Keme Me Thine Fe, Eatrongëne Jë La Nekönatr Kowe La Bapataiso

1. Nemene la ka troa pane mama hnyawa koi keme me thin qëmekene tro la nekönatr a xomi bapataiso?

HANE hi la ewekë ka traqa koi Blossom Brandt ngöne lo angeic a mekun troa xomi bapataiso. “Nyimutre hë la itre treu ne qaja lapane ni koi kaka me nenë la ajang troa xomi bapataiso, matre tha mano kö nyidro ce ithanatane lai me eni. Ame la aja i nyidro tre, tro eni a trotrohnine hnyawa la enyipiewekëne la troa xomi bapataiso. Ame lo 31 Diseba 1934, ketre drai lai ka tru ne la meleng.” Ame enehila, itre keme me thine fe a thel tro la nekönatr a axecië mekune hnyawa. Maine tro la nekönatr a itreqe qëmekene troa xomi bapataiso, nge pëkö nyipi kepin, tro lai a hetre thangane kowe la aqane imelekeu i nyën me Iehova. (Iakobo 4:17) Qëmekene tro la nekönatr a xomi bapataiso, loi e troa pane mama hnyawa kowe la keme me thin laka, eje hë e kuhu hni nyën la mekun troa xötrethenge Keriso.

2. (a) Nemene la hna qaja hnene la itre trejin ka iwai trootro? (b) Nemene la hne së hna troa ce wang ngöne la tane mekun celë?

² Kola qaja hnene la itre trejin ka iwai trootro ka hape, alanyimu catre la itre thöth hna hiane ngöne la nyipici. Ngacama 20 hë lao macatre i nyudren, ngo tha xomi bapataiso pala kö. Nyudreni palahi a sine la itre icasikeu, me cainöje trootro, nge ame koi nyudren, Itretre Anyipici Iehova fe nyudren. Ngo, hetre kepin matre tha sa xepu pala kö nyudren koi Iehova, me xomi bapataiso. Ame koi itre xan e nyudren, kola mekun hnei keme me thin laka, tha macaje pala kö nyudren. Ame ngöne la tane mekune celë, tro sa ce wang la foa lao mekun ka hnöth la keme me thin troa nue la nekönatr troa xomi bapataiso.

KA NYIPI ATRE HË LA NEKÖNG?

3. Nemene la hna isine troa kuca hnene la keme me thine i Blossom?

³ Ame la keme me thine i Blossom, lo hna qaja ha e caha, nyidroti a isine matre tro Blossom a trotrohnine la aliene la troa xomi bapataiso, memine la enyipiewekëne lai. Nemene la aqane troa mama kowe la keme me thin laka, eje e kuhu hni ne la nekönatr troa nue la mele i nyëne koi Iehova?

4. Nemene la aqane xatuane la keme me thin hnene la hna qaja ngöne Mataio 28:19, 20?

⁴ E jë la Mataio 28:19, 20. Tha hna amekötine kö hnei Tusi Hmitrötr la macatre ka ijij troa xomi bapataiso. Ngo, loi e tro la keme me thin a mekune hnyawa la aliene la kola hape, troa “inine” la itre nekö i angatr matre tro nyudreni a hane drei Iesu. Ame la atre dreng tre, kola qaja la atre ka thel troa trotrohnine la itre ini qaathei Iesu, me trongëne itre ej. Matre, loi e tro la keme me thin a inine la nekönatr, e co petre kö, matre tro nyën a nue la mele i nyën koi Iehova, me ketre atre drei Keriso. Eje hi laka, tha ijije kö kowe la itre medreng troa xomi bapataiso. Ngo, Tusi Hmitrötr a amamane ka hape, ngacama co petre kö la nekönatr, ngo ijiji nyëne hi troa trotrohnin, me wangatrune la itre nyipici ne la Tusi Hmitrötr.

5, 6. (a) Jëne la tulu i Timoteo, nemene la hne së hna inin göne la bapataiso? (b) Nemene la aqane tro la keme me thin a xatuane la nekönatr?

⁵ Timoteo la ketre atre dreng ka mekun troa nyihlue i Iehova lo co petre kö. Öni Paulo aposetolo göi Timoteo ka hape, hnei angeic hna atre la nyipici “e nekönate pete kö.” Tha ka hmi kö la keme i angeic, ngo hnene la ixatua i thin me qaqa hmunë, matre ka tru koi angeic la Wesi Ula i Akötresie, nge catrecatre la lapaune i angeic. (2 Timoteo 1:5; 3:14, 15) Nge, ame la kola sasaithe la 20 lao macatre, hna hamë angeic la ketre hnëqa ka tru ngöne la ekalesia.—Ite Huliwa 16:1-3.

