Amamane Jë La Ihnimi Së Koi Itre Xan—Ene La Troa Menyik
1 Hna qaja hnene la ketre föe ka xele ma wang la itre Temoë i Iehova, ngo kola mekune hmaca pe la xötrei iöhnyi eahlo me ketre e angatr, öni eahlo: “Thaa nyipi mama kö koi ni la hnei nyiho hna ithanatan, ngo ame la ka mama cile koi ni, tre, ene la thiina ka menyike i nyiidro, me aqane kepe hnyawa ni, me hni ka ipië thei nyiidro. Hnene laka lolo la thiina i nyiidro koi ni matre eni a easenyi nyiidro.” Kola amamane hnene la itre mekune celë la enyipiewekëne la troa amamane la ihnimi së kowe la itre hne së hna cainöje kow.—Fil. 2:4.
2 Ihnim La Atr Ka Menyik: Ame la ketre jëne troa amamane la ihnimi së koi itre xan, tre, ene la troa menyik. (1 Kor. 13:4) Ame la atr ka menyik, tre, ka atreine wangatrune la aja ne la itre xan, nge ka thele troa kuca la loi koi angatr. Eje hi laka, kola thue loine la atr la huliwa ne cainöj. Ngo thaa tro kö a mama hmekuje ngöne la easa cainöj kowe la itre atr, ka hape, ka tru angatr koi së. Tro la aqane ujë së kowe la itre at—ene la elolone la thiina së, me metrötre së, me aqane drei angatre hne së, me itre mekune hne së hna qaja, me aqane qaja së itre ej, memine fe la iqëmeke së—a amamane la etru i angatr koi së.—Mat. 8:2, 3.
3 Tro fe la ihnimi së me aqane hnehengazo së la itre atr a upi së troa hamëne la ixatua ka ijij. Ame ngöne la kola cainöje ngöne itre hnalapa trootro, hna helën la ketre trejine trahmanyi hnene la ketre sine föe ka qatre föe hë, ngöne la eahlo a atre ka hape Temoë i Iehova angeic. Eahlo a qaja koi angeice ka hape, eahlo a cil hune la ija me thele troa nyihnane la laam, ngöne la kola fenafena la qëhnelö. Önine jë hi la trejine ka hape: “Thaa loi kö tro eapo a kuca caasine lai, wanga eatre jë eapo.” Eahlo a könë angeice jë. Ame la angeic a ase sazene la laam, angeic a tro hmaca jë. Thaa qea ju kö thupen, nge kola traqa wange lai föe hnene la nekö i eahlo trahmany, nge eahlo a qaja asë jë la aqane trongene la itre ewekë. Haawe, hnene laka hnei angeice hna haine la aqane ujë ne lai trejin, angeice a ajane troa iöhnyi memin matre troa qaja la ole i angeic. Matre celë hi ka aijijëne lai atr troa porotrikë tus memine la trejin, ene pe hane jë fe angeice kapa troa inine la Tusi Hmitrötr.
4 Maine easa thiina ka menyik, easa lai a amamane la aqane hnime Iehova la itre atr, nge easë fe a amingömingöne la maca ne la Baselaia. Qa ngöne lai, epi tro pala hi sa “amamai së kö ite hlue i Akötesie . . . me thina ka loi.”—2 Kor. 6:4, 6.