Meken 21

Hnine La Sunago e Nazareta

NYIPICI kola hetre mejene la Nazareta, ngöne la kola bëeke hmaca hnei Iesu. Qëmekene lo kola bapataiso nyidrëti hnei Ioane, laka, caa macatre hë, atre nyidrëti petre kö hnene la itre atr tune la atre tratrau sinöe. Ngo ame hë enehila, kola qaja hnene la nöjei atr ka hape, ka kuci iamamanyikeu nyidrë. Atraqatre fe la ajane la itretre Nazareta tro Iesu a hane kuca la itre xaa iamamanyikeu ka lolo qëmekei angatr.

Kola elë la madrine i angatre ngöne la angatre a öhnyi Iesu e tro kowe la sunago, tune la hnei nyidrë hna majemin. Ngöne la ijine kola hmi, nyidrëti a mejë troa e tus, nge kola line koi nyidrë la tusi perofeta Isaia. Nyidrëti a öhne la xötr, kola qaja la atr hna iëne hnene la uati hmitrötre i Iehova, xötre lai ka ihmeku memine la mekene 61 ne la tusi Isaia, ngöne la Tusi Hmitrötre së enehila.

Thupene la hnei Iesu hna e la hna ithahnata lo kola hape, tro la atr cili a cainöjëne laka tro ha goe la itre timek, nge tro angeice a qaja la ijine loi i Iehova, nyidrëti a hamëne pi la tusi kowe la hlue me lapa. Kola goeë nyidrëti hnene la itre atr asë. Thupene lai nyidrë a ithahnata ngöne la ketre hnepe hawa, öni nyidrë: “Eatë hë ngöne la drai celë la hna cinyihane celë ngöne la ite hnangenyë i nyipunie.”

Kola haine “la nöjei wesi ula ne ihnim” hnene la itre atr, nge angatre a iqajakeune ka hape: “Hapeu, tha nekö i Iosefa kö la?” Ngo atre hë Iesu laka, angatre a ajane tro nyidrë a kuca la itre iamamanyikeu, nyidrëti a qaja ju koi angatre ka hape: “Maine tro nyipunie a qaja koi ni la cei tune celë, ka hape, ‘Tene drösinöe fe, aloinyi eö jë kö; ame la nöjei ewekë hna kuca e Kaperenauma hne huni hna deng, kuca jë fe e celë ngöne la nöje i nyipë.’ ” Eje hi, nyimutre la itre atr ka ce mele me Iesu ngöne la traone ka caas, angatre a mekune laka, ka loi kö ekö tro Iesu a pane nyiqaane kuca la itre iamamanyikeu ngöne la traone i nyidrë, matre tro angatre a pane kepe thangane itre ej. Celë hi matre angatre a mekune ka hape, hna wangaconyi angatre hnei Iesu.

Pine laka, atre hnyawa hi Iesu la itre mekune i angatr, nyidrëti a amekunë angatre hmaca la itre xaa ewekë ka traqa ekö. Nyimutre catre la itre sine föe e Isaraela ngöne la ijine i Elia, ngo thaa hna upi nyidrëti kö kowe la ketre e angatr. Hnei nyidrëti pe hna tro kowe la ketre sine föe ne Sidona, thaa atre Isaraela kö, nge hna amele nyiidro jëne la ketre iamamanyikeu. Ketre tune mina fe, nyimutre la itre lepera ngöne la hneijine i Elia, ngo hnei nyidrëti hna tro koi Namana hmekuj, atre Suria troa amele angeic.

Ame hna elëhni la itre atr, nge angatre a mejë me helë Iesu, pine laka, qa ngöne la itre ewekë hnei nyidrë hna qaja, kola amamane hnyawa la aqane mele caasi me pë lapaune i angatr. Kola huzu nyidrëti hnei angatre kowe la wetr, nge traqa ha e cili, angatre a mekune ju troa ukapië nyidrë. Ngo Iesu a utretre qaathei angatre me kötre ananyi angatr. Luka 4:16-30; 1 Ite Joxu 17:8-16; 2 Ite Joxu 5:8-14.

▪ Pine nemene matre kola hetre meje e Nazareta?

▪ Nemene la hna mekune hnene la itretre Iudra kowe la cainöje i Iesu, ngo nemene la ka jele la trenge elëhni i angatr?

▪ Nemene la ewekë hna tupathe hnene la itre atr troa kuca koi Iesu?