“Hnëkëne Jë Thatraqane La nöjei Huliwa Ka Loi Asëjëihë”
1 Hna amanathithine enehila la nöje i Iehova, ngöne laka, mana la xeni ne la ua ka lolo hnei angatre hna kapa. (Is. 25:6) Nyimutre la itre mekune hna xome qa hnine la Tusi Hmitrötr, nge madrine troa ce xome itre eje ngöne la ijine kola isa ini tus, maine e hnine la hnepe lapa, me ngöne la itre icasikeu ne la ekalesia, me itre asabele, me itre kovasio. Ngo hapeu, easë kö a sikusikune troa xome la xeni ne ua cili, matre tro së a hane “nyipi meköti me hnëkëne thatraqane la nöjei huliwa ka loi asë”?—2 Tim. 3:17.
2 Pane mekune ju së la xeni ne ua hna hnëkëne thatraqane la macatre 1998, ase hë së nyiqaane xen! Ame ngöne la itre icasikeu ne la ekalesia, kola troa ce wange la itre xaa mekune ka tru qa hnine la 23 lao itus, hna xome qa ngöne la Itre Hna Cinyihane qene Heleni thatraqane la itre keresiano; kola troa ce wange fe la itre ithuemacanyi hnine Auxilliaire pour une meilleure intelligence, göne la aqane melene la 49 la atr, ngöne la hneijine i Tusi Hmitrötr, nge troa xome fe la 138 lao götrane ne la itus, Prédicateurs. Tro hmaca fe së a wange la itus Atrehmekune (thaa tro kö a xome asë, ngo 1/3 la götrane itus nyine troa wang), tro fe së a wange la itus, Madrine Kowe La Fami, memine la itus Parole de Dieu. Ketre, easë a kapa madrine la 12 lao Huliwa ne Baselaia, 52 lao taane nyine inine la Tusi Hmitrötre hnine la itre zonal, La Tour de Garde, nge nyimutre la itre cainöje hna eköthe hune la itre topike ka isa pengön, hna xome qa hnine la Tusi Hmitrötr. Kola nyixane asë lai, hnene la itre porogarame ne asabele, me kovasio. Drei la emanane la itre ewekë ka lolo ngöne la götrane la ua, hna aijijë së troa kapa!
3 Loi e Kapa Madrine Së La Itre Hna Hnëkëne Hnei Iehova: Maine easë a ajane troa kepe thangane hnyawa la itre ewekë cili, haawe, loi e tro së a trotrohnine hnyawa la kepine matre Iehova a hamëne atrune la itre ini ngöne la götrane la ua. Maine tro së a xome la itre ewekë ka loi cili, haawe, tro itre eje a acatrene la lapaune së, memine la aqane imelekeu së me Nyidrë. (1 Tim. 4:6) Ngo eje hi laka, thaa kolo hmekuje kö a hamëne la xeni ne ua, matre troa ini së. Kolo fe a upi së troa hane trofë la nyipici kowe la itre xaa atr, me hnëkë së matre tro së a itretre nyihluei Iehova ka atreine tro fë hnyawa la maca ka loi ne la Baselaia.—2 Tim. 4:5.
4 The wangacone kö së la itre aja ne la hni së ngöne la götrane la ua, ngo loi e ajane pala hi së la xeni ka pipixenyë ngöne la ua, hna hnëkëne thatraqai së hnei Iehova. (Mat. 5:3; 1 Pet. 2:2) Maine easë fe a ajane troa hetre thangane hnyawa la itre ewekë cili ngöne la mele së, loi e tro së a ami ijine thatraqane la itre huliwa ka nyipi ewekë catr, tune la troa isa inine pala hi la Tusi Hmitrötr, me etidi memine la fami, me hane sine la itre icasikeu. (Efe. 5:15, 16) Nyipi lolo la thangane hna kapa qa ngöne la itre huliwa cili, nge kola ihmeku lai, memine ithuecatre qa thene la uati hmitrötr, hna cinyihane hnei Paulo koi angetre heberu, ngöne Heberu 13:20, 21.