Meken 81

Kolo Hmaca a Thele Troa Humuthi Iesu

TRAQA ha la hneijine hnötr. Iesu a tro ngöne la ēnēti, ngöne la poretiko i Solmona. Ame hna icasikeu xötreithi nyidrë hnene la angetre Iudra, me qaja ka hape: “Tro nyipëti a aluelue hni huni utihë eu? Maine nyipëti la Keriso, ulatine amamane jë koi hun.”

Iesu a wetëti koi angatre ka hape: “Ase hë ni lo qaja koi nyipunie, ngo tha kapa kö hnei nyipunie.” Thaa hnei Iesu kö hna qaja mekötine koi angatre ka hape, Keriso nyidrë, tune lo aqane qaja nyidrëti kowe la föe ne Samaria, ezine lo an. Thaa hnei nyidrëti kö hna qaja la pengö i nyidrë, ngo nyidrëti pe a qeje pengöne ka hape, ka traqa nyidrëti qaa koho hnengödrai, nge pa i nyidrëti kö mele hui Aberahama.

Ngo ame la aja i Iesu ke, tro la itre atr a isa atre laka, caasi hi la itre huliwa hnei nyidrëti hna kuca, a kola eatrëne lo itre hna thingehnaeane hë ekö göi nyidrë, qa ngöne lai, tro hë angatre a isa trotrohnine laka, nyidrëti hi la Keriso. Celë hi matre hna pane ahnithe kowe la angetre drei nyidrë ka hape, thaa tro kö a qaja koi ketre atr laka, nyidrëti hi la Keriso. Nge celë fe la kepine matre nyidrëti hmaca a qaja kowe la angetre Iudra ka icilekeu ka hape: “Ame la ite huliwa hnenge hna kuca ngöne la atesiwa i kaka, celë hi itete anyipici ni. Ngo tha kapa kö hnei nyipunie.”

Pine nemene matre thaa jele nyipicine kö angatr? Hapeu, thaa nyimutre kö la itre hatrene ka anyipicine laka, Iesu hi la Keriso? Nyipici, ame pe, Iesu a hamëne la sipu kepine lai: “Ke tha ite mamoenge fe kö nyipunie. Dengë hë la ite mamoenge la aqane ewekëng. Nge atehmekunyi angate kö ni, nge angat’ a xötethenge ni. Nge tro ni a hamë angate la mele ka tha ase paluakö; nge tha tro kö angat’ a meci epine palua, nge pëkö kete ate troa thepe angate pi qa ngöne la imeng. Ame Kakati, ate hamë angate koi ni, ataqate nyidëti hune la nöjei ewekë asë; nge pëkö ka ateine troa thepe angate pi qa ngöne la imeng.”

Iesu a qaja jë la elolone la aqane imelekeu i nyidrë me Tretretro i nyidrë, laka, ka caasi catre nyidro: “Ame ini me Tetetro, te, casi hi nyihoti.” Pine laka Iesu e celë fen, nge Keme i nyidrë e koho hnengödrai, haawe, thaa Iesu kö a qaja ka hape, ame nyidrëti me Tretretro i nyidrëti ke, atr ka caasi hi nyidro. Ohe, ngo kolo pe a qaja ka hape nyidroti a caas, nge caasi hi la aja i nyidro.

Ene pe kola jele la trenge elëhni ne la angetre Iudra, angatre a hleme jë la itre etë troa tranyi nyidrë, tune lo aqane kuca hnapane angatr, lo ijine pui ne xeni ne uma ne hunuma. Iesu a catre me sa ka hape: “Nyimute la ite huliwa ka loi hnenge hna amamane koi nyipunie qa thei Tetetro. Pine la huliwa ka ue laka, nyipunieti a troa trânyi ni?”

