Tro La Tusi Iobu a Xatua Eö La Eö a Akötr

1-2. Pine nemene matre loi e troa e la tusi Iobu?

HNEI epuni kö hna hane e la tusi Iobu? Ngacama hna cinyanyine ej a 3 500 hë lao macatre enehila, ngo alanyim la itre ka mekun ka hape, pëkö ketre itus ka tun. Itre atr a haine la ka cinyanyine la itusi cili. Ngacama hnei angeic hna huliwane la itre hnaewekë ka hmaloi troa trotrohnin, ngo ka mingöming itre ej, nge ka ketr la hni ne la itre atr. Nyipici laka, Mose la ka cinyanyine la tusi Iobu, ngo Iehova la ka qaja koi angeic la nyine troa cinyanyin.​—2 Tim. 3:​16.

² Ka nyipiewekë catr la tusi Iobu. Pine nemen? Pine laka, ej a amamane la enyipiewekën tro asë hi la itre angela me itre atr a ahmitrötrëne la ëje i Iehova. Ketre, ej a amamane la itre thiina ka mingöminge i Nyidrë, tune la ihnim, me inamacan, me meköt, me mene i Nyidrë. Eje hi, traqa koi 31 lao mama la hnaewekë “Ka Tru Trenge Men” ngöne la tusi Iobu, nge xalaithe hi ngöne la itre xaa tusi ne la Tusi Hmitrötr. Nge tusi Iobu a sa la itre hnyinge ka tru, tune la hna hape: Hnauëne la Akötresie a nue së troa akötr? Celë hi hnying hna pi atre hnene la itre atr.

3. Nemene la thangane la troa ce wang la tusi Iobu?

³ Ijije hi tro sa aceitunëne la tusi Iobu memine la ketre wetr. Ame la easa traqa ngöne la gaa draië ne la wetr, öhne asë hi së koilo. Ceitune hi lai memine la easa e la tusi Iobu, öhne hi së la aqane goeëne Iehova la itre akötre së. Tro sa ce wang la aqane tro la tusi Iobu a xatua së la easa akötr. Ame ngöne la tane mekune celë, tro sa ce wang la aqane xatuane la angetre Isaraela hnene la tusi Iobu, me aqane tro ej a xatua së enehila. Tro fe sa ce wang la aqane tro sa xatuane la itre atr memine la tusi Iobu.

AKÖTRESIE A NUE IOBU TROA AKÖTR

4. Nemene la eisapengöne i Iobu memine la angetre Isaraela e Aigupito?

⁴ Iobu a mel ngöne la nöje Uza ngöne la ijine kola thahluëne la angetre Isaraela e Aigupito. Ame Uza, ke ej ngöne la götrane koië ne la Nöje Hna Thingehnaean, me ngöne la götrane kolopi ne Arabi. Tha ceitu i Iobu kö memine la angetre Isaraela. Angatr a thil kowe la itre idrola e Aigupito, ngo angeic a catre nyihlue i Iehova. (Ios. 24:14; Ezek. 20:8) Öni Iehova göi angeic: “Pëkö atr ka tui angeic ngöne la fen.”a (Iobu 1:8) Ka trenamo catre Iobu, nge ka hlemu loi. Pëkö atr ka hlemu tui angeic thene la nöjei atr asë ne Koië. (Iobu 1:3) Drei jë kö la wesitre i Satana la angeic a goeëne la atre cili ka tru, a catre nyihlue i Akötresie!

5. Hnauëne la Iehova a nue Iobu troa akötr? (Iobu 1:​20-​22; 2:​9, 10)

⁵ Satana a mekune ka hape, e tro Iobu a akötr, tro angeic a nuetriji Iehova. (Iobu 1:​7-​11; 2:​2-5) Tru la ihnimi Iehova koi Iobu. Ngo hnei Nyidrë hna nue Satana troa anyipicine la hnei angeic hna qaja. (Iobu 1:​12-​19; 2:​6-8) Celë hi matre, hnei Diabolo hna humuth la itre öni memine la 10 lao nekö i Iobu, me lepi angeic hnene la itre thewek ka catrehnin, qane waca utihë la he. Ngo tha ie ju kö la itre nyinyithiina i Diabolo! (E jë la Iobu 1:​20-​22; 2:​9, 10.) E thupen, hnei Iehova hna aloine la meci angeic, me atrenamo angeic, me adraië angeic. Hnei Nyidrëti hna hamëne hmaca koi angeic la 10 lao nekönatr. Ketre, hnei Iehova hna ahuëne la mele i Iobu koi 140 lao macatre, matre hnei angeice hna öhne la itre api i angeic, uti hë la hna 4 ne xötr. (Iobu 42:​10-​13, 16) Tune kaa la aqane xatuane la itre hlue i Iehova ekö hnene la hna melën hnei Iobu? Nge kola xatua së tune kaa enehila?