⁶ Isapengöne kö la itre nekönatr. Alanyim la itre nekönatr ka canga trotrohnine la nyipici, me axeciën troa xomi bapataiso. Nge, ame pena itre xan, nyudreni a treqen matre nyipi atre jë nyudren. Tha tro kö la keme me thin a musinëne la nekönatr troa xomi bapataiso. Tro nyidroti pe a xatuane la itre nekönatr troa kökötr hnyawa ngöne la nyipici. Madrine catre la keme me thin la kola trongëne hnene la nekönatr la hna qaja ngöne Ite Edomë 27:11. (E jë.) Ngo, tha tro pi kö nyidro a thëthëhmine la aja i nyidro, ene la troa inine la nekönatr matre troa ketre atre drei Iesu. Loi e tro fe nyidroti a thel, me hape, ‘Hapeu, atre hnyawa hi la neköng la aliene la Tusi Hmitrötr matre troa sa xepu me xomi bapataiso?’

ATRE HNYAWA KÖ LA TUSI HMITRÖTR HNENE LA NEKÖNG?

7. Qëmekene troa xomi bapataiso, nyipiewekë kö troa atre asë la hna qaja e hnine la Tusi Hmitrötr? Qejepengöne jë.

⁷ Ame la kola inine la nekönatr hnene la keme me thin tre, nyidroti a thel tro nyën a atre hnyawa la Tusi Hmitrötr. Nyipici laka, tro la itre ini hnei nyën hna kapa a upi nyën troa nue la mele i nyën koi Iehova. Ngo, tha kolo kö lai a qaja ka hape, loi e tro nyën a atre asë la Tusi Hmitrötr qëmekene troa sa xepu me xomi bapataiso. Thupene la bapataiso, tro pala kö la itretre drei Keriso a catre inine la Tusi Hmitrötr. (E jë la Kolose 1:9, 10.) Nemene la nyine troa atre hnene la atr qëmekene troa xomi bapataiso?

8, 9. Nemene la ewekë ka traqa e Filipi, nge nemene la ini hne së hna xom?

⁸ Tro la hna melën hnene la ketre hnepe lapa ekö a xatuane la keme me thin enehila. (Ite Huliwa 16:25-33) Ame ngöne la macatre 50, hnei Paulo hna traqa ngöne la traon e Filipi, kolo hnaaluene tronge i angeic. Ame lo angeic e cili, hna jelengazo angeic me Sila, me akalabusi nyidro. Hna traqa la sa ngöne la jidri cili, nge fe angangane pi la itre qanahage ne la kalabus. Ame la kola öhne hnene la atre thupëne la kalabus ka hape, patre hë lo lue hna oth, hnei angeic hna thel troa hnöjua. Ngo, hnei Paulo hna sewe angeic. Thupene lai, hnei Paulo me Sila hna ini angeic me hnepe lapa i angeic la nyipici göi Iesu. Ame hnei angatr hna mejiune kowe la itre ini cili, me öhne la enyipiewekëne troa drengethenge nyidrë. Matre, hna bapataiso angatr ngöne la ijine cili. Nemene la hna ini së hnene la hna melën celë?

⁹ Maine jë, ame la atre thupëne la kalabus tre, ketre soce i angetre Roma. Thatre hnyawa kö angeic la Wesi Ula i Akötresie. Matre, qëmekene troa bapataiso angeic, hnei angeic hna pane inine la itre ini ka tru ne la Tusi Hmitrötr, me atre la aja i Iehova kowe la itre hlue i Nyidrë, me hetre aja troa trongëne la itre ini qaathei Iesu. Ame la hnei angeic hna inine ngöne la hnepe ijine ka co hi tre, celë hi ka upi angeic troa xomi bapataiso. Eje hi laka, tha hnei angeice kö hna hmaca troa atrepengöi Iehova e thupen. Matre, e qaja jë hnene la nekönatr la aja i nyën troa xomi bapataiso ke, tru la ihnimi nyën koi Iehova, nge aja i nyën troa drengethenge Nyidrë, nemene la hnei epon hna troa kuca? Loi e tro epon a nue angeic troa ithanata memine la itre qatre thup, matre tro angatr a axeciën ka hape, ijiji nyëne hi troa xomi bapataiso.a (Wange ju la ithuemacany.) Tro palahi nyëne lai a thel troa atrepengöi Iehova ngöne la mele i nyën, nge utihë epine palua.—Roma 11:33, 34.

