Aqane Tro Sa Nyiqaane La Etid Ngöne La Itus Ini Tusi Hmitrötr

Nyimutre the së la itre ka madrin troa xomiujine la ketre etid, ngo loi e pane nyiqaane jë. Ijije hi troa xatua së hnene la itusi ka hnyipixe, Nemene La Nyipi Ini Hna Hamën Hnei Tusi Hmitrötr? Hna hnëkëne la götrane 3-7 matre troa hmaloi kowe la itre atr troa hane nyiqaane porotrik jëne la itusi cili. Ame koi itre ka thaa hekö kö cainöj, troa hmaloi koi angatr troa xome ej matre troa nyiqaane la itre etid.

◼ Maine jë troa xome la götrane 3 tune la:

Thupene la hna qaja la ketre nuvel maine ketre jol ka ketr la itre atr ngöne la teritoare së, amamane ju kowe lai atr la itre hnying hna cinyihane atrun ngöne la götrane 3, nge sipo angeice jë troa hane qeje mekune ngön. Thupene lai, xome jë la itre götrane 4-5.

◼ Maine tro pena a pane amamane la itre götrane 4-5:

Qaja jë ka hape, “Hapeu, nyipi lolo kö troa melën enehila cahu itre ewekë hna nyihatren hnene la itre iatr?” Maine pena, hape jë, “Nemene ngöne la itre hna thingehnaeane celë, la itre hnei epuni hna ajan troa eatr?” Drenge hnyawa ju la aqane troa sa lai atr.

Maine kola wanga atrune hnene la atr la ketre xötr, amamai angeice ju la hna inine hnei Tusi Hmitrötr göne lai topike cili; xome jë la itre paragaraf ne la itus ka ithanatane la xötre cili. (Wange ju la itre mekun hna eköhagen ngöne la sine cetrone la götrane celë.) Ce wange ju la itre mekun tune lo epuni a kuca la ketre etid. Aqane tro lai a kuca ngöne la kola xötrei cainöj; faifi koi treen lao menetr ne ithanata.

◼ Ame la ketre aqan, tre, sipone jë kowe la atr troa ketre qeje mekun ngöne la götrane 6:

Amamane ju kowe lai atr la itre hnying fene la götran, nge hnyinge jë ka hape, “Hane kö epuni hnyinge tune la?” Maine angeic a ajan troa ithanatane lai ketre hnying, fe jë kowe la itre paragaraf ne la itus ka sa lai hnying. (Wange ju la itre mekune hna eköhagen ngöne la sine cetrone la götrane celë.) Ame la epuni a ce wange lai ithuemacanyi, epuni hi lai a etid.

◼ Troa xome la götrane 7 matre troa iamacanyine la ketre etid:

E jë la köni xötrehnëewekë hnapan ne la götrane celë, nge fe jë kowe la mekene 3, me iamacanyine la ketre etid; xome jë la itre paragaraf 1-3. Wange ju matre troa bëeke hmaca troa ithanatane la itre mekune ka sa la itre hnying ne la paragaraf 3.

◼ Aqane troa ce wang matre troa bëek: Ame ngöne la kola nyipune la pane etid, wange ju la aqane troa sisedrëne ej. Maine jë troa qaja ka hape: “Ngöne hi la hnepe menetr, easë a atrepengöne la hna inin hnei Tusi Hmitrötr ngöne la ketre topik ka nyipi ewekë. Ame pë hë ngöne la etidi hnapin, tro nyiso a ithanatan la [qaja jë la ketre hnying nyine troa ce wang]. Ijije kö tro ni a traqa hmaca e wiike hnapin ngöne la traeme celë?”

Easë a easenyi catre kowe la drai hna sa hnei Iehova, nge Nyidrëti pala hi a nyi jiane la huliwa nyine troa kuca. (Mat. 28⁠:​19, 20; 2 Tim. 3:​17) Loi e tro sa catre xome la jiane huliwa ka lolo celë matre troa nyiqaane etid memine la itre atr.

Troa Tro Fë Tune Kaa La Itus Ini Tusi Hmitrötr

Ame la sine cetrone celë, tre, ej a qatreng la itre mekune nyine ixatua ka isa pengön, hna hnëkën matre troa tro fë la itus Ini Tusi Hmitrötr. Maine easa ajan troa hetre thangane ka loi, thaa tro kö a e gufan ngo tupathe jë troa ketre qaja lai itre mekun. Thele jë troa ihmeku la aqane nyiqaane ithanata i epun memine la aja ne itre atr ne la teritoare i epun, nge imajemikeu jë memine la itre topik hna ithanatan hnine la itus nyine troa cainöje fë. Ijije fe troa xome la itre xaa aqane nyiqaane ithanata ka lolo.​—Wange ju la Huliwa Ne Baselaia ne Januare 2005, g. 8.

