Manathithi Hna Troa Kapa Qa Ngöne La Ini Ne Cainöje Qa Thei Akötresie Göi Macatre 1999
1 Iesu la ketre Joxu atre Ini. Hnene la itre atr hna “haine la ini nyidë.” (Mareko 1:22) Ngacama pëkö ala caasi e easë, ka atreine troa cainöje me hamë ini tui Iesu, ngo ijije hi tro së a catre troa xötrethenge la tulu i nyidrë. (Ite Huliwa 4:13) Qa ngöne lai, tro hë la aqane hane sine së la Ini Ne Cainöje Qa Thei Akötresie a xatua së troa maca hnyawa ngöne la aqane tro së a cainöje me hamëne la ini.
2 Ame ngöne la macatre 1999, troa nyitrepene la hnëqa Na. 1 ngöne la itre hna cinyihane e hnine la itre zonal, La Tour de Garde me Réveillez-vous! macatre 1997. Maine tro së a canga e la ithuemacanyi cili, nge thupene lai, easë a drenge eje ngöne la ijine icasikeu thatraqane la ini, haawe, tro ha kökötre hnyawa la aqane trotrohnine së la itre mekune ngöne la götrane la ua. Loi e tro la itre trejine ka troa kuca la cainöje cili, a thele la itre mekune ka ijije troa ithahnatane matre troa kepe thangane lai ini, nge loi e tro mina fe a cile fë hnyawa la cainöje matre hetre ajane la itre atr troa dreng. Ame la hnëqa Na. 3, troa nyitrepene eje ngöne la itus, hna hape, Madrine kowe la Fami, nge ame Na. 4 ke, troa xome la ketre atr qa hnine la Tusi Hmitrötr; ame itre xaa ijine ke, troa ithöeëne la lue hnëqa cili. Loi e troa goeëne hnyawa hnene la atre thupëne la Ini, la itre mekune nyine troa ithahnatan, qëmekene troa isa athipi qane la itre ka xome lai itre hnëqa. Loi e tro asë hi la itre ka kuca la itre hnëqa hna nyitrepene ngöne la itus, hna hape, Madrine kowe la Fami, a itre tulu ka loi ngöne la aqane mele angatre hnine la hnepe lapa.
3 Trongëne Jë La Itre Eamo, Nge Hnëkë Hnyawa Jë: Ijije hi tro së isa ala caasi a isa kökötre ngöne la aqane troa cainöje me hamëne hnyawa la ini. (1 Tim. 4:13) Qa ngöne lai, loi e tro së a thele ixatua, nge thaa tro pi kö a xele ma drenge la ihaji. (Ite edomë 12:15; 19:20) Ame la troa amamane hnyawa la nyipici ngöne la itre ijine icasikeu me ngöne la hna cainöje trootro, ke, thaa ene hmekuje kö la troa edromëne la ketre ewekë, maine troa e nyimenyimëne pena la ketre xötre qa hnine la Tusi Hmitrötr. Nyipi ewekë tro së a ketr la hni ne la itre atr, me ahlëne la aja i angetre drei së troa trongëne la itre ini hne së hna hamën. Atreine hi troa eatrëne hne së la mekune cili, e hne së hna qaja la nyipici hnene la hni së ka ajan. (Wange ju la Ite Huliwa 2:37.) Ijije hi tro sa traqa kowe la mekune cili, jëne la itre ixatua hne së hna troa kapa ngöne la ijine kola icasikeu göi Ini.
4 Ame ngöne la epuni a kapa la xötreqa i epun, loi e troa canga mekune la ini nyine troa huliwan; itre ini lai hna qeje pengöne hnyawa ngöne la itus, Manuel pour l’École. Wange ju la ka nyipi ewekë troa kuca, matre troa trongëne la pane ixatua hnei epuni hna kapa. Mekune hnyawa ju la taan la xötreqa, me götrane hna cainöj hna troa ithahnatane ngön, memine la aqane tro epuni a xomi ini qa ngöne la itre xötre ka eje ngöne la hnëqa i epun. Mekune ju la aqane troa xome hnyawa la ithuemacany, matre troa hamëne la ini, me xatuane la itre atr.—1 Tim. 4:15, 16.
5 Maine epuni a qoue troa hane hetre hnëqa, thithi fë jë lai aja ka eje thei epun, nge ce ithahnatane jë la mekune i epuni memine la atre thupëne la ini. Maine tro së isa ala caasi a isa thele troa wangatrune me trongëne hnyawa la porogarame hna hnëkëne thatraqane la Ini Ne Cainöje Qa thei Akötresie ne macatre 1999, haawe, tro fe hë së a hane kapa la itre manathithi qa ngön.