Itre Hlue i Akötresie, Kökötre Jë
1. Nemene la itre ceitun ka amamane ngöne lo hneijine i Iesu, laka, loi e tro sa kökötr ngöne la aqane tro sa cainöj?
1 Loi e troa itre hlue ka kökötre la itre Keresiano. Celë hi kepine matre hnei Iesu hna inine la itretre drei nyidrë troa cainöj. (Luka 9:1-5; 10:1-11) Celë mina fe kepine matre hnei Akula me Perisila hna thei Apolo me “amamane hnyawa koi angeice la pengöne la kala i Akötesie.” (Ite Huliwa 18:24-26) Ketre tui Paulo mina fe, hnei angeic hna ithuecatre koi Timoteo, ketre trejine ka macaj troa cainöj, troa catre trongëne la itre ini “mate mama pi la tropane la huliwa i [angeic] kowe la nöjei ate asë.” (1 Tim. 4:13-15) Ka hekö ju hë së nyihluene la Joxu me tro fë la maca ka loi, ngo nyipi ewekë tro pala hi së a catre kökötre troa xome hnyawa la huliwa ne cainöje së.
2. Nemene la aqane tro sa thele ixatua thene la itre xan?
2 Troa Thele Ixatua Thene La Itre Xan: Ame la ketre aqane troa kuca matre troa maca troa cainöj, tre, ene la troa hane goeëne la aqane cainöje ne la itre xan. (Ite edomë. 27:17) Celë hi matre, loi e troa goeën me drenge hnyawa la angatr a tro fë la maca. Sipone jë fe kowe la itre trejine ka maca troa cainöj troa hamëne la itre xa mekune nyine ixatua, nge qatixenyëne hnyawa ju la hnei angatr hna qaja. (Ite edomë. 1:5) Hapeu, ka luelue epuni troa iwai hmaca, me nyiqane ini tus, maine xome pena la itre xa aqane cainöj? Tro jë kowe la atre thupëne la gurup ne cainöj maine kowe pena la ketre trejin ka maca matre tro angeic a xatua epun. Nge the thëthëhmine kö laka, tro la Uati Hmitrötre i Iehova a ixatua matre tro epuni a atreine cainöj. Haawe, thithi jë me catre sipone la Uati Hmitrötre cili.—Luka 11:13.
3. Nemene la aqane tro sa ujë ngöne la kola xatua së ngo tha hne së pe hna sipone la ixatua cili?
3 Maine kola xatua epuni hnene la ketre trejin matre tro epuni a kökötr, ngacama tha hnei epuni kö hna sipo angeic troa ixatua, the wesitre pi kö. (Ate cai. 7:9) Kapa ju tui Apolo la ixatua cememine la hni ka ipië, nge olene jë. Aqane ujë ne ka inamacane hi lai!—Ite edomë. 12:15.
4. Nemene la nyipi kepine hna hamëne hnei Iesu ka upi së troa kökötre me maca troa cainöj?
4 Kökötre Jë Matre Troa Atrunyi Akötresie: Hnei Iesu hna xome la itre ceitun matre troa ithuecatre kowe la itretre drei nyidrë troa kökötr, matre tro angatr a itre hlue i nyidrë. Hnei nyidrëti hna aceitunë nyidrë me ketre vine nge itre hna iën me itre wapicin. Hna qaja hnei nyidrëti ka hape, kola nyihnyawane hnene la Tretretro i nyidrë la nöjei wapicin ka hamë wen “mate wa atrune pi.” (Ioane 15:2) Tune la atrekë vin, laka, nyidrëti a ajane tro la itre wapicin a wa atrun, haawe, Iehova mina fe a ajane tro sa cate kökötr matre atreine së eköthe hnyawa la “wene la ite ukeineqe shë.” (Heb. 13:15) Nemene la thangane ka loi e tro sa kökötre me maca troa cainöj? Kola sa hnei Iesu ka hape: “Nyine atrunyi Kaka la tro nyipunie a wa atrun.”—Ioane 15:8.