Epi Tro Asë Hi Së a Kuca La Huliwa Hna Nyiqaane Hë
1 Troa isa trotrohnine hnyawa hnene la itretre drei Iesu laka, ka nyipi ewekë catre la itre hna kuca hnei nyidrë, göi troa sajuëne me cainöjëne la Baselaia. Kola qaja amamane hnei Iesu ka hape, tro la itretre drei nyidrë a hamëne la itre wene ne la Baselaia, a isa pengöne la isa etrun. (Mat. 13:23) Ngacama itre pionie pala hi la hne së hna öhne e cainöje ngöne la nöjei drai, ngo kolo fe a olene kowe la nöjei ka catre atrunyi Akötresie, ngöne laka kola wawene la itre huliwa i angatr, thenge la hnei angatre hna atrein.—Ioane 15:8.
2 Troa Eatrëne Hnyawa La Mekun, e Hna Ce Huliwa: Hnei Iesu hna qaja ka hape, tro kö a wawene catre la itre huliwa hna troa kuca hnene la itretre drei nyidrë, hune lo itre hnei nyidrëti hna kuca, pine laka, angatre asë a troa ce huliwa. (Ioane 14:12) Ngacama jole koi së troa akökötrene la itre hawa ne cainöje së, maine atreine pena hi së troa aelëne itre ej, ngo loi e tro asë hi së a kuca la huliwa hna nyiqaane hë. Tune lo hna qaja hnei Paulo ka hape: “Ngönetei asë hna itratraunekeune hnyawa, nge hna itöne hnyawa, hnene la nöjei enone itön’asë, thenge la huliwa ngöne la tulu ne la ite götrane ngönetei, nge kola trujë la ngönetei.”—Efe. 4:16.
3 Ame itre xan, angatre a mekune ka hape, co hi la hnei angatre hna kuca kowe la huliwa. Ngo ame la ka nyipi ewekë catre koi Iehova, ke, loi e tro së a kuca la huliwa hnene la hni ka pexej. Sisitria koi Nyidrë, nge Nyidrëti a kapa madrine la nöjei huliwa asë hne së hna kuca thatraqane la ëje i Nyidrë.—Wange ju la Luka 21:1-4.
4 Catre Pi Troa Cilëgöline La Huliwa: Hnëqa së asë hi troa hamëne la hne së hna hetrenyi thatraqane la huliwa ne cainöj, e cailo fen. Ame itre xan, ijije hi tro angatre a ixatua troa kuca la itre huliwa thatraqane la Baselaia. Atreine asë hi së isa ala caas, troa catre isa hamëne la itre mekune hne së hna hnëkëne hnyawa, ngöne la itre ijine icasikeu, me hane sine la Ini ne Cainöje Trootro Qa Thei Akötresie. Maine tro së a thele ijine troa hane ithuecatre kowe la itre xan, haawe, easë hi lai a hane nyi xaa ecatrene la ekalesia, ngöne la götrane la ua, nge kolo fe lai a hamë ixatua kow, matre troa atreine hnyawa kuca la huliwa hna ahnithe kowe ej.
5 Nyipici laka, kola ajane tro asë hi së a kuca la huliwa. Thatreine pe kö tro ketre a qaja ka hape, thaa nyipi ewekë fe kö koi angeice troa hane kuca la huliwa. Troa wangatrehmekunyi së hnene la itre atr, ka hape, easë hmekuje hi la itretre nyihluei Akötresieti hnyawa, e hne së hna ce huliwa, ngacama tru maine co pena la hne së hna kuca. (Mal. 3:18) Ijije hi tro së isa ala caasi a hane amamane la aja ka tru the së, troa atrunyi Iehova, me hane xatuane la itre xaa atr troa atre Nyidrë me nyihluei Nyidrë.