6. Nemene la hna trotrohnine hnene la angetre Isaraela jëne la hna melën hnei Iobu? (Wange ju fe la foto.)

⁶ Hna xatuane tune kaa la angetre Isaraela hnene la hna melën hnei Iobu? Tha ka hmaloi kö la mele ne la angetre Isaraela e Aigupito. Ame lo kola co hnei Iosua me Kaleba, ke nyidroti a nyihlu. E thupen, 40 lao macatre ne trongëne nyidro la hnapapa, nge pëkö ngazo hnei nyidro hna kuca. Maine atre ju la angetre Isaraela la hna melën hnei Iobu, me aqane amanathithi angeic hnei Iehova, tro angatr lai a trotrohnine la qane la itre akötre i angatr. Eje hi lai ka xatuane la itre matra i angatr troa trotrohnine la kepin matre Akötresie a nue la itre atr troa akötr, memine la enyipiewekën troa catre mele nyipici.

7-8. Tune kaa la aqane tro la tusi Iobu a xatuane la itre ka akötr? Qaja jë la ketre hna melën.

⁷ Nemene la aqane xatua së hnene la tusi Iobu? Alanyim la itre atr enehila ka nuetrij la lapaun ke, tha trotrohnine kö angatr la kepin matre kola traqa la itre akötr kowe la itre atr ka loi. Tro sa ce wang la hna melën hnei Hazelb ka mel e Rwanda. Ame lo angeic a jeune, angeic a mejiun koi Akötresie. Ngo tru catr la itre jol ka traqa koi angeic. Hnene la keme me thine i angeic hna sei hna cil, nge hnene la thine i angeic hna faipoipo hmaca memine la ketre trahmanyi ka qanangazo angeic. Ame lo angeic a neköjajiny, hna angazo angeic. Nge ame la angeic a thele ixatua ngöne la uma hmitrötr, ke pëkö ixatua hnei angeic hna kapa. E thupen hnei Hazel hna cinyanyi tus koi Akötresie ka hape: “Akötresie, hnenge hna thithi koi Nyipë me isine troa kuca la loi, ngo hnei Nyipë hna të la loi hnei ngazo. Ame enehila, tro ni a nuetriji Nyipë, me kuca la ajang.” Tui Hazel, alanyim la itre atr ka mekun maine ka dreng ka hape, zöi Akötresie la itre akötr!

⁸ Ame easë, hne së hna inin ngöne la tusi Iobu laka, tha zöi Akötresieti kö la itre akötr, ngo zöi Satana! Nge atre hë së laka, ame la kola akötr la ketre atr, ke tha angeice kö a xeni pun la itre huliwa i angeic ka ngazo. Öni Tusi Hmitrötr, “Kola traqa koi [së] asë la itre ijine jol, me itre ewekë ka iasesëkötrë.” (A. Cai. 9:​11; Iobu 4:​1, 8) Ketre, ame la easa mele nyipici ngöne la itupath, easa aijijë Iehova troa sa koi Satana. Nge e cili, easa isigöline la ëje i Nyidrë. (Iobu 2:3; It. Ed. 27:11) The wangacone kö la itre ini hne së hna kapa! Eje hi lai ka xatua së troa trotrohnine la itre kepin, matre easë me itre sinee së a akötr. E thupen, hnei Hazel hna ini Tus memine la itre Temoë Iehova, me trotrohnine laka, tha Akötresieti kö la qane la itre akötr. Öni angeic: “Hnenge hmaca hna thithi koi Akötresie qa kuhu hning. Hnenge hna qaja koi Iehova ka hape, ngacama ase hë ni qaja laka, tro ni a nuetriji Nyidrë, ngo tha ajange kö lai. Thatre Nyidrëti hnyawa kö ni ekö. Ngo ame enehila, atre hë ni laka, tru la ihnimi Nyidrëti koi ni. Nge tha fene madrine kö ni.” Madrine catre së troa atre la kepine matre Akötresie a nue së troa akötr! Tro pena së a ce wang la aqane tro la hna melën hnei Iobu a xatua së isa ala cas, la easa cil kowe la itupath.

