Meken 17

Ini Hna Hamëne Koi Nikodemo

NYIMUTRE la itre iamamanyikeu hna kuca hnei Iesu ngöne la nyidrëti a sine la pui ne paseka, lo macatre 30 M.K. Celë hi matre, nyimutre catre la itre atr ka lapaune koi nyidrë. Hna haine fe hnei Nikodemo, ketre atr ishenyin, ka hane cilëne la hna kootre ka tru i angetre Iudra, nge angeice a ajane troa atre hnyawa la pengö i Iesu. Haawe, angeice a tro pi troa wai Iesu e hnenyipajidr; ma angeice a xouene e öhnyi angeice jë hnene la itre xaa tane i angetre Iudra, nge thaa hane pi pe metrötrë angeice hnei angatr.

Öni angeice ka hape: “Rabi, ate hë huni cilieti la ate ini hna jötëti celati thawai Akötesie; ke pëkö ate ateine troa kuca la nöjei iamamanyikeu hna kuca e qatikö Akötesie thei nyidë.” Iesu a sa koi Nikodemo ka hape, maine ketre atr a ajane troa lö kowe la Baselaia i Akötresie, nyipi ewekë troa “hnahone hmaca” la atr cili.

Nemene kö la aqane troa hnahone hmaca la ketre atr? Kola hnyingëne hnei Nikodemo ka hape: “Ateine angeice troa nyi hnaaluene lö kowe la hni ne la thine i angeic, mate hnahone pi?”

Ohe, thaa eje kö la aliene la trenge ewekë i Iesu lai. Nyidrëti a qeje pengöne pe ka hape: “Maine tha hna hnahone kö la ate qa ngöne la timi memine la Ua, tha ’teine kö angeice troa lö kowe la baselaia i Akötesie.” Ame ngöne lo kola bapataiso Iesu, nge hna të hui nyidrë la uati hmitrötr, e cili hi la ijine kola hnaho nyidrë “qa ngöne la timi memine la Ua.” Ngöne fe la hawa cili, hetrenyi la aqane ula qa hnengödrai, kola hape, ‘Dei la Nekönge hniminang; ini a madi nyidë,’ Akötresieti hi lai a ithuemacanyine laka, hna celohmë Iesu hë hnei Nyidrë, a atre troa lö kowe la baselaia i Nyidrë e hnengödrai. Ame hë thupen, ngöne la Penetekos 33 M.K., tro ha bapataisone la itre xaa atr hnei uati hmitrötr, nge e cili troa hnaho angatre hmaca, matre itre ua i Akötresieti hë angatr.

Ngo jëne iamele la hnëqa ne la Hupuna i Akötresie, ngöne la nyidrëti petre kö e celë fen. Öni Iesu koi Nikodemo ka hape: “Hnei Mose hna adraiëne la une ngöne la hnapapa, kete tune troa adraiëne la Nekö i ate; mate tha tro kö a meci la kete e angete lapaune koi angeic, ngo tro ha hetenyi la mele ka tha ase palua kö.” Eje hi, tune lo angetre Isaraela hna heje hnei un, laka, maine angatre a pi mel, ke, loi e tro angatre a goeëne la une kopa, haawe, maine kola ajane hnene la itre atr troa utretre qa ngöne la mec, loi e tro asë hi angatre a lapaune kowe la Hupuna i Akötresie.

Thupene lai, Iesu a amamane jë koi Nikodemo la aqane ihnimi Iehova, öni nyidrë: “Ke hnei Akötesieti hna hnime la fene hnengödrai, mate nyidëti a hamëne la Nekö i nyidëti ka cas, mate tha tro kö a meci la kete e angete lapaune koi nyidë, ngo tro ha hetenyi la mele ka tha ase palua kö.” Celë hi aqane amamane Iesu e Ierusalema ngöne la hnaasikisine treu ne cainöje nyidrë, laka, nyidrëti hi lo jiane huliwa hna xome hnei Iehova nyine amelene la nöjei atr.

Iesu a qeje pengöne hmaca koi Nikodemo ka hape: “Ke tha hnei Akötesieti kö hna upe la Neköne kowe la fene hnengödrai troa ahnëjinëne la fene hnengödrai” a thaa ene kö la troa ahnëjinëne maine troa hamë pune ka ngazo kowe la itre atr, ene la troa apaatrenyi angatr. Ngo tune la hna qaja hnei Iesu laka, “troa amelene hnei nyidë” la fen.

Hna traqa hnei Nikodemo troa wai Iesu e jidr, nge atraqatre la xou i angeic. Haawe, lolo ju hi koi Iesu e troa nyipune la porotrike i nyidro, jëne la trenge ewekë celë, kola hape: “Dei la hnëjin, laka traqa ha la lai [hna nyi atrëne hnei Iesu ngöne la aqane mele i nyidrë me itre ini hnei nyidrë hna hamën] kowe la fen, nge aja i nöjei ate la jidi hune la lai, ke ngazo la ite thiina i angat. Ke kola methinëne la lai hnene la ate ka kuca la ngazo, nge tha tro kö kowe la lai wanga mamapi la ite huliwa i angeic. Ngo ame la ate kuca la nyipici, angeic’ a tro kowe la lai, mate mamapi la ite huliwa i angeic, laka, hna kuca qa thei Akötesie.” Ioane 2:23–3:21; Mataio 3:16, 17; Ite Huliwa 2:1-4; Numera 21:9.

▪ Pine nemene matre kola iwai hnei Nikodemo? Nge hnauëne la kola tro e jidr?

▪ Nemene la aliene la trenge ewekë hna hape, “hna hnahone hmaca” ?

▪ Nemene la aqane amamane Iesu la hnëqa i nyidrë, ngöne la aqane troa amele së?

▪ Nemene la aliene la hnaewekë hna hape, thaa Iesu kö a traqa troa ahnëjinëne la fen?