“Nyidëti a Hamën’ Atrune La Cate Kowe La Ka Pë Men”
1 Drei pe kö la atr ka thaa hane kucakuca ngöne la ketre ijin ne la mele i angeic? Maine jë thaa hnene hmekuje kö laka tru la hna huliwa maine itre xaa hna kuca ju kö matre kola kucakuca, ngo hnene fe la itre jol hne së hna cile kow ngöne la “nöjei ijine ka aköte” celë. (2 Tim. 3:1) Pine laka itre hlue i Iehova së, tune kaa la aqane tro sa hetrenyi la trenge catr ngöne la götrane la ua, matre thaa tro kö sa nanazije ngöne la easa xome la huliwa ne cainöje së? Maine easë a ajan troa catre cainöj, nyipi ewekë tro sa mejiune koi Iehova pine laka “atraqate la mene i Nyidë.” (Is. 40:26) Atrehmekune hnyawa hi Nyidrë la ka nyipi ewekë koi së, nge hetre hni ne ajane i Nyidrë troa xatua së.—1 Pet. 5:7.
2 Itre Nyine Ixatua Qaathei Iehova : Iehova a aegöcatrenyi së jëne la uati hmitrötre i Nyidrë, celë trenge catre lai hnei Nyidrëti hna xome matre troa xupe la hnengödrai memine la fen. Kola xatua së hnene la uati hmitrötre i Akötresie troa “hete xa egöcat” ngöne la easa nango kucakuca. (Is. 40:31) Isa hnyinge jë së ka hape, ‘Eue lo eni a sipone jëne la thith matre troa aegöcatrenyi ni hnene la uati hmitrötr matre troa eatrëne hnyawa la itre hnëqang ne Keresiano?’—Luka 11:11-13.
3 Maine tro sa e pala hi me mekune thele la Wesi Ula i Akötresie, me xome pala hi la göxeni ne la ua jëne la hna isa inine lapaan la itre itusi ne la Keresiano, haawe, tro hë së a tune la “sinöe [ka cia hlöeë] hna trane ngöne la öli ne la ite di, kola wa ngöne la ijin; tha tro kö a fite la ite dön’ ej.”—Sal. 1:2, 3.
4 Iehova fe a jëne la itre trejine me easë, matre tro angatr a hane ‘hamëne la ketre ixatua nyine aegöcatrenyi së.’ (Kol. 4:10, 11) Angatr a aegöcatrenyi së ngöne la itre ijine icasikeu ne la ekalesia, hnene la eloine la itre porotrik, me itre mekune hna hamën, memine la itre cainöj. (Ite hu. 15:32) Kola hamën hnene la itre qatre thup Keresiano la ixatua ngöne la götrane la ua, me hamëne la itre ithuecatre ka acatrene me akeukawane hmaca la itre hni së.—Is. 32:1, 2.
5 Huliwa Ne Cainöj: Maine epuni a nango kucakuca, the tro pi kö nyipunieti a hmacahmaca troa cainöj! Thaa ceitune kö la huliwa ne cainöj memine la itre xaa huliwa së; maine tro sa catre cainöje pala hi, eje hi lai laka, tro ha akeukawane hnyawa la itre hni së, me aegöcatrenyi së. (Mat. 11:28-30) Maine tro sa catre cainöjëne la maca ka loi, haawe, tro ha xatua së troa caa hna goeëne hi, ene la Baselaia i Akötresie, me amë hutine e kuhu itre hni së la itre hnei Nyidrëti hna troa kuca ka lolo thatraqa së.
6 Tru catre la itre nyine troa kuca qëmekene troa apaatrene la fene ka ngazo celë. Nyimu kepin ka aijijë së troa cila xome hnyawa la huliwa së, ke thaa qaathe së kö, ngo “atreine hnei Akötesie hna hamën.” (1 Pet. 4:11) Jëne la ixatua i Iehova, ijiji së hi troa afenesine la huliwa së, pine laka, “Nyidëti a thue egöcatene la ka kucakuca.”—Is. 40:29.