Nyipiewekë Troa Ikep!

1. Nemene la itre jol hna qëmeke kow hnene la itre pane keresiano?

AME ngöne la itre macatre 62 koi 64, hnei Peteru aposetolo hna cinyihane “kowe la nöjei tenyiwa hna isa ije kowe Poneto, me Galatia, me Kapadokia, me Asia, me Bithunia.” (1 Peteru 1:1) Ame la itre trejine cili tre, angatr a traqa qa ngöne la itre nöj gaa nany. Hnei angatr hna qëmeke kowe “la itupathi kösë eë,” matre angatr a aja ithuecatr, me ixatua. Ketre, angatr a melëne la hneijine ka ngazo. Öni Peteru: “Eaeshenyi hë la pune la nöjei ewekë asëjëihë.” Nyipici laka, xalaithe hi la itre macatre thupene lai, kola troa lep apatrene Ierusalema. Nemene la ka troa xatuane la itre keresiano ngöne la itre macatre ne akötre cili?—1 Peteru 4:4, 7, 12.

2, 3. Pine nemene matre hnei Peteru hna upe la itre trejin me angeic troa kepe ketre me ketre? (Wange ju la pane iatr.)

² Hnei Peteru hna upe la itre trejin troa “ihnimi trenyiwa,” ene la troa ikep. (1 Peteru 4:9, MN) Peteru e celë a upe la itre trejin troa ikep, ngacama ka iatre hë angatr, nge ka majemine hë angatr ce huliwa. Nemene la aqane tro lai a xatua angatr?

³ Celë hi ka troa aeasenyi ketre koi ketre. Tune kaa epun? Mekune pala kö epuni lo kola hë epun hnei ketre? Tha ijine madrine kö lo koi epun? Nge, ame la epuni a ikönë, hapeu, tha hna acatrene kö la aqane imelekeu i epun memine la itre trejin? Ame la aqane tro sa atrepengöne hnyawa la itre trejin tre, ene la troa kepe angatr. Ame la itre keresiano ka mel ngöne la hneijine i Peteru, nyipiewekë tro angatr a acatrene la aqane imelekeu i angatr ke, kolo palahi a ngazo catre la itre ijine cili. Ketre tune mina fe, loi e tro sa nyitipu angatr ke, easa melëne “la ite drai hnapin,” ene la itre drai tixenuë ne la fene celë.—2 Timoteo 3:1.

4. Nemene la itre hnying hne së hna troa ithanatan?

⁴ Eu la itre ijine tro sa kepe ketre me ketre? Pine nemene matre easa cile hnö troa ikep, nge nemene la ka troa xatua së troa ikep? Nemene la aqane tro sa metrötrën la itre ka kepe së?

ITRE IJINE TROA IKEP

5. Nemene la aqane tro sa ikep ngöne la itre ijine icasikeu?

⁵ Ngöne la itre icasikeu: Hnei Iehova memine la organizasio i Nyidrë hna hë së kowe la itre icasikeu. Ketre, aja së troa kapa hnyawa la itre ka sine la itre icasikeu, ene mina fe la itre ka xötrei traqa. (Roma 15:7) Angatre fe la itre hna hën hnei Iehova, matre loi e tro sa kepe angatr hnyawa, ngacama tha ceitu së kö me angatr, nge isapengöne kö la aqane heetre së me angatr. (Iakobo 2:1-4) Maine epuni a öhne la ketre e lapa cas, hë angeice jë troa ce lapa me epun. Tro angeice lai a madrin e tro epuni a xatua angeic troa trotrohnine la aqane trongene la icasikeu, maine troa ithel ngöne la Tusi Hmitrötr. Celë hi aqane tro sa ‘majemine troa hnime la itre trenyiwa.’—Roma 12:13.

