Thupëne Hnyawa Kö La Itre Ewekë Ne La Maseta

¹ Ame ngöne la hneijine i Tusi Hmitrötr, ke, göhnë ka tru la hna lapane hnene la hlue atre musinëne la nöjei ewekë ne la maseta i angeic; qa ngöne lai, atraqatre la mejiune ne la maseta koi angeic. Hnei Aberahama hna upe la hlue i nyidrë troa thele föe ne la nekö i nyidrë, ene Isaka. (Gen. 24:​1-4) Eje hi laka, hnëqane fe la hlue troa thupëne hnyawa la itre matra i Aberahama. Drei la ketre hnëqa ka tru! Thaa sesëkötre kö së la kola qaja hnei Paulo, ka hape: “Nge dei fe la, qâ i angete thupë ewekë troa isa nyipici”!​—1 Kor. 4:2.

Keresiano Atre Thupë Ewekë

² Hna qeje pengöne ngöne la Tusi Hmitrötre la itre xaa götrane ne la huliwa ne cainöj ne la keresiano, kösë itre qa nyine tro së a thupën. Hanawange la ketre ceitun, hnei Paulo aposetolo hna hane qaja koi angetre efeso, ka hape, ame “la qâng, ene la ihnimi gufa i Akötesie hna hamë ni thatraqai nyipunie.” (Efe. 3:2; Kol. 1:25) Nyidrëti a wangatrune la hnëqa i nyidrë, ene la troa tro fë la maca ka loi kowe la nöjei nöj, ceitune me ketre qa hnei nyidrëti hna troa kuca cememine la hni ka nyipici. (Ite Huliwa 9:15; 22:21) Hna cinyihane hnei Peteru, kowe la itre trejine me nyidrë hna iën, ka hape: “Ishaheji kete koi kete nge the nyi ulili fë kö; loi e tro nöjei ate a inyi hluekeu thenge la hna kapa la ahnahna hnei angeic, tune la itete thupëne aloine la ihnimi gufa ka nyimu pengöi Akötesie.” (1 Pet. 4:​9, 10; Heb. 13:16) Ame asë hi la itre ewekë hna hetrenyi hnene la itre Keresiano ne la hneijine i Iesu, celë hi thangane la ihnimi gufa i Iehova koi angatr. Haawe, kösë lo angetre thupëne la itre ewekë cili; nge kola ajane troa xome la itre ewekë cili, thatraqane la huliwa ne la keresiano.

³ Ceitune fe aqane waiewekë ngöne la huliwa cili, hnene la Itretre Anyipici Iehova. Ase hë angatre nue la mele i angatre koi Iehova, me mekune laka, ame asë hi la itre ewekë ka eje thei angatr, ene la mel, me trenge catr, me itre ewekë i angatr, kösë itre wenene hi “la ihnimi gufa ka nyimu pengöi Akötesie.” Tune la itre atre thupë ewekë hnyawa, angatre hnehengazone la aqane troa huliwane la itre ewekë i angatre cili. Ketre, hnei angatre fe hna kapa la atrehmekune ne la maca ka loi. Celë fe ketre hnëqa lai hnei angatre hna ajane troa huliwane hnyawa: ene la troa atrune la atresiwa i Iehova me hane xatuane fe la itre xaa atr troa kapa la atrehmekune ne la nyipici.​—Mat. 28:19, 20; 1 Tim. 2:​3, 4; 2 Tim. 1:​13, 14.

