Mekene 9
Nemene La Ewekë Ka Traqa Kowe La Itre Atr Ka Mec Hne Së Hna Hnim?
1. Nemene la ewekë hna drenge hnene la itre atr, ngöne la kola meci la ketre atr hnei angatre hna hnim?
“KOLA akötre la atr ngöne la kola meci hnene la ketre sinee hnei angeice hna hnim, pine laka ame la mec, ke, kola paatre hnene la atr a thatre kö la hmekun.” Celë hi hna qaja hnene la ketre nekö trahmanyi ngöne la kola itrongë pi la aqane meci ne la keme me thine i angeic. Atraqatre la hace thei angeic, nge tru catre la hleuhleu thei angeice la kola meci hnei nyidro, nge ene pe “traqa pi koi angeice la mekune ka ngazo.” Maine jë hnei epuni fe hna hane akötre tun. Ma hnei epuni fe hna hane isa thele ka hape, eka jë hë la hmekune la itre sinee hnei epuni hna hnim, me isa hnyinge ka hape, tro jë kö epuni a hane iöhnyi hmaca me angatr.
2. Nemene la itre hnyinge hna amejëne ka qejepengöne la mec, matre luelue la atr?
2 Hanawange la ithuecatre hna pune qaja kowe la lue trefëne ngöne la nyidro a hleuhleu thupene la hna meci la nekö i nyidro, kola hape, “Akötresie a iëne la nöjei iengene ka mingöminge matre nyine thatraqai nyidrë e hnengödrai.” Hapeu, nyipici kö la hna ithahnata cili? Nyipici kö lai hna qaja ka hape, tro la itre atr hne së hna hnim a tro kowe la nöje ne la ua? Angatre kö a tro kowe la ketre götrane hna troa mele ngön hna hëne ka hape Nirvana, götrane ka pëkö akötre me meciun? Hapeue la itre atr hne së hna hnim, angatre kö a tro kowe pena la ketre mele lo hnë mele ka uti hë epine palua ngöne la paradraiso? Maine pena, kola tro xomi angatre kowe la iaxösisi cili ka pë pune pine la itre ngazo i angatre qëmeke i Akötresie? Hapeu, ijije kö tro la ka meci a kuca hmaca la ketre ewekë ka ngazo maine ka loi koi së? Maine ajane së troa atre la nyipici göne la itre hnyinge celë, ke, nyipi ewekë tro së a wange lo hna qaja hnene la Wesiula i Akötresie hnine la Tusi Hmitrötr.
NEMENE LA “U” THENE LA ITRE ATR?
3. Nemene la mekune hna hamëne hnei Socrates me Plato nyine troa qejepengöne la itre ka meci hë, nge tuneka la aqane ketr la itre atr enehila hnene la mekune cili?
3 Hnene la lue filozofe, lue atr ne heleni ekö Socrates me Plato hna catre fë ka hape, hetre ketre götrane thene la trahmanyi me föe ka thaa meci kö—kolo hna hape u, ka mele pala hi ngacama meci hë la atr. Ame enehila, ke, kola jelenyipicine hnene la itre milio lao atr ngöne la fen asëjëihë. Qa ngöne la ini cili, alanyimu la itre atr ka xouene la itre ka meci hë, memine la itre ewekë ka troa traqa koi angatre thupene la mec. Isazikeu catre la itre mekune cili memine la itre ini qa hnine la Tusi hmitrötre göi mec.
4. (a) Nemene la hnei Genese hna qaja koi së, göi u? (b) Nemene la hnei Akötresie hna hamëne koi Adamu matre mele pi angeic?
