Tro La Tusi Iobu a Xatua Eö Troa Hamë Eamo

1-2. Pine nemene matre jole kowe la köni sinee i Iobu me Elihu troa akeukawanyi Iobu?

DRENG asë hi la itre atrene kuë la ka traqa koi Iobu. Pëhë ca ewekë ne lo atr ka trenamo ekö. Ame la kola drenge lai hnei Elifaza, Biledad me Zofar, angatr a nue pi la hnalapa i angatr me tro Uza troa akeukawanyi angeic. Ngo ame la angatr a traqa, angatr a sesëkötr la angatr a öhnyi Iobu.

² Pane mekune jë la: pë hnyawa ca ewekë i Iobu. Ketre ka axö öni catr angeic ekö. Ngo hna atrekënö me humuth la itre mamoe, me itre kau, me itre kamela, me itre boliko i angeic. Meci asë hë la itre nekö i angeic, nge hnyiqetre hë lo uma ka malatranyi angatr. Ketre, hna humuth la itre xaa hlue i angeic. Nge ame pena angeic, hna tithi angeic hnene la ketre mec ka sis: kola si thewek la ngönetrei angeic. Köni sinee i angeic a öhnyi angeic qa gaa nany, a lapa hleuhleu ngöne la hnatresij. Nemene la hnei angatr hna kuca? Ame ngöne la 7 lao drai, pëkö ala cas e angatr ka ithanata, ngacama angeic a thë fë la akötre i angeic. (Iobu 2:​12, 13) E thupen, traqa pi Elihu, ketre nekötrahmanyi a lapa ezi angatr. Iobu pa nyiqane ewekë jë, me ejine la drai ne hnaho angeic me sipone troa mec. (Iobu 3:​1-3, 11) Eje hi, Iobu a aja ithuecatr qaathene la itre sinee i angeic! Nge ijine hi lai tro angatr a ithuecatr koi Iobu me amamane ka hape, angatr la itre nyipi sinee.

3. Nemene la hne së hna troa ce wang ngöne la tane mekune celë?

³ Aja i Iehova tro Mose a cinyanyine la hna qaja me kuca hnene la köni sinee i Iobu me Elihu. Ame lo hna qaja hnei Elifaza ke, qaathene la ketre dremoni. Ngo ame la itre hna qaja hnei Elihu ke, qaathei Iehova. (Iobu 4:​12-​16; 33:​24, 25) Celë hi matre, ame ngöne la tusi Iobu, hetre eamo ka lolo nyine troa ce thawa me itre xan, me itre eamo laka, tha nyine tro kö a hamën. Ka lolo catr la tusi Iobu, ke kola ini së la aqane tro sa hamë eamo koi ketre. Ame ngöne la tane mekune celë, tro sa pane ce wang la tulu ka ngazo hna amaman hnene la köni sinee i Iobu. E thupen, tro sa ce wang la tulu ka lolo i Elihu. Tro fe sa ce wang la aqane kepe thangan la angetre Isaraela la hna melën hnei Iobu, me itre ini koi së enehila.

AQANE EAMO IOBU HNENE LA KÖNI SINEE I ANGEIC

4. Hnauëne laka, tha akeukawanyi Iobu kö hnene la köni sinee i angeic? (Wange ju fe la foto.)

⁴ Öni Tusi Hmitrötr, aja ne la köni sinee i Iobu troa “amamane la utipine i angatr koi Iobu, me aupunyi angeic.” (Iobu 2:​11) Ngo, tha hnei angatre kö hna akeukawanyi Iobu. Pine nemen? Köni kepin. Ame la hnapan, hnei angatr hna canga qaja menune koilo, nge tha pane drei Iobu kö me trotrohni angeic. Hnei angatr hna qaja menun ka hape, kola ameköti Iobu pine la itre ngazo hnei angeic hna kuca.a (Iobu 4:7; 11:14) Ame la hnaaluen, ke ka catrehnine pala ha la itre eamo i angatr, nge pëkö eloin. Ame la itre eamo hnei angatr hna hamën, ke ka pëkö trepen. (Iobu 13:12) Ketre, hnei angatr hna qaja la itre trenge ka akötr koi Iobu. Alua jelë Iobu hnei Biledad ka hape, ka ithaithanata. (Iobu 8:2; 18:2) Nge hnei Zofar hna ithanata akökötrenyi koi Iobu, me jelë angeic ka hape, “atr ka hmo.” (Iobu 11:12) Ame la hnaakönin, ke ngacama tha ase kö angatr tro catr koi Iobu, ngo drenge hi easë ngöne la aqane ithanata i angatr ka hape, angatr a iupezö, me pë metrötr, me ihnyimasai. (Iobu 15:​7-​11) Hnei angatr hna thel troa amamane ka hape, hetre ngazo i Iobu, matre tha akeukawanyi angeice ju kö, me acatrene la lapaune i angeic.

