Ita Ne Thup göi 11 Febuare
Nyima 22 me 7 Qene Drehu
“Tro Eö a Madin”
“Tro eö a pui ne xeni göi Iehova Akötesi ’ö . . . , nge tro eö a madin.”—DEUTERONOMI 16:15.
1. (a) Nemene la lue jole hna amejëne hnei Satana? (b) Nemene la hnei Iehova hna ahnithe amë thupene la hna icilekeu hnei Adamu me Eva?
AME ngöne la Satana a uku Adamu me Eva ekö troa icilekeu memine la Atre xupi nyidro, hnei angeic hna amejëne e cili la lue mekune ka nyipi ewekë catr. Ame la pane mekun, tre, hnei angeic hna isenyine la enyipici Iehova memine la emekötine la aqane musi Nyidrë. Ame la hnaaluen, tre, kola ati ewekëne la atr ka hape, angeic a nyihlue i Akötresieti hi e hetre thupen. Kola mama hnyawa la mekune celë ngöne la hneijine i Iobu. (Genese 3:1-6; Job 1:9, 10; 2:4, 5) Ngo, hnei Iehova hna canga unijolene la lue jole cili. Adamu me Eva petre kö ngöne la hlapa e Edena, nge Iehova ha ahnithe amë la aqane tro Nyidrë a cile kowe la lue jole celë. Hnei Nyidrë hna ahnithe laka troa traqa la “matran” ka troa athe la he i Satana, thupene la hna athe la tidöca i angeic hnei Satana.—Genese 3:15.
2. Nemene la itre ithuemacanyi hnei Nyidrëti hna hamën göne la aqane tro Nyidrëti a aeatrëne la hna perofetane ngöne la Genese 3:15?
2 Kola tro la itre hneijin, nge Iehova a hamëne trongëne la itre ithuemacanyi matre troa trotrohnine hnyawa la hna ahnithe amë hë ekö, ene pe kola anyipicine hnyawa laka troa eatre elanyi lai hna perofetan. Hanawange la ketre ceitun, hnei Akötresie hna qaja koi Aberahama ka hape tro la “matran” a fetra qa ngöne la itre xötre nekö i angeic. (Genese 22:15-18) Thupene lai, Iakobo, nekö i api Aberahama trahmanyi a nyi kemene pi pë hë la 12 lao tribu ne Isaraela. Ame ngöne la macatre 1513 M.P.K. lo ijine kola xötrei sa xepu hnene la nöje Isaraela koi Iehova, hnei Nyidrëti hna hamë angatr la itre wathebo laka, hetrenyi fe la itre pui ne xen ka isapengöne nyine kuca e nöjei macatre. Hnei Paulo aposetolo hna qaja ka hape, itre “ahnuene la nöjei ewekë ka troa traqa” la itre pui ne xeni cili ekö. (Kolose 2:16, 17; Heberu 10:1) Itre eje a nyihatrene la aqane tro Iehova a aeatrëne la aja i Nyidrë göne la Matran. Atraqatre la madrin e Isaraela ngöne la kola atrune la itre pui ne xeni cili. Maine tro sa nango ce wange itre ej, tre, tro ha acatrene la lapaune së kowe la enyipicine la itre hna thingehnaeane hnei Iehova.
Kola Fetra La Matran
3. Drei lo Matran hna thingehnaean, nge tune kaa lo aqane athe la tidröca i Nyën?
3 Foa thauzane lao macatre nge sin thupene la kola xötrei perofetane hnei Iehova lo Matran, nge Nyëne hi a fetra, ene Iesu lo hna thingehnaean. (Galatia 3:16) Atr ka pexeje Iesu, nge hnei nyidrë hna mele nyipici uti hë la mec, nge ene pe kola jelethoine lo itre ewekë hna sil hnei Satana. Ketre, pine laka pëkö engazo i Iesu, ka tru alamekene la meci nyidrë, ene la mele hnei nyidrëti hna huujën. Jëne lai, hnei Iesu hna thapa la nöjei xötre nekö i Adamu me Eva ka nyipici qa ngöne la ngazo me mec. Ame la kola meci hnei Iesu hune la sinöe ne iaxösisi, tre e cili hi la kola ‘athe la tidöca’ ne la matrane tune lo hna thingehnaean.—Heberu 9:11-14.
