Bapataiso—Hna Amekötine Kowe La Keresiano

1, 2. (a) Nemene la mekuna ne la itre keme me thin la kola ajan hnene la nekönatr troa xomi bapataiso? (b) Pine nemene matre loi e troa pane sa xepu koi Iehova qëmekene troa xomi bapataiso? (Wange ju la pane iatr.)

KOLA goeë Maria, nekönatre jajiny, hnene la keme me thine i nyën a ce lapa memine la itre ka troa xomi bapataiso. Ame hë la kola qaja la lue hnying koi angatr hnene la trejin ka cile fë cainöj, Maria a sa catrëne lue ej. Thupene lai, kola bapataiso nyën.

² Tru catre la madrine ne la keme me thine i Maria laka, hnei nyën hna sa xepu koi Iehova, me xomi bapataiso. Ngo, qëmekene la drai cili, kola nango seseu hnene la thine i Maria. Eahlo a sipu thel, me hape: ‘Hapeu, tha ka nango co pala kö Maria matre troa xomi bapataiso? Trotrohnine kö nyëne la enyipiewekëne troa sa xepu koi Iehova? Tro kö nyën a nango itreqe qëmekene troa xomi bapataiso?’ Alanyimu la itre keme me thin ka isa hnyinge tune lai la kola ajan hnene la nekönatr troa xomi bapataiso. (Ate Cainöj 5:5) Ngo, eje hi laka, ame la mekun ka tru nyine tro sa isa axeciën tre, ene la troa sa xepu koi Iehova me xomi bapataiso.—Wange ju la itre mekun hna eköhagen, “Ase Hë Epuni Sa Xepu Koi Iehova?”

3, 4. (a) Nemene la aqane amamane Peteru aposetolo la enyipiewekëne troa xomi bapataiso? (b) Pine nemene matre Peteru a aceitunëne la bapataiso memine la aka hna cane hnei Noa?

³ Hnei Peteru aposetolo hna aceitunëne la bapataiso memine la aka hna cane hnei Noa. Öni angeic: “Kola cei tune me bapataiso, la kola amele nyipunie enehila.” (E jë la 1 Peteru 3:20, 21.) Hnene la hna cane la aka matre kola mama ka hape, ka ej e kuhu hni Noa troa kuca la aja i Akötresie. Hnene la lapaune i Noa matre angeic a kuca la huliwa hnei Iehova hna athipe koi angeic. Jëne la lapaune i Noa, hnei Iehova hna amele angeic me hnepe lapa i angeic ngöne la ijine Iwë Atraqatr. Nemene la ini hne së hna xom qa ngöne la hna qaja hnei Peteru?

⁴ Ame la kola goeëne la aka hnene la itre atr, mama hi koi angatr laka, ka lapaune Noa koi Akötresie. Nge, ame la kola öhne hnene la itre atr la kola xomi bapataiso hnei ketre, atre hë angatr laka, ase hë angeic sa xepu koi Akötresie ke, ka lapaune angeic koi Keriso. Tui Noa, ame la itre ka ajan troa xomi bapataiso, angatr a drengethenge Akötresie, me kuca la huliwa hnei Nyidrëti hna athipe koi angatr. Nge, tune la aqane amele Noa hnei Iehova ngöne la ijine Iwë, tro Nyidrëti lai a amelene la itre hlue i Nyidrë ka bapataiso, me ka mele nyipici koi Nyidrë ngöne la ijine troa lep apatrene la fen ka ngazo. (Mareko 13:10; Hna Amamane 7:9, 10) Maine tro ketre a uthe lapane la ijine troa xomi bapataiso, tro angeice lai a triane la mele ka tha ase palua kö. Haawe, ka nyipiewekë catre troa sa xepu koi Iehova me xomi bapataiso.

5. Nemene la hne së hna troa ce wang ngöne la tane mekune celë?

⁵ Atre hë së enehila la enyipiewekëne la troa xomi bapataiso, haawe, tro hë sa ce wange la köni hnyinge celë: Nemene la hna qaja hnei Tusi Hmitrötr göi bapataiso? Nemene la nyine troa kuca hnene la atr qëmekene troa xomi bapataiso? Pine nemene matre tro la ka hamë ini a lapa mekune la enyipiewekëne la bapataiso ngöne la kola ini Tus kowe la itre nekönatr me itre xa atr?

ALIENE LA BAPATAISO E HNINE LA TUSI HMITRÖTR

6, 7. (a) Pine nemene matre itre atr a traqa koi Ioane troa bapataiso angatr? (b) Nemene la bapataiso ka sisitria catr, nge pine nemen?

