Ketre Ini Ka Hnëkë Së Kowe La Itre Huliwa Ka Sisitria Ne La Mel

¹ Kola ini hnene la itre atr matre troa hetrenyi la atrein, göi troa xatua angatr troa eatrën la itre hnei angatr hna ajan thatraqane la mel. Ngo hetre ketre aja kö ka sisitria catr, hune la troa atrun la Atre hamën la mel me troa hane xatuan la itre xan troa inin la itre mekuana me itre jë i Nyidrë? Ohea, pëkö. Ame la kepin matre kola acil la Ini Ne Cainöj Qaathei Akötresie, tre, göne la troa hnëkë së troa hane inine koi itre xan la pengöne la lapaune së. Qa ngöne lai, easë a hane kapa la atrein ka hnëkë së kowe la itre huliwa ka sisitria nyine thatraqane la mel, hnene laka, easë a sin la ini cili ngöne la nöjei wiik.

² Hna kapa hë lo “Porogaram Ne Ini Ne Cainöje Qaathei Akötresie Göi Macatre 2003” ngöne lo sinecetron lo Huliwa Ne Baselaia ne treu hnapan. Kola hane qejepengöne atrun hnene lai porogaram la aqane trongen lai ini. Loi e tro pala hi a xometrongën ej cememine lo itus École du ministère, kowe la Ini Ne Cainöj Qaathei Akötresie ngöne la nöjei wiik. Hanawang la itre xaa hnepe götran ne lai Ini Ne Cainöj Qaathei Akötresie Göi Macatre 2003.

³ Göi Troa Atreine Cainöj: Qaan e treu Januare, troa nyiqaan la nöjei Ini hnene la faifi lao menetre ne troa pane ithanatan la itre mekun göi troa atreine cainöj, maine ketre aqane troa e tus, me ini tus, maine troa hamë ini. Troa cile fë la itre mekune cili nyine nyiqaan la icasikeu, hnene la atre thupën la ini, maine tro pena angeic a ahnithe lai kowe la ketre qatre thup ka maca troa cile fë lai cainöj cili. Troa ithanatan la alien me enyipiewekën la troa atreine cainöj. Tro angeic a qaja anyimutren la itre mekun, me hane hamën la itre ceitun qa hnine la Tusi Hmitrötr, me amamane hnyawa la aqane troa amacane lai atreine cainöj, ngöne la kola tro fë la maca ka loi.

⁴ Hnëqa Naba 1: Troa thuemacan la itre trejin ka troa kuca lai cainöje nyine ini, laka, “troa amamane hnyawa la thangane ka sisitria hna troa kapa qa ngöne la itre mekun hna troa ithanatan.” Kolo lai a hape, troa amaman kowe la ekalesia la aqane troa xome me trongën la ithuemacany. Maine epuni la ka kuca la xötreqa celë, wange ju la götrane 48-9 ne la itus, École du ministère, göne la itre aqane troa hnëkën, me troa wange hnyawa la itre mekun nyine ixatua hna hape, “Ini Nyine Troa Trongën”, hna hamën fene la hna cinyihan hna hape, Index.

⁵ Porogaram Ne e Tusi Hmitrötr: Maine thaa hane ju kö epuni e la Tusi Hmitrötr thenge lo hna hamën ngöne lo porogaram ne ini, haawe, tune kaa matre hane wange pena kowe la macatre celë? Ame lo itre ka xötrethenge lai porogaram, tre, tro angatr a ase e asë la Isisinyikeu Qene Heleni ngöne la pune macatre. Hna qaja ngöne la götrane 10, paragarafe 5 ne la itus École du ministère, la itre manathith hna troa kapa qa ngöne la hna pane nyiqaane e la Isisinyikeu Qene Heleni ngöne la isa porogaram ne e Tusi Hmitrötr.

⁶ Mekun Ka Sisitria Qa Ngön La Itre Meken La Tusi Hmitrötr: Hna amekötin troa treen lao menetr thatraqane la hnëqa celë, pine laka, kola troa hamë mekun hnene la itre atren la icasikeu ngöne la itre meken nyine troa ce wang ngöne la wiik. Loi e thaa tro kö a sasaith la traem hna amekötin, hnene la ka troa kuca la hnëqa cili. Troa cile fë eje ngöne la nöjei wiik, me ngöne fe lo ijine kola revizio hna ce ithanatan. Ame ngöne la epuni a e la itre meken hna ahnith, thele jë la itre mekun ka troa hetre thangane ka loi kowe la etid ne la fami, ngöne la hna cainöje trootro, maine ngöne la aqane mele i epun. Nemen la itre thiina i Iehova ka mama, ngöne la aqane ujë i Nyidrë kowe la itre atr, me kowe la itre nöj? Nemen la hnei epuni hna inin ka acatrene la lapaune i epun, me akökötren la hni ne ole i epun koi Iehova? Hamë mekune jë fe ngöne lo lai meken hna troa e hnene la ka troa kuca la xötreqa N. 2, pine laka, angeice pe hi a troa e la itre xötr ngo thaa kolo hmaca kö a troa hane qeje mekune ngön.

