Ka Madrine La Itre Ka Nyihluene La “Akötesie Tene Manathith”

1. Pine nemene matre ka madrine la Itretre Anyipici Iehova? (Wange ju la pane iatr.)

KA MADRINE la Itretre Anyipici Iehova. Angatr a ce porotrik me ce madrin ngöne la itre icasikeu me itre asabele me itre ijine ce xen. Pine nemene matre angatr a madrin? Pine laka, atre Iehova hë angatr, lo “Akötesie tene manathith.” Angatr a caas troa nyihlue i Nyidrë, me thele troa nyitipu Nyidrë. (1 Timoteo 1:11; Salamo 16:11) Iehova Akötresie la Ine la madrin. Nyidrëti a hamëne la nöjei ewekë matre tro fe sa hane madrin.—Deuteronomi 12:7; Ate Cainöj 3:12, 13.

2, 3. (a) Nemene la aliene la troa madrin? (b) Pine nemene matre thatreine kö së troa mele madrin?

² Hapeu, ka madrine kö së? Ame la troa madrin, tre, kola qaja la troa mele ka loi me mele madrin. Öni Tusi Hmitrötr ka hape, ka madrine la itre hna amanathithine hnei Iehova. Ngo pine nemene matre jol enehila troa mele madrin?

³ Pëkö madrine së ngöne la kola traqa la itre jol. Maine jë, hna mec maine upetröneë la ketre sinee së, maine hne së hna sei hna cil, maine pena, hna upi së qa ngöne la hna huliwa. Thatreine kö tro sa mele madrin, e pëkö tingeting ngöne la hnalapa. Ketre, ame e itre xaa ijin, kola hnyimasai së hnene la itre sine huliwa maine itre sine ini. Maine jë, kola icilekeu me easë maine akalabusi së pine la nyipici. Maine pena kola tithi së hnene la ketre mec ka pë nyin, nge kola ngazo trootro la meci së, matre easa kucakuca. Ngo the thëthëhmine kö laka, aja i Iesu Keriso, ene lo “Joxu ka casi tene manathith,” troa akeukawane me amadrinëne la itre ka akötr. (1 Timoteo 6:15; Mataio 11:28-30) Ame ngöne lo Cainöje i Iesu Hune La Wetr, hnei nyidrëti hna qaja la itre thiina ka troa thue madrine së, ngacama tru catr la itre jol ngöne la fene i Satana.

THATREINE KÖ TRO SA MADRIN, E PAATRE KÖ IEHOVA

4, 5. Nemene la nyine tro sa kuca matre tro sa madrin?

⁴ Ka nyipiewekë catr la pane ewekë hna qaja hnei Iesu. Öni nyidrë: “Manathithi la ite ka pë ewekë ngöne la u, ke thatraqai angate la baselaia ne hnengödrai.” (Mataio 5:3) Maine tro sa atrehmekune laka, itre ka pë ewekë së ngöne la u, tro hë sa öhne la enyipiewekëne troa atre Akötresie, me thele ixatua thei Nyidrë. Tro sa tune kaa? Tro sa inine la Tusi Hmitrötr, me drengethenge Akötresie, me amë panëne la huliwa i Nyidrë ngöne la mele së. Celë hi ka troa hamë madrine së me acatrene la lapaune së laka, tro kö a eatr la itre hna thingehnaean hnei Akötresie. Nge ketre, tro “la mejiune ka manathith” hna hamën hnei Tusi Hmitrötr, a hamë trengecatre koi së.—Tito 2:13.

⁵ Maine easa ajane troa madrin ngöne la kola traqa la itre jol, nyipiewekë tro sa acatrene la aqane imelekeu së me Iehova. Öni Paulo aposetolo: “Madine pala jë koi Joxu; nge ini hmaca a qaja, ka hape, Madinejë.” (Filipi 4:4) Maine easa ajane troa imelekeu hnyawa me Iehova, nyipiewekë tro sa hetrenyi la inamacane qaathei Nyidrë. Öni Tusi Hmitrötr: “Manathithi hë la ate öhne la inamacan, memine la ate hete trotrohnin. Sinöe ne mele angeice koi angete xomi angeic, nge manathithi angete xölehuji angeic.”—Ite Edomë 3:13, 18.