5. Nemene la thangane la itre eamo hna hamën hnene la itre sinee i Iobu?

⁵ Matre tha sesëkötre kö së laka, pëkö thangane la itre eamo hna hamën hnene lo köni sinee i Iobu. Hna thaipië Iobu hnene la itre trengewekë i angatr. (Iobu 19:2) Easë fe a trotrohnine la kepin matre, Iobu a isigöline la meköti angeic me ithanata menu. (Iobu 6:​3, 26) Ame la itre hnei angatr hna qaja ke, tha ka ihmeku kö memine la mekuna i Iehova, nge pëkö utipine i angatr koi Iobu. Celë hi matre, hnei Satana hna nyijë angatr matre akötrë Iobu. (Iobu 2:​4, 6) Tune kaa la aqane xatuane la angetre Isaraela hnene la hna melën celë? Nge kola xatua së tune kaa enehila?

6. Nemene la itre ini hna xom hnene la itre trahmanyi ka macaj ne Isaraela qa ngöne la tulu ka ngazo ne la köni sinee i Iobu?

⁶ Hnene la tulu ka ngazo ne la köni sinee i Iobu hna xatuane tune kaa la angetre Isaraela ekö? Ame la Iehova a hamëne la Trenge Wathebo kowe la nöje Isaraela, hnei Nyidrëti hna acile la itre trahmanyi ka macaj matre amekötin, me xatuane la nöj troa trongëne la itre wathebo. Nyipiewekë fe tro la itre trahmanyi cili a trongëne la itre hnei Iehova hna amekötin. (Dreut. 1:​15-​18; 27:1) Ketre, qëmekene tro angatr a hamë eamo, maine ameköti ketre, loi e tro angatr a drei angeice hnyawa. (2 Aq. Jo. 19:6) Tha tro kö angatr a mekun ka hape, atre asë hi angatr la jol ka traqa, ngo loi e tro pe angatr a hnying. (Dreut. 19:18) Nge tha tro kö angatr a ithanata akökötrenyi kowe la itre ka sipo ixatua. Pine nemen? Pine laka, e tro angatr a wesitr, tro lai a sawa la atr ka aja ixatua troa fe la hni angeic. (Eso. 22:​22-​24) Maine jë, hnene la itre trahmanyi ka macaj ne Isaraela hna xomi ini qa ngöne la tusi Iobu, matre eatrëne hnyawan la hnëqa i angatr.

7. Drei la itre xan ka hane hamë eamo e Isaraela, nge nemene la ixatua hnei angatr hna kapa qa ngöne la tusi Iobu? (Itre Edromë 27:9)

⁷ Nyipici laka, tha itre trahmanyi ka macaj hmekuje kö la ka hamë eamo koi itre xan. Ijije hi tro la angetre Isaraela asë, itre jeune me qatr, trahmanyi me föe, a hane hamë eamo. Angatr a xatuane la itre trejin me angatr troa easenyi catr koi Iehova, maine amekötin la aqane ujë i angatr. (Sal. 141:5) Nge eje hi lai hna kuca hnene la itre nyipi sinee. (E jë la Itre Edromë 27:9.) Hnene la tulu ka ngazo ne la köni sinee i Iobu hna xatuane la angetre Isaraela ekö. Kola amamane koi angatre la nyine tha tro kö a qaja maine kuca la kola hamë eamo.

8. Nemene la nyine tro sa thupën la easa hamë eamo? (Goeëne ju fe la itre foto.)

⁸ Kola xatua së tune kaa hnene la tulu ka ngazo ne la köni sinee i Iobu? Ame la itre trejin a cil kowe la itre jol, aja i easë troa xatua angatr. Ngo tha tro kö sa nyitipune la aqane ujë ne la köni sinee i Iobu. Hnapan, loi e troa pane atrepengöne hnyawa la jol, qëmekene troa qeje mekun. Hnaaluen, tha tro kö sa nyitipu Elifaza, ene la troa qaja la itre sipu mekuna së. Loi e tro pe sa nyitrepene la itre eamo së hnei Tusi Hmitrötr. (Iobu 4:8; 5:​3, 27) Hnaakönin, tha tro kö a ithanata akökötreny, maine ixöjetrij. Nyipici laka, tha ka tria kö la itre xaa hna qaja hnei Elifaza me itre sinee i angeic. Hnei Paulo aposetolo e thupen hna amexej lo hna qaja hnei Elifaza. (Wange ju la Iobu 5:​13 memine 1 Korinito 3:​19.) Ngo, tru pe hi la hnei angatr hna qaja angazo Akötresie, me akötrë Iobu. Matre ame koi Iehova, tha hnei angatre kö hna qaja la nyipici. (Iobu 42:​7, 8) Ame la easa hamë eamo, thupëne kö matre tha tro kö a qaja ka hape, tha ka itrotrohni kö Iehova, nge tha Nyidrëti kö a hnimi së. Tro pena sa ce wang la tulu i Elihu.