4 Maine ajane së troa atre hnyawa la pengöne la atr ka meci hë, ke, loi e tro së a pane mekune hmaca lo mele ne lo pane keme së, pëkö u hna xupe nyine troa löthi angeic. Ngo angeice hi la u. Ame la ketre ewekë hnei Akötresieti hna xupe nyine hain, ke, ene la Nyidrëti a xupe la atr—ene la u—qa ngöne dro, nge thupene lai Nyidrëti pë hë a hamëne ju la “mano ne mel.” Hnene la tusi Genese 2:7 hna qaja ka hape: “Hnei Iehova Akötesieti hna xupe la ate xaxau qa ngöne la hnadro, me mano kowe la lue hnafiji angeice la mano ne mel; ene pe u ka mele la at.” Adamu a mele jëne la hna mano. Ame la Akötresieti a hamëne la mano ne mele koi Adamu, ke, thaa ene hmekuje kö la hna mano thatraqane la idrefitre i angeic, ngo hetre ketre aliene ka sisitria ngöne la hna ithahnata celë. Tusi Hmitrötre a qaja “la ecatrene la mele” ka eje thene la itre atr me itre öni e celë fen.—Genese 7:22, NW.
5, 6. (a) Nemene la aliene la trenge ewekë hna hape “ecatrene la mel”? (b) Nemene la ewekë ka traqa e paatre hë la ua qa ngöne la ngönetrei; ene lo ua hna qaja ngöne Salamo 146:4?
5 Nemene la aliene la trenge ewekë hne së hna hëne ka hape “la ecatrene la mel”? Ame la ecatrene la mel, ke, ceitune me ketre malepe ne eë ka hamëne la mele hnei Akötresieti hna amë ngöne la ngönetrei Adamu, ka thaa enije kö pine laka pë kö ecatren. Nge hna xomexatuane la ecatrene celë hnene la hna mano. Ngo hapeu, nemene pe kö lo aliene la “ua” hna qaja ngöne la tusi Salamo 146:4 (NW)? Kola qaja hnene la xötre celë göi itre ka meci ka hape: “Kola löpi la [ua, NW] i angeic, ame hna hmacaju angeice kowe la dro i angeice; ngöne la drai cili patë hë la ite mekune i angeice.” Ame la kola amë la hna ewekë celë, ene la “ua” hnene la itre ka cinyihane la Tusi Hmitrötr, ke, thaa angatre kö a mekune la u ka mele thupene la hna mec.
6 Ame la “ua” ka tro qa thene la atr ka mec, ke, celë hi ecatrene la mele ka xulu qa thene la Atr xupi së. (Salamo 36:9; Ite Huliwa 17:28) Isapengönëne kö la atr memine la ecatrene mele ka cilexome ej, tune la tirisite, laka thaa ceitune kö eje memine la masine hnene eje hna aulilin. Kola meci la atr, pine laka patre hë la ua (la ecatrene la mel), ene pe meci ju la itre selile ne la ngönetrei, tune la laam a pi ju e thupa ha la tirisite. Ame ngöne la ijine meci la ketre atr, ke, paatre hë la ua (ecatrene la mel) troa hamëne la mano ne mele kowe la ngönetrei ka mec, kola ceitu la ewekë cili memine la ketre apul, thaa mele hë ej, ke, pë hë tirisite ka traqa kowe ej. Haawe, e paatre hë thene la ngönetrei ne la atr la ecatrene la mel, pë ju hi ixatua kowe ej, ene pe meci ju la atr—maine u.—Salamo 104:29; Ate Cainöj 12:1, 7.
“TRO HMACA EÖ KOWE LA XAXAU”
7. Nemene la ewekë ka troa traqa koi Adamu, e maine thaa hnei angeice kö hna drenge thenge Akötresie?
7 Hnei Iehova hna qaja hnyawa la pengöne la meci kowe lo atr ka thaa idrei, ene Adamu. Hnei Akötresieti hna qaja ka hape: “nge tro eö a xeni hnene la zihnue ne la qëmeke i’ö, uti hë la tro eö a hmaca kowe la hnadro; ke hna xomi’ö qa lai; ke xaxau eö, nge tro hmaca eö kowe la xaxau.” (Genese 3:19) Matre hna bëeke hmaca ië hnei Adamu? Hna bëeke kowe la hnadro, kowe la xaxau lo hna xupi angeice qa ngön. Celë hi matre ame ngöne la Adamu a mec, ke, hna umuthe e cili la mele i angeic!