⁶ Ame e hnine la Tusi Hmitrötr, Ioane bapataiso lo ka pane bapataisone la itre atr. (Mataio 3:1-6) Pine nemene matre itre atr a traqa koi angeic troa xomi bapataiso? Angatr a ajan troa amamane ka hape, ase hë angatr ietra ke, tha hnei angatre kö hna trongëne hnyawa la wathebo i Mose. Nge, hleuhleu catre la hni angatr pine lai. Ngo, ame la bapataiso ka sisitria catr hnei Ioane hna kuca tre, ka hetre sipu aliene kö; kola qaja lo bapataiso i Iesu, nekö i Akötresie. (Mataio 3:13-17) Nyipici laka, pëkö ngazo i Iesu, matre tha nyipiewekë kö tro nyidrëti a ietra. (1 Peteru 2:22) Ngo, hnei Iesu pe hna xomi bapataiso matre troa amamane laka, tro hë nyidrëti a kuca la aja i Iehova ngöne la mele i nyidrë.—Heberu 10:7.

⁷ Ame hë la Iesu a cainöje trootro, kolo ha bapataisone la itre atr hnene la itretre drei nyidrë. (Ioane 3:22; 4:1, 2) Itre atr a xomi bapataiso ke, angatr a ietrane la ngazo i angatr. Tha hnei angatre kö hna trongëne hnyawa la wathebo i Mose. Ame hë la kola meci hnei Iesu, me amele nyidrëti hmaca, hetre ketre aliene hë la kola bapataisone la itre atr.

8. (a) Nemene la hnei Iesu hna amekötine kowe la itretre dreng? (b) Pine nemene matre kola bapataisone la atr?

⁸ Ame ngöne la macatre 33, thupene lo kola amele Iesu, hetre hnei nyidrëti hna amekötine kowe la ala 500 lao atr, itre trahmany, me föe, me itre nekönatr. Öni nyidrë: “Qa ngöne lai, tro jë nyipunie a inine la nöjei nöj’ asëjëihë, me bapataiso angate kowe la atesiwa i Tetetro, me Hupuna, me [u]ati [h]mitöt; ini angate jë troa trongëne la nöjei ewekë asëjëihë lo hnenge hna ahnithe koi nyipunie.” (Mataio 28:19, 20; 1 Korinito 15:6) Hnei Iesu hna upe la itretre drei nyidrë troa inine la itre atr troa xötrethenge nyidrë. Nyipiewekë troa bapataisone la atr ka kapa la ini qaathei nyidrë. (Mataio 11:29, 30) Maine hetre aja ne la atr troa nyihlue i Iehova thenge la aqane amekötine Nyidrë, loi e tro angeic a atrehmekune me kapa la hnëqa i Keriso laka, tro Iehova a eatrëne la aja i Nyidrë jëne Iesu. Ame hë e cili, ijije hë troa bapataiso angeic. Celë hi bapataiso hna kapa hnei Akötresie. Nyimu aqane anyipicine e hnine la Tusi Hmitrötr ka amamane ka hape, trotrohnine hnyawa hi la itretre drei Iesu la enyipiewekëne troa xomi bapataiso. Ame koi angatr, tha tro kö a hmitre troa xome la bapataiso.—Ite Huliwa 2:41; 9:18; 16:14, 15, 32, 33.

THE CILE KÖ TROA XOMI BAPATAISO!

9, 10. Nemene la hne së hna inine qa ngöne la hna kuca hnene la atre Aithiope, me Saulo?

⁹ E jë la Ite Huliwa 8:35, 36. Kola bëeke qa Ierusalema hnene la atre Aithiope ka lö kowe la hmi angetre Iudra. Angeic a bëeke qa hna atrunyi Iehova. Hnene la angela i Iehova hna upi Filipo troa cainöj koi angeic, ame hnei Filipo hna qejepengöne koi angeic “la maca ka loi Iesu.” Nemene hë la hna kuca hnene la atre Aithiope? Hnene laka, trotrohnine hë angeic la hnëqa i Iesu, ame hnei angeic hna thel troa trongëne la hna amekötin hnei Iehova. Celë hi matre, angeic a canga xomi bapataiso.

