Troa Cainöje Tune Kaa Kowe La Itre Wanaithihlë?
1 Hna qaja kowe la ketre mesinare e Afrik, hnene la ketre föe ne Pologne ka professeur, ka hape, “Thaa ka lapaune kö ni koi Akötresie.” Ngo thaa hna sawa kö la söre troa porotrike me nyidro, me hamëne la itus, La vie: comment est-elle apparue? Évolution ou création? Hna bëeke hmaca hnene la söre ngöne la wiike thupen, nge hna qaja koi nyidro hnene la professeur ka hape: “Eni hë a hane lapaune koi Akötresie!” Hnei nyidroti hna e asë la itus, Création, nge enehila kola ajane troa hane inine la Tusi Hmitrötr. Nemene la aqane troa cainöje kowe la itre wanaithihlë, ene lo itre atr ka pë Akötresieti kö ngöne la mele i angatr? Ame la ewekë hnapan, troa wange la itre kepine matre kola mele tune lai la itre atr cili.
2 Itre Ewekë Ka Sajuëne La Pë Lapaun: Thaa hna hiane kö lo itre atr matre tro angatre asë a wanaithihlë. Nyimutre la itre ka hane saene kowe la itre hmi, nge hnei angatre hna hane lapaune koi Akötresie. Ngo traqa pi hi la ketre meci ka tru, maine ketre jole e hnine la hnepe lapa, maine ketre ewekë ka thaa meköti kö, ene pe nanazije ju hi la lapaune i angatr. Ame koi itre xane ke, kola athixötrëne la mekune i angatre göi Akötresie, hnene la itre ini hnei angatre hna kapa ngöne la itre hna ini ka tru. Hanawange cahu itre tulu qaathene la itre atr ka wanaithihlë ekö, ngo ame hë thupene ke, hna hane akökötrene la lapaune i angatre koi Iehova Akötresie, ene pe angatre hë a hane anyipici Nyidrë.
3 Hetrenyi la ketre föe ne Paris ka meci ne ijun, qaane la kola hnaho eahlo. Ngacama hna bapataiso eahlo ngöne la hmi katolik, ngo öni eahlo ka hape, thaa ka lapaune kö eahlo koi Akötresie. Hnei eahlo hna hnyingëne kowe la itre söre katolik, la kepine matre Akötresieti a nue troa hnaho eahlo fë la akötre cili; öni angatre ka hape: “Pine laka Nyidrëti a hnimi nyipo.” Thatreine kö nyidroti troa kapa la mekune hmo cili. Hetrenyi mina fe la ketre thöthi ne Finlande ka ti ikaatre pë hë, pine laka, kola meci fë non, nge pëkö nyin. Ene pe hna tro sai nyëne jë kowe la ketre trahmanyi ka hmi Pentecôtiste; ka hlemu nyidrë, ke, hape lai ka aloine la itre atr. Ngo pë pi kö iamamanyikeu koi nyën. Celë hi matre, paatre pi hi la lapaune ne la nekö trahmanyi koi Akötresie.
4 Hna hetrune la ketre trahmanyi ngöne la hmi katolik, ngo hnei angeice hna inine la philosophie socialiste, memine la itre ini, ene laka, pëkö Akotresie. Ketre, hetrenyi fe hë la mejiune i angeice kowe la itre ini hna hamëne ngöne université, ene laka, thaa hna xupe kö la itre atr, ngo ka traqa xane angatr; paatre ju hi la lapaune i angeice koi Akötresie. Ketre tune mina fe la ketre föe ne États-Unis hna hiane ngöne la hmi Méthodiste. Hnei nyidroti hna inine la Psychologie ngöne la ketre Université. Nemene la thangane lai kowe la lapaune i nyidro? Öni nyidroti ka hape: “Itre hnepe ijine ini hi, nge kola lepe trije la lapaunenge kowe la hmi.”