6. Drei la nyine tro sa kapa hnyawa?

⁶ Troa hutihut maine ce xen: Ame ekö, itre atr a ihë kowe la hnalapa i angatr matre troa ce xen ke, angatr a ajan troa ce sinee, maine ce mele tingeting. (Genese 18:1-8; Angete Amekötin 13:15; Luka 24:28-30) Drei la itre hne së hna troa canga kapa? Loi e tro sa hëne la itre trejine ka ce me easë e hnine la ekalesia. Pine laka, tro palahi a ngazo catre la fen, haawe, nyipiewekë catr tro së, itre trejin, a inyipicikeu, me ce mele tingeting. Ame lo macatre 2011, hnene la Lapa Ne Xomi Meköt hna saze la hawa ne icasikeu göi ini Ita Ne Thup ngöne la Bethela e Etazini. Tha tro hmaca kö a nyiqaane e 18 h 45, ngo e 18 h 15. Kola qaja hnene la ithuemacanyi ka hape, tro ha hmaloi kowe la itre atrene la Bethela troa kapa la ihë i ketre, maine könë ketre pena ke, canga fenesi hi la icasikeu. Hnene la itre xa Bethela hna hane kuca tune lai. Kola aijijën la itre atrene la Bethela troa iatre hnyawa.

7, 8. Nemene la aqane tro sa kapa la itre ka traqa troa tro fë cainöj ngöne la ekalesia së?

⁷ Ame itre xa ijin, kola traqa kowe la ekalesia së la ketre trejin ka troa hamë cainöj, maine ka iwai trootro, maine ka nyitrengewekëne la Bethela. Hapeu, ijije kö tro sa könë angeic ngöne la ijine cili? (E jë la 3 Ioane 5-8.) Ka lolo catr e tro sa hë angeic kowe la hnalapa së matre troa hutihut, maine ce xen.

⁸ Önine la ketre trejin föe qa Etazini ka hape: “Ame ngöne la itre macatre ka ase hë, hnenge me föeng hna majemine könëne la itre trejin ka tro fë cainöj ngöne la ekalesia hun.” Ame koi angeic, hnene la itre ijine cili hna acatrene la lapaune angeic, nge itre ijine madrin atraqatr. Öni angeic: “Tru catre la madrinenge la hnenge hna kapa la itre trejin.”

9, 10. (a) Drei la itre ka troa lapa aqeanyi thei epun? (b) Ijije kö troa hane ikep hnene la itre ka trene uma ka co? Hamëne jë la ketre ceitun.

⁹ Itre ka lapa aqeany: Ame ekö, hnene la itre atr hna majemine kapa la itre ka traqa kowe la hnalapa i angatr. (Iobu 31:32; Filemona 22) Ame enehila, loi e tro fe sa hane kuca tun. Ame la trejin ka wange trongëne la itre ekalesia tre, angeic a aja hnë meköl. Ketre tune mina fe la itre ka sine la itre ini qaathei Iehova, me itre ka saen troa xupi uma. Nge, tune kaa la itre ka pëhë hnalapa thupene la itre hulö? Angatr a aja hnë meköl ngöne la ijine kola xupe hmaca la uma i angatr. Tha tro pi kö sa mekune ka hape, itre ka trene uma ka tru hmekuje hi la ka ijij troa ikep. Anyimua kapa ha angatre lai la itre trejin. Nge tune kaa fe epun, ijiji epuni kö troa hane ikep, ngacama co ju hë la hnalapa i epun?

¹⁰ Kola qaja hnene la ketre trejin qa Corée du Sud la itre ijine ne kapa angeic la itre ka sine la itre ini qaathei Iehova. Öni angeic: “Ame ngöne la xötrei, eni a nango cile hnö troa kepe angatr ke, kolo eni a xötrei faipoipo, nge coco hi la uma i nyio. Ngo, ame la itre ijine ce lapa nyio me angatr tre, itre ijine madrin atraqatr. Pine laka lue ka xötrei faipoipo nyio, haawe, mama hnyawa hi koi nyio la madrin ka ej thene la lue xa trefën la nyidroti a nyihlue i Iehova, me thel troa ce kuca la itre huliwa i Nyidrë.”

