Ini Ne Cainöje Qaathei Akötresie Göi Macatre 2000
1 Ketre manathithi ka tru catre la Ini Ne Cainöje Qaathei Akötresie, kowe la nöje i Nyidrë. Kolo ha e la 50 nge hetre munëne lao macatre ne kuca la ini cili; hetre thangane catre ej, pine laka, hna xatuane la itre atr, itre milio la etrun, troa akökötrene la atreine i angatre troa cainöje kowe la nöjei atr, me hane hamëne la nyipici qa hnine la Tusi Hmitrötr. (Sal. 145:10-12; Mat. 28:19, 20) Hapeu, epuni fe a hane öhne la aqane ixatua ne la Ini? Ixatua lai hne së hna troa kapa fe ngöne la macatre 2000, e hne së hna wangatrune ej, me trongëne la itre eamo hna hamën.
2 Ame la itre hna amekötine göi itre xötreqa me itre itusi hna troa xom, ke, hna cinyihane itre eje ngöne la pane götrane ne la porogarame ne ini göi macatre 2000. Hna isa wangatrune hnyawa la traeme hna athipe kowe la itre xötreqa, me itre mekune nyine troa cile fë, me itre xaa ewekë ju kö. Haawe, loi e tro së a thele troa e hnyawa la itre ithuemacanyi hna hamën, me trongëne itre ej.
3 Wiike Ne e Tusi Hmitrötr: Lue porogarame ne e Tusi Hmitrötre thatraqane la wiik, hna hamëne ngöne la porogarame ne ini. Hna hnëkëne la ketre, matre troa e la faifi lao götrane ne la Tusi Hmitrötr, nge troa xomi ini qa ngöne itre ej. Ame koi ketre, ke, nyine nyixan, kösë nango tru catre kö la nyine troa e. Maine tro së a xötrethenge hnyawa la porogarame celë, atreine hi tro sa e asë la Tusi Hmitrötre ngöne la köni macatre. Easë a trotrohnine laka, hetrenyi la itre ka pi ajane troa nyi xane la porogarame cili ke ma ame koi angatre ke co hi; ame itre xane ke, thatreine kö angatre troa eatrëne ke ma tru pala ha. Ame la nyipi ewekë ke, ene la tro së a kuca la hne së hna atrein, ngo thaa tro kö a thele troa inyitipu. (Gal. 6:4) Loi pe tro sa inine troa e pala hi la Wesi Ula i Akötresie ngöne la nöjei drai.—Sal. 1:1-3.
4 Maine epuni a ajane troa hane sine la Ini Ne Cainöje Qaathei Akötresie, loi e tro epuni a ce ithahnatane lai memine la atre thupëne la ini. Loi e troa wangatrune hnyawa la itre xötreqa hna athipe koi së, nge thaa tro kö a qeje ejolene menu troa kuca itre ej, nge pë pe ka sewe së. Nyipi ewekë tro sa wangatrune la ini, ke, ewekë lai hnei Iehova hna hnëkëne koi së. Qa ngöne lai, loi e tro sa hnëkë hnyawa, me thele troa atrepengöne hnyawa la itre xötreqa hna amekötine koi së, me qaja la itre mekune hnene la hni ka pexej, nge eje hi laka, tro hë së a kepe thangane ka loi qa ngöne la ini ka sisitria cili.