Aqane Troa Jui La Itre Thithi Së

1-2. (a) Pine nemene matre easa xou troa fe la hni së koi Iehova? (b) Nemene la ka amamane ka hape, Iehova a dreng hnyawan la itre thithi së?

AME itre xaa ijin, casi pala hi la hne së hna qaja la easa thith, maine ka tëtë hi. Ngo tha easë casi kö. Maine jë, tru pala ha la itre jole së matre easa thith nyimenyim. Maine pena, easa xou troa fe la hni së koi Iehova, ke tru la itre ngazo së.

² Tusi Hmitrötr a amamane ka hape, tha Iehova kö a goeëne la aqane eköth la itre thith, ngo ene pe la hni ka ipië. Ej a qaja ka hape, Nyidrëti “a dreng la sipo ne la itre ka ipië.” (Sal. 10:17) Iehova a dreng hnyawane la itre hnëewekë hne së hna qaja, ke Nyidrëti a nyipiewekë së.​—Sal. 139:​1-3.

3. Nemene la itre hnying hne së hna troa ce wang ngöne la tane mekune celë?

³ Loi e tro sa isa hnying ka hape: Hnauëne laka, tha tro kö sa xou troa thithi koi Iehova? Nemene la nyine tro sa kuca, matre tro la itre thithi së a aeasenyi së koi Nyidrë? Nemene la hna ini së hnene la itre thith ne la itre hlue i Iehova ekö, nge kola xatua së tune kaa matre troa jui la itre thithi së? Nge tune kaa e thatre kö së la nyine troa qaja ke, tru pala ha la itre jole së? Tro sa ce wang la itre mekune celë.

THE XOU KÖ TROA THITHI KOI IEHOVA

4. Nemene la ka troa xatua së, matre tha tro kö sa xou troa thithi koi Iehova? (Salamo 119:145)

⁴ Maine ka xecie koi së laka, Iehova la sinee së, nge aja i Nyidrë tro sa madrin, ke tha tro kö së lai a xou troa thithi koi Nyidrë. Hnene la atre cinyhane la Salamo 119 hna thel troa acatrene la imelekeu i angeic me Iehova. Tha ka hmaloi kö la mele i angeic, ke itre atr ka thoi a akötrë angeic, nge pë pe kepin. (Sal. 119:​23, 69, 78) Ketre, angeic a hace fë la itre ngazo i angeic. (Sal. 119:5) Ame pe, tha xou i angeice kö troa fe la hni angeic koi Iehova.​—E jë la Salamo 119:145.

5. Pine nemene matre tha tro kö sa nue la itre mekune ka ngazo troa sewe së troa thith? Qaja jë la ketre ceitun.

⁵ Aja i Iehova tro la itre atr ka kei kowe la ngazo a thithi koi Nyidrë. (Isa. 55:​6, 7) Matre the nue kö la itre mekune ka ngazo troa sewe së troa thith. Tro sa xom la ketre ceitun: Pane mekune jë laka, epuni a patre ngöne la ketre hnepahnitr, nge iöhnyi ju hi epun memine la ketre atr. Tro kö epuni a hmahma troa sipo ixatua kowe lai atr? Waea! Haawe, e thatre kö së la nyine troa kuca, maine hne së hna kuca la ketre ngazo ka tru, the xou pi kö troa thith koi Iehova.​—Sal. 119:​25, 176.

AQANE TRO LA THITH A AEASENYI SË KOI IEHOVA

6-7. Nemene la ka xatua së troa qaja koi Iehova la ka ej e kuhu hni së? Qaja jë la ketre hna melën. (Wange ju la ithuemacany.)

⁶ Maine aja i easë troa easenyi koi Iehova, nyipiewekë tro sa fe la hni së koi Nyidrë, me qaja la itre mekuna së, me itre ka ej e kuhu hni së. Nemene la nyine tro sa kuca, matre troa jui la itre thithi së?