Amagedo

◼ “Ame la kola dreng hnene la itre atr la hnëewekë ‘Amagedo,’ nyimutre la itre ka mekun ka hape troa paatr asë la fen. Nge maine tro nyipunieti a atre ka hape, ame la Amagedo, tre, ketre ewekë nyine tro sa lapa treqen hnyawa, hapeu ma troa asesëkötrë epun? [Nue pi tro sa. Thupene lai, e jë la Hna Amamane 16⁠:​14, 16.] Drei la hna qaja göne la mel elanyi thupene e Amagedo.” E jë la götrane 82-4, nge e jë la paragarafe 21.

Tusi Hmitrötr

◼ “Kola qeje Tusi Hmitrötr hnene la itre atr e itre xaa ijin, ceitu me Wesi Ula i Akötresie la Tusi Hmitrötr. Hane kö nyipunieti hnyingëne thel la kepin matre kola hën la itusi cili ka hape Wesi Ula i Akötresie, ngo hna cinyihane pe hnei atr? [Nue pi troa sa. Thupene lai, e jë la 2 Peteru 1:​21 me götrane 19-20, paragarafe 5.] Kola hamën hnene la itusi celë la itre mekune qa hnine la Tusi Hmitrötr; nge itre ej a sa la itre hnyinge cili.” Amamane jë la itre hnying ne la götrane 6.

◼ “Hmaloi catre kowe la itre atr enehila troa kapa la itre ithuemacanyi hune ekö lo. Ngo tune kaa la mekune i epun, ekaa la hnë tro sa thele eamo ka loi nyine troa xatua së troa hetrenyi la mele madrin, me manathith? [Nue pi troa sa. Thupene lai, e jë la 2 Timoteo 3:​16, 17 memine la götrane 23, paragaraf 12.] Kola qaja hnene la itusi celë la aqane mel ka amadrinë Akötresie, nge ka troa hetre thangane ka loi koi së.” Amamane jë la iatr memine la tablo hna eköhagen 122-3.

Mec/Melehmaca

◼ “Nyimutre la itre atr ka thele la ewekë ka traqa thupene la mec. Ijije kö tro sa hane atre la pengöne cili? [Nue pi troa sa. Thupene lai, e jë la Ate Cainöj 9⁠:5 memine la götrane 58-9, paragarafe 5-6.] Kola qaja fe hnene la itusi celë la aliene kowe la itre ka meci hë, lo hna thingehnaeane hnei Tusi Hmitrötr göne la melehmaca.” Amamane jë la iatr götrane 75.

◼ “Ame la kola meci hnene la ketre atr hne së hna hnim, easë asë hi a ajan troa iöhnyi hmaca me angeic. Tune kaa la mekune i epun? [Nue pi troa sa.] Nyimutre la itre atr hna akeukawane hnene lo hna thingehnaeane hnei Tusi Hmitrötr göne la melehmaca. [E jë la Ioane 5:​28, 29 memine la götrane 72, paragarafe 16-​17.] Kola sa mina fe hnene la mekene celë la itre hnyinge cili.” Amamane jë la itre hnying ka nyiqaane la götrane 66.

Mele Ka Thaa Ase Palua Kö

◼ “Ala nyimu la itre atr ka ajan troa egöcatr me qea la hna mel. Nge maine ijije hi, aja i epuni kö troa hane mele epine palua? [Nue pi troa sa. Thupene lai e jë la Hna Amamane 21:​3, 4 memine la götrane 53-4, paragaraf 17.] Kola ithanatane hnene la itusi celë la aqane tro sa hetrenyi la mele ka thaa ase palua kö, memine la pengöne mele elany ngöne la kola eatr la hna thingehnaeane celë.”

Hnepe Lapa

◼ “Aja së asë hi troa hetrenyi la mele ka loi me madrine e hnine la fami. Tune kaa la mekune i epun? [Nue pi troa sa.] Kola qaja hnei Tusi Hmitrötr la ketre ewekë nyine troa kuca hnene la itre atren la fami, matre troa hetre madrin e hnine la fami​—ene la troa Ihnimi tui Akötresie.” E jë la Efeso 5:​1, 2 me götrane 135, paragaraf 4.

Hnalapa

◼ “Ame ngöne la itre götran ka nyimutre, ka jole catr e troa öhnyi hnalapa ka loi me ka co thupen. Hapeu, tro kö a hetreny me isa lapaan elanyi hnene la itre atr la itre uma ka loi? [Nue pi troa sa. Thupene lai, e jë la Isaia 65⁠:​21, 22 me götrane 34, paragaraf 20.] Kola qaja hnene la itusi celë la aqane troa eatr elanyi lai hna thingehnaeane hnei Akötresie.”

