Mekene 11

Easë a Melëne La Itre Drai Hnapin!

1. Pine nemene matre alanyimu la itre atr ka pë hë mejiune ngöne la angatre a goeëne la aqane trongene la fene enehila, ngo troa thele eka la itre mekune nyine mejiune kow, ka troa qeje pengöne hnyawa la itre ewekë ka traqa kowe la fene hnengödrai?

HNAUËNE laka kola elë catre la gomegome enehila e celë fen? Nemene la pengöne la itre drai ka troa xulu koi së? Hapeu, hane fe kö epuni thele troa sa la itre hnyinge celë? Alanyimu la itre atr ka kukehnine la drai elany, pine la itre ewekë hnei angatre hna öhne e celë fen. Kola isa thele hnene la itre atr la pengöne la mele ngöne la itre drai ka troa xulu, pine laka, eje pala hi ngöne la mele enehila la itre isi, itre mec, me itre ihumuth. Pëkö hna mejiune kow hna troa kapa qa thene la itre ka cilëne la itre musi ne fen. Caasi hi, ijije troa mejiune kowe la hna qejepengöne göne la itre drai ne akötre celë; hna hamën ej hnei Akötresie ngöne la Wesiula i Nyidrë. Tusi Hmitrötre a aijijë së hnyawa troa atre la pengöne la itre drai hne së hna melën. Ej a amamane koi së laka, easë hë a melëne lo hna hape, “Itre drai hnapin” hna thingehnaeane kowe la fene celë.​—2 Timoteo 3:1.

2. Nemene la hnei itretre dreng hna hnyingëne koi Iesu, nge tuneka la aqane sa i nyidrë koi angatr?

² Pane goeëne ju la aqane sa i Iesu la hnyinge ne la itretre drei i nyidrë. Köni drai qëmekene tro Iesu a mec, hnei angatre hna hnyingë nyidrë ka hape: “Nemenëti la hatrene la hlepëti hmaca enëtilai, meminëti la puatine la [hneijin, NW]?”a (Mataio 24:3) Hnei Iesu hna sa koi angatre me qaja la aqane mele enehila qa ngöne la itre ewekë ka traqa, nge ka troa amamane laka kolo hë a melëne la itre drai hnapine celë hnene la fen. Kola amamane hnyawa hnene la itre ewekë ka traqa enehila memine la itre hne së hna melëne laka, ame la fene celë ka thatre Akötresieti kö, ke, lö hë eje hnine la itre drai hnapine celë.

3. Pine nemene matre kola ngazo la fene ngöne la Iesu a nyiqaane Joxu?

³ Tune la hna qaja ngöne lo mekene ka ase hë, hnene la aqane e hnedrai ne la Tusi Hmitrötre hna amamane ka hape, cile hë la Baselaia i Akötresie. Ngo nemene la enyipicine lai? Ene la kola elë la ngazo me jole catre la mele enehila, nge pëkö nyin. Celë hi hatrene ka anyipicine hnyawa laka, cilë hë la mus ne la Baselaia i Akötresie. Nemene la kepine lai? Salamo 110:2 a qaja koi së laka, tro Iesu a pane musi ‘e nyipine la itre ithupëjia me nyidrë.’ Eje hi laka joxu hë Iesu e hnengödrai, celë hi matre ame la pane huliwa i nyidrë, ke, ene la troa helë Satana me itre dremoni i angeice kowe la fen. (Hna Amamane 12:9) Nemene hë la pune kowe la fen? Hane hi la hnei Hna Amamane 12:12 hna qaja ha ekö: “Qangöne lai madrine jë, nöjei hnengödrai me angetre lapa ngöne itre ej. Ekölö hi ni la hnadro me hnagejë! qa ngöne la hna utipi koi nyipunie la diabolo ka tru tenge elëhni, ke trotrohninë hë nyëne laka xoxopatre pehi la ijine i nyën.” Easë hë enehila a melëne la “ijine ka xoxopatre” cili.