⁷ Lapa mekune jë la itre thiina i Iehova.a Ame la easa lapa mekun la itre thiina i Nyidrë, ke kola thue aja së troa qaja koi Nyidrë la itre mekuna së. (Sal. 145:​8, 9, 18) Tro sa ce wang la hna melën hnei Kristine. Ka isi catr la keme i angeic. Öni angeic: “Jole koi ni troa goeë Iehova tune la ketre kem ka ihnim, matre thatreine kö ni ithanata koi Nyidrë. Eni a mekun laka, tro Nyidrëti a nuetriji ni pine la itre triang me itre ngazong.” Nemene la ka xatua angeic? Öni angeic: “Hnene la ihnimi nyipici Iehova, matre xecie koi ni laka, tro pala hi Nyidrëti a hnimi ni. Atre hi ni laka, tha tro kö Nyidrëti a nuetriji ni. Ngacama kei ju hë ni, ngo tro kö Nyidrëti a amejë ni hmaca. Eje hi lai ka xatua ni troa qaja koi Nyidrë la itre ewekë ka amadrinë ni, me ka akötrë ni.”

8-9. Pine nemene matre, nyipiewekë troa pane mekun la nyine tro sa qaja qëmekene troa thith? Qaja jë la ketre hna melën.

⁸ Pane mekune jë la nyine tro eö a qaja. Qëmekene troa thith, pane hnyinge jë ka hape: ‘Nemene la itre jol hnenge hna melën enehila? Hetre atre kö hnenge hna wesitre kow? Hetre ewekë kö ka saze ngöne la meleng, matre eni a ajane tro Iehova a xatua ni?’ (2 It. Jo. 19:​15-​19) Loi e tro fe sa xome lo tulu ne thith, me mekun la aqane tro sa thithifë la ëj, me Baselaia, me aja i Iehova.​—Mat. 6:​9, 10.

⁹ Hna thuemacanyi Aliska ketre trejin föe laka, ka cancer la föi angeic, nge easenyi hë tro nyidrëti a mec. Matre jol koi Aliska troa thith. Öni angeic: “Hace catre la hning, nge kola ngazo la heng, matre thatreine kö ni thith.” Nemene la ka xatua angeic? Öni angeic: “Qëmekene troa thith, eni a pane mekun la nyine tro ni a qaja koi Iehova. Matre tha eni kö a meku eni cas. Celë hi ka xatua ni troa tingeting, me thithi sai itre xan.”

10. Pine nemene matre loi e tro sa ithanata aqeanyi koi Iehova? (Goeëne ju fe la itre foto.)

¹⁰ Troa ithanata aqeanyi koi Iehova. Nyipici laka, itre thith ka hopatr a hane easenyi së koi Iehova. Ngo ame la easa xomi ijin troa ithanata hnyawa koi Nyidrë, tro së lai a atreine qaja asë la hne së hna mekun.b Öni Elijah lo föi Aliska: “Eni a tupath troa anyimua thith ngöne la drai. Nge ame la eni a xomi ijin troa ithanata aqeanyi me Iehova, ke kola aeasenyi ni me Nyidrë. Ame la eni a ithanata koi Nyidrë, Nyidrëti a drei ni hnyawa, matre tha eni kö a thith nyimenyim.” Pane tupathe jë la: Thele jë la ketre götran me ijine ka loi matre tro eö a ithanata koi Iehova, nge pëkö ka troa ajolë eö. Maine ijij, ithanata catre jë, nge isine jë tro pala hi a ithanata aqeany me Nyidrë.

ITRE INI QA NGÖNE LA ITRE THITH NGÖNE LA TUSI HMITRÖTR

11. Pine nemene matre loi e tro sa lapa mekun la itre thith ne la itre hlue i Iehova ekö? (Wange ju la hna eköhagen “Hnei Eö Kö Hna Hane Mekun Tui Angatr?”)

¹¹ Tro lai a xatua eö, e tro eö a lapa mekun la itre thith ne la itre hlue i Iehova ekö, memine la itre nyima ne iatrun e hnine la Tusi Hmitrötr. Ame la eö a öhne la aqane qaja angatr la itre mekune ka ej e kuhu hni angatr, tro lai a uku eö troa hane fe la hni eö koi Nyidrë. Maine jë, tro eö a öhne la itre xaa trengewekë nyine tro fe eö a qaja la eö a thith. Nge tro fe eö a öhne la itre xaa sipo, me itre mekuna i angatr ka ceitu me eö.

12. Nemene la itre hnying ka troa xatua së la easa lapa mekun la ketre thith ngöne la Tusi Hmitrötr?

¹² Ame la eö a lapa mekun la ketre thith ngöne la Tusi Hmitrötr, hnyinge jë ka hape: ‘Drei la ka thith, nge tune kaa angeic lo ijine cili? Ceitu kö la mekuna i angeic me eni? Nemene la itre ini nyine tro ni a xom?’ Maine jë, tro eö a ithel matre sa la itre hnyinge celë, ngo tro eö lai a kepe thangan. Tro sa ce wang la itre xaa thith.

