Huliwane Hnyawane Jë La Itre Itusi Së
1 Nyimutre catre la itre itusi hna kuca hnene la itre atr ngöne la nöjei nöj, kola e la itre milio hna xeene e cailo fene hnengödrai. Ngo, nemene la itre loi ka cile huti hna kapa hnene la itre atr, jëne la itre itusi cili? (Ate cai. 12:12) Eje hi laka, ka tru alamekene catre kö la itre itusi ka qaja la Baselaia i Akötresie, memine la itre manathithi hna troa hamëne hnene eje kowe la itre atr. Ame ngöne la treu januare, easë a troa tro fë kowe la itre atr la itre itusi ka 192 lao götran, nge kola e fe la itus, Atrehmekune a 150 F la thupen.
2 Nyipi Ewekë Catre Itre Ej: Loi e tro së a mekune pala hi, laka, e hnine la itre itusi cili la nyipici qa hnine la Tusi Hmitrötr. Nge maine hne së hna drenge thenge hnyawa la maca ne Baselaia hna qeje pengöne hnene itre ej, eje hi laka, atreine hi tro sa hetrenyi fe la mel. (Ioane 17:3) Qa ngöne lai, loi e tro së a thele troa catre huliwane hnyawa la itre itusi së. Kola mama laka, ka lolo catre la itus, Atrehmekune, memine la boroshür, Thele, göi troa nyiqaane inine la Tusi Hmitrötre memine la itre atr; haawe, loi e troa wangatrune la lue jiane huliwa cili.
3 Hanawange la thangane ka loi hna kapa hnene la ketre föe ka xome pe la itre itusi Sasaiatri ngöne la kola meci la qaqa i nyidro. Hnene la ketre temoë hna hnyingëne kowe lai föe, maine ase jë fe hë nyidroti hane mekune la enyipiewekëne la itre itus. Önine la föe e sa ka hape: “Thatre hnyawa kö ni la enyipiewekëne itre ej, nge tro ni lai a atrepengöne tuneka?” Haawe, hnene la föe hna mekune ju troa inine la Tusi Hmitrötr, me kapa la nyipici; nge thupene lai, nyidroti a wangatrune hnyawa ceitune me trengamo ka tru aliene la itre itusi ne la qaqa i nyidro. Drei la esisitriane me eloine la trengamo celë, ene la itre itusi ka hekö hna nyipi ewekëne hnyawa!
4 Loi e Troa Hane Hamëne Fe Itre Ej: Maine nyipici laka, hne së hna majemine troa tro fë la itre itusi së ngöne itre hnalapa trootro, ngo thaa tro pi kö së a thëthëhmine ka hape, tro së a hane hamëne itre eje ngöne la easë a wange hmaca la itre atr hne së hna atre ka ajane troa e la itre itusi së, a kowe mina fe lo itre ka abone ngöne la itre zonal, La Tour de Garde, me Réveillez-vous! memine la itre atr hne së hna hamë zonale lapaa kow. Hapeu, hetrenyi fe kö angatre lo itre itus, Atrehmekune, me Bonheur familial, me Le plus grand homme, maine kolo pena lo itre itusi hna xötrei hamëne ngöne lo Kovasio ne Distrik? Thaa tro pi kö së a thëthëhmine laka, nyimutre la itre xaa itus qene faras. Nyipi ewekë troa iëne thatraqane la itre atr ka etidi me easë, la itre itusi hna nyitrepene qa ngöne la atrehmekune ka troa akökötrene hnyawa pala hi la inamacane i angatre kowe la nyipici, tune la itus, Comment raisonner. Loi e troa hetrenyi la itre itus ka paatre ngöne la hna ami itusi së. Qa ngöne lai, tro hë së a xeene hnyawa la itre itusi sasaiatri ka sisitria catr, nge ka troa hetre thangane ka lolo catre koi së ngöne la itre ijine easë a isa inine la Tusi Hmitrötr. Maine easë a ajane troa hetrenyi la itre itusi cili, haawe, komadëne ju itre eje ngöne la uma ne Baselaia.
5 Ame la aja së ke, thaa ene kö la troa xeene la itre itusi së, ngo loi e tro së a huliwane hnyawa itre ej, matre troa upe la itre atr troa “qoue Akötesie me trongëne la itre wathebo i Nyidë.”—Ate cai. 12:13.