NEMENE LA INI KA LOI KOWE LA NEKÖNG?

10, 11. (a) Nemene la mekuna ne la itre xa keme me thin? (b) Nemene la ka troa xatuane la nekönatr?

¹⁰ Ame kowe la itre xa keme me thin, loi e tro la nekönatr a pane ini hnyawa göi troa hetre huliwa ka loi qëmekene troa xomi bapataiso. Ame koi angatr, tha mekun ka ngazo kö lai, ngo loi e tro angatr a isa waipengöi angatre kö, me hape: ‘Eni kö a xatuane la neköng matre troa tro loi la mele i angeic? Ka ihmeku kö la itre mekunang memine la hna qaja hnei Tusi Hmitrötr? Nemene la aqane tro sa mel thenge la aja i Iehova?’—E jë la Ate Cainöj 12:1.

¹¹ Tha tro pi kö sa thëthëhmine laka, ame la fene celë memine la itre igötranene ej tre, ka isazikeu memine la aja i Iehova, me aqane mekune i Nyidrë. (Iakobo 4:7, 8; 1 Ioane 2:15-17; 5:19) E troa catre la aqane imelekeu ne la nekönatr me Iehova, tro lai a thupë angeic qa ngöne la itre nyinyithiina i Satana, me fene i angeic, me aqane mekune ne la fen. Maine nyipiewekë kowe la keme me thin tro la nekönatr a sisedrëne la itre ini ka tru matre troa hetre huliwa ka loi, tro hë nyëne lai a mekun ka hape, ka sisitria kö la itre ewekë ne fen hune la aqane imelekeu i angeic me Iehova. Nge, tro lai a hetre ethan. Hapeu, aja i epone kö tro la fen a amamane kowe la nekönatr la aqane troa hetre mele ka loi? Tro hmekuje hi sa hetre nyipi madrin, me mele ka loi, e hna amë panë Iehova ngöne la mele së.—E jë la Salamo 1:2, 3.

E TRAQA JU KEI KOWE LA NGAZO HNENE LA NEKÖNG?

12. Pine nemene matre itre xa keme me thin a sawa la nekönatr troa xomi bapataiso?

¹² Kola qaja hnene la ketre thine la kepine matre eahlo a sawa la nekö i eahlo jajinyi troa xomi bapataiso. Öni eahlo, “Eni a hmahma troa qaja, ngo ame la nyipi kepine matre eni a ujë tune lai tre, xoung e troa upetröneëne la neköng e thupen.” Alanyimu la itre keme me thin ka mekun tune lai. Ame koi angatr, loi e tro la nekönatr a pane itreqe matre nyipi atre jë nyën ke, wanga kei pi kowe la ngazo. (Genese 8:21; Ite Edomë 22:15) Angatr a mekun laka, e tha hna bapataisone kö la nekönatr, thatreine kö troa upetröneë nyën. Ngo, pine nemene matre ka tria la aqane mekune cili?—Iakobo 1:22.

13. E tha hna bapataisone petre kö la nekönatr, kolo kö lai a hape, tha tro kö Iehova a hnyingë pengöne la thiina i nyën? Qejepengöne jë.

¹³ Trotrohnine hi së laka, tha aja i keme me thine kö tro la nekönatr a xomi bapataiso, nge tha nyipi atre pala kö. Ngo, tha meköti kö e troa mekun ka hape, pëkö ngazo i nekönatr e tha hna bapataisone pala kö. Ame hë la nyën a atre la mekuna i Iehova göi loi me ngazo, tro hë Nyidrëti lai a hnyingë pengöne la thiina i nyën. (E jë la Iakobo 4:17.) Haawe, tha tro pi kö la keme me thine a sawa la nekönatr troa xomi bapataiso. Loi e tro pe nyidroti a amamai tulu ka loi. Ngacama ka co petre kö la nekönatr, ngo loi e tro nyidroti a ini nyën troa wangatrune la itre trepene meköti Iehova. (Luka 6:40) Pine laka, hetre aja i nyën troa trongëne la itre trepene meköti Iehova, haawe, tro la ihnimi nyëne koi Nyidrë a sewe nyën troa kei kowe la ngazo.—Isaia 35:8.