⁴ Nemene la aqane xome hnene la itretre anyipici Iehova, la itre hnëqa i angatr, ene la troa itretre thupë ewekë? Kola amamane hnene la rapore ne cainöje ne la macatre laka, ame ngöne lo macatre hnapan, hnei angatre hna cainöje ngöne la fene hnengödrai asë, matre 1 milio lao hawa ne trofë trongëne la “maca ka loi ne la Baselaia” nge hna kuca la 4 500 000 nge hetre munën, lao etid memine la itre atr ka pi ajane troa inine la Tusi Hmitrötr. (Mat. 24:14) Kola mama fe laka, angetre thupë ewekë i Iehova angatr, angetre mele nyipici, qa ngöne laka, angatre a hamëne fe la hnei angatre hna hetrenyi thatraqane la huliwa ne cainöj e cailo fen, me kowe fe la itre Uma ne Baselaia ne la nöj, me jëne la aqane kapa hnyawa angatre la itretre thupe ka vizite trootro, me itre xane ju kö; ketre, angatre fe a hane amamane la ihnimi angatre kowe la itre hna akötrën, ene lo itre ka eatre hnene la itre isi. Kola huliwa hnene la itre nyipi keresiano tune la ketre gurup, laka, angatre a thupëne hnyawa la itre ewekë ne la Maseta.

“Ate Thupe Nyipici, Me Ka Inamacan”

⁵ Thaa hnei Akötresieti hmekuje kö hna hamëne koi së isa ala caas, la hnëqa ne troa elemekene la itre ewekë i Nyidrë, ngo kowe fe la organizasio. Hnei Iesu hna hëne la ekalesia i keresiano hnei nyidrëti hna iëne e celë fen, ka hape, “ate thupe nyipici, me ka inamacan.” (Luka 12:42) Ame la hnëqa ne la “ate thupe nyipici” celë, ke, ene la troa hamëne la “xen” me troa elemekene la huliwa ne cainöjëne trongëne la maca ka loi, ngöne la fene hnengödrai asë. (Hna ama. 12:17) Qa ngöne lai, hna nyi ukeineqene la atre thupe nyipici, hnene la Koleji sataral, hna upe hnei Akötresie troa xome la ketre hnëqa ka tru, ene la troa huliwane hnyawa la itre jiane huliwa, me “ite talane” ngöne la götrane la ua. (Mat. 25:15) Kola xötrethenge la tulu hna hamëne hnene la ‘ate thupe nyipici’ hnene la itre wapicine i Sasaiatri ka ce huliwa, ngöne laka, angatre a isa catre huliwane hnyawa thenge la meköt, la itre ahnahna hna kapa, matre thatraqane la itre huliwa ne la Baselaia. Hna hamëne asë hi la itre ahnahna cili cememine la mejiune laka, troa huliwane hnyawa, nge qa ne la “ate thupe nyipici, me ka inamacan,” troa elemekene hnyawa, me xome la manie cili matre troa aeatrëne la itre hna mekune kow, nge tro fe a xecie koi angatre laka, hna huliwane inamacanëne lai mani, maine ngöne la itre hna troa itön, nge hetre thangane ka lolo la aqane huliwan.

⁶ Kola mama laka, hetre inamacane nge lolo la aqane huliwane la itre ahnahna hna ithingën, ngöne laka, kola kökötre la ketre götrane la huliwa ne la itretre anyipici Iehova ngöne la hna truedrene hadredrene macatre, ene la huliwa ne fejane la itre itus. Ame ngöne la “itre drai hnapin,” tru la thangane la “maca ka loi”, ngöne laka, kola thewe Tusi Hmitrötr, me tro fë trongëne la itre itusi ka qeje pengöne ej, ene lo​—itre zonal, me itre itus, me itre boroshüre, me itre sine itus, me itre tarak, me itre Huliwa ne Baselaia. (Mareko 13:10; 2 Tim. 3:1) Nge kola mama hnyawa laka, ka sisitria la jiane huliwa, ene la zonal, La Tour de Garde, ngöne la troa hamëne la “xeni ngöne la nyipi ijin” kowe la “lapa i Akötesie” me itretre ce huliwa me angatr, ene la “ka ala nyimu ataqat” ne “ite xa mamoe.”​—Mat. 24:45; Efe. 2:​19; Hna ama. 7:9; Ioane 10:16.

