ Ijije fe tro sa thithi fë la itre trejin ka elemeken, tune la itre atrene la Lapa Ne Xomi Meköt me itre ka xatua angatr, me itre atrene la filial, me itre ka hetre hnëqa ngöne la Bethela, me itretre thupë sirkoskripsio me itre qatre thup me itre ka ixatua. Angatr a huliwa catr thatraqai easë, ngo hetre jole fe hnei angatr hna melën. (2 Kor. 12:15) Öni Mark ka thupë sirkoskripsio, ka hape: “Ame la ewekë ka jole koi ni, ke troa lapa ananyine la kem me thineng ka qatre hë, nge lue ka wezipo catr. Nyipici laka, xa i eni me föi angeic a thupë nyidro, ngo eni a hace, ke tha ijijinge kö troa hamë ixatua koi kaka me nenë.” Ngacama thatre kö easë la itre jol hna melën hnene la itre trejin ka elemeken, ngo loi e tro sa meku angatr ngöne la thith. (1 Thes. 5:​12, 13) Loi e tro fe sa thith thatraqane la itre föi angatr, ke nyudreni a xatua angatr, matre tro pala hi angatr a huliwa catre kowe la ekalesia.

10-11. Iehova kö a kapa la itre thith thatraqane la itre trejin asë? Qejepengöne jë.

¹⁰ Tune la hne së hna ce wang, easë pala hi a thith kowe la itre trejin asë. Ijije hi tro sa thith thatraqane la itre trejin hna akalabusin, maine ka meci sineen, ngacama pëkö ëj hne së hna qaja. Öni Donald ketre qatre thup, “Tru catre la itre trejin ngöne la fen ka cile kowe la itre jol, matre easa thith thatraqai angatr asë.”

¹¹ Iehova kö a kapa la itre thithi cili? Eje hi! Thatre kö së la itre hna ajan hnene la itre trejin isa ala cas. Matre loi e tro sa thith thatraqane la itre trejin asë. (Ioa. 17:20; Efe. 6:​18) E cili, easë hi lai a amaman ka hape, easa hnim “la lapa ne la itre trejin asë.”​—1 Pet. 2:​17.

LA EASA THITH THATRAQAI KETRE

12. Nemene la nyine tro sa kuca, matre tro sa atreine thithi fë la hna ajan hnene la itre trejin?

¹² Troa atreine goe. Nyipiewekë troa thith thatraqane la itre trejin asë, ngo loi e tro mina fe sa qaja la ëjen ne la itre trejin. Hapeu, hetrenyi kö ngöne la ekalesia i eö la ketre trejin hna tith hnene la ketre mec ka tru? Hetre jeune kö ka cile kowe la itre jol e koilo hna ini? Hetre keme kö me thin ka hetrune casine la nekö i angeic “ngöne la itre ihaji me itre ini qaathei Iehova”? (Efe. 6:4) Maine tro eö a goe ngöne la ekalesia, tro eö lai a trotrohnine la itre jole hna melëne hnene la itre trejin, nge tro lai a uku eö troa thithi sai angatr.b​—Roma 12:15.

13. Ijije kö tro sa thithi fë la ketre trejin hne së hna thatre?

¹³ Qaja jë la ëjene la itre trejin hnei eö hna thithi fë. Ngacama thatre angatre kö hnei eö, ngo ijije hi tro eö a qaja la ëje i angatr, tune la itre trejin hna akalabusin e Crimée, me e Érythrée, me e Russie me e Singapour. Troa tune kaa? Hetreny ngöne jw.org la ëjene la itre trejin hna akalabusin.c Öni Brian atre thupë sirkoskripsio, ka hape: “Hnenge hna öhne laka, ame la eni a cinyanyine la ëjene la ketre trejin hna akalabusin, me qaja catrëne la ëje i angeic, ke kola xatua ni troa meku angeic ngöne la itre thithing.”