4. Hna nyihatrene tune kaa la mele hna huujëne hnei Iesu?
4 Hna meci hnei Iesu lo treu Nisa, drai 14 macatre 33 M.K.a Ame koi angetre Isaraela, tre, ketre drai ne madrin la 14 Nisa, drai ne atrune la Paseka. E nöjei macatre ngöne la drai cili, itre hnepe lapa a ce thawa la ketre pui ne xeni hna nyi wetrëne hnene la fekene mamoe ka pë ethan. Haawe, ame la pui ne xeni e nöjei 14 Nisa, tre celë hi aqane amekunë angatr la esisitriane la madra ne la neköi mamoe ngöne la hna nuamelene pe la itre neköi angatre haetra nge hna humuthe pë hë hnene la angela la itre pane neköi angetre Aigupito, lo 14 Nisa 1513 M.P.K. (Esodo 12:1-14) Iesu la hna nyihatrene hnene la mamoe ne la Paseka, nge kola qeje nyidrë hnei Paulo ka hape: “Hna humuthe la paseka shë, ene Keriso.” (1 Korinito 5:7) Tune la madra ne lo mamoe ne la Paseka, kola nyijëne mele kowe la ka ala nyimu hnene la madra i Iesu hna anenin.—Ioane 3:16, 36.
Keriso La Ka ‘Pane Mele e Angete Ka Mec’
5, 6. (a)Eu la kola amele Iesu hmaca, nge tune kaa la aqane nyihatrene la ewekë cili hnene la Trenge Wathebo? (b) Pine nemene matre ka sisitria catre la melehmaca i Iesu kowe la aqane troa eatrëne lo hna perofetane ngöne la Genese 3:15?
5 Ame la hnaakönine drai, hna amele Iesu qa hna mec matre troa tro fë xajawa i Tretretro i nyidrë la etrune la mele i nyidrë hna huujën. (Heberu 9:24) Hna nyihatrene la melehmaca i nyidrë hnene la ketre pui ne xen. Ame la drai ka sisedrëne la drai 14 Nisa, tre kola nyiqaane la pui ne xeni areto thaa hna levenëne kö. Thupene la drai cili, e 16 Nisa, hna traqa fë hnene la angetre Isaraela la uke pane qite hna menuën, lo itre hna xötrei menu e Isaraela, thatraqane la atre huuj matre troa tro fë xajawai Iehova. (Levitiko 23:6-14) Drei lai ijine ka ijij, ene lai drai cili 16 Nisa ngöne la macatre 33 M.K., laka hnei Iehova hna sewe Satana matre thaa hune kö angeice troa apaatrene paluane lo “ate anyipicine ka nyipici me meköt”! Ame ngöne lo drai 16 Nisa macatre 33 M.K., Iehova a amele Iesu hmaca qa hna mec kowe la mele ngöne la ua, mele ka pë pun.—Hna Amamane 3:14; 1 Peteru 3:18.
6 Nyipici, Iesu la “ka pane mele e angete meköl.” (1 Korinito 15:20) Thaa ceitu kö la aqane amele Iesu memine la itre hna amelene ekö, thaa hnei nyidrëti kö hna meci hmaca tui angatr. Hnei nyidrëti pe hna elë hnengödrai eë kowe la götrane maca i Iehova, me treqene uti hë la troa acili joxu nyidrë hnei Iehova ngöne la Baselaia e koho hnengödrai. (Salamo 110:1; Ite Huliwa 2:32, 33; Heberu 10:12, 13) Pine laka ase hë acili Iesu troa Joxu, haawe, ijije hë tro nyidrëti a athe la he ne la ithupëjia ka tru, ene Satana, laka tro ha apaatrenyi angeic palua, me hane apaatrene fe la matra i angeic.—Hna Amamane 11:15, 18; 20:1-3, 10.