⁷ Hnëqa Naba 2: Ame ngöne la nöjei wiik, troa thele troa e hnyawa kowe la ka ala nyimu hnene la hnainin ka troa kuca la pane xötreqa. Troa nyitrepene lai xötreqa celë hnene la itre mekene la Tusi Hmitrötr hna troa e ngöne la nöjei wiik. Ame pë hë ngöne la nöjei pune treu, tre, troa e la itre xaa hnepe paragaraf ne la zonal La Tour de Garde. Tro la hnainin a e la itre meken hna amekötin, ngo thaa tro hmaca kö a hamë itre mekun nyine nyiqaan, me nyine nyipun, kolo pe hi a troa e. Nge celë hi la ka nyipi ewekë lai, ene la troa thele la aqane troa e hnyawa.—1 Tim. 4:13.

⁸ Hnëqa Naba 3 Me Naba 4: Ame la itre xaa hnëqa, tre, hna nyitrepen hune la itre mekune hna xom qa hnine la itus Comment raisonner; ame itre xan thaa tru menu kö la itre mekun, ame pena itre xan, hna hamëne hi la taan, nge qanyi së pë hë troa thele mekune ngön. Ame koi itre trejin ka troa kuca la itre xötreqa, laka, xalaithe hi la itre mekun hna hamën, maine taan hmekuje hi, haawe, ijine tro hi angatre lai a thele mekun hnine la itre itusi së itre Keresiano, matre troa nyi mekunen la xötreqa i angatr. Ewekë fe lai ka aijijën la itre trejine föe, troa hamëne hnyawa la itre mekun ka ijij, kowe la itre ka dreng la xötreqa.

⁹ Trepen: Tune la hna amamane hë hnine la itus, École du ministère, götrane 45, maine jë tro la atre thupën la ini a amekötin la jëne cainöj. Maine thaa angeice kö hna kuca, haawe, iëne jë la ketre trepen qa hnine la itre mekun hna hamën wengën ngöne la götrane 82. Maine ngöne la nöjei lue treu, tre, kola kuca hnene la ketre trejine föe la xötreqa i angeic, haawe, atreine hi troa kuca asë lai 30 lao jëne cainöj hna amekötin troa huliwan, ngöne la faifi lao macatre. Maine hna iën hnene la itre trejine föe troa kuca la N. 30, ene lo hna sija hna hape, “itre xaa jëne cainöj ka ihmeku memine la nöje i epun,” loi e tro angatr a cinyihane la jëne cainöj hnei angatre hna iën, e hune la pepa (S-89), maine hutröne eje pena. Troa cinyihan hnene la ka thupën la ini, la drai ne kuca hnene la hnainin la xötreqa ngöne la götrane 82 ne la itusi sör, ezine la jëne cainöje hnei angeice hna iën. Ce ijine tro hi nyidrë a kuca lai, memine la kola nyihatren la pepa ne la hnainin, ngöne la götran hna hnëkën thatraqan la itre eamo nyine xatua angeic.

¹⁰ Götran Göi Eamo Nyine Ixatua: Eje e hnine la itusi epuni la götran hna hnëkën thatraqane la eamo nyine ixatua. Kola mama ngöne la götrane 79-81. Qa ngöne lai, nyipi ewekë tro epuni a tro fë la itusi epuni kowe la atre thupën la ini, ngöne la nöjei epuni a ase cile fë la xötreqa i epun. Nyipi ewekë fe troa xom me ketre cinyihan hnene la atre thupën la ini, la itre eamo nyine ixatua hna huliwan hnene la itre hnainin.

¹¹ Revizio Hna Ce Ithanatan: Troa ce ithanatan la revizio ne Ini Ne Cainöj Qaathei Akötresie. Troa acaa kuca thupene la lue treu, nge 30 menetr ne troa kuca. Troa mama pala hi hnine la Huliwa Ne Baselaia la itre hnying thatraqane lai. Maine ame la ijine revizio, tre wiik ne asabele ne sirkoskripsio, maine ijine traqa ne la atre thupën ka iwai trootro, haawe, troa canga kuca la itre xötreqa ne la wiike hnapin ngöne la wiik qëmekene lai, nge ame koi revizio, tre, troa kuca ngöne la wiike thupen.