8. Ngacama itre u asë hi nyidro, nemene la ka amamane laka, draië kö la itre atr hune la itre öni?
8 Qa ngöne lai, thaa isa pengöne kö la meci ka traqa kowe la atr memine la meci ka traqa kowe la itre öni. Itre u fe itre ej, nge caasi hi la ua, ene la ecatrene la mele ka hamëne la mano ne mele koi angatre asë. (Genese 1:24) Ngöne Atre Cainöj 3:19, 20, kola qaja koi së hnene la atr ka inamacan, Solomona la ëje i nyidrë, ka hape: “Ame la mecine la ketre tune la meci ne la ketre; nge ceitune la lue u i nyidro; nge thaa sisitria kö la atr hune la öni; . . . [Hna xomi nyidroti asë hi qangöne la xaxau, NW] nge tro nyidroti asë a hmaca hnadro eë.” Eje hi laka, ka sisitria la atr hune la itre öni pine laka, hna xupi angeice hnaiji Akötresie, qa ngöne lai kola mama pi la itre thiina i Iehova thene la atr. (Genese 1:26, 27) Ngo ame pe, ngöne la kola meci la itre atr memine la itre öni, angatre asë hi a bëeke kowe la xaxau.
9. Nemene la pengöne la itre atr ka meci hë, nge tro ju hë angatre ië?
9 Hna qejepengöne hnei Solomona la mec, ngöne la kola qaja ka hape: “Ke atre hë la itre ka mele laka tro angatr’a mec; ngo thatre kö la ketre ewekë hnei itre ka meci hë, nge pa hmaca kö thupene koi angatr.” Haawe, pëkö ca hna atre hnene la itre ka meci hë. Qa ngöne lai, hnei Solomona hna hamë ixatua me hape: “Ame la hna öhne hnei lue iwanakoime i ö troa kuca, te, kuca jë eö hnene la egöcatre i’ö; ke pëkö huliwa, me mekun, me wangatrehmekun, me inamacan, ngöne la hua eö a tro kow.” (Ate Cainöj 9:5, 10) Matre e ka la hna tro kow hnene la ka mec? Kowe la hua, (Qene Heberu, sheʼolʹ) celë hi göhnene la nöjei atr asë. Ame la itre hne së hna hnime ka meci hë, pë hmaca fe kö hnei angatre hna atre. Thaa angatre kö a akötr, nge ketre thaa tro pena kö angatre a kucahmë së maine xatua së pena.
10. Pine nemene matre ijije tro së a qaja ka hape, thaa meci kö la pune la mele ne la atr?
10 Hapeu, nyipici kö laka tro së memine la itre hne së hna hnim, a mele a xalaithe hi lao macatre nge thupene lai easë hë a meci palua? Ohe, thaa hnei Tusi Hmitrötre kö hna qaja tune lai! Ngöne la ijine Adamu a icilekeu me Iehova Akötresie, Nyidrëti a canga thele jëne troa cile kowe la itre ethanyine la ngazo ne la atr. Ame ngöne la itre ewekë ekö hnei Akötresieti hna hnëkëne thatraqane la itre atr, thaa hnei nyidrëti kö hna mekune me kuca matre troa meci la atr. (Ezekiela 33:11; 2 Peteru 3:9) Celë hi matre, thaa tro kö la meci a nyipune la mele së, easë memine fe la itre atr hne së hna hnim.
