Meken 84

Hnëqa Ne La Atre Dreng

IESU a tro qa ngöne la hnalapa ne la faresaio ka hlemu, ketre e angetre isenyin, me xome hmaca la gojenyi ne tro Ierusalema eë. Kola xötrethenge nyidrë, hnene la ka ala nyim. Ngo nemene la ka upi angatr troa xotrethenge nyidrë? Nge, nemene la sipu aliene la hnëewekë kola hape, troa nyipi atre drei Iesu?

Ngöne la gojeny, Iesu a xei jë kowe la ka ala nyim, me qaja koi angatre la itre trenge ewekë celë ka iathixötrë: “Maine hetete tro koi ni, nge tha xelene kö la kem, me thin, me ifëkuku, me ite kuku, me ite tejin, me ite xa i angeic, memine fe la mele i angeice kö, te, tha ’teine kö angeice troa sine la angete dei ni.”

Nemene la aliene la trenge ewekë i Iesu? Thaa nyidrëti kö a qaja ka hape, troa xele ma wange hnene la itretre drei nyidrë la itre atrene la hnepe lapa i angatr, ngo loi e tro kö a sisitria catre la ihnimi angatre koi nyidrë, hune la ihnimi angatre kowe la itre atrene la hnepe lapa i angatr. Hanawange la ceitun, kola qeje Iakobo, la xötrapane i Iesu ka hape, hna “xele” Lea, nge hna hnimi Rakela. Haawe, hna co pë hë la aqane hnimi Lea hui Rakela, trejine me angeic.

Easë a öhne fe lo hna qaja hnei Iesu, laka loi e tro la atre drenge a xelene “la mele i angeice kö.” Haawe, kola hape, thaa tro kö a sisitria catre pala ha la aqane hnime angeice la sipu mele i angeic, nge co pë hë la aqane hnimi nyidrëti hnei angeic. Haawe, Iesu a amamane hnyawa la etrune la hnëqa, ene la troa ketre atre drei Iesu. Thaa ketre mekune kö nyine troa xome ahmaloeën.

Ame la atr ka xötrethenge Iesu, ke, angeice a troa tro qëmeke kowe la itre itupath, me itre akötr: “Ame la ate tha ajöne kö la [“sinoë,” MN ] i angeic, me tha xöte thenge ni fë, tha ’teine kö angeice troa sine la angete dei ni.” Qa ngöne lai, tro la ketre nyipi atre drenge a hetrenyi la hni ka ajane troa hane kapa la ehnef hna thue hë hnei Iesu, ene la hmahma; nge maine ijij, ke uti fe hë la troa mec, hna humuthe hnene la itre ithupëjia, celë hi ewekë lai ka troa traqa koi Iesu.

Haawe, nyipi ewekë kowe la ka ala nyim ka xötre thenge Keriso troa waipengöne hnyawa la aliene la troa ketre atre drei nyidrë. Iesu a qaja atrune jë la mekune cili jëne la ketre ceitun. “Ke dei e nyipunie, ate pi xupi ita, nge tha pane lapa kö troa e la thupen, hape u, hetenyi kö angeice la nyine umuth? Wanga ase hë angeice nyi tepen, nge tha ’teine kö troa umuth, ame hna hnyima sai angeice hnei angat’ asë angete öhn, kola hape, hna nyi qane xupe hnene la ate ce, ngo tha ’teine kö troa umuth.”

Tune la aqane qeje pengöne Iesu kowe la itre atr ka ala nyimu ka xötre thenge nyidrë, laka qëmekene tro angatre a itretre drei nyidrë, nyipi ewekë troa pane catre e kuhu hni angatre la ajane troa kuca thenge elanyi la mekune hna axeciën; kola aceitunëne lai memine la atr ka ajane troa xupi ita, angeice a e la thupen, nge xecie koi angeice laka, hetrenyi asë hi angeice la itre nyine troa umuth. Thupene lai, Iesu a hamëne la ketre ceitun:

“Nge dei la joxu e troa ishi me kete joxu, nge tha pane lapa kö troa mekun, hape u, ateine angeice memine la luepi la o thauzan troa ishi me angeice la tene caate la o thauzan e troa traqa koi angeic? Nge maine tha ’teine kö, angeic’ a upe la maca nge nanyi pete kö la ishi, troa sipo loinöj.”

Iesu a hamëne la ini qa ngöne la itre ceitune jëne la itre trenge ewekë celë: “Kete tun, ame la ate thei nyipunie ka tha hna nue kö la nöjei ewekë asëjëihë hnei angeice hna heteny, tha ’teine kö angeice troa sine la angete dei ni.” Celë hi nyine troa kuca hnene la itre atr ka ajane troa xötre thenge nyidrë, nge troa mama hnyawa lai thene la itre ka troa atre Keriso. Nyipi ewekë troa hetrenyi thei angatre la hni ka ajane troa hujëne la nöjei ewekë i angatr, ene la nöjei ewekë hnei angatre hna hetreny, uti hë la mele i angatr, e ajane angatre troa itretre drei nyidrë. Hapeu, ijiji epuni kö troa hane hujëne la itre ewekë celë?

Iesu a sisedrëne ka hape “loi la alase.” Ngöne lo Cainöje i nyidrë hune la wetr, hnei nyidrëti hna qaja göne la angetre drei nyidrë ka hape, angatre “la alase ne la nöj,” ngöne laka, tune la alase a thupëne la itre xeni matre thaa tro kö a pi, haawe atreine hi tro la itre trenge ewekë i angatre a thupëne la mele ne la itre atr ka drei angatr. “Ngo maine patë hë la ehaitene la alase, nemene la nyine ahaiten’ ej. Tha nyipi ewekë kö eje thatraqane la hnadro, nge kete tha nyipi ewekë kö thatraqane la hnajuaego; ngo hna tije hnei ate. Ame la ate hete hnangenyë nyine deng, dengeju angeic.”

Iesu a amamane e celë ka hape, loi e thaa tro pi kö a nanazije hnene lo itre atr ka xötrethenge nyidrëti hë, ngo loi e tro angatre a catre trongëne la gojenyi cili. Ketre, wanga troa gufa la huliwa i angatr, me hnyima sai angatre hnei nöjei atr, nge thaa ijije hë xajawai Akötresie, nge angatre la ka iahmahmanyi xajawai Nyidrë. Tune la alase ka pë hë ehaitren, nge ka pui ngazo, haawe, tro ha triji angatre e kuhu trön, troa apaatrenyi angatr. Luka 14:25-35; Genese 29:30-33; Mataio 5:13.

▪ Nemene la aliene la hna hape, troa “xelene” la itre keme me thine i angatr, memine la troa ketre sipu ‘xele’ angeice kö?

▪ Nemene la lue ceitune hna hamëne hnei Iesu, nge nemene la aliene lue ej?

▪ Nemene la ini hna xome qa ngöne la itre trenge ewekë tixenuë hna hamëne hnei Iesu, göi alase?