Hetre Thangane Ka Loi Hne Së Hna Kapa Qa Ngöne La Ini Ne Cainöj Qaathei Akötresie
1 Kola kapa hnene la nöje i Iehova la ketre manathithi ka lolo catr, ene la Ini Ne Cainöj Qaathei Akötresie. (Is. 54:13; Ioane 6:45) Ngo tro sa kepe thangane ka loi qa ngöne la ini cili, e hne së hna catr troa hane sin. Epuni kö a hane atrehmekun la itre eloine la Ini cili ngöne la mele i nyipunie ngöne la götrane la ua?
2 Itre Mekune Ka Lolo: Nyimutre la itretre thupën la itre ini ka qaja ka hape, qa ngöne la hna trotrohnine hnyawa la itre aqane troa atreine cainöj, haawe, kökötre lolo catr la itre ekalesia ngöne la huliwa ne cainöje trootro. Ketre, kola qaja hnene la ketre atre thupën la ini ka hape, hnene lo hna amekötin göi troa hane sa ngöne lo ijine kola ce wang la itre mekun ka tru ne la Tusi Hmitrötr, haawe, ala nyimu la itre ka catre eatrën lo porogaram ne e Tusi Hmitrötr ne la ini. Ame göi Hnëqa N. 2, nyimutre la itre trejine ka qaja la itre thangane ka loi hnei angatr hna kapa qa ngöne la hna hnëkëne la itre hnepe mekune nyine troa e, nge thaa hna hnëkëne fe kö la itre mekune nyine nyiqaan me nyine nyipun. Ame koi itre ka kuca la hnëqa cili, angatre a catre thele troa kökötre lolo la aqane tro angatr a e.—1 Tim. 4:13.
3 Tro Asë Hi Së a Kepe Thangan Ka Loi: Ketre madrine ka tru la troa qeje mekun ngöne la itre ijine icasikeu. (Ite edomë 15:23) Qa ngöne laka easë a canga kapa la itre hnying göi revizio hna ce ithanatan, haawe, kola aijijë së troa canga hnëkën me troa hane qeje mekun. Ketre, hna ithanatan hnine la zonal La Tour de Garde ne 1 Januare 2004, la itre mekune ka qejepengön la itre xaa xötr hna amekötin tro sa e ngöne la Ini Ne Cainöj Qaathei Akötresie. Itre mekune lai ka xatuan la ka ala nyimu troa hamën la itre mekun ka ithuecatr ngöne la ijine kola cilë fë lo itre mekun ka tru ne la Tusi Hmitrötr.
4 Ame asë hi la itre ka saen kowe la ini, angatr asë hi a madrin troa hnëkë me kuca la itre xötre qa. Tro asë hi së a kepe thangane ka loi qa ngöne la itre eamo ka lolo hna troa hamën koi së hnene la atre thupën la ini. Ketre tro mina fe a kepe thangane hnene la itre hnainin la itre mekun hna troa isa hamë angatr hnene la atre thupën la ini thupene la hna icasikeu. Troa ithanatan lo itre qa ka amexeje hmaca lo itre aqane atreine cainöj, itre eje ngöne la pune la nöjei meken ne la itus, Tirez profit de l’École du ministère théocratique.
5 Ame ngöne la kola amamane hnyawa koi epuni la itre mekune nyine trongën me itre xötr qa hnine la Tusi Hmitrötr ngöne la ijine ini, cinyihane ju itre ej hnine la sipu itusi epun, ene la itus École du ministère. Mekune hnyawa ju la itre hnei epuni hna inin, nge wange ju la aqane tro la ini celë qaathei Akötresie a hane xatua epuni troa kökötre lolo ngöne la götrane la ua.