Iehova Akötresie

◼ “Nyimutre la itre atr ka lapaune koi Akötresie, ka ajan troa easenyi catre koi Nyidrë. Atre fe hi nyipunieti laka Tusi Hmitrötr a hë së troa easenyi Akötresie? [Nue pi troa sa. Thupene lai, e jë la Iakobo 4⁠:8a me götrane 16, paragaraf 20.] Hna hnëkëne la itusi celë matre troa xatuane la itre atr troa atre Akötresieti hnyawa; loi e troa xome la sipu Tusi Hmitrötre i angatr.” Amamane jë la itre hnying ka nyiqaane la götrane 8.

◼ “Nyimutre la itre atr ka thithi fë la atresiwa i Akötresie, matre troa ahmitrötrën ej (maine atrun ej). Hane kö epuni thele la ëje cili? [Nue pi troa sa. Thupene lai, e jë la Salamo 83⁠:18 me götrane 195, paragaraf 2-3.] Kola qaja hnene la itus la hna inin hnei Tusi Hmitrötr göi Iehova Akötresie memine la trepene mekune i Nyidrë kowe la itre atr.”

Iesu Keriso

◼ “Drei meje i Iesu Keriso asë hi hnene la itre atr e cailo fen. Ame itre xan, öni angatr ka hape, ceitui nyidrë hi me ketre atr. Itre xan a thili koi nyidrë kösë Akötresie Ka Pucatin asë. Hapeu, ka nyipi ewekë kö la mejiune së koi Iesu Keriso?” Nue pi troa sa. Thupene lai, e jë la Ioane 17⁠:3 me götrane 37-8, paragaraf 3. Amamane jë la itre hnying ka nyiqaan, fene la taan lai mekene itus.

Thith

◼ “Hane kö epuni thele la aqane sa Akötresieti la itre thith? [Nue pi troa sa. Thupene lai, e jë la 1 Ioane 5:​14, 15 me götrane 170-2, paragaraf 16-​18.] Kolo fe a qaja hnene la mekene celë la kepin matre loi e tro sa thithi koi Akötresie, memine la nyine tro sa kuca matre troa drei së hnei Nyidrë.”

Hmi

◼ “Nyimutre la itre atr ka nyiqaane öhne laka, ame la itre hmi ne la fen, tre, itre eje hi la qaan la itre jol ngo thaa itre eje kö a nyinyin la itre jol. Tune kaa la hnei epuni hna mekun, hmi kö a eatrongën la itre atr ngöne la gojenyi ka loi? [Nue pi troa sa. Thupene lai e jë la Mataio 7:​13, 14 me götrane 146, paragaraf 5.] kola ithanatane hnene la mekene celë la sikisi lao ewekë ka amamane hnyawa la hmi hna kapa hnei Akötresie.” Amamane jë la itre mekun ngöne la götrane 147.

Hulö/Akötr

◼ “Ame la kola traqa la ketre hulö, nyimutre la itre ka hnying; kola thel hnei itre xan ka hape, Akötresieti jë kö a hane hnehengazon la itre atr, nge öhne jë fe kö Nyidrëti la Akötre i angatr. Tune kaa, hane kö epuni hnyinge tune lai? [Nue pi troa. Thupene lai, e jë la 1 Peteru 5⁠:7 me götrane 11, paragaraf 11.] Kola qaja hnene la itusi celë la aqane tro Akötresie a apaatrene epine palua la akötr ne la itre atr.” Amamane jë la itre hnyinge ka nyiqaane la götrane 106.

Isi/Tingeting

◼ “Kolo asë hi a ajan hnene la nöjei atr asë la tingeting. Tune kaa la mekune i epun, kola pu la kola qaja ka hape, hetre mejiune troa tingeting la fen asë? [Nue pi troa sa. Thupene lai e jë la Salamo 46:​8, 9.] Kola ithanatan hnene la itusi celë la aqane tro Akötresie a aejën la aja i Nyidrë me axulune la tingeting e cailo fen.” Amamane jë la iatr ngöne la götrane 35, nge wange ju la itre paragaraf 17-​21 götrane 34.

[Hna eköhagen götran 5]

Itre Aqane Troa Amexej La Hna Amekötin Göi Ahnahna

“Maine nyipunieti a ajan troa hane hamën enehila la itre hnepe ahnahna thatraqane la huliwa hun e cailo fen, eahuni a madrine itre ej.”

“Ngacama thaa eahuni kö a hë thupene la itre itusi hun, ngo eahuni pe a kapa madrine la itre hnepe ahnahna hna hamën thatraqane la huliwa e cailo fen.”