TRO LA ITRE TREJIN A HAMË IXATUA

14. Nemene la aqane tro la qatre thup a xatuane la keme me thin?

¹⁴ Loi e tro la itre qatre thup a xatuane la itre keme me thin, ene la troa qaja aloine la itre huliwa i Iehova nyine troa kuca. Tha thëthëhmine kö la ketre trejin föe la hna qaja hnei Russell koi angeic lo kola 6 lao macatre. Öni angeic, “Fifitrin lao menetr ne ce ithanatan nyio la itre mekun hnenge hna pi eatrëne ngöne la huliwa i Iehova.” Nemene ju hë la thangane lai? Ame hë e thupen, hnene la trejin föe hna xom la huliwa ne pionie, nge 70 nge sine lao macatre ne angeic a pionie! Haawe, nyipiewekë la itre ithanata ka iakeukawan, me ka ithuecatre ke, tro lai a hetre thangane kowe la mele ne la atr. (Ite Edomë 25:11) Tro fe la itre qatre thup a hëne la keme me thin me nekönatr troa ixatua nyihnyawane la Uma Ne Baselaia, me thue huliwane la nekönatr thenge la macatre, me hna atreine kuca hnei nyën.

15. Nemene la aqane tro la itre xa trejin a hamë ixatua?

¹⁵ Nemene la aqane tro la itre xa trejin a hamë ixatua? Loi e tro angatr a nyipiewekën la nekönatr. Tro lai a mama koi së la itre hatrene laka, nyën a thel troa easenyi koi Iehova. Hapeu, hane fe kö nyën hamë mekun ngöne la itre icasikeu, maine hetre xötreqa pena hna cile fë? Hapeu, hnei nyëne kö hna cainöj ngöne la hna ini, maine elë hune la ketre itupath? Haawe, the cile kö së troa qaja la madrine së koi nyën! Loi e tro sa thel troa ithanata memine la ketre nekönatr qëmekene me thupene la icasikeu. E tro sa ujë tune lai, tro la itre nekönatr a dreng laka, nyudreni fe la atrene la “icasikeu atraqat.”—Salamo 35:18.

XATUANE JË LA NEKÖNATR TROA XOMI BAPATAISO

16, 17. (a) Pine nemene matre nyipiewekë troa xomi bapataiso la nekönatr? (b) Nemene la ka troa hamë madrine kowe la keme me thin? (Wange ju la pane iatr.)

¹⁶ Ame la hnëqa ka tru ne la keme me thin tre, ene la troa inine la nekönatr troa hnimi Iehova. (Salamo 127:3; Efeso 6:4) Ame ngöne la nöje Isaraela, itre ka sa xepu hë la itre nekönatr la kola mala nyudren. Ngo, tha ka ceitune kö memine la itre nekö së. Tha hnene kö laka, ka hnimi Iehova, me ka wangatrune la nyipici hnene la keme me thin, matre tro fe la nekönatr a hane ujë tun. Qaane la kola mala nyudren, loi e tro la keme me thin a xatua nyudren troa sa xepu koi Iehova me xomi bapataiso. Pine nemene matre ka nyipiewekë catre lai? Pine laka, ame la atr ka sa xepu me xomi bapataiso, me mele nyipici koi Iehova, celë hi ka troa aijiji angeic troa mele pe ngöne la ijine akötr atraqatr.—Mataio 24:13.

¹⁷ Ame la Blossom Brandt a qaja la aja i angeic troa xomi bapataiso, hnene la keme me thine i angeic hna thel troa atre ka hape, xecie hnyawa e kuhu hni angeic la aja cili. Ame la kola mama hnyawa lai koi nyidro, hnei nyidroti hna thuecatre koi angeic. Blossom a qaja la hna kuca hnei kem lo hej qëmekene tro angeic a xomi bapataiso. Öni angeic: “Hnei nyidrëti hna upi huni asë troa sa iwatingöneca, ame hnei nyidrëti hna thith. Hnei nyidrëti hna qaja koi Iehova la madrin ka ej thei nyidrë pine la mekun hnenge hna axeciën, ene la troa nue la meleng koi Nyidrë.” Traqa koi 60 nge sine lao macatre enehila, öni Blossom: “Tha tro pi kö ni a thëthëhmine la heji cili!” Keme me thine fe, epi tro fe epun a madrin troa goeëne la nekö i epun a nue la mele i nyën koi Iehova, me xomi bapataiso.