Ijine Hi La Troa Itö Ithuecatr!
“Tro sha imekunekeune. . . , loi pe troa itö ithuecatr, e tro nyipunie a goeëne la drai a easenyi hë.”—HEBERU 10:24, 25, MN.
1. Pine nemene matre hnei Paulo hna upi ielene la itre keresiano ne Heberu troa itö ithuecatr?
HNEI Paulo aposetolo hna hamë eamo kowe la itre keresiano ne Heberu, me hape: “Tro sha imekunekeune mate troa aciane la ihnimi me ite huliwa ka loi ; tha tro kö a trije la icasikeu së tune la thiina i itre xan; ngo loi pe troa itö ithuecatr e tro nyipunie a goeëne la drai a easenyi hë.” (Heberu 10:24, 25, MN) Hnene la itre trejin hna isa thel la kepine matre upe iele angatre jë hnei Paulo troa itö ithuecatr. Tha faifi ju kö lao macatre thupen, nge mama cile ju hi koi angatr laka, easenyi hë tro Iehova a amekötine la traone Ierusalema. Hnei angatr hna trotrohnine laka, ijine hi la tro angatr a kötre qa cili, thenge lo hna qaja hnei Iesu. (Luka 21:20-22; Ite Huliwa 2:19, 20) Hna traqa lo drai Iehova lo macatre 70, lo kola lepe apatrenyi Ierusalema hnene la angetre Roma.
2. Pine nemene matre nyipiewekë tro sa itö ithuecatr enehila?
2 Ame enehila, easë fe a troa qëmeke kowe la ‘drai atraqatre i Iehova, me nyine xouene atraqatr.’ (Ioela 2:11) Hnei Zefania perofeta hna qaja göne la hneijine së ka hape: “Eashenyi hë la drai ka tru i Iehova, eashenyi hë, nge saqe catë hë.” (Zefania 1:14) Celë hi kepine matre, nyipiewekë “tro sha imekunekeune mate troa aciane la ihnimi me ite huliwa ka loi.” (Heberu 10:24) Loi e tro sa nyipiewekëne la itre trejin, matre ijiji së troa ithuecatr ngöne la nyipi ijin.
DREI LA KA AJA ITHUECATR?
3. Nemene la hna qaja hnei Paulo göi ithuecatr? (Wange ju la pane iatr.)
3 “Ame la hleuhleu e kuhu hni ne la ate, te, ate agenyin ; ngo ate amadinën’ eje la tenge ewekë ka loi.” (Ite Edomë 12:25) Aja së asë hi troa kepe ithuecatr. Hnei Paulo hna amamane laka, ame la itre hna acil troa hamë ithuecatr tre, angatre fe a aja ithuecatr. Öni angeic kowe la itre trejin ne Roma ka hape: “Atraqate la pi tro ni a iöhnyi me nyipunie, mate tro ni hamë nyipunie kete ihnimi ne u, mate acile huti nyipunie ; celë hi mate troa, ce akeukawanyi ni me nyipunie, hnene la ce lapaune shë.” (Roma 1:11, 12) Haawe, kola mama laka, Paulo fe a hane aja ithuecatr e itre xa ijin.—E jë la Roma 15:30-32.
4, 5. Drei la nyine tro sa ithuecatre kow, nge pine nemen?
4 Ame enehila, loi e tro sa ithuecatre kowe la itre ka huliwa i Akötresie o drai, tune la itre pionie. Alanyimu thei angatr ka nue pë hë la itre xa ewekë matre troa xome la huliwa ne pionie. Ceitui angatre hi memine la itre mesinare, me itre ka lapa Bethela, me itre ka iwai trootro me föi angatr, me itre ka huliwa ngöne la itre uma ne ujë qene hlapa. Hnei angatr hna nue la itre xa ewekë matre troa huliwa catre koi Iehova. Haawe, loi e tro sa thuecatre koi angatr. Hetrenyi fe la itre trejin ka ajan troa cile hut ngöne la huliwa i Iehova, ngo tha ijiji angatre hë. Tro angatre lai a madrin e tro sa thuecatre koi angatr.