6. Nemene la ketre jëne madrin?

⁶ Maine easa ajane troa madrin, nyipiewekë tro sa trongëne la itre ini hna hamën hnei Tusi Hmitrötr. Celë hi hna qaja hnei Iesu, lo kola hape: “Maine ate nyipunie la ewekë cili, manathithi hë nyipunie maine nyipunie a kuca it’ ej.” (Ioane 13:17; e jë la Iakobo 1:25.) Eje hi, nyipiewekë tro sa xötrethenge la hna qaja hnei Tusi Hmitrötr, matre imelekeu hnyawa me Akötresie me madrin. Ngo tro sa madrin tune kaa ngöne la kola traqa la itre jol? Tro sa pane ce wang la hna qaja hnei Iesu ngöne la Cainöj Hune La Wetr.

ITRE THIINA KA THUE MADRINE SË

7. Ijije kö troa madrine la itre ka treij?

⁷ “Manathithi la itete teij, ke tro ha aupunyi angat.” (Mataio 5:4) Maine jë, easa hnying ka hape, ‘Ijije kö troa madrine la itre ka treij?’ Tha Iesu kö a qaja la nöjei atr ka treij. Nyimutre la itre atr ka treij me hleuhleu ke, tru catr la itre jol ka traqa ngöne la “ite drai hnapin,” nge “ka aköt.” (2 Timoteo 3:1) Tha angatre kö a meku Iehova, ngo angatr a sipu meku angatre kö. Thatreine kö tro angatr a madrin ke, thatre Akötresieti kö hnei angatr. Ame la itre atr hna qaja hnei Iesu, tre, kolo itre ka atrehmekune laka, itre ka pë ewekë angatr ngöne la u. Angatr a hleuhleu ke, angatr a öhn laka, pëkö lapaune ne la itre atr koi Akötresie. Angatr a trotrohnin laka, itre atr ka ngazo së. Ketre, angatre fe a trotrohnine la kepin la itre jol ka traqa enehila. Iehova a goeëne la itre ka treij, me aupunyi angatr jëne la Wesi Ula i Nyidrë, me hamë mejiune me madrin koi angatr.—E jë la Ezekiela 5:11; 9:4.

8. Nemene la ka troa thue madrinene la itre ka menyik?

⁸ “Manathithi la ite ka menyik, ke tro angat’ a hetenyi la nöj.” (Mataio 5:5) Nemene la ka troa thue madrinene la itre ka menyik? Nyimutre la itre atr ka calogitr me ka iakötrë, nge tha tingetinge kö la mele i angatr. Ngo ame la angatr a atre la nyipici, hnei angatr hna saze me xetrëne “la ate ka hnyipixe.” Ame hë enehila, angatr a “utipin, me thina ka loi, me hni ka ipië, me thina ka menyik, me xomi hni ahoeany.” (Kolose 3:9-12) Mele tingetinge hë angatr memine la itre xan, nge celë hi ka thue madrin koi angatr. Ketre, Tusi Hmitrötr a thingehnaean laka, tro angatr a “hetenyi la nöj.”—Salamo 37:8-10, 29.

9. (a) Nemene la aliene la hna qaja hnei Iesu la kola hape, tro la itre ka menyik a “hetrenyi la nöj”? (b) Pine nemene matre troa madrine “la itete pi xeni me pi iji la thina ka meköt”?

⁹ Nemene la aliene la hna qaja hnei Iesu la kola hape, tro la itre ka menyik a “hetrenyi la nöj”? Kola qaja la itre hna iën ka troa joxu me atre huuj. (Hna Amamane 20:6) Kolo fe a qaja la itre milio lao atr ka troa mel epine palua e celë fen. Tro angatr a pexej me mele tingeting me mele madrin. Angatre lo hna qaja hnei Iesu ka hape: “Manathithi la itete pi xeni me pi iji la thina ka meköt.” (Mataio 5:6) Iehova a troa aejëne la aja ne la itre ka thele la meköt, ngöne la ijine Nyidrëti a troa lep apatrene la itre atr ka ngazo. (2 Peteru 3:13) Ame ngöne la fene ka hnyipixe, tha tro hmaca kö angatr a hleuhleu pine la itre ewekë ka ngazo.—Salamo 37:17.

10. Nemene la aliene la troa ihnim?

¹⁰ “Manathithi angete ihnim, ke tro pena ha hnimi angat.” (Mataio 5:7) Ame la troa ihnim, tre, kola qaja la troa akeukawane la ketre atr, me thiina ka menyik koi angeic, me utipi angeic. Ngo, hetre ketre aliene kö la ihnim. Öni Tusi Hmitrötr, ame la atr ka ihnim, tre, angeic a xatuane la itre xan.