“MEKÖLE HË”
11. Nemene la aqane qejepengöne i Iesu la pengöi Lazaro, sine i nyidrë ka meci hë?
11 Aja i Iehova troa thepe së me itre hne së hna hnim, qa ngöne la mec hna kapa qa thei Adamu. Ketre, hnene la wesiula i Akötresie hna aceitunëne la meci memine la kola hmulizië. Hanawange la nyine ceitun; ngöne la Iesu a atre laka, meci hë la sine i nyidrë, ene Lazaro, nyidrëti a qaja ju kowe la itretre drei nyidrëti ka hape: “Mekölë hë Lazaro sine shë; ngo ini a tro troa ahlë angeice jë qa hna meköl.” Ngo pine laka thaa hna canga trotrohnine kö hnene la itretre dreng la aliene la ithahnata i nyidrë, Iesu a qaja amamane ka hape: “meci hë Lazaro.” (Ioane 11:11, 14) Thupene lai, hnei Iesu hna tro kowe la traon e Bethania, nge tru la hleuhleu i Maretha me Maria hnene la meci ne la xa i nyidro. Ngöne la Iesu a qaja koi Maretha ka hape, “tro ha mele hmaca la xa i nyipo” nyidroti a fe amamane jë la lapaune i nyidro kowe la hna thingehnaeane hnei Akötresie, ene la troa apaatrene la itre ethanyine la meci qa thene la nöjei atr asë. Nyidroti a qaja ka hape: “Ate hë ni laka tro angeice a mele hmaca ngöne la ijine mele hmaca, ngöne la drai hnapin.”—Ioane 11:23, 24.
12. Nemene la mejiune i Maretha göi itre ka meci hë?
12 Tha Maretha kö a qaja la u ka thaa meci kö ka hape, tro eje a mele pe thupene la hna meci la atr me tro kowe la ketre götran. Ketre thaa hnei nyidro kö hna mekune ka hape, Lazaro hë a mele ngöne la nöje ne la ua. Ngo Maretha a lapaune kowe lo hna mejiune ka sheming, ene la melehmaca qa hna mec. Thaa eje kö ngöne la trotrohnine i nyidro laka troa lö la ketre ewekë ka thaa tro kö a hane mec, ene la u qa hnine la ngönetrei ne la xa i nyidro, ngo hna trotrohnine pe laka paatre hë qa thene la xa i nyidro ka mec la mel. Nge ame la nyin lai, ke, ene la troa mele hmaca hnene la xai nyidro.
13. Nemene la mene hna kapa hnei Iesu qa thei Akötresie, nge nemene la aqane amamane i nyidrë la mene cili?
13 Iesu Keriso caasihi la hna aijijëne hnei Iehova troa thapa la itre atr qa thene la mec. (Hosea 13:14) Celë hi matre, Hnei Iesu hna sa thenge la hnyinge i Maretha me hape: “Ini hi la mele hmaca, memine fe la mel; ame la ate lapaune koi ni, ngacama meci hë, te, tro angeice a mel.” (Ione 11:25) Hnei Iesu hna amamane la mene i nyidrë hna hamëne hnei Akötresie ngöne la götrane cili, ngöne la nyidrë a troa wai Lazaro ngöne la hua i angeic; meci hë Lazaro a foa ha lao drai, ngo hnei nyidrëti hna amele angeice hmaca. (Ioane 11:38-44) Pane mekune hmaca jë së la ijine cili, maine kolo pena lo itre xane hna kuca pala hi hnei Iesu, drei la ketre ijine madrine kowe la itre ka öhne la melehmaca cili!—Mareko 5:35-42; Luka 7:12-16.