⁷ Ame ngöne lo itre drai hnapan, hna fejane asë hi la itre itusi ne la ite Temoë i Iehova, hnene la itre atr ne fen. Ngo ame hë ngöne la macatre 1920, hna mekune hë hnei sasaiatri, laka, tro kö a nyipi lolo, nge hetre thangane catre ngöne la götrane la ua, e tro la itretre Anyipici Iehova a ketre fejane la itre itusi angatr. Hna nyiqaane troa eatrëne la mekune cili ngöne la macatre 1920, matre kökötre ju pë hë e Brooklyn, me New York, uti hë la ketre hnë feja itusi ka tru. Ame hë ngöne la macatre 1967, hna e la foa lao hnepe götrane hnë feja itus. Thupene lai, hna hane acile fe la itre hnë feja itusi ngöne la itre xaa nöj, ngo nyimutre la itre götrane hna pane ajolëne hnene lo hnaaluene Isi ka tru.

⁸ Ngacama kökötre catre la huliwa ne feja itusi e Etazini, ngo thaa ijije kö troa huliwa caasi kowe la fene hnengödrai asë. Qa ngöne lai, ame ngöne la itre macatre thupene la isi, hna acile la itre hnë feja itus, nge ame ngöne itre xaa nöj, kola kökötre la huliwa cili, ene e Kanada, me Danemark, me Agele, me Heleni, me götrane ailojë ne Afirik, me Suis, me götrane ahuë ne Alema. Ketre, ame hë ngöne la macatre 1970, hna nyixane hnei Osetralia, me Berezil, me Fëëlaad, me Gana, me Zapo, me Nizeria, me Filipin. Ala nyimu angatr, itre nöje ka kuca hmekuje hi la itre zonal, nge ame itre xan, angatre fe a hane kuci itus. Ame ngöne la macatre 1970, hna inine la itre mesinare ne Gileada troa huliwane la itre masine ne feja itus, nge hna upi angatre kowe la itre xaa nöje cili, matre troa xatuane la itre trejine ne la nöj, troa fejane la itre itus.

⁹ Ame ngöne la macatre 1980, hna elë la etrune la itre nöje ka feja itus, 51 la etrun.a Drei la hatrene la aqane huliwane hnyawa la trengamo ne la Maseta! Kola mama hnyawa la aqane kökötre ne la huliwa thatraqane la Baselaia! Nge drei la ketre hatrene ka tru, ka amamane la aqane ham ne la itre Temoë i Iehova, itre milio, angetre ‘metötë Iehova hnene la ite nyi angat’! (Ite edomë 3:9) Qa ngöne lai, angatre kö a amamane hnyawa, laka, itretre thupëne hnyawa angatre la itre ewekë i Iehova, ene lo itre manathithi hnei angatre hna kapa qa thei Nyidrë, ngöne la nöjei götran.

Ketre Ewekë Ka Lolo Hna Kuca

¹⁰ Ngöne la macatre 1970 nge qaane lo 1980, hetrenyi la itre ewekë ka tru hna kuca matre troa kökötre me lolo catre la huliwa ne feja itus, nge hna xome hnene la itre Temoë i Iehova la itre aqane troa feja itus, ka hnyipixe. Ame petre kö ekö lo, hnei angatre hna fejane la itre itus jëne lo itre masine hnapan. Saze trootro ju pë hë, uti hë la nyiqaane angatre troa xome la itre aqane troa feja itusi ne la hneijine së, ene la itre imasine ka tru hna huliwane hë enehila. Celë hi matre easë enehila a kapa la itre itusi ka mingöminge pine laka nyimu hane la itre iatr, thaa kolo hmaca kö lo lue hane iatr hmekuj (ka wetrewetr me ketre han) hna fejane ngöne lo itre imasine hnapan. Ketre, saze hë la aqane troa hnëkë (hnëkë troa feja itus), ene laka, jëne ordinatöre pena ha. Hnene la itre Temoë i Iehova hna kuca la ketre porogaram, MEPS la ëjen, a Multilanguage Electronic Phototypesetting System; ketre porogarame ka aijijëne troa acaa tro fejane enehila la itre itusi ngöne la 370 nge hetre munën, lao isa qene hlapa. Pëkö porogarame hna kuca hnene la itre atr ne fen, ka atreine troa wajane la MEPS, ene la troa acaa tro fejane ngöne la nyimu qene hlapa.