4. Nemene la itre aliene la itre drai hnapin, nge kola qejeqeje nemene hnene itre ej? (Goeëne ju lo itre hna cinyihane hna eköhagen.)

⁴ Tha sesëkötre kö së la ejuine la aqane sa i Iesu la hnying, ngöne lo kola hnyingë nyidrë la pengöne la hatrene la hlepëti i nyidrë memine la puatine la fen. Hna eköhagene la itre aliene la hatrene cili ngöne la götrane 102. Ketre, kola hane cinyihane fe la itre xaa aliene la itre drai hnapine hnene la itre keresiano aposetolo, ene Paulo, Peteru, me Ioane. Ngo eje hi laka, tru catre kö la itre aliene lai hatrene me aliene la itre drai hnapin, ka troa akötre kowe la atr. Ngo ame pe, easë a mejiune laka easenyi catre hë la pune la fene ka ngazo celë, hnene laka kola eatre asë la itre hna perofetane celë. Celë hi matre nyipi ewekë tro së a ce wange la itre aliene ka tru ne lo hna hape itre drai hnapin.

ITRE XAA ALIENE LA ITRE DRAI HNAPIN

5, 6. Nemene la aqane eatre la itre hna perofetane göi isi me jiin?

⁵ “Tro ha cile la ketre nöje kowe la ketre nöj, me ketre baselaia kowe la ketre baselaia.” (Mataio 24:7; Hna Amamane 6:4) Hnei Ernest Hemingway, ketre atre cinyany, hna qejepengöne lo pane isi ka tru ka traqa kowe la fene hnengödrai, me aceitunëne eje memine “la ketre ilepamecinyi ka tru, me ihumuthi ka tru nge ngazo catre pala ha la aqane traqa ne ej, thaa hna hane pala kö traqa tune lai ngöne la mele ne la atr e celë fen.” Tune la hna qaja hnene la itus Le monde dans le feu de l’épreuve​—1914-1919 (Papale), Drei la “ketre pengöne isi, isi ka ketr asë la fene hnengödrai, hnene la eqeane la itre macatre ne isi, me aqane iakötrë, memine fe laka ka catrehnine catre kö eje hune lo itre xaa isi hne së hna atre maine hne së hna treqen.” Thupene la pane isi, ke, kola xulu fe la hnaluen, a ka catrehnine catre hmaca ju kö eje hune lo hnapan. Kola qaja fe hnei Hugh Thomas porofesöre ne isitoar ka hape “Ame lo itre macatre wane thauzane naene hadredr, ke, hna mama la itre xaa jiane isi, ene la taak, B-52 ketre avio ka kuië boob, boob nukeler, me misil. Ka ketre pengöne kö la hneijne cili, thaa jole kö troa wangatrehmekune pine laka, tru la madra ka neni nge tru catre kö la itre ka meci hune lo itre xaa hneijine ekö.” Nyipici tru la hna ithahnatane troa apaatrenetrije la itre jia ne isi thupene lo isi hna hëne ka hape “guerre froide”. Ngo kola öhne laka, thupene la hna mekune troa acone me apaatrene la itre jia ne isi, hetrenyi pe kö la 10 000 maine 20 000 lao boobe nikeler​—kösë lo a 900 lao isi ka tune lo hnaluene isi ka tru.