11. Nemene la ini hne së hna xom qa ngöne la ceitun ne la atre Samaria?

¹¹ E jë la Luka 10:30-37. Kola mama hnyawa la pengöne la ihnim, ngöne la ceitun hna hamën hnei Iesu, göne la atre Samaria ka loi thiina. Hnene la atre Samaria hna utipin me xatuane la atr hna lep. Thupene la hnei Iesu hna hamëne la ceitun, öni nyidrë: “Trojë eö a kuca tune lai.” Loi e tro sa isa hnying ka hape: ‘Eni kö a xötrethenge la tulu ne la atre Samaria? Ame la itre xan a akötr ke, ijijinge kö troa xatua angatr? Ijijinge kö troa xatuane la ketre trejin ka qatre hë, maine ketre sine föe, maine itre nekönatr ka hmi caas? Ijijinge kö troa “haji angete hni ka ewë” matre akeukawanyi angatr?’—1 Thesalonika 5:14; Iakobo 1:27.

12. Pine nemene matre easa madrine la easa amamane la ihnimi së?

¹² Pine nemene matre easa madrine la easa amamane la ihnimi së? Ame la easa hnime la itre xan, easa ham, nge öni Iesu ka hape, troa madrin la atre ham. Ketre, atre hi së laka, easë hi lai a amadrinë Iehova. (Ite Huliwa 20:35; e jë la Heberu 13:16.) Öni Davita joxu göne la atr ka ihnim: “Tro ha thupë angeice me amele angeice hnei Iehova; tro angeic’ a loi xölene ngöne la nöj.” (Salamo 41:1, 2) Maine tro sa hnim me utipine la itre xan, haawe, tro fe Iehova lai a utipi së, nge tro sa madrin uti hë epine palua.—Iakobo 2:13.

KEPIN MATRE KA MADRIN LA ITRE KA “HNI KA WIË”

13, 14. Pine nemene matre nyipiewekë tro sa hetre “hni ka wië”?

¹³ Öni Iesu: “Manathithi angete hni ka wië, ke tro angat’ a goeë Akötesie.” (Mataio 5:8) Maine easa ajane troa hni ka wië, nyipiewekë tro sa thele matre tro palahi a wië la itre mekuna së me itre aja së. Ka sisitria catre lai, e ajane së tro Iehova a kepe së.—E jë la 2 Korinito 4:2; 1 Timoteo 1:5.

¹⁴ Ijije hi tro la itre ka hni ka wië a imelekeu hnyawa me Iehova. Öni Nyidrë: “Manathithi hë angete hnea la ite ixete i angat.” (Hna Amamane 22:14) Kola hapeu la angatr a “hnea la ite ixete i angat”? Ame la itre keresiano hna iën, tre, nyipiewekë tro angatr a wië xajawa i Iehova. E cili, tro Nyidrëti a hamë angatr la mel ka tha ase palua kö e hnengödrai, nge tro angatr a mele madrin uti hë epine palua. Ame kowe la ka ala nyimu atraqatr, lo itre ka troa mel e celë fen, tre, tro Iehova a aijijë angatr troa hane nyisinee i Nyidrë ke, itre ka meköti hë angatr koi Nyidrë. Öni Tusi Hmitrötr, ‘hnei angate hna hnea la itre ixetre i angatr, me awiën itre ej ngöne la madra ne la Arenio.’—Hna Amamane 7:9, 13, 14.

15, 16. Nemene la aqane troa “öhnyi Akötresie” hnene la itre ka hni ka wië?

¹⁵ Öni Iehova: “Pëkö ate ka troa öhnyi ni a troa mel.” (Esodo 33:20) Nemene la aqane troa “öhnyi Akötresie” hnene la itre ka hni ka wië? Ame la aliene la hnaewekë qene Heleni hna hape, “öhn,” tre, kola hape, troa mekun, troa trotrohnin, maine troa atre. Haawe, ame la troa “öhnyi Akötresie,” tre, kola qaja la troa trotrohnine la pengöi Nyidrë me hniin la itre thiina i Nyidrë. (Efeso 1:18) Hnei Iesu hna nyitipune la itre thiina i Akötresie. Celë hi matre, öni nyidrë: “Ame la ate goeë ni, angeice fe a goeëne la Tetetro.”—Ioane 14:7-9.