5 Drei la nyine tro sa ithuecatre kow? Loi e tro sa ithuecatre kowe la itre trejin ka lapa cas ke, aja i angatr troa drengethenge Iehova me faipoipo “göi Joxu hmekuje hi.” (1 Korinito 7:39) Ame la trahmanyi a qaja la ihnimi angeic kowe la föi angeic, memine la hni ne ole i angeic kowe la föe tre, kola thuecatre koi nyiidro. (Ite Edomë 31:28, 31) Loi e tro fe sa thuecatre kowe la itre trejin hna akötrën, me itre ka wezipo. (2 Thesalonika 1:3-5) Iehova me Iesu a hamë ithuecatre kowe la itre trejine cili, itre ka mele nyipici.—E jë la 2 Thesalonika 2:16, 17.
ITRE QATRE THUP A ITHUECATRE KOI SË
6. Nemene la hnëqa ne la itre qatre thup thenge la hna qaja ngöne Isaia 32:1, 2?
6 E jë la Isaia 32:1, 2. Easa melëne la hneijine ka jol, matre canga tro hi së lai a hacehni me kucakuca. Hnei Iesu Keriso hna nyijëne la itre trejin hna iën, memine la “ite tane” troa ithuecatre koi së. Tha itre qatre thupe kö a ‘musinë’ së, ngo angatre pe a ‘xatua’ së. Aja i angatr tro sa hetre madrin, me catre mele nyipici koi Iehova.—2 Korinito 1:24.
7, 8. Nemene la aqane tro la itre qatre thup a thuecatrene kowe la itre trejin?
7 Loi e tro la itre qatre thup a nyitipu Paulo aposetolo, ene la troa thuecatre kowe la itre trejin. Hnei Paulo hna cinyianyi kowe la itre keresiano ne Thesalonika ke, hna akötrë angatr. Öni angeic: “Hne huni hna hnime atrunyi nyipunie, mate loi koi huni troa hamëne koi nyipunie, tha maca ka loi Akötesie hmekuje hi, ngo ite mele huni fe, ke hna hnimi nyipunie hne hun.”—1 Thesalonika 2:8.
8 Tha tro pi kö la itre qatre thup a hamë ithuecatre jëne hmekuje hi la itre ithanata i angatr. Öni Paulo kowe la itre qatre thup ne Efeso ka hape: “Qâ i nyipunie troa huliwa tune lai troa xatuane la ite ka kucakuca, me hnine la wesi ula i Joxu Iesu lo hnei nyidëti hna ulatin, ka hape, Sisitia la manathithi e troa hame hune la troa kapa.’ ” (Ite Huliwa 20:35) Aja i Paulo ‘troa ase la itre ewekë i angeic me umuthi’ angeic thatraqane la itre trejin. Hnei angeic hna amamane jëne la aqane ujë i angeic ka hape, aja i angeic troa kuca asë la hnei angeic hna atrein thatraqane la itre trejin. (2 Korinito 12:15) Ketre tune mina fe, loi e tro la itre qatre thup a ithuecatre kowe la itre trejin jëne la aqane ithanata i angatr, ngo memine la aqane ujë. Celë hi aqane tro angatr a amamane laka, ka tru koi angatr la itre trejin.—1 Korinito 14:3.
9. Nemene la aqane tro la itre qatre a hamë eamo?
9 Ame itre xa ijin, tro la itre qatre thup a hamë eamo. Loi e tro palahi la itre qatre thup a thel e hnine la Tusi Hmitrötr la aqane troa ithuecatre ngöne la angatr hamë eamo. Thupene lo kola amele Iesu hmaca, hnei nyidrëti hna amamai tulu ngöne lo nyidrëti a iupi fë maca kowe la itre ekalesia ne Asia. Ka catre la itre eamo hnei nyidrëti hna hamëne kowe la itre ekalesia e Efeso, me Peregamo, me Thuataira. Ngo qëmekene troa hamë eamo, hnei nyidrëti hna pane qaja aloinyi angatr kowe la itre huliwa hnei angatr hna kuca. (Hna Amamane 2:1-5, 12, 13, 18, 19) Öni Iesu kowe la ekalesia ne Laodikea ka hape: “Ini a hajine me thaucëne la ite hnenge hna hnim ; qa ngöne lai catejë me ietraju.” (Hna Amamane 3:19) Haawe, itre qatre thup a thel troa nyitipu Keriso ngöne la aqane troa hamë eamo.
