Ini Ne Cainöje Trootro Qaathei Akötresie Göi Macatre 2004
1 Iehova a hamë ixatua kowe la itre atr troa kuca e cailo fen la huliwa ka nyipi ewekë. Ame la ketre aqane ixatua i Nyidrë, tre, hna jëne la ini hna hamën ngöne la nöjei wiik hnine la Ini Ne Cainöje Trootro Qaathei Akötresie. Hapeu, epuni kö a hane sin la huliwa cili ngacama hetrenyi la itre jole ka eje thei epun? Ame ngöne la treu Januare, tre, troa kapa la itre nyine hna saze matre troa xatuan la itre hnainin troa kepe thangane hnyawa la itre hna amekötin.
2 Thupei Ketre Sine Ce Huliwa Tre Ketre Pena: Troa madrin hnene la itre trejin ka kuca la cainöje naba 1 memine lo ka ithanatan la itre mekune ka tru qa hnine la Tusi Hmitrötr, troa kapa la itre emo nyine ixatua hna hamën hnene la sine ce huliwa. Maine nyimu qatre thup ka maca hnine la ekalesia, ma loi e troa isatrën hnei angatr la hnëqa ne troa eamo, isa caa macatre. Eje hi lai laka tro ha ce ithawakeune la huliwa cili; ngo ame kö la enyipi ewekëne lai, tre, ene la troa kepe thangane ka loi hnene la itre qatre thup me itre drikona ka maca la itre ewekë ka nyimu pengön hna melëne hë hnene la itre ka maca hnyawa troa hamë cainöj me hamë ini.
3 Göi Revizio Hna Ce Ithanatan: Maine kola asabele ne sirkoskripsio la ekalesia i epun ngöne lo wiike ne revizio, haawe, loi e troa uthe lai revizio (memine lai itre xaa hna hnëkën) kowe la wiik thupene lai asabele, nge ame pë la porogarame ne lai wiike cili, tre, celë hi la hna troa xome lai ngöne la ijine asabele. Ngo thaa nyipi ewekë kö troa isazene la lue porogaram ne la lue wiik ngöne la kola ihmeku la ijine revizio memine lo kola vizitëne la ekalesia hnene la qatre thup ka iwai trootro. Nyima hmekuje hi me atreine cainöj, me itre mekun ka tru qa hnine la Tusi Hmitrötr, la itre hna troa kuca ngöne la ijine cili. Tro pë hë a kuca la cainöj naba 1 (lo hna majemine hamën thupene la atreine cainöj) ngöne la wiike thupene lai. Troa sisedrëne la itre mekune ka tru qa hnine la Tusi Hmitrötr hnene la 30 menetr Göi Itre Icasikeu Ne La Huliwa, hna troa thawa könin matre troa isa 10 lao menetr maine luetre pena koi isa 15 menetr. (Thaa tro pë hë a kuca la itre ithuemacany.) Troa sisedrën la götrane Göi Itre Icasikeu Ne La Huliwa hnene la nyima memine la porogarame ne la atre thupën la sirkoskripsio, thötre menetr hna troa xom hnei nyidrë. Ame pë hë göi Ini Ne Cainöje Trootro Qaathei Akötresie ngöne la wiike hnapin, tre, troa kuca lo itre hnëqa, ene lo atreine cainöj, me itre mekun ka tru qa hnine la Tusi Hmitrötr, nge troa sisedrëne fe hnene la revizio hna ce ithanatan.
4 Thele jë troa kepe thangan la nöjei ijine matre troa kökötr ngöne la götrane la ua. Ngöne la epuni a kepe thangane ka loi qa ngöne la Ini Ne Cainöje Trootro Qaathei Akötresie, haawe, epuni fe a xatuan la ekalesia, me hane eatrën la itre hna perofetan hnei Tusi Hmitrötr, me atrune la atrekë ewekën lo maca ka mingöming hne së hna tro fë trongën.—Is. 32:3, 4; Hna ama. 9:19.