⁶ “Nge tro ha jiin.” (Mataio 24:7; Hna Amamane 6:5, 6, 8) Qaane lo 1914, ke, 20 lao jiine ka tru ka ketr la itre nöje ka tru, tune e Banagaladesh, Burunudi, Kabodia, Caina, Aithiope, Heleni, Ëëd, Nizeria, Rusia, Ruada, Somalia, me Suda. Ngo thaa qa ngöne pë xeni caasi kö la kola jiine ngöne la itre xaa nöj. Hnene la itre agoronom, ene lo itre atr ka thele troa atrepengöne la dro, memine la itre economist, ene lo itre atr ka waipengöne la aqane mele ne la atr göi xeni maine itre xaa ewekë ju kö nyine troa salemëne me itön; hnei angatre hna qaja ka hape: “Ame ngöne la itre macatre ka nyimutre ka ase hë, ke, mana nyimenyime kö la xeni hune la itre atr e celë fen. Ngo ame pe hetre 800 milio lao atr ka puafala catr, . . . Pëkö manie i angatre troa itö xen, matre mele pi angatre qa ngöne la mecijin, kola meci la atr hnene la mecijine o’drai.” Ame la itre xaa kepin, ke, hnene la aqane huliwa ne la kuci politik. Hnei Abdelgalil Elmekki atre Suda ka ini sias politik, ngöne la ketre hna ini ka tru ne Toroneto, hna hamëne la lue nöje nyine ceitun, Aithiope me Suda; ngöne la lue nöje cili, tru la xeni hna salemëne koi itre xaa nöj, ngo kola meci la itre thauzane hnei thë xen. Hnene la itre ka cilëne la itre baselaia ne la itre nöje cili, hna hnengazone me isine troa thele maniëne la xeni matre nyithupene la itre jiane isi thene la itre xaa nöj, ngo thaa ithuane pe la itre atrene la nöj. Nemene hë la pune la mekune i Elmekki? Ame la qaane la kola jiin, ke “zöi itre ka thewe xen, me angetre cilëne la baselaia ne la nöj, ene lo itre ka kuci politik.”

7. Nemene la aqane trongene enehila la itre meci ka solesol?

⁷ “Itre meci ka solesol.” (Luka 21:11; Hna Amamane 6:8) Ngöne la itre macatre 1918-1919, ke, hna meci la 21 milio lao atr hnene la ketre meci hna ati ëjen, giripe qaa Sepania. Hna cinyihane hnei A. Hoehling ngöne la itus La grande épidémie (Papale) ka hape “Thaa hna apatrene kö tune la, la itre atr hnene la ketre ka ihumuth, ene la kola wange la etrune la atr hna lepe amecine nyimenyimën.” Enehila, kola ngazo catre trootro me catrehnine la itre meci ka solesol. Ngöne la nöjei macatre, ke, kaser a humuthe la 5 milio lao atr, nge 3.5 milio nge sin lao medrenge me nekönatre ka meci hnei trohni, nge 3 milio la ka meci hnei meci fë imano. Ketre, ngöne la macatre, ke, 3.5 milio lao nekönatre qaane la ka hnyipi mala uti hë la ka faifi lao macatre, ka meci hnei hmanono, maine itre xaa meci ne idrefitre pena. Nge kola akötrëne fe la 2 500 000 000​—kösë lo sine la etrune la atr e celë fen​—hnene la itre mec, qa ngöne laka pëkö tim, maine pena hetre timi hi ngo thaa loi hmaca kö troa ij, maine qa ngöne la hna thatreine nyidrawane la ngönetrei memine la hnalapa ka dro. Kola mama hnyawa laka, ngacama tru la itre ixatua me itre nyin hna öhne hnei atr matre troa aloine la itre meci ka ixötrekeu, ngo thatreine kö angeice troa apaatrenene asë itre ej.

8. Nemene la aqane amamane la itre atr laka angatre a “hni koi mani”?

⁸ “Ke tro nöjei at . . . a meciu mani.” (2 Timoteo 3:2) Kola mana ngöne la fene hnengödrai asë, la aja ka tru thene la itre atr, ene la pi hetrenyi la nöjei ewekë asë. Kola mekune hnei itre xane ka hape, ame la “kii ne la hna ie” ne la atr, ke, eje e ngöne la mani hnei angeice hna kapa qa ngöne la hna huliwa, nge ame la “atreine,” ke, eje e ngöne la itre mo hnei angeice hna hetreny. Hna qaja hnene la perezida ne la ketre biero ne pibilisite, ka hape: “Ame la ketre ewekë ka hule la itre atr e Amerika, ke, ene la pi aja mo . . . ketre mina fe, kola tru catre fe la saleme me itö, nge elë catre fe la thupene mo.” Hapeu, eje fe kö la itre aja cili ngöne la zi i epun?