¹⁰ Ame la ketre tre, Saulo, atre Iudra. Hna hnaho angeic ngöne la nöj ka sa xepu hë koi Iehova. Ngo hnene la angetre Iudra hna tha idrei, ame hnei Iehova hna nuetriji angatr. Ka catre trongëne Saulo la itre hna majemine kuca hnei angetre Iudra ngöne la hmi. Matre, hnei angeic hna axösisine la itre keresiano. Ngo, ame la ketre ijin, hnei Iesu, lo mele hmaca ha nyidrë, hna ithanata meköti koi Saulo qa hnengödrai. Nemene hë la hna kuca hnei Saulo? Hnei angeic hna kapa madrine la ixatua i Anania, ketre atre dreng. Öni Tusi Hmitrötr: “Ame hna goepi angeice, me cilejë, ame hna bapataiso angeic.” (Ite Huliwa 9:17, 18; Galatia 1:14) Hna hë angeice pë hë e thupene ka hape, Paulo aposetolo. Pane mekune jë! Ame ju hi la angeic a trotrohnine laka, Iehova a eatrëne la aja i Nyidrë jëne Iesu, canga xomi bapataiso ju fe hi angeic.—E jë la Ite Huliwa 22:12-16.

11. (a) Pine nemene matre hetre aja thene la itre ka ini Tus troa xomi bapataiso? (b) Nemene la ewekë ka ej e kuhu hni së la kola xomi bapataiso hnene la atr?

¹¹ Celë hi ewekë ka traqa enehila thene la itre ka ini Tusi Hmitrötr, itre thöth me itre qatr. Hnene laka, angatr a wangatrune me mejiune kowe la hna qaja hnei Tusi Hmitrötr, haawe, hetre aja i angatr troa sa xepu koi Iehova me xomi bapataiso. Eje hi laka, ketre ijine ka lolo la kola cile fë la cainöj ne bapataiso ngöne la itre asabele. Hetre madrinene la Itretre Anyipici Iehova la kola kapa la nyipici hnene la itre ka ini Tus, me xomi bapataiso. Nge, atraqatre la madrine la itre keme me thin la kola ujë tune lai hnene la itre nekönatr. Ame ngöne la macatre 2017, 284 000 nge hetre munën lao atr hna bapataison. (Ite Huliwa 13:48) Trotrohnine hnyawa ha angatr la enyipiewekëne troa xomi bapataiso. Ngo, nemene la hnei angatr hna kuca qëmekene troa xomi bapataiso?

12. Nemene la nyine tro la ka ini Tus a kuca qëmekene troa xomi bapataiso?

¹² Qëmekene tro la ka ini Tusi a xomi bapataiso, loi e tro angeic a atre la nyipici göi Akötresie, memine la aja i Nyidrë kowe la itre atr memine la ihnadro. Loi e tro fe angeic a atre la hnei Iehova hna hnëkën matre troa amelene la nöjei atr. (1 Timoteo 2:3-6) Tro ha catre la lapaune i angeic e thupen, nge tro hë angeice lai a trongëne la itre wathebo i Akötresie, me sisine la hnei Nyidrëti hna sisin. (Ite Huliwa 3:19) Ka nyipiewekë catre lai ke, tha tro kö Iehova a kapa la hna sa xepu hnene la atr ka kuca la itre ewekë hnei Nyidrëti hna xele ma wang. (1 Korinito 6:9, 10) Ngo, hetre ketre ewekë kö nyine tro angeic a kuca. Ame la atr ka ajan troa sa xepu koi Iehova, nyipiewekë tro angeic a sine la itre icasikeu ne la ekalesia, me catre cainöjëne la maca ka loi, me ini itre xan. Celë hi ewekë nyine troa kuca hnene la atr ka ajan troa xötrethenge Keriso. (Ite Huliwa 1:8) Loi e tro la ka ini Tus a pane kuca la itre ewekë celë. Thupene lai, tro hë angeice lai a sa xepu koi Iehova jëne la thith, me xomi bapataiso.

HNËKËNE JË LA ITRE KA INI TUS KOWE LA BAPATAISO

13. Pine nemene matre, nyipiewekë tro la nyipi keresiano a xomi bapataiso?

¹³ Ame la easa xatuane la itre nekönatr memine la itre ka ini Tus troa kuca la itre ewekë celë, loi e tro sa lapa atre laka, ame la atre thel troa xötrethenge Iesu, nyipiewekë tro angeic a xomi bapataiso. E ka mama cile hnyawa lai koi së, tro së lai a thel la ijin ka loi troa ithanatan me angatr la enyipiewekëne troa sa xepu koi Iehova me xomi bapataiso. Eje hi laka, hetre aja së tro la itre ka ini Tus, me itre nekö së a kökötre ngöne la nyipici, me xomi bapataiso!