5 Loi e Troa Ketr La Hni Ne La Itre Atr Ka Hni Ka Ajan: Nyimutre la itre atr ka qaja ka hape, thaa ka lapaune kö angatre koi Akötresie, ngo troa madrine hnei angatre troa atre laka, hetre nyin la itre jol, tune la itre mec, me isazikeu hnine la hnepe lapa, me itre aqane ujë ka thaa meköti kö, me itre xane ju kö. Hetre hni ne ajane thei angatre troa atre la itre mekune ka sa la itre hnyinge celë, hna hape: ‘Pine nemene matre hetrenyi jë la ngazo?’ ‘Pine nemene matre kola traqa la itre ewekë ka ngazo kowe la itre atr ka thiina ka loi?’ nge ‘Nemene la sipu aliene la mel?’
6 Hna hetrune la lue trefëne ka mele e Suisse, ngöne la itre fami ka wanaithihlë. Thaa hnei nyidroti kö hna kapa la nyipici, ngöne la xötrei. Ene pe hna traqa la itre jole ka tru hnine la fami, nge kolo ha nyiqaane qeje sei hna cile hnei nyidro. Ngo hna wai nyidroti hmaca hnene la lue trefëne ka cainöje me amamane koi nyidro la aqane troa cile kowe la itre jol jëne la Tusi Hmitrötr. Kola haine hnene la lue trefëne la itre eamo ka lolo, ene pe hane ju fe nyidroti ajane troa inine la Tusi Hmitrötr. Thaa luuzi ju kö la faipoipo i nyidro, ngo kolo pë hë a kökötre ngöne la götrane la ua, me hane xome la bapataiso.
7 Nemene La Nyine Troa Qaja Kowe La Atr Ka Pëkö Akötresie Ngöne La Mele i Angeic: Loi e tro së a thele la kepine matre qaja jë hnene la ketre atr ka hape, pëkö Akötresie ngöne la mele i angeic. Hapeu, thaa hnene jë kö la aqane ini angeic, me itre jole ka traqa koi angeic, maine aqane mele thoi ne la hmi me itre ini ka thoi hna öhne hnei angeic? Hnyingëne jë ka hape: “Hapeue la paatre Akötresie ngöne la mele i epun, ka qaane kö ekö?” maine “Nemene la kepine matre paatre kö Akötresie ngöne la mele i epun?” Atreine hi troa xatua së troa sa thenge la mekune hnei angeice hna troa hamën. Maine kola sipo ixatua ka tru, haawe, tupathe jë troa xome la itus, Y a-t- il un Créateur qui se soucie de vous?
8 Maine jë tro epuni a sisedrëne la porotrike memine la atr ka pëkö Akötresie ngöne la mele i angeic, me qaja ka hape:
◼ “Hane kö epuni hnyinge ka hape: ‘Maine hetre Akötresie, pine nemene matre tru catre la akötr, me ngazo ngöne la fen?’ [Nue pi troa sa.] Ijije kö tro ni a amamane koi nyipë la hna qaja hnei Tusi Hmitrötr?” E jë la Ieremia 10:23. Thupene la hna e, hnyingëne jë la mekune i angeic ngöne lai xötr. Thupene lai, amamane ju la boroshür, Connaîtrons-nous un jour un monde sans guerre? g. 16 me g. 17. Maine pena, troa xome la mekene 10 ngöne la itus Créateur. Xatua angeice jë troa kapa la itus me e lai mekun.—Xome jë la itus Comment raisonner, götrane 150-1, matre troa nyixane la itre mekun.
9 Eje hi laka, thaa tro jë kö la nöjei wanaithihlë asë a kapa la nyipici. Ngo nyimutre la itre ka ajane troa hane atrepengöne la itre xaa aqane waiewekë. Qa ngöne lai, loi e troa maca la aqane waiewekë, me thele troa acatrene la mekune thei angatr, nge e hune la nöjei ewekë asë cili, tro la mene ne la Wesi Ula i Akötresie a fe gojenyi angatre kowe la nyipici.—Ite Huliwa 28:23, 24; Heb. 4:12.