TULU I IOBU A XATUA SË TROA ATREINE CILE HUT

9. Tune kaa Iobu ngöne la itupath? (Iakobo 5:​11)

⁹ Pane mekune jë la: Iobu a lapa cas, nge angeic ngöne la hnatresij. Ka wegeju, me si thewek la ngönetrei angeic, nge angeic a thë fë la akötre i angeic. Kola wetrewetr me ulele la kupeine i angeic. Kucakuca catre Iobu, nge ame pe hi la hnepe trengecatre i angeic ke, goi troa xoxo la ngönetrei angeic me sine inege, me treije fë la akötre i angeic. Nyipici, Iobu a xomi akötr, ngo angeice fe a catre mele nyipici koi Iehova me mejiune koi Nyidrë. (E jë la Iakobo 5:​11.) Nemene la ka xatua Iobu troa mele nyipici?

10. Ka tune kaa la imelekeu i Iobu me Iehova? Qejepengöne jë.

¹⁰ Hnei Iobu hna fe la hni angeic koi Iehova. (Iobu 10:​1, 2; 16:20) Ame ngöne la mekene 3, Iobu a eetr pine la itre akötr ka traqa koi angeic, me upezö Iehova. E thupen, hnene la köni sinee i Iobu hna qaja ka hape, Akötresie a ameköti angeic pine la itre ngazo i angeic. Ngo hnei Iobu hna catre fë koi Akötresie ka hape, atr ka meköt angeic. Kola mama ngöne la itre trengewekë i Iobu laka, ame koi angeic, ka meköti kö angeic hui Akötresie. (Iobu 10:​1-3; 32:​1, 2; 35:​1, 2) Ngo hnei angeic hna trotrohnin e thupen laka, hnei angeic hna “ewekë menu.” (Iobu 6:​3, 26) Nge ame ngöne la mekene 31, easa öhne laka, aja i Iobu tro Akötresie a jelemeköti angeic. (Iobu 31:35) Nyipici laka, ka ngazo la hnei Iobu hna kuca, ene la troa upi Akötresie troa sa koi angeic, me qaja la kepin matre angeic a akötr.

11. Tune kaa la aqane ujë i Iehova koi Iobu?

¹¹ Easa trotrohnine enehila la kepin matre hnei Iobu hna ithanata tun koi Iehova. Ka catr la imelekeu i nyidro, nge xecie koi Iobu laka, ka meköt la aqane ameköti ewekë i Iehova. Ame lo Iehova a sa koi angeic ngöne la wene, tha ase kö Nyidrë qaja hnyawane la kepin matre angeic a akötr. Nge tha hnei Nyidrëti kö hna wesitrë Iobu pine eetr, maine catre fë la meköti angeic. Hnei Iehova pe hna ini Iobu, tune la kem a inine la kuku. Nge celë hi ka xatua Iobu. Ame hnei angeic hna ipië, me qaja ka hape, pëkö hnei angeic hna atre, nge ka tria la hnei angeic hna qaja. (Iobu 31:6; 40:​4, 5; 42:​1-6) Nemene la aqane xatuane la itre hlue i Iehova ekö hnene la hna melën hnei Iobu? Nge kola xatua së tune kaa enehila?