9. Nemene la hna öhne qa ngöne la hna thaa drenge thenge keme me thine hnene la itre neköne?

⁹ “Tha drei keme me thin.” (2 Timoteo 3:2) Kola mama hnyawa enehila kowe la itre keme me thin, me itre monitör, me itre itre xaa atr ju kö laka, alanyimu catre la itre nekönatre ka thatre hmaca kö la metrötr, me thaa idrei. Itre nekönatre a akötre pine la itre aqane ujë ka ngazo ne la itre keme me thin, maine itre nekönatre pena a xome la tulu i angatr. Kola mana catre pala hi la itre nekönatre ka thaa lapaune hmaca kö​—nge angatre a icilekeu memine la​—itre ka ini angatr, memine la itre wathebo, memine la hmi, ketre memine fe la itre keme me thine i angatr. Kola qaja fe hnene la ketre profesör ka hekö hë ini ka hape: “Ame ngöne la mekune la itre atr, ke, pë hmaca kö hna metrötrëne hnene la itre nekönatr.” Eloine pe, ke, ketre alanyimu kö la itre nekönatre ka amamane ka hape, angatre a xoue Akötresie hnene la aqane ujë i angatre ka loi.

10, 11. Nemene la ka anyipicine laka, pi isi la itre atr, nge pë hë hnimi sinee?

¹⁰ “Catre mek.” (2 Timoteo 3:3) Ame la qene Heleni ne la hna hape “Catre mek,” ke, hna hape ‘pë wenethëhmi, thaa thiina ne atr kö, pine laka paatre kö la ihnimekeu ka eje ngöne la fami.’ Celë hi aqane qejepengöne hnyawa enehila la itre atr ka iakötrë! Hna qaja hnene la ketre ka cinyanyi zonal ka hape “Hnene laka nyimutre la itre ewekë ngöne la mele ka akötrëne la mekune së, nge ketre tiqa fe eje hnei ewekë ka iaxoueny, eje hi laka hace pi hë la hni së la kola e e nöjei drai la itre zonal.” Hna qaja hnene la ketre polisi ka thupe ka hape, nyimutre la itre thöthi ka thaa wangatrune la itre thangane la itre huliwa i angatr. Hnei nyidrë fe hna qaja ka hape: “Hetrenyi la mekun, ka hape, ‘Drei la ka atre la drai elany. Haawe, loi e tro pe ni a hetrenyi la hnenge hna ajane enehila.’ ”

¹¹ “Angetre tha hnimi sinen.” (2 Timoteo 3:3) Ame la aqane ujëne qene Heleni la mekune celë, ke, kola hape “pëkö ihnimi e kuhu hni, pëkö hni ne atr,” nge kola hape fe “thaa ka ihmeku kö memine la pengöne la atr, nge pëkö ihnimi trejin.” (Nouveau dictionnaire international de théologie du Nouveau Testament, [Papale]) Nyipici laka, paatre kö la ihnimi ngöne la hnene eje hna troa nyiqane mama​—ene ngöne la hnalapa. Kola mama enehila la itre aqane mele ngazo ne la atr, itre trefëne a iqanangazo, hna qanangazone fe la itre nekönatr, me itre qaqa i angatr. Hna qaja hnene la itre xaa atr ka thele la kepine matre kola paatre la ihnim, ka hape: “Ame la iakötrë, ene la kola ixe maine kola iukapië, maine kola ikuluhmathe maine kola ikuqany​—itre ewekë lai ka traqa a co hmaca ju kö e trön, ngo tru catre kö e hnine la fami.”