14. Pine nemene matre tha tro kö sa musinë ketre troa xomi bapataiso?

¹⁴ Eje hi laka, tha tro pi kö sa musinëne la nekönatr, maine la ka ini Tusi me easë troa xomi bapataiso. Ame Iehova, tha ka imusinë kö troa nyihlue i Nyidrë. (1 Ioane 4:8) Ame la easa ini Tusi memine la nekö së, maine ini Tusi pena me itre xan, loi e tro sa xatua angatr troa trotrohnine la enyipiewekën la troa imelekeu me Iehova. Nge, maine tro la ka ini Tus a hetre hni ne ole kowe la itre nyipici göi Akötresie, me hetre aja troa trongëne la itre hna amekötin thatraqane la keresiano, tro hë angeice lai a hetre aja troa xomi bapataiso.—2 Korinito 5:14, 15.

15, 16. (a) Hetre macatre kö hna amekötin göi troa xomi bapataiso? Qejepengöne jë. (b) Hnauëne laka, tro la ka ini Tus a xomi bapataiso matre troa ketre Atre Anyipici Iehova fe angeic, ngacama hna bapataisone hë ngöne la ketre hmi?

¹⁵ Tha hna amekötine kö la macatre ne troa xomi bapataiso. Ame la itre xa ka ini Tus tre, ka canga kökötre kö angatr hune la itre xan. Alanyimu la itre ka xomi bapataiso e nekönatre petre kö, nge ka mele nyipici utihë e qatre hë. Ame itre xan, qatre hë angatr la kola atre la nyipici, me xomi bapataiso. Ame la itre xa qatr, ase hë sasaithe la 100 lao macatre!

¹⁶ Ame la ketre föe ka ini Tus, ase hë bapataiso eahlo ngöne la itre xa hmi. Celë hi kepin matre eahlo a hnying kowe la ka hamë ini koi eahlo ka hape, ‘Tro hmaca kö ni a xomi bapataiso?’ Hnene la ka ini Tusi me eahlo hna amamane la itre xötr ne la Tusi Hmitrötr ka sa la hnyinge i eahlo. Ame hë e cili, trotrohnine hë eahlo la itre hna amekötin hnei Tusi Hmitrötr, ame hnei eahlo hna xomi bapataiso, ngacama easenyi hë matre 80 pi hë la macatre i eahlo. Nemene la ini koi së? Tro Iehova a kapa la bapataiso së, e atre hë së la nyipici göne la aja i Nyidrë. Matre, ngacama ase hë bapataiso së ngöne la ketre hmi, ngo loi e tro sa xomi bapataiso hmaca, maine easa ajan troa hane anyipici Iehova.—E jë la Ite Huliwa 19:3-5.

17. Nemene la nyine troa mekune hnyawa ngöne la drai ne bapataiso?

¹⁷ Ketre drai ne madrine la drai ne bapataiso. Nge, ijine fe hi lai troa mekune hnyawa la hnëqa së, ene la troa catre mele thenge la hna sa xepu me xomi bapataiso. Tha ka hmaloi kö troa trongëne la hnëqa cili. Celë hi kepine matre, “tha tro hmaca kö [la itretre drei Iesu] a mele koi angate kö ange ka mel, ngo loi pe koi nyidëti ate meci nge mele hmaca ha thatraqai angat.”—2 Korinito 5:15; Mataio 16:24.

18. Nemene la itre hnying hne së hna troa ce ithanatan ngöne la tane mekun ka troa xulu?

¹⁸ Tune la hne së hna ce wang ngöne la tane mekune celë, ketre mekun ka tru nyine axeciën la troa sa xepu me xomi bapataiso. Celë hi kepin matre kola seseu, me hnying hnene la thine i Maria, lo hna qaja ha e caha. Maine itre keme me thin epun, isa hnyinge jë ka hape: ‘Ijije hë kowe la neköng troa xomi bapataiso? Atrepengöi Iehova hnyawa kö hnei angeic matre troa sa xepu koi Nyidrë me xomi bapataiso? Tro kö angeic a pane ini hnyawa me hetre huliwa ka loi qëmekene troa xomi bapataiso? Nemene la hnenge hna troa kuca e kei pi angeic kowe la ngazo thupene la hna xomi bapataiso?’ Ame ngöne la tane mekune ka troa xulu, tro sa ce ithanatane la itre hnyinge celë, me itre nyine kuca hnene la keme me thin matre meköt la aqane waiewekë i nyidro göi bapataiso.