THA HNËQA I QATRE THUPE CASI KÖ LA TROA HAMË ITHUECATR
Keme me thine fe, epone kö a inine la nekönatr troa ithuecatr? (Wange ju la paragarafe 10)
10. Nemene la aqane tro sa isa hamë ithuecatrekeu?
10 Tha hnëqane hmekuje kö la itre qatre thup troa hamë ithuecatr. Hnei Paulo hna upe la itre keresiano asë troa qaja “la tenge ka loi, la nyine troa eamon, mate aciane la loi” koi itre xan. (Efeso 4:29) Loi e tro sa atre la hna ajane hnene la itre trejin, matre ijiji së troa xatua angatr. Öni Paulo kowe la itre keresiano ne Heberu: “Aegöcatenejë la ite ime ka thip, me ite iwatingöneca ka geny ; athegölianepi la nöjei gojenyi nyine thatraqane la ite waca i nyipunie, wanga elapi la waca ka pej, loi pe troa amelen.” (Heberu 12:12, 13) Ijiji së asë hi troa hamë ithuecatr jëne la itre ithanata së, ngacama thöthi ju hë së.
11. Nemene la ka xatua Marthe lo angeic a hacehni?
11 Hna traqa la hacehni koi Marthe, ketre trejin föe.a (Wange ju la ithuemacany.) Öni angeic: “Ame ngöne la ketre drai, hnenge hna sipo Iehova troa hamë trengecatreng. Thupene lai, hnenge hna iöhnyi memine la ketre trejin qatre föe, nge hnei eahlo hna amamane la ihnimi eahlo koi ni. E cili hi lo eni a aja ithuecatr. Hnei eahlo hna qaja koi ni la hnei eahlo hna melën, memine la itre itupath hnenge fe hna cile kow. Kösë tha eni casi hmaca kö.” Maine jë, thatre kö la trejin laka, hna xatua Marthe hnene la itre ithanata i eahlo!
12, 13. Nemene la aqane tro sa trongëne la eamo ka mama ngöne Filipi 2:1-4?
12 Öni Paulo kowe la itre keresiano ne Filipi ka hape: “Maine eje thei Keriso la akeukawan, me aupune ngöne la ihnim, me ce memine la [u]a, nge maine ihnimi ka tru, me utipin, hawe, atiqanejë la madineng, mate casiju hi la mekune i nyipunie, nge mate hetenyi la ce ihnim, me hni ka cas, me mekune ka ca jën ; the kuca kö kete ewekë thenge la ikucanyi me pi tru ; ngo loi e isa mekune memine la hni ka ipië, laka sisitia angate hui angeic ; the isa wai ewekëne kö, ngo loi e isa wange la ite ewekë i ite xan.”—Filipi 2:1-4.
13 Loi e tro së a isa thel la aqane tro sa itö ixatua. The tro pi kö sa cile troa thuecatrene la itre trejin ngöne la easa ‘aupunyi angatr ngöne la ihnim,’ me nyipiewekë angatr, me amamane la “ihnimi ka tru, me utipin” koi angatr.
ITRE XA AQANE HAMË ITHUECATR
14. Nemene la ketre aqane tro sa hamë ithuecatr?
14 Tru la madrine së la easa atre ka hape, hetre atr hne së hna xatuan ekö, nge ka nyihlue i Iehova ha enehila. Öni Ioane aposetolo: “Pëkö madinenge ka sisitia hune laka e tro ni a denge la ite nekönge a trongëne la nyipici.” (3 Ioane 4) Atraqatre la madrinene la itre pionie la angatr a itronyi memine la ketre atr hnei angatr hna xatuan ekö troa atre Iehova. Nge ame enehila, ka bapataiso hë angeic, nge maine jë ka pionie fe. Haawe, maine kola kucakuca hnene la ketre pionie, loi e tro sa amekunë angeic la itre ewekë ka lolo hnei angeic hna kuca göi troa xatua itre xan.
