MEKENE 7
Pengöne La Itre Icasikeu Hun
Nu Zilan
Zapo
Uganda
Lithuanie
Ame ngöne la itre pane icasikeu ne la itre Keresiano ekö, tre kolo hi a nyima, me thith, me e me ce ithanatane la Tusi Hmitrötr. (1 Korinito 14:26) Celë mina fe hi lai hnei nyipunieti hna troa öhne ngöne la itre icasikeu hun.
Ini hna nyitrepene hnene la Tusi Hmitrötr nge ka hetre thangan. Ame ngöne la nöjei pune wiik, tre hne huni pala hi hna icasikeu ngöne la isa ekalesia hun; 30 lao menetre ne troa pane drenge la ca cainöje qa hnine la Tusi Hmitrötr, nyine amamane la aqane tro huni a melëne la hnedrai celë. Celë hi matre nyipi ewekë troa isa xomi Tusi Hmitrötren, me isa wange e hnin la itre mekune hna qejepengön. Thupene jë hi lai cainöj, ca hawa hmaca ne tro huni a inine la Tusi Hmitrötr jëne lo zonal “Ita Ne Thup Nyine Inin.” Ngöne la hawa cili, hna nue kowe la ekalesia troa ithanatane la itre mekune qa hnine Ita Ne Thup. Qa ngöne lai, hetre ixatua koi hun troa trongëne la itre trepene meköti qa hnine la Tusi Hmitrötr ngöne la mele hun. Casi hi la mekune hna ce ithanatane hnene la 110 000 nge hetre munëne lao ekalesia e cailo fene hnengödrai.
Aqane xatua huni troa hamë ini. Ame fe e nyipine la wiik, eahuni ce traqa itronyi e hej, matre troa sine la porogaram hna hape, Mel Me Huliwa Ne Cainöj Ne La Keresiano hna thawa koi köni götran. Ijije hi troa goeëne la aqane trongene ej ngöne la Mel Me Huliwa Ne Cainöj Pepa Nyine Huliwan. Ame la hnapan götran, tre Itre Trengamo Qa Hnine La Wesi Ula. Ketre icasikeu lai ka troa xatua hun, troa atreine huliwan la itre meken ne la Tusi Hmitrötr hne huni hna e hë. Thupene lai, Isa Tupathe Jë Ngöne La Hna Cainöj. Kola amamane la itre iamacany, göne la aqane troa tro fë la Tusi Hmitrötr kowe la nöjei atr ngöne la hna cainöj. E cili, tro la atre thupëne la ini a xatua hun troa maca hnyawa, göne la aqane troa e tus me ithanata. (1 Timoteo 4:13) Ame la icasikeu tixenuë, tre, Mele Ne Keresiano. Jëne la icasikeu cili, kola amamane la itre trepene meköt nyine tro palahi a trongën ngöne la mele hun. Hetrenyi fe la itre hnying nyine troa sa, nge ka troa xatua huni ngöne la aqane troa trotrohnine la Tusi Hmitrötr.
Maine tro nyipunieti a hane sine la itre icasikeu hun, eje hi laka tro nyipunieti a madrine la nyipunieti a öhne la elolone la ini hna kapa qa ngöne la Tusi Hmitrötr.—Isaia 54:13.
Nemene la aqane trongene la itre icasikeu ne la Itretre Anyipici Iehova?
Nemene la icasikeu huni hnei nyipunie hna pi ajane catrëne troa hane sin?