11. Pine nemene matre loi e tro sa kapa la itre trejin ka traqa ngöne la ekalesia?

¹¹ Itre trejin ka traqa ngöne la ekalesia: Alanyimu la itre trejin, maine itre hnepe lapa ka fek qa ngöne la götrane i angatr, me saze ekalesia. Maine jë, angatr a traqa kowe la ekalesia i epun ke, kola aja ixatua. Maine pena, itre pionie angatr, nge hna upi angatr a tro kowe la ekalesia i epun. Ketre ewekë lai ka saze ngöne la mele i angatr. Angatr a troa majem kowe la ketre götran, me ketre ekalesia, me inine la ketre qene hlapa, me ketre aqane mel. Hapeu, ijiji epuni kö troa könë angatr troa hutihut, maine ce xen? Nge, tune kaa troa ngenu sai angatr? Tro lai a xatua angatr troa hetre sinee, me madrine palahi, ngacama saze hë la aqane mele i angatr.

12. Nemene la ka amamane ka hape, tha nyipiewekë kö troa mana la xen matre troa ikep?

¹² Tha nyipiewekë kö troa mana la xen matre troa ikep. (E jë la Luka 10:41, 42.) Kola qaja hnene la ketre trejin la ewekë ka traqa lo angeic me föi angeic a xome la huliwa ne mesinare. Öni angeic: “Xötre ka co pala kö nyio ngöne la ijine cili, nge tha maca pala kö nyio ngöne la huliwa ne mesinare. Ketre, tha majemi hnyawa kö nyio kowe la nöj hna upi nyio kow. Matre, ame la ketre hej, kola jole catre la föeng, nge thatre hë ni la nyine troa kuca. Ame la kola 19 h 30, fenafena jë hi la qëhnelö hnene la ketre jajinyi ka ini Tusi Hmitrötr. Angeic a traqa fë la köni wene pic, me italofa me nyio. Hnei nyio hna alö angeic kowe la hnalapa, me hamë verë tim koi angeic. Thupene lai, hnei eahuni hna ce iji tri, me chocolat ka idreuth. Thatre pala kö nyio la qene Swahili, nge tha ka qene Papale kö angeic.” Ame kowe la trejin, celë hi ka xatua nyidro troa nyisineene la itre trejin ne la nöj, nge ka hamë madrine koi nyidro.

THE CILE HNÖ KÖ TROA IKEP

13. Nemene la thangane la troa ikep?

¹³ Hapeu, hnei epuni kö hna cile hnö e itre xa ijin troa ikep? Maine nyipici ke, triane hë epun la ketre ijine troa ce madrin, nge ka troa xatua epun troa hetre itre nyipi sinee ka epine palua. Ame la troa ikep tre, celë hi aqane tro sa elë hun lo mekun ka hape, pëkö ka hnimi së. Pine nemene hö matre hetre itre trejin ka cile hnö troa ikep? Tro sa ce wang la itre xa kepin.

14. Nemene la nyine tro sa kuca e pëkö traem, me trengecatre së troa ikep?

¹⁴ Pëkö ijin, me trengecatr: Nyimutre catre la itre huliwa ne la itre hlue i Iehova, nge itre ka trene hnëqa asë hi angatr. Matre, itre xan a mekun laka, pëkö traem, me trengecatre i angatr troa ikep. Maine celë hi aqane mekuna i epun, loi e tro epuni a wange hmaca la porogarame i epun matre ijij troa ikep, maine troa kapa la ihë ne la ketre trejin. Ka nyipiewekë catre lai ke, Tusi Hmitrötr la ka upi së troa ikep. (Heberu 13:2) Maine epuni a ajan troa ikep, loi e tha tro kö epuni a aluzi traem ngöne la itre huliwa ka tha nyipiewekë kö.

15. Pine nemene matre kola mekun hnene la itre trejin ka hape, tha ijiji angatre kö troa ikep?

¹⁵ Aqane waiewekë i epun: Hapeu, aja i epuni hi troa ikep, ngo kösë tha ijiji epuni kö? Maine jë, epuni a hmahma me xou tro la trejin hnei epuni hna kapa a öhnyi engazon. Maine pena, epuni a mekun ka hape, tha ijije kö la manie i epuni matre troa ikep tune la itre xa trejin. Ngo, the thëthëhmine kö laka, tha nyipiewekë kö troa thaipin la uma matre troa mingöming. Tro lai trejin hnei epuni hna kapa a madrin e ka porope hi la hnalapa, nge ka lolo la thiina i epun.

