Nemene La Hnei Nyipunieti Hna Troa Amë Panën?
1 Tro epuni a sa tune kaa la hnyinge celë? Eje hi laka, aja së asë hi troa amë panëne la Baselaia ngöne la mele së. (Mat. 6:33) Ngo loi e tro sa isa thele ka hape, ‘Kolo kö a amamane laka pengöi eni fe kö lai hnene la aqane ië ewekëng?’ Kola ithuecatre koi së hnei Tusi Hmitrötr ka hape: “Tupathi nyipunieti ju kö.” (2 Kor. 13:5) Nemene la aqane tro sa amamane ka hape easë a amë panën la Baselaia ngöne la mele së?
2 Traeme Së: Loi e tro sa pane nyiqaane goeën la aqane xome së la traeme së. (Efe. 5:15, 16) Ije traeme hne së hna xome ngöne la nöjei wiik matre troa itrokeu, maine wai televizio, me goeë ëternet, maine troa kuca pena la ketre nyine madrin? Maine tro sa e la etrune la traeme hne së hna xome thatraqane la itre ewekë cili me goeëne la etrune la traeme hne së hna xome kowe la itre huliwa ngöne la götrane la ua, eje hi lai laka tro sa sesëkötr. Hne së kö hna kuca la itre xaa hawa xane lo itre hawa i maseta nge thaa wanga atrune pë hë la huliwa së ka hmitrötr; hnene hi laka kola ajan la itre mo ne fen? Aija triane së la itre icasikeu maine huliwa ne cainöje pena, matre troa ngenu ngöne la itre mecixeni me sabath?
3 Troa Amë Panën La Itre Ewekë: Ala nyimu the së la itre ka ajan troa kuca la nöjei mekuna së, ngo ame la ejolen, tre hna sa tulune hi la traeme së. Haawe, maine easa ajan troa amë panën la itre aja ne la Baselaia, nyipi ewekë tro sa atrehmekune la itre nyine tro sa amë panën; thupene lai, easë a eköthe jë la traeme thatraqane la “nöjei ewekë ka isa pengöne kö [ka nyipi ewekë].” (Fil. 1:10) Kolo lai a qaja la troa inine la Wesi Ula i Akötresie, me cainöje trootro, me thupëne la itre atrene la fami, me sine la itre icasikeu i Keresiano. (Sal. 1:1, 2; Rom. 10:13, 14; 1 Tim. 5:8; Heb. 10:24, 25) Eje hi lai laka, ka hetre thangane fe la itre xaa ewekë tune la troa tuluthe la aqane troa pane jumijumi itrei me kuca la itre nyine madrin. (Mar. 6:31; 1 Tim. 4:8) Ngo thaa tro pi kö la itre ewekë cili ka thaa nyipi ewekë catre kö, a thahe la itre aja ne la Baselaia.
4 Hnene la ketre thöth, ketre trejine trahmany hna thele troa amë panëne la itre aja ne la Baselaia matre troa xome la huliwa ne cainöje ngöne la drai ka pexej; hnei angeic hna iëne lai, hune la troa sisedrën la itre ini ka tru matre troa cilën elanyi la ketre huliwa ka tru. Hnei angeic hna inine la ketre qene hlapa me tro troa cainöj ngöne la ketre götran gaa aja ixatua. Öni angeic ka hape: “Lolo catre la meleng e celë. Madrine catre ni troa xome la huliwa ne cainöj! Eni a ajan tro la nöjei thöthi asë a kuca la huliwa ka tune la, me hane kapa la madrin ka eje theng. Pëkö ketre ewekë ka sisitria hune la troa nyihlue i Iehova hnene la hne së hna hetreny.” Nyipici laka, maine tro sa amë panën la Baselaia, tro hë së a kapa la itre manathith; ngo ame la ka nyipi ewekë, tre, ene laka, easë a amadrinë Iehova, Tretretro së e koho hnengödrai.—Heb. 6:10.