Nyitipu Iehova Jë Akötresie Ka Ithuecatr

1. Ame lo kola ena la wathebo, nemene la aqane hamë trengecatr, me ithuemejiunene la itre atr hnei Iehova?

IEHOVA la Akötresie ka ithuecatr. Ame lo kola kei kowe la ngazo hnene la atr, tha mano kö Nyidrë ithuecatr. Thupene ju hi la kola ena la wathebo hnei Adamu me Eva, hnei Nyidrëti hna hamë trengecatr, me thue mejiune kowe la itre matra i nyidro jëne la ketre hna perofetan. Kola mama la hna perofetane cili ngöne Genese 3:15. Öni Nyidrë, troa apatrenyi Satana Diabolo, memine la itre huliwa i angeic.—1 Ioane 3:8; Hna Amamane 12:9.

IEHOVA A ITHUECATRENE LA ITRE HLUE I NYIDRËTI EKÖ

2. Nemene la aqane ithuecatre i Noa hnei Iehova?

² Pane mekune jë së lo aqane ithuecatre i Noa ekö hnei Iehova. Noa a mel e nyipine la iakötrë me kuci ngazo, nge angeice hmekuje hi me hnepe lapa i angeic la ka nyihlue i Iehova. Maine ju, tro Noa a kucakuca, me mekun, ka hape, pëkö nyin. (Genese 6:4, 5, 11; Iuda 6) Ngo, hnei Iehova hna hamë trengecatre i Noa matre tro angeic a nyihlue i Nyidrë, me kuca la itre huliwa ka loi. (Genese 6:9) Hnei Iehova hna thuemacanyi Noa laka, tro Nyidrëti a lepe apatrene la fene ka ngazo. Ketre, hnei Nyidrëti hna amamane la nyine tro angeic me hnepe lapa i angeic a kuca matre troa mele pe. (Genese 6:13-18) Iehova la Atre ithuecatre koi Noa.

3. Nemene la aqane thuecatre i Iosua hnei Iehova? (Wange ju la pane iatr.)

³ Thupene lai, hnei Iehova hna ithuecatre koi Iosua ke, hetre hnëqa ka tru hnei angeic hna troa xom. Tro angeic a ee la angetre Isaraela kowe la Nöje Hna Thingehnaean, me cile kowe la itre trongene isi ka catr, itre ka mel e cili. Atre hnyawa hi Iehova laka, tro Iosua lai a xou, matre öni Nyidrë koi Mose: “Ahnithejë koi Iosua, me [thuecatre koi] angeic, me [xatua] angeic, ke tro angeic’ a mekene la nöje celë, nge tro angeic’ a alapanyi angate ngöne la nöje lo hnei ’ö hna troa goeën.” (Deuteronomi 3:28) Thupene lai, hnei Iehova hna ithuecatre koi Iosua, me hape: “Hape u, tha hnenge hna ahnithe koi ’ö ? Catejë, nge iahlëpi ; the qou kö, nge the hmengöhmengöne kö, ke eje kö Iehova Akötesi’ö thei ’ö ngöne la hnei ’ö hna troa tro kow.” (Iosua 1:1, 9) Hnene la itre trengewekë i Iehova hna hamë trengecatre koi Iosua!

4, 5. (a) Nemene la aqane ithuecatre Iehova kowe la nöje i Nyidrëti ekö? (b) Nemene la aqane ithuecatre i Iesu hnei Iehova?

⁴ Tha hnei Iehova hmekuje kö hna thuecatrene la itre hlue i Nyidrë, angatr isa ala cas. Ame la kola po hnei angetre Iudra e Babulona, atre hnyawa hi Nyidrë laka, angatr a aja ithuecatr. Matre, hnei Nyidrëti hna ithuecatre koi angatr asë. Hnei Nyidrëti hna perofetane ka hape: “The qou kö, ke ce ini me eö ; the hlohlo kö, ke ini la Akötesi ’ö ; tro ni a aegöcatenyi ’ö ; he, tro ni a xatua eö ; he, tro ni a sajuë eö hnene la ime macange ka meköt.” (Isaia 41:10) Hnei Iehova fe hna hane ithuecatre kowe la itre pane keresiano ekö, nge celë fe hnei Nyidrëti hna kuca koi së enehila.—E jë la 2 Korinito 1:3, 4.

⁵ Hnei Iehova hna hane ithuecatre fe kowe la nekö i Nyidrë. Thupene lo Iesu a bapataiso, hnei nyidrëti hna dreng la kola ithanata qa hnengödrai, kola hape: “Dei la Nekönge hniminang ; ini a madi nyidë.” (Mataio 3:17) Hnene la itre trengewekë celë hna hamë trengecatre i Iesu, ngöne lo nyidrëti ekö e celë fen!