12. Nemene kepine matre kola qaja ka hape, itre atr a kösë thiina ka ijiji Akötresie?

¹² “Angetre kösë thina ka ijiji Akötresie, ngo xelene pe la menen’ej.” (2 Timoteo 3:5) Atreine la mene la Tusi Hmitrötre troa ujëne la atr matre loi la aqane mele i angeic. (Efeso 4:22-24) Ngo ame pe, jëne la itre hmi, hnene la itre atr hna zae matre heetrëne la itre huliwa ka ngazo i angatre ka sisi xajawa i Akötresie. Hnene la itre keme ne hmi hna lapa goeëne la thoi, me atrekënö me kuci ngazo, me itre thiina ka sis. Tru la itre hmi ka cainöjëne la ihnim, ngo löhnine pe la itre isi. Hna cinyihane hnene la ketre zonal India Today ka hape: “Ngöne la atresiwa ne la Atre Xupe la hnengödrai me fen, itre atr a ikucakeune la itre aqane iakötrë ka tru.” Eje hi laka, hna fetra nyipine la itre hmi ne lo itre atr lo lue isi ka tru, ene lo lue isi ka tru ka traqa kowe la fene asë.

13. Nemene la nyine anyipicine laka, hna ajifelöne la ihnadro?

¹³ “Hna ajifelöne la fewatin.” (Hna Amamane 11:18) Hnene la itre siatifik ne la fene asë, traqa jë kö koi 1600 la etrui angatre nge qa thei angatr, ala 104 ka kapa la Prix Nobel, hnene lai lapa cili hna siji pune la tus ne ithuemacanyi qa thene la lapa ka caas ne la itre siatifik ka hnengazo; kola hape: “Tro ha ihnakeune la atr memine la nöjei ewekë hna xup, ka cile xötreithi angeic . . . Xalaithe pe hi lao macatre ne tro angeice a cile kowe la itre ka ajolëne la mel.” Önine hmaca jë kö lai hna cinyinhane ngöne lai tus, ame la itre huliwa menu ne la atr, ke, “atreine itre eje troa angazone la fene matre thatreine hmaca kö troa mele ngön.” Kola ae trootro la iatune la ihnadro lo hna hape couche d’ozone, kola ngazo la timi e troa ij, kola paatre fe la itre hnitr hnene laka kola thupe sinöe, pë trootro hë dro ka loi troa eën, kolo ha troa paatre palua la itre öni tune fe la itre feja; lue xaa jole ka tru lai nyine troa canga ithahnatan. Önine la itre siatifik ka hape: “Eje hi laka thaa hna xupe kö la itre selile matre tro itre eje a isa kuci mekun, ngo maine tro pena huliwane menune itre eje hnene la atr, nyipici tro ha traqa kowe la pune ka ngazo, ene la troa ethitre asë la ngönetrei ne la atr, nge thatreine kö së troa atreine qeje pengöne hnyawa la kepin.”

14. Nemene la aqane tro epuni a anyipicine laka, kola eatre ngöne la hneijine së lo hna thingehnaeane hnei Mataio 24:14?

¹⁴ “Nge tro ha cainöjëne la maca ka loi ne la Baselaia e cailo fene nyine anyipicine kowe la nöjei nöj.” (Mataio 24:14) Hnei Iesu hna thingehnaeane ka hape, troa cainöjëne la maca ka loi, nyine anyipicine kowe la nöjei nöj asë. Qa ngöne la ixatua me manathithi qa thei Akötresie, itre milio lao atr a anyipici Iehova, angatre a catre cainöjëne pala hi la atresiwa i Iehova matre tro fe la itre xaa atr a hane itretre drei i Iesu; celë hi matre, traqa pala hi kowe la itre thauzane milio lao hawa hnei angatre hna kuca ngöne la hnëqa cili. (Mataio 28:19, 20) Nyipici, atrehmekune hnyawa hi la angetre anyipici Iehova laka, e thaa qaja kö angatre la maca ka loi, ke, zö i angatre nge troa hnyingëne koi angatre la madra ne la itre atr hna thaa thuemacane kö. (Ezekiela 3:18, 19) Ngo ame la madrine ka tru i angatr, ke, ngöne la nöjei macatre traqa pala hi kowe la itre thauzane la etrune la itre atr ka kapa hnyawa la ithuemacanyi ne la Baselaia, me angetre mejë troa ce hane cile catre tune la itre nyipi keresiano, lo itretre anyipici i Iehova. Celë hi hnëqa ka sisitria la troa nyihlue i Iehova hnene la troa hane ithuemacanyine la atrehmekune i Akötresie. Eje hi troa nyipune elanyi la fene ka ngazo, e pane ase jë cainöjëne la maca ka loi ngöne la nöjei nöje asë.