Itre Xaa Atrene La Matra i Aberahama
7. Nemene la Feet Ne La Itre Wiik?
7 Iesu hi lo matran hna thingehnaeane e Edena, nge jëne nyidrë tro Iehova a “apatene la ite huliwa i diabolo.” (1 Ioane 3:8) Ngo, ame lo Iehova a ithanata koi Aberahama, hnei Nyidrëti hna amamane laka, troa nyimutre la “matra” i Aberahama, thaa ala caasi hmekuje kö. Tro la matran a tune la “ite wëtesiji e hnengödrai, nge tune la ngöni ne ngöne gejë.” (Genese 22:17) Kola mama fe la itre xaa atrene la matran, jëne la hna nyiahnuene hnene la ketre pui ne xen ka hamë madrin. Fifitre lao drai thupene la 16 Nisa, kola atrune hnei angetre Isaraela la Feet Ne La Itre Wiik. Kola qaja hnene la Trenge Wathebo göne la ijine cili ka hape: “Uti hë elanyi thupene la sabathi [hnaasevenen] tro nyipunie a e ite drai ka [fifitre] ; nge tro nyipunie a hujëne la huuj ne xeni ka hnyipixe koi Iehova. Tro nyipunie a tro fë qa ngöne la ite hnalapa i nyipunie lue areto ne simesim, lue omera falawa lu’ ej ; tro ha deuthe lue’ eje hna levenën ; celë hi ite pane wene koi Iehova.”b—Levitiko 23:16, 17, 20.
8. Nemene la ewekë hna acil ngöne la Penetekos macatre 33 M.K.?
8 Ame lo Iesu e celë fen, hna majemine hëne la Feet Ne La Itre Wiik hnene la Penetekos (qa ngöne la hnepe hnëewekë qene Heleni hna hape “hnaafifitren”). Ame ngöne la Peneteko 33 M.K., tre, hnei Iesu Keriso, atre huuje ka sisitria, lo hna amelene hmaca, hna nenge la uati hmitrötr hune la ala 120 lao itretre drenge ka icasikeu e Ierusalema. Haawe, itretre drenge hna iënë hë angatre matre troa itre nekö i Akötresie, me itre trejine me Iesu Keriso. (Roma 8:15-17) Angatre hë la nöje ka hnyipixe, ene la “Isaraela i Akötesie.” (Galatia 6:16) Ala xalaithe hi angatre ngöne la qaan, ngo tro la nöje cili a traqa kowe la ala 144 000.—Hna Amamane 7:1-4.
9, 10. Hna nyihatrene tune kaa la ekalesia i Keresiano hna iën ngöne la ijine Penetekos?
9 Hna nyihatrene la ekalesia i itre Keresiano hna iën hnene la lue areto hna levenën, nge hna tro fë xajawa i Iehova e nöjei Penetekos. Hna amamane hnene la lue areto hna levenën laka hetrenyi petre kö thene la itre Keresiano hna iën la leven ne la ngazo hna xeni pune hnei nöjei atr. Ngo, ijije hi tro angatr a easenyi Iehova jëne la thupene mel, ene la mel hna huujëne hnei Iesu. (Roma 5:1, 2) Pine nemene matre lue areto? Maine jë kola amamane hnyawa laka, troa fetra la itre nekö i Akötresie hna iën qa ngöne la lue gurup—ene la angetre Iudra itre pane nekö i Akötresie, nge thupene lai itre ethen.—Galatia 3:26-29; Efeso 2:13-18.
10 Ame la lue areto hna tro fë ngöne la Penetekos, tre, hna xome qa ngöne la itre pane wene ne la hna menuëne la itre qiitr. Thenge la ewekë celë, kola hëne la itre Keresiano hna iëne hnei uati hmitrötr ka hape “pane wene la nöjei ewekë hnei [Akötresie] hna xup.” (Iakobo 1:18) Angatre hi la itre hna pane sei ngazon jëne la madra i Iesu hna anenin, nge celë hi ka aijijë angatre troa hane kapa la mele e koho hnengödrai ngöne la ua, nge e cili angatre a ce musi me Iesu ngöne la Baselaia i nyidrë. (1 Korinito 15:53; Filipi 3:20, 21; Hna Amamane 20:6) Hnene laka angatre hë la itre nekö i Akötresie e koho hnengödrai, easenyi hë la ijine tro angatre a “musinë [itre nöje] hnene la wameuce fao,” nge tro hë angatre a wange la aqane ‘waja fici Satana fene la itre lue ca i angatr.’ (Hna Amamane 2:26, 27; Roma 16:20) Hnei Ioane aposetolo hna qaja ka hape: “Angate lai itete xöte thenge la Arenio kowe la hnei nyidëti hna jötëti kow. Angate lai ite hna itöne qa nyipine la nöjei ate, ite pane wene thatraqai Akötesie memine la Arenio.”—Hna Amamane 14:4.