14-15. Nemene la ka xatua së troa atre la hna ajan hnene la itre trejin la easa thith?

¹⁴ Qaja jë la hna ajan hnene la itre trejin. Öni Michael, lo hna qaja e caha: “Ame la eni a e la itre hna melën hnene la itre trejin ngöne jw.org, eni a hnying ka hape, ‘Maine eni ju lae angeic, ke nemen la hnenge hna ajan ngöne la ijine cili?’ Tro eni lai a hnehengazone la föeng, me ajan tro la ketre a thupë angeic. Celë hi ka xatua ni troa atre la hna ajan hnene la itre trejin trahmany hna akalabusin.”​—Heb. 13:​3, ith.

¹⁵ Maine tro sa tupath troa mekun la hna melën hnene la itre trejin ngöne la kalabus, tro lai a xatua së troa atre la hnei angatr hna ajan me sipo Iehova. Maine jë, tro sa thith matre tro la itre ka thupë kalabus a loi thiina koi angatr, nge tro la itre ka trene mus a aijijë angatr troa nyihlue i Iehova. (1 Tim. 2:​1, 2) Ijije fe tro sa thith matre tro la tulu i angatr a ithuecatr kowe la ekalesia i angatr, me thue aja kowe la itre atre ne fen troa drenge la maca. (1 Pet. 2:​12) Eje hi, tro fe sa hane tune kowe la itre trejin ka cile kowe la itre xaa itupath. Maine tro sa atreine goe me qaja la ëjene la itre trejin, me itre hnei angatr hna ajan, ke easë hi lai a amamane la “ihnimi ketre koi ketre.”​—1 Thes. 3:​12.

TROA ATREINE TULU EWEKË LA EASA THITH

16. Ngacama ka hetre thangane la itre thithi së, ngo nemene la nyine tro sa mekun? (Mataio 6:8)

¹⁶ Tune la hne së hna ce wang, ka hetre thangane catr la itre thithi së. Ngo, loi e tro sa atreine tulu ewekë. The thëthëhmine kö laka, ame la easa thith, ke pai Iehova kö atre la jol hna melën hnene la itre trejin, nge tha qanyi së kö qaja koi Nyidrë la aqane troa nyinyine la jol. Atre fe hë Nyidrë la hnei angatr hna ajan, qëmeken tro sa atre. (E jë la Mataio 6:8.) Matre, hnauëne kö la tro sa thithi sai itre xan? Ke easa hnimi angatr. Ihnim la ka uku së troa thithi sai itre xan. Nge madrine catre Iehova la itre hlue i Nyidrëti a nyitipune la ihnimi Nyidrë.

17-18. Qaja jë la ketre ceitun ka amaman la enyipiewekën troa thithi sai itre xan?

¹⁷ Ngacama ame koi së, pëkö thangane la itre thithi së, ngo itre ej a amamane la ihnimi së kowe la itre trejin. Nge öhne hi Iehova lai. Tro sa xome la ketre ceitun: Pane mekune jë la ketre fami ka lue nekönatr, ca nekö trahmany me ca nekö jajiny. Ka wezipo la nekö trahmany. Matre nekö jajiny a upi kem ka hape: “Kaka ka wezipo angeic, canga tro jë wai angeic!” Atre hi kem laka, ka wezipo la nekö i nyidrë. Nyidrëti a hnimi angeic me nyidrawa angeic. Ngo nyidrëti a madrine la nyidrëti a öhne la nekö i nyidrëti jajiny a sikusikune la xa i angeic.

¹⁸ Aja i Iehova tro sa meku itre xan me thithi sai angatr. Ame la easa thithi fë itre xan, easë hi lai a amamane ka hape, easa hnimi angatr. Nge öhne hi Iehova lai. (2 Thes. 1:3; Heb. 6:​10) Ketre, tune lo hne së hna ce wang, ka hetre thangane la itre thithi së koi itre xan. Haawe, catre jë së thithi sai itre xan.