¹⁶ Ketre, easa “öhnyi Akötresie” la easa öhne la ixatua i Nyidrë ngöne la mele së. (Iobu 42:5) Ijije hi tro sa “öhn” maine lapa mekun la itre ewekë hna thingehnaean hnei Iehova, kowe la itre ka thele tro palahi a wië me mele nyipici koi Nyidrë. Nge tro la itre hna iën a sipu öhnyi Iehova, ngöne la kola troa amele angatre hmaca hnengödrai eë.—1 Ioane 3:2.

IJIJE HI TRO SA MADRIN NGACAMA NYIMUTRE LA ITRE JOL

17. Pine nemene matre ka madrine la atr ka thel troa iloi?

¹⁷ Öni Iesu e thupen, ka hape: “Manathithi angete ailoin.” (Mataio 5:9) Maine tro sa thel troa iloi memine la itre xan, tro hë sa madrin. Öni Iakobo: “Ame la wene thina ka meköti hna trane ngöne la tingetinge hnei angat’ angete aciane la tingeting.” (Iakobo 3:18) Maine jole koi së troa iloi memine la ketre trejin ne la ekalesia maine ketre sinee së, loi e tro sa sipo Iehova troa xatua së troa thele la tingeting. Tro Iehova a hamë së la uati hmitrötr, matre xatua së troa hetrenyi la itre thiina ka loi, me madrin. Hnei Iesu hna amamane la enyipiewekëne troa thele la tingeting. Öni nyidrë: “Qa ngöne lai maine eö a tro fë pi la ahnahna i ’ö kowe la ita ne huj, nge eö lai a hnine la tejine me eö a hete aköte göi ’ö, amëju pë hë e cili fene la ita ne huje la ahnahna i ’ö, nge trojë eö a pane iloi me tejine me eö, ame hna tropi troa hujëne la ahnahna i ’ö.”—Mataio 5:23, 24.

18, 19. Pine nemene matre ka madrine la itre keresiano ngacama kola qanangazo angatr?

¹⁸ “Manathithi nyipunie e troa qaqa nyipunie me axösisin, me sili ewekë nyipunie la nöjei ewekë ka ngazo asë pi ini.” Kola hapeue lai? Öni Iesu: “Madinejë nyipunie, me aciacin, ke atraqate la june thatraqai nyipunie e hnengödrai; ke tune mina hi lo hnei angate hna axösisine la ite pane perofeta.” (Mataio 5:11, 12) Ame lo kola qanangazone la itre aposetolo me sewe angatr troa cainöj, hnei ‘angatr hna tro qa cili thene la itre Faresaio, me madrin.’ Eje hi laka, tha angatre kö a madrin pine la hna qanangazo angatr. Ngo angatre pe a madrin ke, “hna meku angate laka ijije troa xomi hmahma pine la atesiwa” i Iesu.—Ite Huliwa 5:41.

¹⁹ Ame fe enehila, ka madrine la itre hlue i Iehova la kola qanangazo angatr pine la ëje i Iesu. (E jë la Iakobo 1:2-4.) Tui ange aposetolo, tha easë kö a madrin la kola qanangazo së. Ngo maine tro sa mele nyipici koi Iehova, tro hë Nyidrëti lai a hamë së la trengecatr ka ijij. Hanawang la tulu i Henryk Dornik memine la trejin me angeic. Ame lo Ogas 1944, hna upi nyidro kowe la ketre camp de concentration. Önine la itre ka icilekeu: “Thatreine kö tro sa upi angatr troa kuca la ketre ewekë. Angatr a madrine troa akötr.” Öni Henryk: “Ngacama xele ni ma akötr, ngo eni a madrin la eni a catre thele troa mele nyipici koi Iehova. Hnene la thith matre easenyi catre hë ni koi Iehova, nge Nyidrëti a xatua ni.”

20. Pine nemene matre easa madrine troa nyihluene la “Akötesie tene manathith”?

²⁰ Iehova la “Akötesie tene manathith.” Ka madrine Nyidrë la easa cile catr me madrin ngöne la kola icilekeu me easë hnene la fami, maine ngöne la easa wezipo, maine uti ipië trootro. (1 Timoteo 1:11) Ketre, easa madrin ke, hnei Iehova, Akötresie “ka tha’teine thoi,” hna thingehnaeane koi së la itre manathith ka nyimutre. (Tito 1:2) Ame hë elany, paatre palua ha la itre jol. Drei kö la madrine së elany memine la elolone la mel ngöne la Paradraiso! Tro hë sa “madine la tingetinge atraqat.”—Salamo 37:11.