Tro Ha Mele Pe La Nöjei Atr Asë
1. Nemene la ewekë ka aijijë së troa hlemu loi xajawa i Akötresie?
1 Hna fe gojenyi kowe la mel, hnene la ihnimi gufa i Akötresie. Drei lai aja i Iehova, ene la tro asë hi la “nöjei ate asëjëihë [a] mele me wangate hmekune la nyipici.” (1 Tim. 2:3, 4) Ame la hlemu loi së xajawai Akötresie, tre, thaa qa ngöne kö la hane ngönetrei së, maine hnëqa së ngöne la nöj, maine atreine së, maine qëmeke së pena, ngo qa ngöne pe la aqane lapaune së kowe la mele hna huujën hnei Iesu. (Ioane 3:16, 36) Loi e tro së itre ka huliwa i Akötresie a lepe trije la imekuhni; ketre ewekë la ka uku së troa xelene la itre atr hna kapa hnyawa hnei Iehova.
2, 3. Nemene la ka xatua së matre thaa tro kö së a mekuhnine la itre atr hnene la ketre pengöne kö la iqëmeke i ngönetrei i angatr?
2 The Tro Kö Sa Imekuhni: Iehova a goeëne la ewekë ka eje e kuhu hni ne la itre atr, laka, pëkö mele thoi maine iwangatrehmekunyi atr. (1 Sam. 16:7) Nyidrëti mina fe a goeën la itre ewekë hnei angatr hna atreine troa kuca. Qa ngöne lai, Nyidrëti a wangatrun la itre atr ka ajan troa amadrinë Nyidrë, ceitu me itre atr hna piin hnei Nyidrë. (Hag. 2:7) Easë kö a hane goeën la itre xaa atr ceitu me aqane goeë angatr hnei Akötresi së?
3 Hetrenyi la itre xaa atr hne së iöhnyi memine ngöne la hna cainöje trootro, maine jë troa nango ajolë së hnene la iqëmeke i angatr. Maine jë hnene la aqane heetre i angatr, thaa ka porope kö, maine pena tre ngazo la aqane heetr; ame itre xan, maine jë thaa ka icinyi hnyawa jë kö, maine ka ami iangane hnafiji pena. Ame itre xan, tre, itre ka pë hnalapane angatr. Itre xan, ka calogitre troa ithanata koi së. Thaa loi kö e troa mekuhnine la itre atr me mekun, ka hape, thaa tro jë kö angatre a hane nyihlue i Iehova, loi e tro pe së a goeëne aloi angatr, “ke ite hmo shë ekö, me ite ka tha idei, me ite hna iaön.” (Tito 3:3) Maine tro sa ujë tune lai, canga tro hi sa cainöje kowe la itre atr asë, ngacama ketre pengöne la iqëmeke i angatr, nge kola mama laka ma thaa itre ka hni ka ijije kö koi Akötresie.
4, 5. Nemene la itre ini hne së hna xome qa ngöne la lue tulu i Iesu me Paulo?
4 Itre Tulu Ekö Ngöne La Hneijine i Iesu: Hnei Iesu Keriso hna thele troa xatuan lo itre atr kola mama laka, ma thaa ka tro kö a hane nyihlue i Akötresie. (Luka 8:26-39) Maine nyipici laka thaa hnei nyidrëti kö hna thinge la lue meke i nyidrë ngöne la itre ewekë ka ngazo hna kuca hnene la itre atr, ngo atre hi nyidrë laka, troa thapa la mele i angatr hnene la itre ewekë ka ngazo. (Luka 7:37, 38, 44-48) Qa ngöne lai, hnei nyidrë hna trotrohni angatr, ene pe hna “utipi angat, ke cei tui angate memine la ite mamoe ka pa ate thupën.” (Mar. 6:34) Ijije kö tro sa hane xötrethenge hnyawa la tulu i nyidrë?
5 Hna tranyi Paulo aposetolo, me lepi nyidrë me akalabusi nyidrë. (Ite hu. 14:19; 16:22, 23) Hapeu, hna thele troa iatëkeun hnei nyidrë lai itre ewekë hna kuca koi nyidrë, me mekune ka hape kola aluuzi traem e troa cainöj kowe la itre xaa nöj memine la itre xaa qene hlapa? Ohea. Atre hi nyidrë laka, ijije hi troa öhne la itre atr ka hetre hni ka menyik thene la itre atr e hnine la nöjei qene hlapa asë, nge hnei nyidrëti hna catre thele angatr. Hapeu, celë kö la aqane goeëne së lai la itre atr ngöne la itre götran hne së hna cainöje ngön, ene lo itre atr ne la itre nöjei nöj nge ka isapengöne aqane mel?
6. Nemene la thangane la aqane ujë së thene la itre atr ka xötrei traqa troa hane sin la itre icasikeu ne la ekalesia?
6 Troa Kapa La Itre Xan Enehila: Nyimutre e hnine la nöjei i Akötresie ka madrin laka hna kepe angatre hnyawa ekö hnine la ekalesia, hnene la itre trejine trahmanyi me föe ka thaa cile kö ngöne la hna goeën hnei lue mek. Hna traqa ngöne la ketre ijin hnine la Uma Ne Baselaia e Alema, la ketre thupëtresij ka tru ienaj, nge qeadridri la ihnaihe i nyidrë nge dro la hnaheetr. Ketre atr hna atre hnyawa a ka ngazo la thiina. Ngo keukawa catr la aqane kepe nyidrë ngöne la ijine icasikeu. Hna ketri nyidrë hnene la aqane ujë ne la itre trejin, ene pe hnei nyidrëti hmaca hna bëeke ngöne la wiike thupen. Thaa qea kö nge nyidrëti hë a nyihnyawane la ngönetrei i nyidrë, ase fe hë triji sixa me cile memine la sine ce elo i nyidrë ngöne mus. Ame hë enehila, nyidroti hë me haa nekö i nyidro a hane nyihlue i Iehova, caasi hë angatr fami.
7. Tune kaa la aqane tro sa xötrethenge la tulu ne la Akötresi së ka thaa iwangatrehmekunyi atre kö?
7 Epi tro sa catre xötrethenge la tulu ne la Akötresi së ka thaa iwangatrehmekunyi atr, hnene la troa könëne fe la itre xaa atr matre tro angatr a hane kepe thangane la ihnimi gufa i Akötresie.
[Iatr ne la götran 3]
“Tha hnei Akötesieti hna iwangate hmekunyine ite ate, ngo hna kapa hnei nyidëti la ate qoue nyidë me kuca la thina ka meköt, ngöne la nöjei nöj’ asë.”—Ite Huliwa 10:34, 35.