IESU A ITHUECATRENE LA ITRE XAN

6. Nemene la aqane hamë trengecatre së hnene la ceitun ne la itre talan hna hamën hnei Iesu?

⁶ Hnei Iesu hna xötrethenge la tulu ne la Keme i nyidrë. Ame lo Iesu a hamëne la ceitun ne la itre talan, nyidrëti hi lai a ithuecatre kowe la itre ka drei nyidrë troa mele nyipici. Önine lo maseta kowe la itre hlue i angeic ka hape: “Ole, eö la hlue ka loi me nyipici ; hnei ’ö hna nyipici kowe la ite ewekë ka xalaith, tro ni a acilë eö hune la ite ewekë ka nyimute ; löjë kowe la ga madine ne la joxu i ’ö.” (Mataio 25:21, 23) Hnene la itre trengewekë celë hna ithuecatre kowe la itretre drei nyidrë, troa catre mele nyipici koi Iehova!

7. Nemene la aqane thuecatrene Iesu la ange aposetolo, tui Peteru?

⁷ Tha mano kö la itre aposetolo isi pi göhnë, me thele troa pi nyi ka tru. Ngo, hnei Iesu palahi hna xomihni angatr. Hnei nyidrëti hna ithuecatre koi angatr troa hetre hni ne ipië, me huliwa koi itre xan, ngo tha tro pe a ujë qene joxu. (Luka 22:24-26) Anyimua tria Peteru, me ahleuhleune la hni Iesu. (Mataio 16:21-23; 26:31-35, 75) Ngo, tha hnei Iesu kö hna xele ma wai angeic. Hnei nyidrëti pe hna ithuecatr, me upi angeic troa ithuecatre kowe la itre xan.—Ioane 21:16.

ITRE ITHUECATR NGÖNE LA ITRE IJIN EKÖ

8. Nemene la aqane thuecatrene Hezekia la itre tane isi memine la nöj asë?

⁸ Qëmekene tro Iesu a amamai tulu, atre hnyawa hi la itre hlue i Iehova ekö laka, loi e tro angatr a ithuecatrekeu. Pane mekune jë la tulu i Hezekia. Ame la kola thel hnei angetre Asuria troa lepe Ierusalema, hnei angeic hna aicasinekeune la itre tane isi memine la nöj asë, matre troa ithuecatre koi angatr. Ame hnei angatr “hna lapa qale kowe la tenge ewekë i Hezekia.”—E jë la 2 Aqane lapa ite Joxu 32:6-8.

9. Nemene la ini nyine tro sa xom, qa ngöne la aqane ithuecatre i Iobu?

⁹ Hetre ini nyine tro sa xom qa ngöne la aqane ithuecatre i Iobu. Ngacama kola aja ithuecatre hnei Iobu, ngo hnei angeic hna xomi ijin troa amamane kowe la köni trahmanyi ka traqa troa wai angeic, la aqane troa hamë ithuecatr. Hnei Iobu hna qaja koi angatr ka hape, maine angeice ju la ka traqa troa iwai, tro angeic a qaja la itre trengewekë ka troa hamë trengecatr. Ngo, tha itre trengewekë kö ka troa akötrë angatr. (Iobu 16:1-5) Eloine pe, hna hamë trengecatre i Iobu hnei Elihu, me Iehova fe.—Iobu 33:24, 25; 36:1, 11; 42:7, 10.

10, 11. (a) Pine nemene matre kola aja ithuecatre hnene la nekö i Iefetha jajiny? (b) Drei la hne së hna ithuecatre kow enehila?

¹⁰ Hna aja ithuecatre fe hnene lo nekö i Iefetha. Hnei Iefetha, keme i angeic, hna tro troa isi memine la angetre Amona. Hnei nyidrëti hna sisiny me hape, maine tro Iehova a xatua nyidrëti troa ngaa angetre Amona, tro nyidrëti a upe troa huliwa hnine la uma ne heta i Iehova, la atr ka lö pi troa ixelë me nyidrë thupene la hna isi. Hnei Iehova hna xatua Iefetha troa hun ngöne la isi. Ame ju hi la pane atr ka lö pi troa ixelë me nyidrë tre, kolo hi lo nekö i nyidrë jajiny, ene lo nekö i nyidrëti ka cas. Atraqatr la akötre i Iefetha. Ngo ame pe, hnei nyidrëti hna eatrëne lo hna sisiny, me upe la nekö i nyidrëti jajinyi troa nyihlue i Iehova o drai ngöne la uma ne heta.—Angete Amekötin 11:30-35.