Ketre Drai Ka Amamane La Iamele
11, 12. (a) Nemene la ewekë ekö hna kuca ngöne la drai ne nyithupene mel?(b) Nemene la itre manathith hna kapa hnene la itretre Isaraela qa ngöne la itre huuje hna kuca ngöne la drai ne nyithupene mel?
11 Ngöne la hnaatreene ne drai ne treu Ethanima (hna hëne pë hë ka hape Tishri)c, kola atrune hnei angetre Isaraela la ketre pui ne xen ka nyihatrene la aqane troa kepe eloine elanyi la mele hna huujëne hnei Iesu. Ame ngöne la drai cili, kola traqa hnene la nöje asë kowe la drai ne nyithupene mel matre troa tro fë la itre huuj thatraqai angatr nyine senge la ngazo i angatr.—Levitiko 16:29, 30.
12 Ame ngöne la drai ne nyithupene mel, kola humuthe hnene la atre huuje ka sisitria la neköi kau, nge nyidrëti a sevenene fie hnene la madrane ej qëmekene la thingene la Aka, ngöne la Gaa Nyipi Hmitrötr, ene pe kösë kola tro fë la madra xajawa i Iehova. Ame la huuje cili, tre thatraqane la ngazo ne la atre huuje ka sisitria, me “lapa i angeic,” me itretre huuj, me itretre Levi. Thupene lai, kola xome la lue gootr hnene la atre huuje ka sisitria. Nyidrëti a humuthe la ketre gootr nyine huuje ne ngazo “thatraqane la nöj.” Kolo fe a xome la madran ej troa fie qëmekene la thingene la Aka hnine la Gaa Nyipi Hmitrötr. Thupene lai, kola amë hnene la atre huuje ka sisitria la lue iwanakoime i nyidrë hune la he ne la hnaaluene gootr, nge nyidrëti a qaja amamane hune eje la itre ngazo asë ne la itre nekö i Isaraela. Nge, tro nyidrëti a nue la gootre kowe la hnapapa matre troa ananyine la itre ngazo ne la nöje ngöne la götrane la ua.—Levitiko 16:3-16, 21, 22.
13. Tune kaa la aqane nyiahnuene la hnëqa ka eje thei Iesu hnene la itre ewekë hna kuca ekö ngöne la drai ne nyithupene mele?
13 Haawe tune la hna nyihatrene ekö hnene la itre huliwa celë, kola xome hnei Iesu, Atre Huuje Ka Sisitria catr la sipu madra ne mele i nyidrë troa senge la ngazo ne la itre atr. Ame la etrune la thupene madra i nyidrë, tre hna pane kepe thangane hnene la “uma ne ua,” ene la ala 144 000 ne lo itre Keresiano hna iën, matre ijije tro Iehova a jelemeköti angatr me hane kepe angatr, kösë itre ka pë ethan xajawa i Nyidrë. (1 Peteru 2:5; 1 Korinito 6:11) Celë hi lai hna nyihatrene hnene lo neköi kau hna huujën. Celë fe jëne matre tro angatre a hane kapa la edrö i angatre e koho hnengödrai. Ame la hnaaluene ewekë, tre kola kepe thupene fe la madra i Iesu hnene la itre xaa atr, itre milio la etrun ka lapaune koi nyidrë, tune la aqane amamane hnene la gootr hna huujën. Tro ha amanathithi angatr hnene la mele ka thaa ase palua kö e celë fen, edrö hna aluuzine ekö hnei Adamu me Eva. (Salamo 37:10, 11) Jëne la madra hna anenin hnei Iesu, nyidrëti a ananyine la ngazo ne la nöjei atr, tune mina fe ngöne la götrane la ua, kola ajöne hnene la gootr ka mele la ngazo ne la itre nekö i Isaraela kowe la hnapapa.—Isaia 53:4, 5.