¹¹ Jëne la MEPS, memine kö lo itre xaa ewekë hna kuca ka hnyipixe, tune la troa iupi fë ithuemacanyi hnei ordinatör, haawe, atreine hë troa canga kapa hnene la itre atr ngöne la fene hnengödrai, la xeni ngöne la ijine ka ijij. Ame ekö, ngöne la kola huliwane lo itre imasine hnapan, kola hane kapa la itre zonale ngöne la itre xaa qene hlapa, a itre treu maine caa macatre thupene la hna kapa lo qene Papale. Ame enehila, kolo hi a ce kapa la zonal, La Tour de Garde, ngöne 115 lao qene hlapa ka isa pengön, nge 62 lao qene hlapa göi Réveillez-vous! Kolo lai a hape, 95 koi 100 lao atr ka sine la itre icasikeu ne la itre Temoë i Iehova e nöjei wiik, göi troa inine la zonal, La Tour de Garde; caasi hi la itre mekune hna ce wang, nge caasi fe la ijin. Drei lai ketre manathithi ka tru! Eje hi laka, hna jëne la aqane huliwane hnyawa la itre ewekë ne la Joxu, matre kola aijijëne troa kuca la nöjei aqane huliwa ka hnyipixe!

Kola Ajane La Ketre Pengöne Aqane Huliwa

¹² Hna saze hnene la itre aqane feja itusi ka hnyipixe, lo itre aja ne la organizasio ngöne la fene hnengödrai, göi aqane troa elemekene la huliwa ne feja itusi ne la itre Temoë i Iehova e cailo fen. Nyimenyime catre kö la itre masine ka hnyipixe hune lo itre hnapan, ngo eje hi laka, tru catre la thupene itre ej. Maine nyipici laka, nyimutre la itre hna atreine troa kuca enehila jëne ordinatör, göi troa cinyany, me ujë qene hlapa, me kuci iatr, me troa siji tulu ne uma, ngo tru catre kö la thupene itre ej, hune lo itre jiane huliwa hnapan. Qa ngöne lai, kola mama hnyawa laka, thaa nyine loi kö koi organizasio troa fejane pala hi la itre zonale ngöne lo 51 lao nöje ka tru. Haawe, ame hë ngöne la macatre 1990, kola pane wai pengöne hmaca hnene la “ate thupe nyipici” la aqane troa huliwa. Matre nemenë hë la hna axeciën?

¹³ Kola mama hnyawa laka, troa hetre thangane ka loi la aqane huliwane la “ite ewekë ka sisitia” hna hamëne hnene la itre Temoë i Iehova, me itre enehmu i angatr, e hna iacasinekeune la huliwa ne feja itus. Celë hi matre, kola nango acone la etrune la itre bethela ka troa feja itus. Kola fejane enehila hnene la bethela ne Alema la itre zonale me itre itus, thatraqane la itre nöje ka nyimutre ne la götrane ahië, memine la götrane ahuë ne Erop, ene asë hi lo itre nöje ka isa sipu feja itusi ekö. Ame bethela ne Italia, kola feja zonale me itre itusi thatraqane la itre xaa götrane e Afirik, memine la götrane ailojë ne Erop, a kola e fe la nöje Heleni, me Alebania. Ame e Afirik, kolo hi a fejane la itre zonale koi angetre Nizeria memine la götrane ailojë ne Afirik. Ketre tune mina fe ngöne la itre xaa götrane ne la fen, laka, kola hane icasinekeune la huliwa ne feja itus.