AQANE EAMO IOBU HNEI ELIHU

9. Pine nemene matre Iobu a aja ixatua thupene la angeic a ithanata memine la itre sinee i angeic, nge hnei Iehova hna xatua angeic tune kaa?

⁹ Ame la kola ithanata hnei Iobu me itre sinee i angeic, ke tha nyipi loi kö la ca lapa i angatr. Hna cinyanyine la porotrike i angatr ngöne la 28 lao mekene tus! Tru catr la hnei angatr hna ithanata. Nge angatr a ithanata ngöne la elëhni me wesitr. Matre tha sesëkötre kö së laka, ame la kola ase la porotrike i angatr, ka akötr me hace pala hi la hni i Iobu! Tha hnei angatre kö hna akeukawanyi angeic, maine wenë ameköti angeic. Tune kaa la aqane xatua Iobu hnei Iehova? Hnei Nyidrë hna upi Elihu troa eamo angeic. Hnauëne laka, tha canga ithanata kö Elihu? Öni angeic, “Eni petre hi a öhne la jö nge itre qatr epun. Celë hi matre, hnenge hna xomehnöthe la qëng ngöne la metrötr.” (Iobu 32:​6, 7) Atre hi Elihu laka, ka inamacane kö la itre qatr ke, pai angatre kö öhne la jö, nge tru catr la hnei angatr hna melën hune la itre jeune. Ngo ame la Elihu a dreng la porotrike i Iobu memine la itre sinee i angeic, ke thatreine hë angeic lapa thaup. Öni Elihu: “Tha hnene casi kö laka, iqia matre ka inamacan, nge tha itre qatre hmekuje kö la ka trotrohnine la meköt.” (Iobu 32:9) Nemene la hnei angeic hna qaja e thupen? Nge tune kaa la aqane qaja i angeic?

10. Nemene la hnei Elihu hna kuca qëmekene troa eamo Iobu? (Iobu 33:​6, 7)

¹⁰ Qëmekene tro Elihu a hamën la eamo koi Iobu, hnei angeic hna thel troa atingetingëne la hni Iobu, matre tro nyidrë a dreng la hnei angeic hna troa qaja. Hna tune kaa? Hnapan, hnei angeic hna xomehnöth la itre aliene hni angeic. Hnauëne la easa qaja lai? Pine laka, öni Tusi Hmitrötr, ame lo xötrei Elihu a elëhni koi Iobu. (Iobu 32:​2-5) Ngo tha hnei angeice kö hna ithanata akökötrenyi koi Iobu. Hnei angeice pe hna ithanata amenyiken. Öni Elihu koi Iobu: “Goeën! ceitui nyiso hi qëmekene la nyipi Akötresie.” (E jë la Iobu 33:​6, 7.) Hnaaluen, hnei Elihu hna amamane koi Iobu laka, hnei angeic hna drei nyidrëti hnyawa. Qëmekene troa eamo Iobu, hnei angeic hna amexeje la itre hnei nyidrë hna qaja. (Iobu 32:11; 33:​8-​11) Nge e thupen la Elihu a ithanata, hnei angeic hna qaja lapan la itre trengewekë i Iobu, matre amamane ka hape, hnei angeic hna drei nyidrëti hnyawa.​—Iobu 34:​5, 6, 9; 35:​1-4.

11. Tune kaa la aqane hamëne Elihu la eamo koi Iobu? (Iobu 33:1)

¹¹ Ame la Elihu a eamo Iobu, hnei angeic hna metrötrë nyidrë. Tune kaa? Hnei Elihu hna qaja la ëje i Iobu, ewekë tha hna kuca kö hnene la köni sinee i nyidrë. (E jë la Iobu 33:1.) Ketre, hnei Elihu hna aijijë Iobu troa hane sa la angeic a ithanata. Pine nemen? Ma angeice jë a mekun lo ijine kola ithanata hnei Iobu memine lo köni sinee i nyidrë, nge angeic a pi qeje mekun. (Iobu 32:4; 33:32) Nge hnei Elihu hna qaja mekötin koi Iobu la kepin, matre tha ka loi kö lo hnei nyidrëti hna qaja me kuca. E thupen, hnei Elihu hna amekunë Iobu laka, ame Iehova, ke Akötresie ka inamacan, me men, me meköt, nge ka nyipici la ihnimi Nyidrë. (Iobu 36:​18, 21-​26; 37:​23, 24) Hnene la itre eamo i Elihu hna xatuane me hnëkë Iobu troa kapa la itre xaa eamo hnei Iehova hna troa hamën mekötin koi nyidrë. (Iobu 38:​1-3) Tune kaa la aqane xatuane la angetre Isaraela hnene la tulu i Elihu? Nge kola xatua së tune kaa enehila?