14. Pine nemene matre isazikeu la aliene la melehmaca memine la mekune ka qaja ka hape, ka thaa meci kö la u?
14 Nyipi ewekë troa pane mekune hnyawa la ewekë celë ka hape: Thaa nyipi ewekë kö troa amelene hmaca la ketre atr, maine tro pena a hamëne hmaca la mele koi angeic, e ame la u ke, ka thaa meci kö. Haawe, pane mekune ju la pengöi Lazaro, thaa kolo kö lai a hnimi angeice la kola amele angeice hmaca qa hna mec, matre bëeke hmaca troa mele ngöne la ngazo, ngo thupene la hna kapa la mele ka sisitria, ene la nyipi manathithi e koho hnengödrai. Eje hi thaa hane fe kö Tusi Hmitrötre qeje “u ka thaa meci kö.” Hnene pe la itre hna cinyihane hnei Tusi Hmitrötre hna qaja ka hape, ame la u ne la atr ka ngazo, ke, tro kö a mec. (Ezekiela 18:4, 20) Ketre, Tusi Hmitrötr a amamane la melehmaca kösë sipu nyin la mec.
“ASË HI LA NÖJEI ATR NGÖNE LA ITRE HUA”
15. (a) Nemene la aliene la hnaewekë lo hna hape “melehmaca”? (b) Pine nemene matre thaa ewekë ka jole kö koi Iehova Akötresie, la troa amelene hmaca la ketre atr ka meci hë?
15 Ame la hnaewekë hna hape “melehmaca” hna qaja hnene la itretre drei i Iesu, ke kola hape lai, “hna ahlën” maine “hna amejën.” Celë hi matre kola iahlë qa ngöne la mec—kösë kola amejëne qa hnine la hua, ene la göhnë ka caasi hna imeköle treqe hnene la nöjei atr (kolo hna hëne ngöne Tusi Hmitrötre ka hape, Sheol maine Hedis). Thaa jole kö koi Akötresieti troa amelene hmaca qa hna meci la ketre atr. Nemene la kepine lai? Pine laka, Iehova la qeqene la mel. Ame enehila, ke, atreine hi troa xome la itre nine memine la itre foto ne la itre föe me trahmanyi ngöne video, nge troa drenge hmaca me wange pë hë itre eje thupene la hna meci la itre atr. Ngo, sisitria catre pala kö la atreine ka eje thene la Atre xupi së ka pucatin asë, pine laka, atrepengöne hnyawa Nyidrëti la atr, nge atreine Nyidrëti troa amelene hmaca la ka mec, nge pëkö caa ewekë hnei Nyidrë hna troa thëthëhmin; ene la nöjei götrane ka eje thene la trahmanyi me föe göi troa hamë nyidro hmaca la ngönetrei ka hnyipixe.
16. (a) Nemene la hna thingehnaeane hnei Iesu, thatraqane la itre ka meci asë hnine la itre hua ne la nöjei atr asë? (b) Nemene la ka amamane ka hape, tro hmaca kö a amelene hmaca la atr?
16 Hnei Iesu hna qaja ka hape: “The sheshëkötre kö ene lai, ke calemi la ijine tro la nöjei ate ngöne la itre hua a drenge la aqane hë i angeic, me tropi; ame la angetre kuca la loi, troa mejë kowe la mel, ngo ame la angetre kuca la ngazo, troa mejë kowe la hnëjin.” (Ioane 5:28, 29) Tro asë hi la itre atr hnei Iehova hna mekune kow a mele hmaca, nge tro ha ini angatre la itre jë i Nyidrë. Ame koi itre ka xötrethenge la atrehmekune i Akötresie, ke, tro hë angatre a mejë kowe la mel. Ngo ame pë hë la itre ka nuetrije la itre ini memine la mus i Iehova, ke, tro angatre a mejë kowe la hnëjin.