Itre Nyine Troa Wange Hnyawa

¹⁴ Ame hë ngöne la treu julai 1998, thaa kolo hmaca fe kö a hane feja itusi ngöne la itre xaa nöje ka tru ne Erop, tune e Autriche, Tchecoslovaquie, Danemark, Faraas, Heleni, Pays-Bas, me Suis. Haawe, ame pë hë la itre nöje ka feja itusi thatraqane e Erop, ke, Agele, Fëlaad, Alema, Italia, Sepania, me Suède. Haawe, kolo hi lai a kuca matre, tro hmekuje hi a goeëne la itre nyipi ewekë, me troa huliwane hnyawa la itre ahnahna thatraqane la huliwa ne cainöje e cailo fen. Pine nemene matre kola axeciëne tune lai, laka, thaa tro pë hë itre xaa nöje a hane feja itus, ngo tro hi la itre xan? Ame ngöne la kola kuca hnene la “ate thupe nyipici” la hnëqa i angeic, ene la troa thupëne hnyawa la itre ewekë ne la Joxu, angeice a wange hnyawa la thangane ka lolo ngöne la nöjei hna feja itus.

¹⁵ Ame la sipu kepine matre thaa hane pë hë feja itusi hnene la itre xaa nöj, ke, hnene laka, hetre thangane ka loi hi la hna huliwa hnene lo lai itre xan. Hetre thangane catre kö e troa caasi hi la nöje ka feja itus thatraqane la itre xan, pine laka, hmaloi nge troa sisitria catre la aqane troa huliwane la itre jiane huliwa ka tru thupen. Kola kuca enehila la itre hnë feja itus, ngöne la itre nöj gaa co thupene mo, nge thaa jole kö e troa xome la itre jiane huliwa, nge pëkö ejolene göi troa iupi fë ewekë. Qa ngöne lai, lolo hnyawa la aqane huliwane la itre ewekë ne la Maseta. Eje hi laka, thaa qa ngöne kö laka, thaa kolo hmaca kö a feja itusi ngöne la ketre nöj, ke, ketre thaa tro fe hë a hane cainöje trootro. Troa nyimutre catre pala hi la itre itusi hna fejan, nge tro pala hi la itre hadredre thauzane itretre Anyipici Iehova ngöne la itre nöje cili a catre cainöjëne kowe la itre ka lapa easenyi angatr, “la maca ka loi ne tingeting.” (Efe. 2:​17) Ketre, hetre thangane ka loi fe la aqane huliwa cili, ngöne la itre xaa götrane aqane mel.

¹⁶ Hanawange la ketre eloine la huliwa cili; hetrenyi la itre imasine ne feja itus, hna iupi fë qaa Danemark, me Heleni, me Pays-Bas, me Suis, a tro Nizeria me Filipin. Hna kapa la itre trejine qa ngöne la itre nöje ne Erop, ka atrepengöne hnyawa la itre imasine cili, troa ce tro memine lai itre imasin, matre troa inine la itre trejine ngöne la nöj, la aqane troa huliwane itre ej. Haawe, kolo fe hë a hane kapa enehila hnene la itre nöje cili la itre zonale ka lolo catr, ceitune hë la eloine la aqane kuca memine lo itre xaa nöj.

¹⁷ Ame la ketre eloine la aqane waiewekë cili, ke, ene laka, ala xalaithe hi la itre nöje ka feja zonal, nge angatre a nyithupene asë la itre zonal. Celë hi matre, ame ngöne lo itre nöje ka thaa feja itusi hmaca kö, kolo pena huliwane lo itre manie hna kapa, maine troa xupi Uma ne Baselaia, me hane xatuane la itre trejine me easë ngöne la itre nöje gaa pë ewekë. Qa ngöne lai, ame la troa huliwane hnyawa la itre ewekë ne la Joxu, kolo lai a hape, ijije fe troa hane eatrëne ngöne la fene hnengödrai la itre trenge ewekë i Paulo koi angetre Korinito, kola hape: “Tha ajane kö ni tro ite xan’a maloe, nge hace nyipunie; loi la munëne i nyipunie ngöne la ijine celë thatraqane la pë ewekë e angat . . . mate cei tune hi.”​—2 Kor. 8:​13, 14.