15. Nemene la aqane tro sa amamane la hni ne ole së kowe la itre trejin ka catre mele nyipici koi Iehova?
15 Thupene la hna wange la itre ekalesia, alanyimu la itre ka iwai trootro me föi angatr ka kepe tusi ne ole qaathene la itre trejin. Öni angatr, ka ithuecatre la itre hnepe tusi cili. Celë fe hi mekuna ne la itre qatre thup, me itre mesinare, me itre pionie, me itre ka lapa Bethela, me itre ka catre mele nyipici koi Iehova. Troa elitrauje la madrine i angatr e tro sa amamane la hni ne ole së!
IJIJI SË ASË HI TROA HAMË ITHUECATR
16. Nemene la nyine tro sa kuca matre troa hamë ithuecatre koi ketre?
16 Tune kaa e tha majemine kö epuni qaja la aliene hni epuni koi ketre? Eje hi laka, tha ka jole kö troa hamë ithuecatr. Maine jë, tro sa nango dredrehnyima koi ketre. Nge, e tha nyipiewekë së kö, haawe, kolo hi lai a amamane laka, hetre jol hnei angeic hna cile kow, nge kola pi ithanata. Tro epuni lai a ithuecatre koi angeic e tro epuni a drei angeice hnyawa.—Iakobo 1:19.
17. Nemene la ka thuecatre kowe la ketre thöth?
17 Hanawange la hna melën hnei Henri, ketre trejin thöth. Tru catr la hleuhleu i angeic la kola trotrije la nyipici hnene la itre sinee i angeic. Ame la ketre e angatr tre, kolo hi lo keme i angeic, ka qatre thup ekö. Hnene la ketre trejin ka iwai trootro hna öhne laka, tha loi kö Henri, matre hnei nyidrëti hna hë angeic troa iji kofi. Hnei nyidrë hna drenge hnyawa la Henri a fe la hni angeic. Mama ju hi koi Henri laka, tro la itre sinee i angeic a bëeke kowe la nyipici, e tro angeic a catre mele nyipici koi Iehova. Ketre, hna thuecatre angeic hnene la hna qaja ngöne Salamo 46, Zefania 3:17, me Mareko 10:29, 30.
Ijije së asë hi troa thuecatrene la itre trejin ka aja ixatua (Wange ju la paragarafe 18)
18. (a) Nemene la hna qaja hnei Solomona joxu göi ithuecatr? (b) Nemene la hna qaja hnei Paulo?
18 Nemene la ini hne së hna xom qa ngöne la hna melën hnei Marthe me Henri? Ijije hi tro sa thuecatrene la itre trejin ka aja ixatua. Öni Solomona joxu: “Ame la tenge ewekë ngöne la ijin’ eje, te, nyipi loi. Ame la lai ne la lue meke, te, ate amadinëne la hni ; nge ame la maca ka loi, te, at’ apipixenyëne la ite jun.” (Ite Edomë 15:23, 30) Hapeu, hetre trejin hnei epuni hna atre ka aja ithuecatr? Pane e jë koi angeic la ketre tane mekun qa ngöne la Ita Ne Thup, maine qa ngöne la site së pena. Ketre, hnei Paulo hna amamane laka, ame la easa ce thinge la itre nyima ne Baselaia tre, easë hi lai a kepe ithuecatr. Öni angeic: “Kola ini me ihajikeu hnene la nöjei salamo, me nöjei nyima koi Akötresie, me nöjei nyima ne hmi fë la trenge ole, kola nyima koi Iehova qa kuhu itre hni nyipunie.”—Kolose 3:16, MN; Ite Huliwa 16:25.
19. Pine nemene matre nyipiewekë tro sa itö ithuecatr, nge nemene la nyine tro sa kuca?
19 Easa easenyi trootro kowe la drai Iehova, matre nyipiewekë tro sa itö ithuecatr. (Heberu 10:25) Tro sa hetre madrin, e tro sa trongëne la hna qaja hnei Paulo, kola hape: “Eamojë nyipunie, me akeukawane ipitön, tune lo hnei nyipunie hna kuca.”—1 Thesalonika 5:11.
a Hna saze la itre xa ëj.