Aqane Troa Saene Kowe La Ini Ne Cainöje Trootro Qa Thei Akötresie
1 Hna kuca la Ini ne cainöje trootro qa thei Akötresie nyine troa hnëkëne la itre Temoë i Iehova a itre milio, troa itretre tro fë hnyawa la maca ka loi. Mekune hi së lo easë a hane xötrei kuca la pane xötreqa së, laka, hetrenyi la xou, nge thatreine hnyawa kö së kuca la hnëqa, ngo enehila, easë a olene atraqatre la eloine la ini cili ngöne la aqane kökötre së ngöne la ua, laka, itre ka cainöje hë së me ka inine la wesiula i Akötresie. (Wange ju la Ite Huliwa 4:13.) Hapeu hane fe kö epuni saene kowe la ini ka sistria celë?
2 Drei la ka ijije troa hane saene kowe la Ini cili? Kola sa hnene la itus Organisés pour bien remplir notre ministère, götrane 73: “Ijije hi troa hane saene la itre atr ka ce mele memine la ekalesia, ketre tune fe la itre ka xötrei hane nyiqaane sine la itre icasikeu, ngo tro pe angatre a mele thenge la itre trepene meköti ne la Tusi Hmitrötr.” Eahuni a hëne asë la nöjei ka ijiji hë—itre trahmany, me itre föe, me itre nekönatr—troa wange la atre thupëne la Ini me sipone troa hane saen.
3 Porogarame Ne Ini Koi Macatre 1997: Kola troa amamane ngöne la porogarame ne la Ini ne cainöje trootro qa thei Akötresie thatraqane la macatre 1997, la emanane la itre ini qa hnine la Tusi Hmitrötr memine la mele ne la itre atrene ej, ketre tune mina fe la isitoare ne la organizasio. Nge thaa easë hmekuje kö a thele troa maca la aqane troa cainöj me atreine hamëne la itre ini, ngo tro fe së a hane kapa la itre trengamo ngöne la ua jëne la porogarame ne ini hna hamëne e nöjei wiik. (Ite Edo. 9:9) Maine tro së a hnëkë kowe la Ini, ene la troa e lapaane la Tusi Hmitrötr e nöjei wiik, me sine pala hi la itre icasikeu, atreine hi tro së a kapa la ketre manathithi ka tru ngöne la ua jëne la porogaram.
4 Ame e macatre 1997, thaa tro hmaca kö a qea la xötreqa Na. 2, ene lo e Tusi Hmitrötr, tune lo itre xaa macatre. Ngöne la kola hnëkë kowe la xötreqa cili, loi e tro la hna inine a wai traemene hnyawa la aqane tro angeice a e la itre xötr, me thele la aqane tro angeice a huliwane lo lai faifi lao menetre hna amekötin, göi troa nyiqaane me nyipun. Tro hë aijijëne la hna inine troa kuca apexejene la traeme i angeic, me troa huliwane la atreine troa e me troa ithahnata ngo thaa tro hmaca kö a goeë pepa.—1 Tim. 4:13.
5 Ijije fe hë troa hane kuca la xötreqa Na. 3 ngöne la kola cainöje trootro ngöne la nöjei ijin, hnëqa lai hna troa eköthe hune la itus Connaissance. E cili, tro la trejine föe ka kuca la xötreqa a iëne maine troa iwai hmaca, troa etid, maine troa cainöje ngöne la nöjei ijin. Ngo eje hi laka, ame la ka nyipi ewekë catre pala hi, ke, thaa ene kö la aqane troa kuca, ngo loi pe troa kepe thangane ka loi qa ngöne la itre ini.
6 Maine epuni a troa kuca la xötreqa Na. 1, ene la cainöje nyine ini, maine itre mekune ka tru qa hnine la Tusi Hmitrötr, maine ketre xötreqa pena thatraqane la itre hna inin, loi e tro epuni a amamane la ole i epuni kowe la Ini ne cainöje trootro qa thei Akötresie, ene la troa hnëkë hnyawa matre loi e troa anyimua e la xötreqa, maine hnene la troa amamane eje cememine la lapaune memine la madrin, maine hnene la troa neëne troa sasaithe la hawa hna amekötin, me hnene la troa drenge me trongëne la eamo ne la atre thupëne la Ini, memine fe la troa inine troa catre aeatrëne hnyawa pala hi la hnëqa i epun. Eje hi laka, thaa epuni caasi kö la ka kepe thangane ka loi qa ngöne la hnei epuni hna hane sine la Ini, ngo angatre asë fe angetre hane sine la icasikeu.