¹⁸ Qa ngöne la aqane huliwa cili, kolo ha caasi catre enehila la itre Temoë i Iehova ngöne la fene hnengödrai asë. Thaa ngazo kö kowe la itre Temoë ne Danemark, troa fejane la itre zonale i angatre e Alema, ngacama hnei angatre hë hna majemine ketre fejane la itre itusi angatre e cili lo. Angatre pe a olene me madrine la huliwa hna kuca hnene la itre trejine me angatr, ne Alema. Hapeue la itretre anyipici Iehova ne Alema, thaa madrine kö angatre la mekun, ene laka, troa huliwane la itre ahnahna hnei angatre hna hamën, matre troa kuca la itre itusi thatraqai angetre Danemark​—maine Russie, me Ukraine, me itre xaa nöje ju kö? Ohe! Angatre pe a madrine laka, kolo pena huliwane la itre ahnahna hna hamëne hnene la itre trejine ka mele ngöne la itre nöje cili, thatraqane la itre xaa huliwa ka nyipi ewekë pena ha.

Loi e Thupëne Së La Itre Ewekë

¹⁹ Ame ngöne la nöjei Uma ne Baselaia ne la itretre Anyipici Iehova e cailo fen, hetrenyi la keesi nyine ithingë, hna cinyihane ngön, ka hape, “Itre ahnahna thatraqane la huliwa ne cainöje i Sasaiatri e cailo fen​—Mataio 24:14.” Ame la itre ahnahna hna kuiëne hnine lai itre keesi manie cili, tro pë hë a huliwane itre eje ngöne la itre nöje ka aja ixatua. Nemene la aqane troa huliwane la itre ahnahna cili hnene la “ate thupë ewekë” memine la itre wapicine i Sasaiatri ka ce huliwa. Atreine hi troa xome la manie hna amë ngöne la trengene manie ne la ketre nöj, me iupi fë kowe la ketre, a itre thauzane lao kilomet ne enanyine qaa cili, matre nyine troa xatuane la itre trejine ne la götrane cili. Hna xome la itre ahnahna cili matre troa canga xatuane la itre trejine ka akötr, pine la itre janacas, me itre udreli, me itre sa, me itre isi ngöne la itre xaa nöj. Ketre, nyine tro fe a hane xatuane ngöne la itre xaa nöj, lo itre mesinare ngöne la 200 lao nöj.

²⁰ Ame ngöne la itre ekalesia ne la itre Temoë i Iehova, hna majemine e ngöne la treu la hna ithingë hnene la itre trejin, a itre hnepe menetre hi. Pëkö tro fë itrapetre ne hle manie trootro, ngöne la itre Uma ne Baselai, maine ngöne itre ijine Asabele. Pëkö sipo manie thatraqane la ketre atr menu. Ketre pëkö sipo manie pena ha koi ketre me ketre. Caasi hi la hna cinyihane ngöne la macatre hna hamëne ngöne la zonal, La Tour de Garde, ka qeje pengöne kowe la itre ka ajan, la aqane tro angatre a hane sajuëne la huliwa ne cainöj e cailo fen, jëne la itre ahnahna i angatre koi Watch Tower Bible and Tract Society. Thaa hna qaja lapane kö ngöne la zonal, Réveillez-vous! la manie i Sasaiatri. Tuneka kö la aqane eatrëne la huliwa ka tru ne cainöjëne la maca ka loi e cailo fen, me xupi Uma ne Baselaia, me thupëne la itre ka huliwa huti ngöne la hna cainöj, me troa xatuane la itre Keresiano ka aja ixatua? Hnei Iehova hna amanathithine la nöje i Nyidrë jëne la ketre ewekë ka mingöming, ene la troa ham. (2 Kor. 8:2) Eahuni a pane olene kowe la nöjei atr asë ka hamë ahnahna, matre troa hane ‘Atrunyi Iehova hnene la itre ewekë i angatre ka sisitria.’ Loi e troa xecie pala hi koi angatre laka, tro la “ate thupe nyipici,” a thupëne hnyawa la itre ewekë ne la Maseta. Nge easë pala hi a sipone jëne la thith, matre tro Iehova a amanathithine pala hi la itre huliwa hna amekötin, matre troa haöthe hnyawa la fene hnengödrai hnene la huliwa ne cainöje trootro.

[Ithuemacany]