Angatre a sa ka hape: “Tha trânyi eö kö hne huni pine la huliwa ka loi, ngo pine pe nyi tru; ke ate kö eö, nge kolo pena a qeje eö Akötesie.” Pine laka thaa hane fe kö Iesu sipu qaja ka hape Akötresie nyidrë, pine nemene matre angetre Iudra a qaja la ewekë celë?

Kola mekune laka, qa ngöne la hnei Iesu hna kuca la itre ewekë ka hetre menene a kösë sipu qaathei nyidrë, ngo öni itretre icilekeu pe me nyidrëti ka hape, Akötresieti hmekuje hi la trene men. Hanawange la ketre ceitun, hnei nyidrë hna qaja thatraqane la itre “mamoe” ka hape “Tro ni a hamë angate la mele ka tha ase palua kö,” ketre ewekë lai hna thatreine kuca hnene la ketre atr. Ngo, angetre Iudra a thunge la lue meke i angatre ngöne laka, hnei Iesu hna sipu qaja ka hape, hnei nyidrëti hna kapa qaathei Akötresie la mus.

Iesu a sa jëne la ketre hnying, matre troa amamane hnyawa laka ka draië catre kö Akötresie hui nyidrë, öni nyidrë ka hape: “Hape u, tha hna cinyihane ngöne la wathebo i nyipunie [ngöne Salamo 82:6], ka hape, Ite akötesieti nyipunie? Hnenge hna qaja, ka hape, Ite akötesieti nyipunie? Maine ase hë nyidrëti qaja ka hape ite Akötesieti angat, ene la hnei tenge ewekë i Akötesie hna traqa kow, . . . nyipunie a qaja göi angeic, lo hnei Tetetroti hna ahmitötën, me upe kowe la fen, ka hape, ka nyi tru, qa ngöne laka, hnenge hna qaja ka hape, Ini la nekö i Akötesie?”

Maine kola hëne la angetre amekötine hnene la Itre Hna Cinyihane ka hape itre “akötresie,” ngo itre atr pe, haawe, nemene la kepine matre tro la angetre Iudra a upe zö nyidrë pine la hna qaja ka hape “Ini la nekö i Akötresie”? Iesu a qaja jë fe ka hape: “Ngo maine ini a kuca, ngacama tha kepe ni kö hnei nyipunie, kapa jë la ite huliwa mate atehmekune ju me trotrohnine hnei nyipunie, laka, ini e kuhu hni ne la Tetetro, nge Tetetroti e kuhu hning.”

Ame la angatre a drenge la itre trenge ewekë celë, ke, angatre a tupathe troa xolouthi nyidrë. Ngo, hna kötre mina hnei nyidrë, tune lo ijine pui ne xeni ne hunuma hnapan. Nyidrëti a tro pi qaa Ierusalema, me sasaithe la hneopegejë ne Ioridano, ngöne la hnei Ioane hna pane bapataiso ngön, a foa lao macatre hë enehila. Thaa nanyi kö la götrane cili qa ngöne la götrane keejë ne la hneopegejë ne Galilaia, a lue drai ne trongë iwaca qaa Ierusalema.

Ala nyimu la itre ka traqa koi Iesu ngöne la götrane cili, me qaja ka hape: “Tha hna kuca kö hnei Ioane la kete iamamanyikeu; ngo nyipici la nöjei tenge ewekë asë hnei Ioane hna qaja göi nyidëti la.” Haawe, nyimutre catre la ka lapaune koi nyidrë. Ioane 10:22-42; 4:26; 8:23, 58; Mataio 16:20.

▪ Iesu a ajane tro la itre atr a wangatrehmekune tune kaa laka nyidrëti hi la Keriso?

▪ Tune kaa la aqane caasi Iesu me Keme i Nyidrë?

▪ Pine nemene matre angetre Iudra a qaja ka hape Iesu a sipu qeje nyidrë tune la akötresie?

▪ Iesu a amamane tune kaa jëne la tusi Solomona ka hape ka draië catre kö Akötresie hui nyidrë?