LOI E TROA KAPA LA NYIPICI

15. Nemene la aqane troa nyipune la fene ka ngazo celë?

¹⁵ Troa nyipune tuneka la fene celë? Tusi Hmitrötre a qaja la ketre “akötre katru” troa nyiqaane hnene la kola troa lepe hnei politik la “Babulona Atraqatr,” ene lo itre hmi ka thoi. (Mataio 24:21; Hna Amamane 17:5, 16) Hnei Iesu hna qaja ka hape, ‘ngöne la ijine cili, ke, tro ha melöhleme pi la jö, nge thaa tro kö a meleme la teu, nge tro ha mala la nöjei wëtesij, nge tro ha jumejume la nöjei mene e hnengödrai.’ (Mataio 24:29) Eje hi laka troa hane öhne hnei atr la itre ewekë cili ka troa traqa qa hnengödrai. Nge troa mamacile hnyawa la itre lai ne la itre hmi e celë fen, ene lo itre ka cilë mekene la itre hmi ka thoi, nge troa apaatrenyi angatr. Thupene lai, tro Satana, lo hna hëne ka hape “Gog atr kë zin’e Magog” a ukune la itre atr ka ngazo troa icilekeu tixenuë me thele troa isi memine la nöje i Iehova. Ngo thaa tro kö angeice a hun, pine laka Akötresieti la petre i angatr. (Ezekiela 38:1, 2, 14-23) Troa traqa kowe la pune la “akötr atraqatr” e Amagedo, “drai ataqate i Akötresie kapucatin’asë.” Ketre tro hë a apaatrene asë fe la itre munëne ewekë i Satana ka eje pala kö e celë fen, ene la itre organizasio i angeic, matre tro la thelen, ene la itre atr ka mele pe, a kapa hnyawa la manathithi ka pexej.​—Hna Amamane 7:9, 14; 11:15; 16:14, 16; 21:3, 4.

16. Nemene la aqane atre së laka, ame la itre hna perofetane göi itre drai hnapin, ke, kola eatre ngöne la hneijine së?

¹⁶ Eje hi laka, ame la itre xaa götrane la itre ewekë hna perofetane nyine hatrene la itre drai hnapin, ke, hna traqa ha ekö ngöne la itre xaa hnedrai ne la mele ne la atr. Ngo ame la easë a thele troa atrepengöne hnyawa lo itre hna perofetan, ke, easë a öhne laka, itre eje a traqa itronyi asë ngöne la hnedrai së enehila. Hna aceitunëne memine la thupene la hene wanakoime i atr. Thaa ceitu kö la thupene la hene wanakoime ne la itre atr; isa pengöne kö la isa thupene hene wanakoime së. Ka ceitune hnyawa hi lai memine lo hna qaja hnine Tusi Hmitrötre ka hape, itre drai hnapin, kola amamane hnene la itre sipu aliene ej, me itre ewekë ka traqa ka hape ka ketre pengöne pi kö la itre drai cili hune la itre xaa hnedrai. Thaa hna öhne kö ngöne la itre xaa hnedrai, la “thupene hene wanakoime” ne la itre drai hnapin. Itre ithuemacanyi qa hnine Tusi Hmitrötre a amamane ka hape, cilë hë la Baselaia i Akötresie e hnengödrai, kola anyipicine hnene la itre ewekë ka traqa ka hape easë a melëne la itre drai cili, ke, cili hi la itre drai hnapin. Ketre, hetre nyine anyipicine hnyawa kö qa hnine la Tusi Hmitrötre, ene laka easenyi hë troa apaatrene la fene ka ngazo celë.