Nyine Madrine Xajawa i Iehova
14, 15. Nemene la ewekë hna kuca ngöne la kola fetëne la uma ne hunuma, nge kola amekunë nemene koi angetre Isaraela?
14 Thupene la drai ne nyithupene mel, kola atrune hnene la itretre Isaraela la pui ne xeni ne uma ne hunuma, ijine madrine ka sisitria catre kö kowe la itretre Iudra e nöjei macatre. (Levitiko 23:34-43) Kola nyiqaane la feet ngöne la hnaafifitrine drai ne treu Ethanima uti hë la drai 21, me nyipune hnene la icasikeu ka hmitrötr ngöne la drai truedri tru ne la treu cili. Eje a nyipune fe la ijine ce xome xawane la itre xeni hna menuën, nge ketre ijine ole kowe la elolone la aqane hame i Akötresie. Celë hi matre, hnei Iehova hna amekötine kowe la itretre atrune lai ijine cili: “Tro Akötesi ‘ö a amanathithinyi ‘ö ngöne la nöjei xenin’ asë ne la zi ‘ö, me nöjei huliwa asë ne la lue iwanakoime i ‘ö, nge tro eö a madin.” (Deuteronomi 16:15) Drei lai ketre ijine madrin!
15 Ngöne la ijine feete cili, sevene lao drai ne pane lapa angetre Isaraela hnine la itre uma ne hunuma. Haawe, nyine tro hi lai a amekunë angatre laka, ngöne la ketre hneijin, hnei angatre hna lapa hnine la itre uma ne hunuma ngöne la hnapapa. Kola aijijë angatre hnene la feete cili troa mekune la aqane thupë angatre hnyawa hnei Iehova, kösë aqane ujë ne la ketre keme koi angatr. (Deuteronomi 8:15, 16) Nge pine laka, ceitune hi la trenamo memine la puafala, nyidroti asë hi a lapa hnine la itre uma ne hunuma ka caas, kolo hi lai a amekunëne la itretre Isaraela laka ngöne la ijine feete cili, tre, pëkö ka draië hui ketre, ceitui angatre asë hi.—Nehemia 8:14-16.
16. Nemene la hna nyihatrene hnene la pui ne xeni ne uma ne hunuma?
16 Ame la pui ne xeni la itre uma ne hunuma, tre, ketre ijine madrine me menue, nge eje a nyihatrene la ketre madrine kö me icasikeune la itre ka troa lapaune koi Iesu Keriso. Hna nyiqaane lai ngöne la Penetekos macatre 33 M.K., lo kola iëne hnei uati hmitrötr lo ala 120 lao itretre drei Iesu, matre troa “xötete huj ka hmitöt.” Tune la hna lapa hnene la angetre Isaraela ekö ngöne la itre uma ne hunuma ngöne la itre drai ka ala xalaithe hi, ketre atrehmekune hnyawa hi la itre hna iën laka, itre “tenyiwa me itete hunuma trootro” angatre ngöne la fene celë ka thaa lapaune kö koi Akötresie. Ame la mejiune i angatr, tre ene la troa mele e hnengödrai. (1 Peteru 2:5, 11) Kola troa nyipune la hna icasikeune la itre Keresiano hna iën ngöne la itre “drai hnapine” celë, ngöne la kola apexejene la ala 144 000 hnene la itre thelene pe.—2 Timoteo 3:1.
17, 18. (a) Nemene la ka amamane ka hape thaa itre Keresiano hna iën hmekuje kö la ka kepe thangane la mele hna hujën hnei Iesu, ngo drei kö lo itre xan? (b) Tune ekö, drei la itre ka kepe thangane la pui ne xeni ne uma ne hunuma enehila, nge eue la ijine troa elitrauje la madrine ngöne la feete cili?