16, 17. Nemene la nyine tro epuni a kuca, e epuni a seseu la kola ikep?

¹⁶ Alanyim la itre trejin ka seseu la kola kapa la ketre trejin kowe la hnalapa i angatr. Önine la ketre qatre thup qa Agele ka hape: “Nyipici laka, ame la easa hnëkë troa ikep, hetre xou së. Ngo tune la itre xa huliwa i Iehova, tru catre kö la manathith hne së hna kapa hune la itre mekun ka ajolë së. Madrine ni troa ce iji kofi me angatr, me porotrik.” Ka lolo catr e troa nyipiewekëne la trejin hnei epuni hna könën, ene la troa thel troa atrepengöi angeic hnyawa. (Filipi 2:4) Alanyimu la itre trejin ka madrin troa qaja la hnei angatr hna melën. Nge, loi e tro sa ce lapa me angatr matre, troa drenge hnyawa la hnei angatr hna qaja. Önine la ketre qatre thup: “Ame la eni a kapa la itre trejin ne la ekalesia kowe la hnalapang tre, eni hi lai a atrepengöi angatr hnyawa, memine fe la aqane atre angatr la nyipici. Celë hi ka aijijë ni troa trotrohni angatr.” Tha sihngödri kö koi së laka, maine tro sa nyipine la itre trejin hne së hna könën, haawe, tro hë sa ce madrin me angatr.

¹⁷ Kola qaja la hnene la ketre pionie föe ka majemine kapa la itre ka sine la itre ini qaathei Iehova la ewekë ka traqa koi angeic. Öni angeic: “Ame ngöne la xötrei, eni a nango xou ke, coco hi la hnalapang, nge ame la itre ewekëng tre, itre ewekë hna hamë eni. Hnene la föe ne la ketre atre hamë ini hna xatua eni. Öni eahlo, ‘Ame la eni me föeng a wang trongëne la itre ekalesia, madrine catre nyio troa ce lapa memine la itre trejin ka tha tru kö hnei mo, ngo ka amë panë Iehova, me mejihnine la hnei angatr hna hetreny, tui nyio hi.’ Kola amekunë ni lo hna majemine qaja hnei nenë ka hape: ‘Loi la trepe sil cememine la ihnim.’ ” (Ite Edomë 15:17) The tro pi kö sa seseu ke, ame la ka nyipiewekë tre, ene la troa amamane la ihnimi së kowe la trejin hne së hna kapa.

18, 19. Nemene la ka troa xatua epun troa elë hun la itre mekun ka ngazo göne la itre trejin?

¹⁸ Aqane goeë itre trejin hnei epun: Hapeu, hetre trejine kö e hnine la ekalesia laka, hnei epuni hna xele ma hën kowe la hnalapa i epun? Maine jë, thatreine kö epuni troa könëne la trejin ka hetre thiina hnei epuni hna xele ma wang. Maine pena, ketre trejin ka akötrë epuni ekö, nge thatreine kö epun troa thëthëhmin. Maine tro palahi epuni a lapa fë la itre mekune cili, tha tro pi kö a saze la aqane waiewekë i epun.