17. Drei la itre hna troa amelene hmaca?
17 Eje hi laka, ame lo itre ka xötrethenge pala hi la gojenyi ka meköt, tune la itretre nyi hlue i Iehova, ke, tro hë a amele angatre hmaca qa hna mec. Nyipici, hnene la mejiune i angatre kowe la melehmaca hna thuecatre koi angatr, matre atreine angatre troa cile kowe la mec maine kowe la itre xaa aqane iakötrë ka tru pena. Atre hi angatre laka, tro Akötresie a amele angatre hmaca. (Mataio 10:28) Ngo alanyimu mina fe la itre atr, itre milio lao ka meci hë nge pë ju fe kö ijine tro angatre a hane melëne la itre trenge wathebo ka meköti Akötresie. Angatre fe hi lai itre ka troa hane mele hmaca qa hna mec. Hnei Paulo hna mejiune kowe la trepene mekune i Iehova ngöne la götrane cili, hnei nyidrë hna qaja ka hape: “Nge ini a mejiune koi Akötresie . . . laka, tro ha mele hmaca la nöjei ka meköt, me ka thaa meköti kö.”—Ite Huliwa 24:15.
18. (a) Nemene mele hmaca la hnei Ioane apostolo hna meköle goeën? (b) Nemene la hna troa apaatrene hnine la “hneopegejë eë” nge nemene la hatrene la “hneopegejë cili”?
18 Hnei Paulo aposetolo hna haine la ketre ewekë hnei nyidrë hna meköle goeën; ene la itre ka mele hmaca kola cile qëmekene la therone i Akötresie. Nge Itre macatre thupene lai, Ioane a cinyihane ka hape: “Nge hna hamëne hnei hnagejë la nöjei ka meci then’ej; nge meci me hedis a ketre hamëne la nöjei ka meci thene lu’ej; ame hna isa hnyingë angatre thenge la nöjei huliwa i angatr. Ame hna kuië meci me hedise pi kowe la hneopegejë eë. Celë hi meci hnaluen, ene la hneopegejë eë.” (Hna Amamane 20:12-14) Pane mekune hnyawa jë së lai! Ame asë hi la nöjei ka meci hna mekune hnei Akötresie, ke, tro ha thepe angatre epin, qa hnine la hedis (Qene Heleni, haiʹdes), maine Sheol, ene lo hua ne la nöjei atr asë. (Salamo 16:10; Ite Huliwa 2:31) Haawe tro ha hamë ijine koi angatre matre sipu amamane jë angatre jëne la itre huliwa i angatre ka hape, aja i angatre kö troa hane nyihlue i Akötresie. Thupene lai, troa kuië “meci me hedis” kowe lo hna hape “hneopegejë eë,” maine “Gena”, celë hi hatrene hnëjine atraqatr. (Luka 12:5) Qa ngöne lai, tro ha pë aliene la hua ne la nöjei atr asë, nge tro hë eje a paatre palua ngöne la ijine kola fenesi la iamele hmaca qa hna mec. Eje hi laka, kola xapo la itre hni së la easë a atre laka, thaa tro fe kö Akötresieti a hane axösisine la ketre me ketre!—Ieremia 7:30, 31.
EKA LA HNË TROA MELE HMACA?
19. Nemene kepine matre troa amelene hmaca kowe la hnengödrai la itre xaa atr qa la fen, nge nemene ngönetrei la tro Akötresieti a hamë angatr?
19 Ala xalaithe hi la itre trahmanyi me föe ka troa hane mele hmaca kowe la mele ekoho hnengödrai. Pine laka, itre ka tro angatr a itre joxu me itretre huj, ijiji angatre troa apaatrene la ethanyine la mec hna kapa hnene la nöjei atr qa thene la pane atr, ene Adamu. (Roma 5:12; Hna Amamane 5:9, 10) Ije atr hnei Akötresie hna hëne troa ce musi me Iesu e koho hnengödrai? Tusi Hmitrötre a qaja ka hape, ala 144 000 hi la etrun. (Hna Amamane 7:4; 14:1) Tro Iehova a isa hamëne kowe la itre hna amelene hmaca la ngönetrei ne ua, matre ijije tro angatre a hane mele e hnengödrai.—1 Korinito 15:35, 38, 42-45; 1 Peteru 3:18.
20. Nemene ju hë la hna troa melëne hnene la nöjei atr ka drengethenge Akötresie, ketre tune fe lo itre hna amelene hmaca kowe la fen?