12. Tune kaa jë la aqane xatuane la angetre Isaraela hnene la hna melën hnei Iobu?

¹² Hna xatuane tune kaa la angetre Isaraela hnene la hna melën hnei Iobu? Maine jë, hnene la angetre Isaraela hna kepe thangan qa ngöne la hna melën hnei Iobu. Ka tui Mose. Tha ka hmaloi kö koi angeic troa eatrongëne la nöje i Isaraela ngöne la hnapapa. Nge anyimua tha idrei angatr koi Iehova me akötrë Mose. Ngo tha hnei angeice kö hna nyitipune la angetre Isaraela ka eetre lapa koi Iehova. Hnei angeice pe hna fe la hni angeic koi Nyidrë me qaja la itre jol ka traqa koi angeic. (Eso. 16:​6-8; Num. 11:​10-​14; 14:​1-4, 11; 16:​41, 49; 17:5) Nge hnene la tulu i Iobu hna xatua Mose lo kola haji angeic hnei Iehova. Ame lo angetre Isaraela e Kadesi ngöne la macatre tixenuë i angatr ngöne la hnapapa, tha hnei Mose kö hna atrunyi Iehova, nge hnei angeic hna “ithanata menu.” (Sal. 106:​32, 33) Ame la pun, tha hna aijijë angeice kö troa lö kowe la Nöj Hna Thingehnaean. (Dreut. 32:​50-​52) Akötre catre Mose la Iehova a haji angeic, ngo hnei angeic hna kapa hnyawan. Ketre, hnene fe la hna melën hnei Iobu hna xatuane la angetre Isaraela troa cile catr, qëmekene la itre jol ka traqa ngöne la Nöj Hna Thingehnaean. E tro angatr a lapa mekun la hna melën hnei Iobu, tro lai a xatua angatr troa ipië me kapa la ihaji qaathei Iehova.

13. Tune kaa la aqane tro la tusi Iobu a xatua së troa atreine cile hut? (Heberu 10:36)

¹³ Nemene la aqane xatua së hnene la tusi Iobu? Pine laka, kola jole la mel enehila, nyipiewekë tro sa atreine cile hut. (E jë la Heberu 10:36.) Maine jë hna tithi së hnei mec, maine kola jole la mekuna së, maine kola traqa la itre jol ngöne la fami, maine hna mecitriji së hnene la ketre sinee, maine itre xaa jole ju kö. Nge ame itre xaa ijin, kola jole catr la mele së pine la hna qaja maine kuca hnei itre xan. (It. Ed. 12:18) Kola amamane hnene la tusi Iobu laka, ijije hi tro sa qaja asë koi Iehova la ka ej e kuhu hni së, ke Nyidrëti a drei së. (1 Ioa. 5:​14) Tha tro kö Nyidrëti a wesitr koi së, e tro sa “ewekë menu,” tui Iobu ekö. Tro pe Nyidrëti a hamë së la trengecatr me inamacan matre tro sa atreine cile hut. (2 Aq. Jo. 16:9; Iako. 1:5) Ngo tha tro kö Nyidrëti lai a cil troa haji së, tune la aqane kuca i Nyidrë koi Iobu. Eje hi, kola xatua së hnene la tusi Iobu troa atreine cile hut la kola haji së hnei Tusi Hmitrötr, maine hnei organizasio i Iehova, maine hnene la itre trejin ka macaj. (Heb. 12:​5-7) Hnei Iobu hna kepe thangan la angeic a kapa la ihaji. Haawe, tro fe sa kepe thangan e tro sa kapa hnyawane la ihaji hna hamë së. (2 Kor. 13:11) Itre ini lai ka mingöming hne së hna kapa qa ngöne la tulu i Iobu! Tro hë sa ce wang la aqane troa xatua itre xan hnene la tusi Iobu.

AQANE TROA XATUANE LA ATR MEMINE LA TUSI IOBU

14. Nemene la ketre aqane troa sa kowe la itre atr ka hnyingën la kepine matre easa akötr?

¹⁴ Ame la eö a cainöje trootro, hetre atre kö ka hane hnyingë eö la kepin matre easa akötr? Hnei eö hna sa tune kaa? Maine jë hnei eö hna amamane koi angeic ngöne la Tusi Hmitrötr, la ewekë ka traqa e Edrena. Hnei eö hna qaja ka hape, hnei Satana, lo u ka ngazo, hna iaöne la lue pane atr, me uku nyidro troa icilekeu me Akötresie. (Gen. 3:​1-6) Nge qaane lo kola tha idrei hnei Adramu me Eva, itre atr a akötr me mec. (Roma 5:​12) Ngo Akötresie a nue ijin matre mama jë ka hape, ka thoi lae Satana, nge troa atre hnene la nöjei atr ka hape, tro hmaca së a pexej elany. (Hna Am. 21:​3, 4) Ka lolo catr la aqane sa i eö, nge celë hi ka xatuane la itre xan troa trotrohnine la kepine matre kola akötr la itre atr.