¹² Itre Xaa Hnë Ini: Ame ngöne la itre ekalesia ka sasaith la 50 lao hnainin, tro la itre qatre thup a wang göi itre xaa hnë ini. “Hna hnëkëne lai thatraqane la itre xötreqa asë, maine pena, göne hi lo N. 3 me 4.” (Tirez profit de l’École du ministère théocratique, g. 285) Kösë kolo lai a mekune lo itre ekalesia gaa tru trejine föe, nge xalaithe hi la itre trahmany troa kuca lo xötreqa Naba 2. Loi e iën hnene la itre qatre thup, la itre trejin ka maca troa ini, matre troa xomiujin la itre xaa hnë ini cili.

¹³ Ka Ixatua Troa Eamo: Tune la hna amamane hë ngöne la porogarame ne Ini Ne Cainöj Qaathei Akötresie, Tro la collège ne la itre qatre thup a iëne la ketre trejine ka ixatua troa eamo matre hamëne caasine la ixatua kowe la itre qatre thup me itre drikona ka kuca lo itre hnëqa Naba 1 me Itre mekune ka tru qa hnine la Tusi Hmitrötr. Loi e troa ketre qatre thupe ka maca troa ihaji, nge hna troa metrötrën hnene la itre xaa qatre thup. Loi e hna eköthe hnyawa la eamo, troa ixatua troa qaja hnyawa la itre mekun, me hamën la itre aqane troa cile fë la ini, me hamëne fe la caas maine lue mekun nyine troa aloin la aqane troa kuca la hnëqa. Thaa nyipi ewekë kö e troa hamë eamo thupen la nöjei kola kuca la itre hnëqa hnene la ketre trejin ka cile fë cainöje lapaa. Ngo loi e troa atrehmekun me trotrohnin hnene la qatre thup ka ixatua, laka, ka loi mina fe troa hane xatuan la itre trejine trahmany ka cile fë cainöje hë kowe la ka alanyim, matre tro angatr a kökötre pala hi ngöne la götrane cili.—1 Tim. 4:15.

¹⁴ Nyine Wangatrun Hnene La Ka Ixatua: Nemene la ka troa xatuane la qatre thup ka ixatua, ngöne la kola waipengöne la hnëqa hna cile fë? Ame ngöne lo itre meken ka nyimutre ne la 53 lao meken la itus École du ministère, tre, kola mama la sipu aliene ngöne la itre mekune hna eköhagen hnaakönin, laka nyipi ewekë tro la qatre thup ka ixatua a wang atrun ej. Loi e troa wang atrune hnene la atre thupën la ini, la itre xaa nyine amekunën, maine itre mekun nyine ixatua hnine la itus, ka troa xatua angeic troa wang atrehmekun la elolon la aqane eköth la xötreqa, memine la aqane cile fë. Hanawang la itre hnying ngöne la götrane 55 memine la itre mekun ngöne la paragaraf tixenuë ne la götrane 163.

¹⁵ Nyialiene Jë La Itre Götrane Pepa Ka Pë Hna Cinyanyin: Hetrenyi la itre xaa götrane pepa hnine la itus École du ministère, hna hnëkën, matre tro së a sija la itre xaa mekun hne së hna xom qa ngöne la easë a isa inin la Tusi Hmitrötr, me ngöne la easë a sin la Ini Ne Cainöj Qaathei Akötresie. (Wange ju götrane 77, 92, 165, 243, 246, me 250.) Thaa tro kö a thëthëhmin troa xometrongën la itusi epun ngöne la nöjei wiik. Xome jë ej ngöne le kola kuca la pane cainöj. Fe pi la itusi epun ngöne la ijine ini. Xome jë la itre mekune nyine ixatua hna hamën hnene la atre thupën la ini. Wange hnyawa ju la aqane hamë ini, me hnying, me itre ceitun, me itre aqane hnaewekë, me itre xaa ewekë ju kö hna xom hnene la itre ka cile fë la itre cainöj. Maine tro epuni a xome la itre mekun, atreine hi tro epuni a mekune hmaca itre ej, me trongën la itre mekune ka sisitria catr hna kapa hnine la ini.

¹⁶ Atre hi Iesu Keriso laka, ketre hnëqa ka tru la troa cainöjën la maca ka loi, nge ijije tro nöjei atr a eatrën. Celë hi hnëqa ka tru lai hnei nyidrë hna kuca. (Mareko 1:38) Hna qaja hnei nyidrë ka hape: “Qânge troa cainöjëne la maca ka loi ne la baselaia i Akötresie kowe la itre xa lapa pena; ke hna upi ni thatraqane lai.” (Luka 4:43) Tune lo itre ka ajan troa xötrethenge nyidrë, easë mina fe a hane catre cainöjën la maca ka loi, me thele pala hi troa akökötren la aqane tro sa hamën la “huje ne atrunyi” Akötresie. (Heb. 13:15) Haawe, catre pi së troa sine pala hi la Ini Ne Cainöj Qaathei Akötresie, ketre ini ka troa xatua së me hnëkë së kowe la itre huliwa ka sisitria ne la mel.