20 Alanyimu catre kö thene la itre ka meci hë, la itre ka troa mele hmaca kowe la Paradaiso e celë fen. (Salamo 37:11, 29; Mataio 6:10) Akötresie a ajane troa aeatrëne hnyawa la trepene mekune i Nyidrë thatraqane la fen, celë hi kepine matre Nyidrë a amelene hmaca la itre xane kowe la hnengödrai. Matre, qaa koho hnengödrai, tro Iesu Keriso memine lo itre atr hna iën, ene la ala 144 000 a musi kowe la nöjei atr ka idrengethenge, uti hë la tro angatre a hetrenyi la mele ka pexeje tune lo mele hna aluzine hnene lo lue pane keme me thine së. Celë hi hna troa melëne hnene la itre xaa hna troa amelene hmaca, tune lo hnei Iesu hna qaja kowe la ketre atr ka tro ha mec, nge ka ce thipi me nyidrë hune la sinöe; öni nyidrë koi angeice ka hape: “Tro eö a ce me ini ngöne la Paradaiso.”—Luka 23:42, 43.
21. Thenge la hna qaja hnei Isaia me Ioane aposetolo, nemene la ka troa traqa kowe la mec?
21 Ngöne la Paradaiso e celë fen, tro ha xome trije la mec, pine laka, eje hi la ketre kepine matre pë pi kö caa ewekë ka loi kowe la atr. (Roma 8:19-21) Hnei Isaia perofeta hna qaja ka hape tro Iehova Akötresie a “cengöne apatene la mec.” (Isaia 25:8) Hnei Ioane aposetolo hna meköle goeëne la ijine tro la nöjei atr ka drenge thenge a mele madrine ngöne la fen, pine laka tro ha thapa qa thei angatre la akötr, me mec. Nyipici, “nge tro Nyidreti Akötesieti a ce me angat, ene Akötesi angat. Nge tro Nyidëti a köle tije la nöjei tenge timida asëjëihë qa ngöne la itre lue meke i angat; nge pa hmaca kö mec me hace hni, me teij me akötr; ke pate hë la ite ewekë hnapan.”—Hna Amamane 21:1-4.
22. Nemene la aqane troa ketri epuni hnene la atrehmekune ne la melehmaca?
22 Itre ini qa hnine la Tusi Hmitrötre a apaatrene la itre mekune hmo, ka pi qejepengöne la atr ka mec. Wesiula i Akötresie a qaja amekötine laka, tro ha apatrene la mec, ene la “ithupëjia hnapin”. (1 Korinito 15:26) Drei la madrine së ka tru, jëne la atrehmekune qa thei Akötresie, kola acatrenyi së me akeukawanyi së hnene la mejiune kowe la melehmaca! Ketre atraqatre fe la madrine së laka, tro ha ahlëne qa hna meköle la itre hne së hna hnim, ene lo itre atr ka meci hë lo itre hna mekune hnei Iehova, matre tro angatre a hane kapa madrine la nöjei ewekë ka loi hna hnëkëne thatraqai angatr, itre ka hnimi Akötresie! (Salamo 145:16) Troa axulune la itre manathithi cili jëne la Baselaia i Akötresie. Ngo eue la troa nyiqaane musi la Baselaia cili? Tro së a ce wange la mekene cili.
HAPEUE LA HNEI EPUNI HNA ININ
Nemene la pengöne la ua ka ej thene la itre atr?
Nemene la aqane tro epuni a qejepengöne la pengöi itre ka meci hë?
Drei la itre hna troa amelene hmaca?
[Iatr ne la götran 85]
Hnei Iesu hna hë Lazaro qa hnine la hua, troa traqa tune lai kowe la itre milio lao atr hna troa amelene hmaca qa hna mec
[Iatr ne la götran 86]
Troa atraqatre la madrine ngöne la ‘Akötresieti a troa ulumaxoxö la mec’