15. Tune kaa la aqane tro sa huliwane la tusi Iobu, la kola hnyingën hnene la atr la kepine matre easa akötr? (Goeëne ju fe la itre foto.)

¹⁵ Tro sa ce wang la ketre aqane kuca. Huliwane jë la tusi Iobu matre troa hamën la itre xaa ithuemacanyi kowe la atr ka hnying. Pane felisite angeice jë, ke ka lolo catr la hnyinge i angeic. E thupen, qaja jë ka hape, hna hane hnyinge tun hnei Iobu, ketre hlue i Akötresie ka melëne la itre jole ka tru. Goi upezö Akötresieti fe hnei nyidrë. (Iobu 7:​17-​21) Tro angeice lai a sesëkötr troa atre ka hape, hetre atre fe ekö ka hane hnyinge tun. Nge amamane jë koi angeic laka, tha Akötresieti kö, ngo Diabolo la ka aciane la itre itupath i Iobu. Nge qaja jë fe koi angeic ka hape, ame la kepin matre Satana a qanangazo Iobu, ke xapo a pi amamane ka hape, itre atr a nyihlue i Akötresie göi thupen. Nge hnei Akötresie hna nue Iobu troa akötr ke, xecie koi Nyidrë laka, ijije hi tro la itre hlue i Nyidrë a mele nyipici, me amamane ka hape, ka thoi lae Diabolo. Nge qaja jë fe koi angeic laka, hnei Akötresie hna amanathithi Iobu ke, hnei nyidrë hna mele nyipici. Haawe, catre jë akeukawane la itre atr, me xatua angatr troa trotrohnine laka, tha qaathei Iehova kö la itre akötr.

16. Qaja jë la ketre hna melën ka amamane la aqane xatuane la atr ka akötr hnene la tusi Iobu.

¹⁶ Tro sa ce wang la aqane xatua Mario hnene la tusi Iobu. Ame lo 2021, kola cainöj jëne telefon hnene la ketre trejin föe. Nge Mario la pane atr hnei eahlo hna hën. Hnei eahlo hna qaja ka hape, Akötresie a dreng la itre thithi së, nge tro Nyidrëti a hamë së la mel ka lolo elany me mejiun. Hnei eahlo hna hnyingën la mekuna i angeic, matre hnei angeic hna sa ka hape, ame la kola ho la telefon, angeic a cinyanyi tus kowe la fami angeic, ke angeic ha hnöjua. Öni angeic, “Ka mejiune ni koi Akötresie, ngo ame e kula hmakany, eni a mekun ka hape, ma ase hë nuetriji ni hnei Nyidrë.” Ame lo eahlo a hë Mario hmaca, ke hnei nyidro hna ce ithanatane la itre akötre i Iobu. Matre aja i Mario troa e asë la tusi Iobu. Ame hnei eahlo hna iupifë la lien kowe la Tusi Hmitrötr Fene Ka Hnyipixe Hna Ujën. Nemene la thangane lai? Mario enehila a ini Tusi Hmitrötr, nge madrine catr angeic troa atrepengöne la Akötresie ka wangatrunyi angeic.

17. Hnauëne laka, eö a olene koi Iehova la hna qatreng la hna melën hnei Iobu ngöne la Tusi Hmitrötr? (Iobu 34:12)

¹⁷ Eje hi, ka men la Trengewekë i Akötresie, ke ej a xatuane la itre atr, memine fe la itre ka akötr. (Heb. 4:​12) Easa olene koi Iehova la hnei Nyidrëti hna qatreng la hna melën hnei Iobu ngöne la Tusi Hmitrötr! (Iobu 19:​23, 24) Nge kola qaja ngöne la tusi Iobu ka hape, “Eje hi laka, tha Akötresieti kö a iakötrë.” (E jë la Iobu 34:12.) Easa öhne ngöne la tusi Iobu la kepine matre Akötresie a nue la itre akötr, me aqane tro sa xomihnin itre ej. Nge kolo fe a xatua së troa akeukawane la itre atr ka akötr. Ame ngöne la tane mekun ka troa xulu, tro sa ce wang la aqane tro la tusi Iobu a xatua së la easa haji ketre.