“Maine jë nyipunieti a hnyingëne thele la aqane nyi jiane huni la huliwa celë e cailo fen. Hna sajuëne ej hnene la itre ahnahna hna hamëne gufan. Maine nyipunieti a ajan troa hane hamën la itre hnepe ahnahna enehila, madrine atraqatre huni troa kapa itre ej.”

(1) Hnying, (2) Xötr, Me (3) Meken

Ame la ketre aqane troa tro fë la itus Nemene La Nyipi Ini Hna Hamën Hnei Tusi Hmitrötr? tre, ene la troa (1) amejën la ketre hnying nyine thele la mekuna i atr, (2) troa e la ketre xötr ka ijij, me (3) amaman la ketre meken ne la itus ka ithanatan la mekune cili, me e la itre hnying thupene lo lai taan la meken. Maine hetre aja thene la atr, maine jë troa iamacanyin la ketre etid jëne la itre paragaraf ka nyiqaane la mekene cili. Ijije hi troa xome la aqane nyiqaane ithanata cili matre troa xejë la etid ngöne la kola xötrei iöhnyi maine ngöne la kola iwai hmaca.

◼ “Tune kaa, ijije kö tro la itre atr a hane atre la Atre Xupi së Ka Pucatin Asë, tune la hna qaja e celë hnei Tusi Hmitrötr?” E jë la Ite Huliwa 17⁠:​26, 27, nge nue pi troa sa. Thupene lai, ithanatane jë la mekene 1.

◼ “Ngacama tru la itre jol enehila, hapeu, ijije kö troa hetrenyi la keukawa memine la mejiune hna qejepengön e celë?” E jë la Roma 15⁠:​4, nge nue pi troa sa. Thupene lai, ithanatane jë la mekene 2.

◼ “Maine eje thei epuni la men, tro kö epuni a saze la itre ewekë celë?” E jë la Hna Amamane 21⁠:​4, nge nue pi troa sa. Thupene lai, ithanatane jë la mekene 3.

◼ “Tune kaa, tro kö la itre nekö së a kapa me mele madrine la itre ewekë hna qejepengön hnine la nyima ka hekö celë?” E jë la Salamo 37⁠:​10, 11, nge nue pi troa sa. Thupene lai, ithanatane jë la mekene 3.

◼ “Tune kaa la mekune i epun, tro kö a traqa elanyi la drai ne troa eatr la itre trenge ewekë celë?” E jë la Isaia 33⁠:​24, nge nue pi troa sa. Thupene lai, ithanatane jë la mekene 3.

◼ “Hane kö epuni hnyingëne thel ka hape atre jë fe kö la itre ka mec la hna kuca hnene la itre ka mel?” Nue pi troa sa. Thupene lai, e jë la Ate Cainöj 9⁠:​5, nge ithanatane jë la mekene 6.

◼ “Hapeu, ijije kö tro sa hane iöhnyi hmaca memine lo itre atr hne së hna hnim ka meci hë, tune la aqane qaja i Iesu ngöne la itre xötre celë?” E jë la Ioane 5:​28, 29, nge nue pi troa sa. Thupene lai, ithanatane jë la mekene 7.

◼ “Tune kaa la mekune i epun, tro kö a eje e celë fen la aja i Akötresie tune e koho hnengödrai, thenge la hna qaja hnine la thithi celë?” E jë la Mataio 6:​9, 10, nge nue pi troa sa. Thupene lai, ithanatane jë la mekene 8.

◼ “Tune kaa la mekuna i epun, easë kö a mele enehila ngöne lo hneijine hna qaja hnene la hna perofetane celë?” E jë la 2 Timoteo 3:​1-4, nge nue pi troa sa. Thupene lai, ithanatane jë la mekene 9.

◼ “Nyimutre la itre atr ka thele la kepin matre kola ngazo catre pala hi la itre jol ka traqa kowe la itre atr enehila. Hane kö epuni wange la kepine celë?” E jë la Hna Amamane 12⁠:​9, nge nue pi troa sa. Thupene lai, ithanatane jë la mekene 10.

◼ “Hane kö epuni thele troa atre la mekune ka sa la hnyinge celë?” E jë la Iobu 21⁠:​7, nge nue pi troa sa. Thupene lai, ithanatane jë la mekene 11.

◼ “Tune kaa, maine tro la itre fami a trongëne la eamo celë qa hnine la Tusi Hmitrötr, tro kö a xatua angatr troa madrin me mele ka loi e hnine la fami?” E jë la Efeso 5:​33, nge nue pi troa sa. Thupene lai, ithanatane jë la mekene 14.

Troa nyiqaane hamë rapor göne la ketre etid, e thupene la hna alua kuca ha qaane lo hna xötrei amaman la aqane trongene ej, nge ngöne fe la kola mama laka hetre kepine ka catr troa sisedrëne ej.