17. Nemene la hna upi së troa kuca ngöne la easë a atre laka, easë a melëne la itre drai hnapin?

¹⁷ Nemene la aqane tro epuni a ujë ngöne la epuni a öhne laka, epuni a melëne enehila la itre drai hnapin? Pane mekune hnyawa ju la ewekë celë: Maine atre hë së laka calemi hë la ketre wene ka tru, nge ka catrehnine nge ka ngazo kowe la mele së, eje hi tro hë së lai a canga hmeke me hnëkë, thaa tro kö a hunyinyi. Haawe, ame la hnei Tusi Hmitrötre hna thuemacanyi së kowe la fene celë, ke, tro lai a upi së fe troa hlëhmek. (Mataio 16:1-3) Nyipici easë a öhne laka, easë a mele ngöne la itre drai hnapine ne la fene celë. Celë hi kepine lai matre loi e tro së a saze la itre aqane mele së, matre troa hane kepe së hnei Akötresie. (2 Peteru 3:3, 10-12) Iesu la atre troa hamë iamele, celë hi matre nyidreti a canga thuemacanyi së me hape: “Nge wange kö nyipunie ke hace pi la itre hni nyipunie hnene la hna xeni atrun, me hna iji atrun, me kukehnine kowe la mele celë, ame hna traqa la drai cili a asheshëkötë nyipunie; ke tro ej’a traqa kösë hnö kowe la nöjei atr’asë angetre lapane la fen’asë. Hmekëne ju nyipunie me lapa thith, matre atreine nyipunie troa kötrene la nöjei ewekë asë ka tro ha traqa, me troa icilenyi qëmekene la neköi ate.”​—Luka 21:34-36.

[Ithueamacany]

HAPEUE LA HNEI EPUNI HNA ININ

Nemene la itre ewekë ka traqa kowe la fen ngöne la ijine Iesu a nyiqaane cile troa joxu?

Nemene la itre ewekë ka nyi hatrene la itre drai hnapin?

Pine nemene matre lapaune hnyawa epuni ka hape easë hë la a melëne la itre drai hnapin?

[Hna eköhagen götrane 102]

ITRE XAA ALIENE LA ITRE DRAI HNAPIN

● Itre isi thaa hna traqa tune kö ekö.​—Mataio 24:7; Hna Amamane 6:4.

● Jiin.​—Mataio 24:7; Hna Amamane 6:5, 6, 8.

● Itre meci ka solesol me ixötrekeu.​—Luka 21:11; Hna Amamane 6:8.

● Tro ha haöthe la fen hnene la ngazo.​—Mataio 24:12.

● Troa ajifelöne la fewatin.​—Hna Amamane 11:18.

● Itre sha.​—Mataio 24:7.

● Tro ha traqa la nöjei ijine akötr.​—2 Timoteo 3:1.

● Meciu mani.​—2 Timoteo 3:2.

● Thaa drei keme me thin.​—2 Timoteo 3:2.

● Pëkö hnimi sinee.​—2 Timoteo 3:3.

● Kola ajane la nyine amadine ngo thaa ajane kö koi Akötresie.​—2 Timoteo 3:4.

● Thatreine kö xomehnöth.​—2 Timoteo 3:3.

● Thaa ajane kö la loi.​—2 Timoteo 3:3.

● Thaa hmekëne kö la ewekë ka troa traqa.​—Mataio 24:39.

● Troa mama fe laka easë a melëne la itre drai hnapin, hnene laka alanyimu la itre ihnyima sai, kola xele ma drei së.​—2 Peteru 3:3, 4.

● Troa cainöjëne la Baselaia i Akötresie e cailo fen asë.​—Mataio 24:14.