Loi e Troa Wanga Atrune La Itre Xaa Atr—Hnene La Troa Hnying Me Drei Angatr
1 Ala nyimu la itre atr ka madrine troa qaja la itre aqane mekune i angatr, ngo xele pe tro la itre xan a inin me haji angatr maine hnying göi troa icilekeu memine la mekuna i angatr. Celë hi matre nyipi ewekë troa inine hnene la itre hlue Keresiano, troa inine la aqane troa atreine hnying kowe la itre atr matre troa atre la mekuna i angatr.—Ite edomë 20:5.
2 Loi e tro la itre hnyinge së a upe la itre atr troa isa thele mekun, ngo thaa tro kö sa nyi ka atre me ahmahmanyi angatr. Ame ngöne la kola cainöje ngöne itre hnalapa trootro, kola qaja hnene la ketre trejine ka hape, “Hapeu, tro kö elanyi la itre atr a iwangatruny me imetrötrekeu?” Thenge la aqane sa lai atr, kola sisedrën hnene la trejin ka hape, “Nemene la nyine troa kuca matre troa traqa kowe lai?” maine “Pine nemen la nyipëti a mekune tune lai?” Ame ngöne la kola cainöj hnene la ketre trejine ngöne la nöjei ijin me ngöne la itre götrane gaa tru atr, angeic a hnyinge kowe la itre ka trene nekönatr, ka hape, “Nemene la madrine ka tru ne la itre keme me thin?” Thupene lai, öni angeic, “Nemene la hnei nyipunie hna hnehengazone catrën?” Jëne la itre hnyinge celë, kola aijijën la itre atr troa hane qaja la itre mekuna i angatr; eje hi lai laka, thaa tro kö angatr a hmahma, me xou troa ithanata. Pine laka isapengöne la itre aqane mele ne la itre atr, nyipi ewekë catr tro sa atreine iëne me eköth la itre hnyinge së, thenge la itre aja ne la itre atr ne la teritoare së.
3 Loi e Troa Thele Matre Tro La Itre Atr a Fe Amamane La Aliene Hni Angatr: Maine kola ajan hnene la itre atr troa hane qaja la itre mekuna i angatr, loi e thaa tro pi kö sa thepe ithanata. (Iako. 1:19) Loi e tro sa hane trotrohnin me thele troa kapa la itre aqane mekuna i angatr. (Kol. 4:6) Maine jë tro hi a qaja ka hape, “Eje hi lai. Oleti la itre mekun.” Qaja aloinyi angatre jë. Xome jë la itre xaa hnepe hnying me thele cememine la hni ka menyik la itre mekuna i angatr memine la kepin matre angatr a mekune tune lai. Thele jë troa itrotrohni. Maine epuni a ajan troa amamane koi angatr la ketre xötr ne la Tusi Hmitrötr, hape jë, “Hapeu, ase jë fe hë epuni hane wang la aqane mekune celë?” The thele kö troa ithanatane menune ju pë hë la itre ini maine troa iemane itre ej.—2 Tim. 2:24, 25.
4 Troa wangaloine la itre hnyinge së hnei itre xan, e hne së hna hane drei angatre hnyawa. Atreine hi la itre atr troa goeën maine easë a drei angatr cememine la hni ka menyik. Hna qaja hnene la ketre qatre thup ka wange trongën la itre ekalesia, ka hape: “Ame ngöne la epuni a drenge hnyawa la itre atr e ithanata, hetre thangane lai thei angatr, nge kösë kola ketri angatr; nge celë fe ketre aqane tro lai a wangatrunyi angatr.” Ame la easë a hane drei angatr, tre, kolo lai a atrunyi angatr, me upi angatr troa hane drenge la maca ka loi ne la Baselaia hne së hna thele troa ce thawa me angatr.—Rom. 12:10.