¹¹ Nyipici, tha ka hmaloi kö koi Iefetha. Ngo tro kö a jole catre kowe la nekö i nyidrë jajinyi ke, nyëne la ka kapa la hna sisinyi hnei kem. (Angete Amekötin 11:36, 37) Tha tro pë hë nyëne a hane faipoipo me hetre nekönatr. Pëkö matra i Iefetha. Celë hi matre, nyën a aja ithuecatr. Öni Tusi Hmitrötr: “Celë hi [hna majemine kuca] e Isaraela, laka tro la ite nekö i angete Isaraela jajinyi o macate a teije pine la nekö i Iefetha jajinyi ate Gileada eke drai ne la macate.” (Angete Amekötin 11:39, 40) Easë fe a mekune la tulu ne la itre trejin, itre ka lapa casi enehila, matre troa catre huliwa i Iehova. Hapeu, ijije kö tro sa qaja aloinyi angatr, me ithuecatre koi angatr?—1 Korinito 7:32-35.

ITRE APOSETOLO A ITHUECATR

12, 13. Nemene la aqane “[ithuecatrene] la ite tejine” hnei Peteru?

¹² Ame lo jidr qëmekene tro Iesu a mec, öni nyidrëti koi Peteru aposetolo ka hape: “Simona, Simona fe, hana wang, ase hë Satana aja nyipunie troa jumejume nyipunie tune la qit nge ase hë ni thithi thatraqai’ö, mate tha tro kö a pate la lapaune i ’ö ; nge e hmaca ha eö, tro eö a [ithuecatrene] la ite tejine me eö.”—Luka 22:31, 32.

¹³ Peteru la ketre aposetolo ka elemekene lo pane ekalesia ekö. (Galatia 2:9) Hnei angeic hna ithuecatre kowe la itre trejin ngöne la ijine Penetekos, nge e thupene fe. Nyimutre hë la itre macatre ne nyihlue i Iehova angeic. Öni angeic kowe la itre trejin: “Ase hë ni cinyihan’ axoxopatene koi nyipunie ; . . . ini a eamone koi nyipunie me anyipicin, ka hape, dei lola ihnimi gufa i Akötesie ka nyipici ; cile huti ju nyipunie ngöne lai.” (1 Peteru 5:12) Hnene la itre tusi hna cinyihane hnei Peteru, hna thuecatrene la itre trejin ngöne la ijine cili. Nge, kolo fe a thuecatre së enehila, ke, easenyi hë troa eatre hnyawa la itre hna thingehnaean hnei Iehova.—2 Peteru 3:13.

14, 15. Nemene la aqane thuecatre së hnene la itre tusi Ioane?

¹⁴ Hnei Ioane aposetolo fe hna hane elemekene lo pane ekalesia ekö. Hnei angeic hna cinyihane la ketre götrane la evangelia ka qejepengöne lo huliwa ne cainöje i Iesu. Hnene la tusi angeic hna thuecatrene la itre trejin ngöne la itre hadredr lao macatre thupen, nge kolo fe a thuecatrenyi së enehila. E cili hmekuje hi la easa e la eamo i Iesu göi ihnim. Kolo nyidrëti a qaja ka hape, ame la ihnim, tre, celë hi hatrene la itre nyipi keresiano.—E jë la Ioane 13:34, 35.

¹⁵ Kola meköl e hnine la köni tusi Ioane la itre nyipici ka sisitria catr. Easa hace la easa tria e itre xa ijin. Ngo lapa hnyawa pi hi la hni së, ngöne la easa e ka hape, kola “hnea tije la nöjei ngazo shë asëjëihë” hnene la mele hna huujën hnei Iesu. (1 Ioane 1:7) Maine kola nyizö së hnene la hni së, ngo troa akeukawanyi së ngöne la easa e ka hape, “Sisitia kö Akötesie hune la ite hni shë.” (1 Ioane 3:20) Ioane hmekuje hi la ka cinyihane ka hape, “Akötesieti la ihnim.” (1 Ioane 4:8, 16) Nge, ame ngöne la hnaaluen, me hnaakönine tusi angeic tre, angeic a thuecatrene la itre keresiano troa catre “tro ngöne la nyipici.”—2 Ioane 4; 3 Ioane 3, 4.

16, 17. Nemene la aqane thuecatrene la itre pane keresiano hnei Paulo?

