Meken 87

Loi e Tro Sa Canga Thele La Nyipi Inamacane Thatraqane La Mele Së Elany

ASE hë Iesu hamëne la ceitune ne la neköne ka mejengön kowe la ka ala nyim, ene la itretre drei nyidrë, me itre telona ka ënö, me itre xaa atr ka ngazo ju kö ka hlemu, me itretre cinyihan, me itre Faresaio. Nyidrëti a ithahnata enehila kowe la itretre drei nyidrë, me qaja koi angatre la ketre ceitun, ene la ketre atr trenamo a drenge, laka, ngazo la aqane ujë ne la hlue i angeic, ene la atre thupëne la itre ewekë i angeic.

Iesu a qaja ka hape, kola hëne la hlue hnene la atre trenamo, me thuemacanyi nyëne ka hape kola troa upi nyën. “Ame hnene la ate thupëne hna qaja e kuhu hni nyëne kö, ka hape, ma tro ni a tune ka? Ke tro ha thapa la qânge hnene la tixeng, nge tha ’teine kö ni eëny, nge hmahma ni e troa sipo. Xecië hë la hnenge hna troa kuca, mate kepe ni jë hnei angate kowe la ite uma i angat, e ase hë helë ni qa ngöne la qâng.”

Nemene la hna mekune troa kuca hnene la atre thupë ewekë? Nyëne a hëne la nöjei trene gufa thei tixe i nyën, me qaja kowe la hnapane ka hape: “Ije ewekë ne la tixenge thei nyipë?”

Angeice a sa ka hape ‘Ca hadede la o efa ne wakacu.’

Nge önine la atre thupë ewekë koi angeic, ka hape, ‘Xomejë la hna cinyihanyi i nyipë, nge canga lapaju, me cinyihanyiju pe, luate nge luepi.’

Nge, nyëne a hnyinge kowe la ketre ka hape: ‘Ije ewekë thei nyipë?’

Öni angeice ka hape, ‘Ca hadede la o omera ne qit.’

Nge öni nyën’a qaja koi angeic, ka hape, ‘Xomejë la hna cinyihanyi i nyipë, nge cinyihanyiju pe, ekate.’

Ka meköti kowe la atre thupë ewekë troa acone la itre gufa, thupene la itre ewekë hna azune kowe la tixe i nyën, pine laka nyëne petre kö la ka thupëne la itre ewekë. Haawe, jëne la aqane ujë i nyën, hetre sinee i nyëne elanyi ka troa xatua nyëne e luuzi pi la huliwa.

Kola hai atraqatre hnene la tixe ne lapa, ngöne la nyidrëti a atre la ewekë hna kuca hnene la atre thupë ewekë, ene pe kola “qaja aloine la ate thupëne ka tha meköti kö, qa ngöne la hnei nyëne hna kuca inamacanën.” Nge Iesu a sisedrëne ka hape: “Inamacanë hë la ite ate ne la fene hnengödrai ngöne la xöte i angate hune la ite ate ne la lai.”

Iesu enehila a hamëne la ini kowe la itretre drei nyidrë qa ngöne la ceitune celë. Nyidrëti a thuecatre koi angatre ka hape: “Nyi sine i nyipunie hnene la tenga mo ka tha meköti kö, mate e traqa la pun, tro angat’ a kepe nyipunie kowe la ite uma i angate ka epine palua kö.”

Thaa Iesu kö a qaja aloine la atre thupë ewekë, pine la ewekë ka thaa meköti kö hna kuca, ngo pine la inamacane i angeice me aqane canga hnëkë angeice kowe la itre drai ka troa xulu. Hna majemine hnene la “ite ate ne la fene hnengödrai” troa huliwane inamacanëne la manie me göhmeku i angatre göi troa nyi sinee, matre e traqa pena ha elanyi la itre jole koi angatr, atreine hi troa kapa la ixatua qaathene la itre sinee cili. Haawe, tro la itre hlue i Akötresie, ene la “ite ate ne la lai” a huliwane inamacanëne la itre ewekë i angatr, ene “la tenga mo ka thaa meköti kö,” göi troa kapa la itre thangane ka loi.

Ngo, öni Iesu ka hape, loi e troa xome hnei angatre la itre ewekë celë matre troa nyi sinee ne la itre ka atreine troa kepe angatre ngöne “la ite uma i angate ka epine palua.” Ame koi itre atrene la itre mamoe ka xalaith, ke, e koho hnengödrai la itre uma cili; ame koi “ite xa mamoe,” ke, kola qaja la Paradraiso e celë fen. Pine laka Iehova Akötresie, me Hupuna i Nyidrë hmekuje hi la lue ka atreine troa kepe së ngöne la itre uma cili, haawe, loi e tro së a thele troa nyi sinee me nyidro, ene la troa huliwane la nöjei pengöne “tenga mo së ka tha meköti kö,” matre troa sajuëne la itre huliwa ne la Baselaia. Eje hi laka, ka troa pë maine paatre elanyi la itre ewekë ne ngönetrei, ngo ame koi mele së ke, ka tro eje a cile huti epine palua.

Iesu a sisedrëne ka hape, ame la itre atr ka mele nyipici ngöne la itre ewekë ka co, ene la itre ewekë ne la ngönetrei, ke, tro hë angatre a hane mele nyipici fe ngöne la itre jole ka tru. Nge nyidrëti a qaja fe ka hape: “Maine tha nyipici kö nyipunie kowe la tenga mo ka tha meköti kö, dei la ate tro ha azune koi nyipunie la nyipi tenga mo [la itre ewekë ne la ua, ene la itre ewekë ne la Baselaia]? Nge maine tha nyipici kö nyipunie kowe la ewekë i kete ate kö [itre ewekë ne la Baselaia hna upe la itre hlue troa huliwan], dei la ate tro ha hamë nyipunie la ite ewekë i nyipunieti kö [edrö, ene la mele ngöne la itre uma ka pë pun]?”

Thatreine kö së troa itre nyipi hlue i Akötresie, me nyi hluene fe la itre trenga mo ka thaa meköti kö, ene la itre ewekë ne la ngönetrei. Iesu a nyipune ngöne la mekune cili ka hape: “Pëkö hlue ateine troa nyi hlue ne la lue joxu; ke tro angeic’ a xelene la kete, me hanyine la kete; nge troa fede kowe la kete, me jakalane la kete. Tha ’teine kö nyipunie troa nyi hlue i Akötesie me mamona.” Luka 15:1, 2; 16:1-13; Ioane 10:16.

▪ Ame ngöne la ceitune i Iesu, Tune kaa la aqane nyi sinee hnene la atre thupë ewekë, matre troa hane xatua angeice pena elany?

▪ Nemene la itre “tenga mo ka tha meköti kö,” nge tune kaa la aqane tro së a huliwane itre eje matre troa hane nyi sinee?

▪ Drei la ka atreine troa kepe së ngöne la “ite uma ka epine palua kö,” nge nemene la itre uma cili?