¹⁹ Öni Tusi Hmitrötr, e tro epuni a kapa hnyawa la itre atr, ene mina fe la itre ithupëjia me epun, troa lolo la aqane imelekeu i epun me angatr. (E jë la Ite Edomë 25:21, 22.) E tro epuni a kepe ketre kowe la hnalapa i epun, tro lai a xatua epuni troa elë hun la itre mekun ka ngazo, me lapa tingeting me angeic. Tro hë epuni a goeë angeic tune la aqane goeë angeic hnei Iehova lo Nyidrëti a e angeic koi Nyidrë. (Ioane 6:44) Ame la kola upi epun hnene la ihnim troa könë angeic, nge tha mekune kö angeic tre, kola saze la aqane imelekeu i epon. Nemene la aqane troa xecie koi epuni laka, ihnim la ka upi epun troa ujë tun? Loi e tro epuni a trongëne la eamo ka mama ngöne Filipi 2:3, kola hape: “Loi e isa mekune memine la hni ka ipië, laka sisitia [ketre] angate hui [epun].” Loi e tro palahi a ej ngöne la mekuna së laka, sisitria kö la itre trejin hu së. Hetre ini nyine tro sa xom qa ngöne la aqane lapaun angatr, me catr, me itre xa thiina ju kö. E tro sa mekun la itre thiina ka lolo ka ej thei angatr, tro lai a akökötrene la ihnimi së koi angatr, me thue aja së tro palahi a ikep.

TROA HETRE METRÖTR

20. Pine nemene matre easa uthihe e itre xa ijin? Ame e cili, nemene la nyine tro sa kuca?

²⁰ Hnei Davita hna hnying ka hape: “Iehova fe, dei la ate troa [könën] hnine la uma ne heta i cilie ?” (Salamo 15:1) Thupene lai, hnei angeic hna qaja la itre thiina hnei Iehova hna thel thene la itre hnei Nyidrëti hna könën. Kola mama lai ngöne la kola hape: “Tha hmaca kö angeic kowe la hna sisiny, ngacama ngazo ju hë koi angeic.” (Salamo 15:4, MN) E ase hë së kapa la ihë i ketre, tha tro pi kö sa uthihe, nge pëkö nyipi kepin. Ase hë la trejin hnëkëne laka, tro sa traqa, matre e tro sa patr, luzi pë hë la hna nue trengecatr. (Mataio 5:37) Alanyimu la itre atr ka uthihe thupene la hna hë angatr ke, kolo pena ha kapa la ihë ne la ketre trejin hnei angatr hna majemi kow. Hapeu, aqane ihnimi kö lai, me imetrötrë? Loi e tro palahi sa metrötrëne la itre hna hnëkën, me hna amë qëmeke së hnene la trejin ka ihë. (Luka 10:7) Maine hetre nyipi kepin matre easa uthihe, loi e tro sa canga thuemacane la trejin ka hë së. Aqane tro hi së lai a amamane la ihnimi së, me metrötre së.

21. Nemene la aqane tro sa hetre metrötr la kola hë së?

²¹ Nyipiewekë fe tro sa metrötrën la itre hna majemine kuca ngöne la nöj. Nyimutre la itre götran laka, tha ngazo kö e troa traqa xan ngöne la ijine troa xen. Ngo, ame ngöne la itre xa götran, loi e troa pane hë qëmekene troa traqa. Hetrenyi la itre nöj laka, kola xeni pa hnene la itre atr hna kapa, nge pine pë hë la hnepe lapa. Ngo ame ngöne la itre xa nöj, kola ce xen la itre atrene la hnepe lapa memine la itre hna kapa. Hna majemine ngöne la itre xa götran tro la itre hna hën a traqa fë xen. Ngo hetre nöj laka, tha loi kö e troa kuca tune lai. Ketre, hetre itre nöj laka, loi e tro la hna hën a alua thipën la ihë i ketre qëmekene troa kapa. Ngo, ame ngöne la itre xa nöj, hmitrötr e troa thipëne la hna ihë. Loi e tro palahi sa thelejëne matre tro la itre ka hë së a madrin troa kepe së.

22. Pine nemene matre nyipiewekë tro sa ‘ihnimi trenyiwa ketre koi ketre’?

²² Öni Peteru: “Eaeshenyi hë la pune la nöjei ewekë asëjëihë.” (1 Peteru 4:7) Easenyi hë troa traqa la akötr atraqatr. Kola ngazo catre la fen, matre nyipiewekë tro sa hnime catrëne la itre trejin. Thatraqai së hnyawa hi enehila la eamo i Peteru, kola hape: “Ihnimi trenyiwa jë ketre koi ketre.” (1 Peteru 4:9, MN) Loi e tro palahi sa madrine troa ihnimi trenyiwa enehila, me epine palua.