Itre Atre Thupe a Elemekene La Huliwa—Atre Thupëne La Ini Göi Huliwa Ne Cainöj Qa Thei Akötresie
1 Nyipi ewekë tro së a atrune me ce huliwa memine la atre thupëne la Ini Ne Cainöje Trootro Qa Thei Akötresie, pine laka, nyidrëti la ketre atr ka macaje ngöne la ua nge ka catre huliwa kowe la ekalesia ngöne la götrane la ua, me qaja la wesi ula, me hamëne la itre ini ka lolo koi së. (1 Tim. 5:17) Nemene la itre hnëqa i angeic?
2 Angeice la ka thupëne la ume itus thatraqane la Ini Ne Cainöje Trootro Qa Thei Akötresie, e hnine la Uma ne Baselaia. Angeice fe a wangatrune me xatuane la itre atrene la ekalesia ka ijije hë troa hane nyiqaane kuca la itre hnëqa ngöne la Ini. Angeice fe a canga goeëne hnyawa la porogaram, köni wiike qëmekene tro la itre ka troa kuca la itre hnëqa a cile fë la itre xötreqa hnei angatre hna hnëkën. Nyipi ewekë tro angeice a atrepengöne hnyawa la ekalesia, me isa waipengöne hnyawa la itre hnainin, memine la itre hnei angatre hna isa atreine kuca. Ngacama loi e troa ce huliwa me angeice hnene la ketre trejin, matre troa hnëkëne la porogarame ne Ini, ngo qane la qatre thupe troa goeëne hnyawa la itre hnëqa me itre hna troa athipi qa kow.
3 Nyipi ewekë troa hnëkëne hnyawa hnene la atre thupe ngöne la nöjei wiik, la itre mekune hna troa ithahnatane ngöne la itre xötreqa, matre atreine troa hamëne hnyawa la ini ngöne la ijine icasikeu. Kola aijijë angeice fe troa xatuane la ekalesia matre hetrenyi la madrine troa atrepengöne la itre atrene la Tusi Hmitrötr, nge troa atrehmekune maine hna xome hnyawa la itre mekune nyine troa ithahnatan, me amamane hnyawa fe la itre ini ka sisitria hna troa ce xome hmaca ngöne la ijine kola troa revizio.
4 Maine tro la atre thupe a drenge hnyawa la cainöje ne la nöjei hnainin, tro hë angeice a qaja aloini angatr, me atreine qeje pengöne la eloine la cainöj, maine amexeje pena la kepine matre nyipi ewekë troa aloine ej. Maine kola aja ixatua hnene la ketre atr matre troa ce hnëkëne me angeice la hnëqa hna athipe koi angeic, haawe, atreine hi tro la atre thupe maine ketre trejine pena hnei angeice hna iën, a hamëne la ixatua ka ijij.
5 Maine easë a ajane troa kepe thangane hnyawa qa ngöne la huliwa hna catre kuca hnene la atre thupëne la Ini Ne Cainöje Trotro Qa Thei Akötresie me itre xaa ka ce huliwa me angeic, haawe, loi e tro së a sine pala hi la Ini. Loi e tro mina fe së a eatrëne asë la itre hnëqa hna athipe koi së, me trongëne la itre ixatua hna hamëne koi së me kowe fe la itre xaa hnainin. Haawe, tro hë së a kökötre hnyawa ngöne la aqane tro së a tro fë la maca ne Baselaia, kowe la ka ala nyim, me ngöne itre hnalapa trootro.—Ite Huliwa 20:20; 1 Tim. 4:13, 15.