17 Hna huujën ekö ngöne la pui ne xeni ne uma ne hunuma, la 70 lao bolok. (Numera 29:12-34) Ame la etrun la 70, tre kola hape troa asevene lao 10 matre traqa koi 70; nge ame la 7 memine la 10, tre lue eje a amamane la ewekë ka pexeje e koho hnengödrai me e celë fen. Qa ngöne lai, jëne la mele hna huujëne hnei Iesu, troa kepe manathithi hnene la itre ka mele nyipici qa ngöne la 70 lao fami ne la fene ka fetra qaathei Noa. (Genese 10:1-29) Thenge la ewekë celë, ame ngöne la hneijine ne menue enehila, kolo pala hi a kökötre matre troa iacaasinekeune la itre atr ne la nöjei nöj asë ka lapaune koi Iesu, nge ka mejiune kowe la mele ngöne la paradraiso e celë fen.
18 Hna meköle goeëne hnei Ioane aposetolo la menue ngöne la hnedrai së enehila. Hnei nyidrë hna pane drenge la kola qaja la kola pelehatrene la ala 144 000. Thupene lai, nyidrëti a goeëne “la ka ala nyimu atraqat, lo ka tha ‘teine kö kete ate e,” a cile qëmeke i Iehova me Iesu, nge “ngöne la ite iwanakoime i angate la ite idöne pama.” Angatre hi la “angete tropi qa ngöne la aköte atraqat,” me lö kowe la fene hnengödrai ka hnyipixe. Angatre fe enehila a lapa trehnyiwa trootro ngöne la fene celë ka troa paatr, nge angatre a goeëne cememine la mejiune la ijine troa “hia angate hnei Arenio . . . nge tro nyidëti a e angate kowe la timi ka mele ka qeqe.” Ame ngöne la ijine cili, “tro Akötesieti a köle tije la nöjei tenge timi asë qa ngöne la nöjei lue meke i angat.” (Hna Amamane 7:1-10, 14-17) Kola troa eatre hnyawa elanyi la pui ne xeni ne uma ne hunuma ngöne la pune la Itre Macate Ka Caa Thauzane Ne Musi Keriso; e cili hi lo ijine kola troa kapa la mele ka thaa ase palua kö hnene la ka ala nyimu memine fe la itre hna amelene hmaca.—Hna Amamane 20:5.
19. Nemene la ini hne së hna kapa qa ngöne la aqane atrune la itre pui ne xeni ekö e Isaraela?
19 Easë fe, ijije tro sa “madin” e hne së hna mekune thele la aliene la itre pui ne xeni ne la angetre Iudra ekö. Easa haine la easa öhne laka, hnei Iehova hna hamëne la itre ithuemacanyi ekö ngöne la aqane troa eatr la hnei Nyidrëti hna perofetane e Edena, nge easa haine la aqane eatre trootro hnene ej uti hë la pun. Atrehmekune hë së enehila laka, mama ha la Matran, nge hna athe la tidröca i nyën. Joxu hë nyidrëti enehila e koho hnengödrai. Ketre, nyimutre hë thene la itre ala 144 000 ka meci hë, nge hnei angatre hna mele nyipici. Nemene pe kö la nyine troa kuca? Nemene la aqane troa eatre hnyawa la hna perofetan ngöne la itre drai ka calemi? Tro pë hë sa ce ithanatane lai ngöne la hna cinyihane thupen.
[Ithueamacany]
a Kola ihmeku la treu Nisa me treu Maac/Eiperem ngöne la idrai së enehila.
b Hna lapaa amë hnene la atre huuje la lue areto hna levenën hune la lue hnatrapaime i nyidrë ngöne la kola tro fë lue ej, me adraiëne la lue ime i nyidrë, me simesimëne lue ej. Kola nyihatrene hnene la aqane simesimëne tune lai la itre ewekë hna huujën koi Iehova—Wange ju la itus Perspicacité, Volume 2, götrane 528, hna fejane hnene la Itretre Temoë i Iehova.
c Ame la treu Ethanima maine Tishri, tre ka ihmeku memine la treu Semitrepa / Okotropa ngöne la idrai së enehila.
Ijiji epuni kö troa qejepengön?
• Nemene la hna nyihatrene hnene la mamoe ne paseka?
• Nemene la hna icasikeun, nge hna nyihatrene hnene la pui ne xeni ne Penetekos?
• Nemene la itre götrane ne la drai ne nyithupene mele ka amamane la aqane kepe thangane la mele hna huujëne hnei Iesu?
• Tune kaa la aqane nyihatrene la icasikeune la itre Keresiano hnene la pui ne xeni ne uma ne hunuma?