12. Hnauëne la Iehova a upe la itre perofeta kowe la nöj, nge hna xatuane tune kaa la angetre Isaraela hnene la tulu i Elihu?

¹² Hnene la tulu i Elihu hna xatuane tune kaa la angetre Isaraela ekö? Qane ekö, hnei Iehova hna acile la itre perofeta, matre qaja kowe la nöj la aja i Nyidrë. Ame ngöne la hneijine la Itretre Amekötin, hnei Iehova hna upi Debora perofeta föe troa hamën la itre hna amekötin kowe la nöj. Ngacama jeune pala kö Samuela, ngo hnei Iehova hna upi angeic troa hamëne la itre hna amekötin kowe la angetre Isaraela. (Ang. A. 4:​4-7; 5:7; 1 Sam. 3:​19, 20) Nge ame ngöne la ijine la itre joxu, hnei Iehova pala hi hna upe la itre perofeta matre troa acatrene la lapaun ne la nöj, me eamo angatr la angatr a tha idrei. (2 Sam. 12:​1-4; It. Hu. 3:​24) Maine jë, hnene la tulu i Elihu hna xatuane la angetre Isaraela ka mele nyipici, tune la itre perofeta troa atre la nyine troa qaja me aqane troa qaja, la angatr a eamo ketre.

13. Tune kaa la aqane tro sa ithuecatr kowe la itre trejin?

¹³ Kola xatua së tune kaa hnene la tulu i Elihu? Easë fe itre keresiano a ce thawa me itre xan la aja i Akötresie. Easa cainöjëne la maca ka loi ka ej ngöne la Tusi Hmitrötr. Nge easë mina fe a ithuecatr me akeukawane la itre trejin jëne la itre trengewekë së. (1 Kor. 14:3) Nyipiewekë catr tro la itre qatre thup a “hamëne la itre trenge ithanata ka keukawa” kowe la itre trejin, memine fe lo itre ka nango dépressif, maine itre ka majemine “ewekë menu.”​—1 Thes. 5:​14; Iobu 6:3.

14-15. Tune kaa la aqane tro la ketre qatre thup a nyitipu Elihu la nyidrëti a eamo ketre? Qaja jë la ketre ceitun.

¹⁴ Pane mekune jë la: Kola dreng hnene la ketre qatre thup laka, kola kucakuca la ketre trejin föe ne la ekalesia. Matre nyidrëti a ce tro memine la ketre trejin trahmanyi troa wai angeic me ithuecatr koi angeic. Ame la nyidroti a traqa, angeic a qaja la itre aliene hni angeic. Ngacama angeic a sine la itre icasikeu me cainöje trootro, ngo pëkö madrine i angeic. Nemene la hnei nyidrëti hna troa kuca?

¹⁵ Hnapan, tro nyidrë a pane thele la nyipi kepine matre angeic a kucakuca. Matre, nyipiewekë tro nyidrëti a xomi ijin troa drei angeice hnyawa. Maine jë, angeic a mekun ka hape, tha Iehova kö a hnimi angeic. Maine pena, angeic a “hnehengazone la itre ewekë thatraqane la mel,” matre tha loi kö angeic. (Luka 21:34) Hnaaluen, loi e tro la qatre thup a thel troa felisite la trejin föe. Ngacama angeic a hace hni, ngo angeice pala hi a sine la itre icasikeu me catre cainöj. Nge hnaakonin, e trotrohnine hë nyidrë la aliene hni angeic, memine la kepine matre angeic a kucakuca, ijiji nyidrëti hë troa xome la Tusi Hmitrötr matre amamane laka, Iehova a hnimi angeic.​—Gal. 2:​20.

CATRE JË KEPE THANGANE QA NGÖNE LA TUSI IOBU

16. Tune kaa la aqane tro sa kepe thangane qa ngöne la tusi Iobu?

¹⁶ Tru catr la itre ini nyine tro sa xom qa ngöne la tusi Iobu! Tune la hne së hna ce wang ngöne la tane mekun ka ase hë, kola ini së hnene la tusi Iobu la kepine matre Akötresie a nue la itre akötr, me aqane tro sa cile catr. Nge ame ngöne la tane mekune celë, hne së hna ce wang jëne la tulu ka ngazo ne la köni sinee i Iobu, memine la tulu ka lolo i Elihu, la aqane tro sa hamë eamo. Matre qëmekene troa hamë eamo, pane mekune ju la itre ini hnei eö hna kapa jëne la tusi Iobu. Nge maine ekö hë eö e la tusi Iobu, ke thele jë troa e hmaca. Tro eö lai a öhne laka, ka hetre thangane koi së enehila, tune ekö lo kola cinyanyine ej.