¹⁶ Paulo aposetolo la ketre tulu göi troa ithuecatre kowe la itre trejin. Tha qea kö thupene lo meci Iesu, hetre itre aposetolo ka lapa e Ierusalema, göhnene la lapa ne xomi meköti ekö. (Ite Huliwa 8:14; 15:2) Itre keresiano ne Iudra a cainöjëne la maca i Keriso kowe la itre atr ka mejiune kowe hi la ca Akötresie. Ngo, hnene la uati hmitrötr hna upi Paulo troa cainöje koi angetre Heleni, me angetre Roma, me kowe la itre xan ka mejiune kowe la nyimu akötresie.—Galatia 2:7-9; 1 Timoteo 2:7.

¹⁷ Hnei Paulo hna trongëne la itre nöje hna hëne enehila, ka hape, Turquie, me Grèce me Italie. Hnei angeic hna cainöje kowe la angetre ethen ka mel ngöne la itre götrane cili, me acile la itre ekalesia i keresiano. Jole catre la mele ne la itre keresiano ke, kola akötrë angatr hnene la itre atrene la nöje i angatr. Matre, angatr a aja ithuecatr. (1 Thesalonika 2:14) Ame lo macatre 50, hnei Paulo hna cinyihane la itre tus nyine thuecatrene la ekalesia ka hnyipixe e Thesalonika. Öni angeic: “Eëhuni pala hi a ole koi Akötesie göi nyipunie asë, kola meku nyipunie ngöne la ite thithi hun ; nge tha mano kö huni mekune la huliwa i nyipunie ngöne la lapaun, memine la huliwa ngöne la ihnim, memine la xomi hni.” (1 Thesalonika 1:2, 3) Hnei angeice fe hna upi angatr troa itö ithuecatr, me hape: “Itö ithuecatre jë, me akeukawanyi ketre me ketre, tune lo hnei nyipunie hna kuca.”—1 Thesalonika 5:11, MN.

LAPA NE XOMI MEKÖT A ITHUECATR

18. Nemene la aqane thuecatre i Filipo hnene la lapa ne xomi meköt?

¹⁸ Hnei Iehova hna nyijëne la lapa ne xomi meköt ekö matre troa thuecatrene la itre keresiano, ene mina fe la itre ka elemekene la itre ekalesia. Ame lo Filipo a cainöje koi angetre Samaria, hnene la lapa ne xomi meköt hna thuecatre koi angeic, me upi Peteru me Ioane, lue atrene la lapa ne xomi meköt, koi angeic. Hnei nyidroti hna thith thatraqane la itre trejin e cili, matre tro angatr a hane kapa la uati hmitrötr. (Ite Huliwa 8:5, 14-17) Hna thuecatrenyi Filipo memine la itre trejine cili hnene la ixatua qaathene la lapa ne xomi meköt!

19. Nemene la aqane kapa la tusi ne la lapa ne xomi meköt hnene la itre pane keresiano ekö?

¹⁹ Ame hë e thupen, hetre mekun ka tru nyine tro la lapa ne xomi meköt a axeciën. Hapeu, tro kö a peritomon la angetre ethen, thenge la hna qaja e hnine la Trenge Wathebo i Mose? (Ite Huliwa 15:1, 2) Hnene la lapa ne xomi meköt hna thith, me sipone la uati hmitrötr, me ithel ngöne la Itre Hna Cinyihan. Ame hnei angatr hna axeciën ka hape, tha nyipiewekë hë troa peritomon. Thupene lai, hnei angatr hna cinyihan la ketre tus matre troa ithuemacanyine la hna axeciën, me iupi fë kowe la itre ekalesia. Ame la kola e hnene la itre keresiano la itre tus, “angate pë hë a madine la hna [ithuecatr].”—Ite Huliwa 15:27-32.

20. (a) Nemene la aqane thuecatre së enehila hnene la Lapa Ne Xomi Meköt? (b) Nemene la hne së hna troa ce ithanatane ngöne la tane mekun ka troa xulu?

²⁰ Ame enehila, hnene la Lapa Ne Xomi Meköt ne la Itretre Anyipici Iehova hna hamë ithuecatre kowe la itre ka lapa Bethela, me itre ka xome la ketre pengöne huliwa koi Akötresie o drai. Nge, kolo fe a hamë ithuecatre koi së asë. Tune la itre pane keresiano, madrine catre së troa kapa la itre ithuecatr! Ame lo 2015, hna mama lo boroshür hna hape, Bëeke Jë Koi Iehova. Jëne la boroshüre cili, hnene la Lapa Ne Xomi Meköt hna thelejëne troa ithuecatre kowe la itre ka trotrije la nyipici. Hapeu, hnëqane hmekuje hi la itre trejin ka elemeken troa hamë ithuecatr, maine hnëqa së fe? Ame ngöne la tane mekun ka troa xulu, tro sa ce ithanatane la mekune celë.