13. Nemene la ini hne së hna xom qa ngöne la thithi Hana? (1 Samuela 1:​10, 11) (Wange ju fe la .)

¹³ E jë la 1 Samuela 1:​10, 11. Ame lo Hana a qaja la thithi celë, lue jol hnei hna cile kow. Tha ka hnaho kö angeic, nge kolo fe a ngazo thiina hnei Penina, lo ketre föi Elekana. (1 Sam. 1:​4-7) Maine eö pala hi a melën la ketre jol, nemene la ini hnei eö hna xom qa ngöne la thithi Hana? Hnei angeic hna ithanata aqeanyi koi Iehova, me nu asë la ehnefe i angeic koi Nyidrë. (1 Sam. 1:​12, 18) Tro sa lolo, e tro sa ‘nue koi Iehova la ehnefe [së],’ ene la troa qaja koi Nyidrë la itre jol me itre aliene hni së.​—Sal. 55:22.

14. (a) Nemene la itre ini hne së hna xom qaathei Hana? (b) Pine nemene matre ame la easa lapa mekun la Tusi Hmitrötr, kola jui la itre thithi së? (Wange ju la ithuemacany.)

¹⁴ Itre macatre thupene la kola hnaho Samuela, hnei Hana hna trosai angeic koi Eli, Atre Huuj Ka Sisitria. (1 Sam. 1:​24-​28) Hnei Hana hna thithi koi Iehova, me qaja la mejiune i eahlo koi Nyidrë laka, tro kö Nyidrëti a thupën me xatuane la itre hlue i Nyidrë.c (1 Sam. 2:​1, 8, 9) Ngacama tha patre kö la itre jol ngöne la hnalapa i Hana, ngo eahlo a goeëne la itre manathith qaathei Iehova. Nemene la ini koi së? Tro sa atreine cil kowe la itre jol, e tro sa goeëne catrëne la aqane xatua së hnei Iehova qan ekö.

15. Nemene la ini hne së hna xom qa ngöne la thithi Ieremia ngöne Ieremia 12:1?

¹⁵ E jë la Ieremia 12:1. Kola ngazo hnei Ieremia perofeta, ke kola tro loi la mele ne la itre atr ka ngazo. Nge angeice fe a hleuhleu, ke kola ngazo thiina koi angeic hnene la itre xaa neköi Isaraela. (Iere. 20:​7, 8) Ma casi hi la mekuna së me Ieremia, la easa öhne la aqane lolone la mele ne la itre atr ka qenatrekënö, maine ka hnyimasai së. Hnei Ieremia hna qaja amamane la akötre i angeic, ngo tha hnei angeice kö hna upezö Iehova la itre ewekë ka tha meköti kö. Nge ame la Ieremia a öhnyi Iehova a hajine la nöje i Nyidrë ka tha idrei, kola acatrene la mejiune i angeic kowe la thiina ka meköti Nyidrë. (Iere. 32:19) Loi e tro fe sa qaja amamane koi Iehova la itre akötre së, ke tro kö Nyidrëti a apatrene la itre ewekë ka tha meköti kö ngöne la nyipi ijin.

16. Nemene la ini hne së hna xom qa ngöne la thithi ne la ketre atre Levi? (Salamo 42:​1-4) (Goeëne ju fe la itre foto.)

¹⁶ E jë la Salamo 42:​1-4. Hna cinyanyine la Salamo celë hnene la ketre atre Levi ka nanyi qa Ierusalema. Matre tha ijiji angeice kö troa atrunyi Iehova ngöne la uma ne hmi memine la itre trejin me angeic. Angeic e celë a fe la hni angeic koi Iehova. Celë hi ka aijijë angeic troa waipengöi angeic, me waipengön la mele i angeic. Hnei angeic hna öhne laka, hetre xaa aqane tro angeic a atrunyi Iehova. (Sal. 42:5) Ketre, hnei angeic hna lapa mekun la aqane thupë angeic hnei Nyidrë. (Sal. 42:8) Maine easa umë ke, easa wezipo, maine hna akalabusi së pine la lapaune së, nga casi hi la aliene hni së memine la atre Levi. Haawe, ngöne la itre ijine loi maine ngazo, fe pi la hni së koi Iehova. Tro lai a xatua së troa trotrohnine la ka ej e kuhu hni së, me hetre tingeting, me xomihnine la jol.

17. (a) Nemene la hna ini së hnene la thithi Iona perofeta? (Iona 2:​1, 2) (b) Tune kaa la aqane tro la itre Salamo a xatua së la easa cil kowe la itre jol? (Wange ju la ithuemacany.)

¹⁷ E jë la Iona 2:​1, 2. Celë hi thithi Iona perofeta lo angeic e kuhu hni ne la ie ka tru. Ka xecie koi angeic laka, ngacama hnei angeic hna tha idrei, ngo tro kö Iehova a dreng la nine i angeic. Ame la angeic a thith, hnei angeic hna amexeje la itre Salamo.d Kolo hi lai a amamane ka hape, atre hnyawa hi angeic la itre hna cinyihan. Hnei Iona hna lapa mekun itre ej, matre xecie koi angeic laka, tro Iehova a xatua angeic. Loi e tro fe sa isine troa hnehen la itre xötre ne Tusi Hmitrötr. Matre ame la easa thithi koi Iehova nyipine la itre jol, tro hmaca së a mekun itre ej, nge tro lai a akeukawanyi së.

CATRE JË EASENYI IEHOVA JËNE LA THITH

18-19. Maine thatreine kö së qaja la itre aliene hni së koi Iehova, kola xatua së tune kaa hnei Roma 8:​26, 27? Qaja jë la ketre hna melën.

¹⁸ E jë la Roma 8:​26, 27. Ame itre xaa ijin, seseu pala ha easë, matre thatreine kö së qaja la ka ej e kuhu hni së. Ngo tha easë casi kö. Ame ngöne la itre ijine cili, uati hmitrötr “a sipone thatraqai së la itre ewekë hne së hna thatreine qaja.” Tune kaa? Jëne la uati Nyidrë, hnei Iehova hna amë la itre thithi ne la itre hlue i Nyidrë ka cile kowe la itre jol ka tui së, ngöne la Tusi Hmitrötr. Matre ame ngöne la itre ijine thatreine kö së qaja la itre aliene hni së, tro Iehova a xom la itre thithi ne la itre hlue i Nyidrëti ekö, kösë itre thithi së, me sa itre ej.

¹⁹ Celë hi mekun ka xatua Yelena, ketre trejin föe qa Russie. Hna othi angeic, pine thith me e la Tusi Hmitrötr. Seseu catr Yelena, matre jole koi angeic troa thith. Öni angeic: “Hnenge hmaca hna mekun ka hape, ame ngöne la itre ijine eni a hace, nge jole koi ni troa ithanata koi Iehova, Nyidrëti a xom la itre thithi ne la itre hlue i Nyidrëti ekö . . . kösë itre thithing koi Nyidrë. . . . Celë hi ka akeukawanyi ni ngöne la itre ijine jol.”

20. Maine easa hnehengazo, nemene la nyine tro sa kuca qëmeken tro sa thith?

²⁰ Ame la easa thith, nge tru la hne së hna hnehengazo, ke easë pena a mekun la itre xaa ewekë. Nemene la nyine tro sa kuca? Loi e tro sa e catrën la itre Salamo qëmeken troa thith. Maine pena, ijije hi tro sa cinyanyine la itre mekuna së, tune lo aqane kuca i Dravita ekö. (Sal. 18, 34, 142; ka qejepengöne la mekene cili.) Eje hi, pëkö hna amekötin göne la aqane tro sa hnëkë qëmeken troa thith. (Sal. 141:2) Kuca jë la ka loi koi eö.

21. Pine nemene matre ijije hi tro sa thithi koi Iehova qa kuhu hni?

²¹ Kola ketri së la easa atre ka hape, atre kö Iehova la ka ej e kuhu hni së, qëmeken tro sa qaja. (Sal. 139:4) Ngo madrine Nyidrë la easa qaja la mejiune së koi Nyidrë. Matre the cile kö troa thithi koi Iehova. Qaja jë la itre hnëewekë ka mama ngöne la Tusi Hmitrötr. Thithi jë qa kuhu hni. Nge ce thawa jë me Nyidrë la madrin, me itre akötre i eö. Eje hi, Iehova la Nyipi Sinee së, tro pala hi Nyidrë a ce me easë!